വീഡിയോ ഷൂട്ടിൽ മരം വീണ് ട്വിസ്റ്റ്

Tuesday, July 10, 2018 9:47 AM IST

ഇതു വിവാഹ വീഡിയോകളുടെ കാലം. സംഭവം വെറൈറ്റിയാക്കാൻ ഫോട്ടോഗ്രാഫർമാർ മരമുകളിലും മലമുകളിലുമൊക്കെ കേറുന്ന കാലം. ആവശ്യമെങ്കിൽ നവദന്പതികളും ഏതു സാഹസികതയ്ക്കും തയാർ.

എന്നാൽ, ഇപ്പോൾ സമൂഹമാധ്യമങ്ങളിൽ വൈറലായിരിക്കുന്ന ഒരു വിവാഹ വീഡിയോയുടെ പ്രശസ്തിക്കു കാരണം സാഹസികതയോ വ്യത്യസ്തയോ ഒന്നുമല്ല, മറിച്ച് നവദന്പതികളിൽനിന്നു മരണം തെന്നിമാറുന്ന ഞെട്ടിക്കുന്ന ദൃശ്യമാണ്.

അമേരിക്കൻ സ്വദേശികളായ നവവരൻ ലൂക്കാസും നവവധു ചെയ്യന്നയും ആണ് വിവാഹ ഷൂട്ടിംഗിനിടെയുണ്ടായ അപകടത്തിൽനിന്നു തലനാരിഴയ്ക്കു രക്ഷപ്പെട്ടത്. പള്ളിയിലെ വിവാഹ ചടങ്ങുകൾക്കു ശേഷം ഇരുവരും വീഡിയോഗ്രാഫറുടെ നിർദേശമനുസരിച്ചാണ് അടുത്തുള്ള പക്ഷിസങ്കേതത്തിലെത്തിയത്.

പ്രകൃതിരമണീയമായ പശ്ചാത്തലത്തിൽ മരത്തണലിൽ ഇരുന്നു കിന്നാരം പറ‍യുന്ന നവദന്പതികളുടെ ദൃശ്യം പകർത്തുകയായിരുന്നു ലക്ഷ്യം. കാമറമാൻ ആക്‌ഷൻ പറഞ്ഞു. ലൂക്കാസും ചെയ്യന്നയും അഭിനയം തുടങ്ങി.

പെട്ടെന്നാണ് മുകളിൽനിന്നു വലിയൊരു മരക്കൊന്പ് അടർന്നു താഴേക്കു പതിച്ചത്. മരച്ചില്ലകളിൽ തട്ടിയുലയുന്ന ഇരന്പൽ ശബ്ദം കേട്ടതിനാൽ ഇരുവരും ഞൊടിയിടയിൽ ഒാടിമാറി. ഇല്ലായിരുന്നെങ്കിൽ... എന്തായാലും സംഭവത്തിൽ ആകെ വിരണ്ടുപോയ നവവധു ഇനി ഷൂട്ടൊന്നും വേണ്ടേ, ജീവൻ മതി എന്ന നിലപാടിലാണ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.