നഷ്ടപ്പെട്ട പാവ പറന്നെത്തി, 300 കിലോമീറ്റർ താണ്ടി

Thursday, November 30, 2017 2:02 AM IST

നാലു വയസുകാരി സമ്മറിന് ഇപ്പോഴും തന്‍റെ കണ്ണുകളെ വിശ്വസിക്കാനാകുന്നില്ല. തന്‍റെ പ്രിയകൂട്ടുകാരനായിരുന്ന പാവക്കരടിയെ ഇനി ഒന്നു കാണാൻ പോലും കഴിയുമെന്ന് സമ്മർ ഓർത്തില്ല. കാരണം ടെഡിയെ സമ്മറിനു നഷ്ടപ്പെട്ട കാര്യം അവളറിഞ്ഞത് 300 കിലോമീറ്റർ നീണ്ട വിമാനയാത്ര കഴിഞ്ഞപ്പോഴാണ്. കഴിഞ്ഞ തിങ്കളാഴ്ച സ്കോട്‌ലൻഡിലെ എഡിൻബർഗിൽനിന്നു ഓർക്ക്നീയിലേക്കു പോകാനായി അമ്മ ഡോണയോടൊപ്പം വിമാനത്താവളത്തിലെത്തിയതാണ് കുഞ്ഞുസമ്മറും ടെഡിയും. ടെഡിയെ തെരഞ്ഞ് ഓർക്ക്നീ എയർപോർട്ടിൽ അലഞ്ഞുനടന്ന സമ്മറും ഡോണയും വൈകാതെ സത്യം മനസിലാക്കി. ടെഡിയെ എഡിൻബർഗിൽ നഷ്ടപ്പെട്ടു.

സമ്മറിന്‍റെ വിടർന്ന കണ്ണുകളിൽനിന്നു കണ്ണീർ പൊഴിയുന്നതു ഡോണയ്ക്കു സഹിക്കാനാകുമായിരുന്നില്ല. പൊടുന്നനെയാണ് ഡോണയ്ക്ക് ബുദ്ധിയുദിച്ചത്. ടെഡിയെ നഷ്ടപ്പെട്ടതും കുഞ്ഞു സമ്മറിന്‍റെ സങ്കടവും എല്ലാം ചേർത്തു ഫേസ്ബുക്കിൽ ഒരു പോസ്റ്റിട്ടു. ഇതു ലോഗൻ എയർ കാബിൻക്രൂ മെന്പർ കിർസ്റ്റി വാൾട്ടറിന്‍റെ കണ്ണിൽപ്പെട്ടതോടെ കാര്യങ്ങൾ വഴിതിരിഞ്ഞു. 300 കിലോമീറ്റർ യാത്രചെയ്ത് ടെഡി സമ്മറിന്‍റെ അടുത്തെത്തി. കൈയിൽ നിറയെ കാരമൽ വേഫറുകളുമായി. ലോഗൻ ഫ്ളൈറ്റിൽ ടെഡിക്ക് സ്വന്തമായി സീറ്റും കിട്ടിയിരുന്നുവത്രേ.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.