കിയാലിലെ സിഎജി ഓഡിറ്റിംഗ് ഹൈക്കോടതി സ്റ്റേ ചെയ്തു
Tuesday, December 3, 2019 1:15 PM IST
കൊച്ചി: കണ്ണൂർ വിമാനത്താവള കമ്പനിയായ കിയാലിൽ സിഎജി ഓഡിറ്റിംഗ് വേണമെന്ന കേന്ദ്ര സർക്കാരിന്‍റെ നോട്ടീസിന് ഹൈക്കോടതിയുടെ ഇടക്കാല സ്റ്റേ. കേന്ദ്ര കമ്പനികാര്യ മന്ത്രാലയത്തിന്‍റെ നോട്ടീസ് ചോദ്യം ചെയ്ത് കിയാൽ അധികൃതർ സമർപ്പിച്ച ഹർജിയിലാണ് ഹൈക്കോടതി നടപടി. ഹർജിയിൽ അഭിപ്രായം തേടി കേന്ദ്ര സർക്കാരിന് ഹൈക്കോടതി നോട്ടീസ് അയയ്ക്കും.

കിയാൽ കമ്പനിയിൽ സർക്കാരിന് 35 ശതമാനം മാത്രമേ ഓഹരിയുള്ളൂ എന്നും അതുകൊണ്ട് ഇതൊരു സ്വകാര്യ കമ്പനിയായി മാത്രമേ പരിഗണിക്കാൻ കഴിയൂ എന്നാണ് ഹർജിക്കാരുടെ വാദം. സിഎജി ഓഡിറ്റിംഗ് വേണമെന്ന നോട്ടീസ് സ്റ്റേ ചെയ്യണമെന്ന ഹർജിക്കാരുടെ ആവശ്യവും കോടതി അംഗീകരിക്കുകയായിരുന്നു.

കഴിഞ്ഞ ദിവസമാണ് കിയാലിൽ സിഎജി ഓഡിറ്റിംഗ് നിഷേധിക്കുന്നതിനെതിരേ കേന്ദ്ര സർക്കാർ മുന്നറിയിപ്പ് നൽകി കത്തയച്ചത്. ഓഡിറ്റിംഗ് തടഞ്ഞാൽ കമ്പനി ഡയറക്ടർ ബോർഡ് അംഗങ്ങൾ പ്രോസിക്യൂഷൻ നടപടി നേരിടേണ്ടി വരുമെന്നായിരുന്നു മുന്നറിയിപ്പ്.

സംസ്ഥാന സർക്കാരിനും പൊതുമേഖല സ്ഥാപനങ്ങൾക്കും കൂടി 63 ശതമാനം ഓഹരിയുള്ള കിയാലിനെ സ്വകാര്യ കമ്പനിയായി കണക്കാക്കാൻ കഴിയില്ലെന്നും കേന്ദ്രത്തിന്‍റെ മുന്നറിയിപ്പിൽ വ്യക്തമാക്കിയിരുന്നു. ഈ നോട്ടീസിന് പിന്നാലെയാണ് കിയാൽ ഹൈക്കോടതിയെ സമീപിച്ചത്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.