അത് യെതിയല്ല, വെറും കരടി; സൈന്യത്തിന്‍റെ അവകാശവാദം തള്ളി നേപ്പാൾ

Thursday, May 2, 2019 2:24 PM IST

ഹിമാലയൻ മലനിരകളിലെ സാങ്കൽപ്പിക ഭീമൻ ഹിമക്കരടി യെതിയുടെ പാദമുദ്രകൾ കണ്ടെത്തിയെന്ന ഇന്ത്യൻ സൈന്യത്തിന്‍റെ അവകാശവാദം തള്ളി നേപ്പാൾ. ഇന്ത്യൻ പർവതാരോഹകർ കണ്ടെത്തിയത് യെതിയുടെ കാൽപ്പാടുകളല്ല, ഹിമക്കരടിയുടെ കാൽപ്പാടുകളാണെന്ന് നേപ്പാൾ കരസേന വക്താവ് ബ്രിഗേഡിയർ ജനറൽ ബിഗ്യാൻ ദേവ് പാണ്ഡെ പറഞ്ഞു.

ഇന്ത്യൻ സൈന്യത്തിന്‍റെ അവകാശവാദം വിശദമായി പരിശോധിച്ചെന്നും കണ്ടെത്തിയത് കരടിയുടെ കാൽപ്പാടുകളാണെന്ന് നാട്ടുകാർ സ്ഥിരീകരിച്ചെന്നും പ്രദേശങ്ങളിൽ കരടിയുടെ സാന്നിധ്യമുണ്ടെന്നും അദ്ദേഹം അറിയിച്ചു.

തിങ്കളാഴ്ച യെതിയുടേതെന്നു ചൂണ്ടിക്കാട്ടി മഞ്ഞിലെ കാൽപ്പാടുകളുടെ ദൃശ്യങ്ങൾ സൈന്യം ഒൗദ്യോഗിക അക്കൗണ്ടിൽനിന്നു ട്വീറ്റ് ചെയ്തിരുന്നു. എന്നാൽ ഇതിന്‍റെ തെളിവുകളൊന്നും പുറത്തുവിടാൻ സൈന്യത്തിനു കഴിഞ്ഞില്ല.

നേപ്പാളിലെ മക്കാലു ബേസ് ക്യാന്പിനു സമീപത്തുനിന്ന് മൗണ്ടനീയറിംഗ് എക്പെഡീഷൻ സംഘം കണ്ടെത്തിയത് എന്ന പേരിലാണ് കാൽപ്പാടുകളുടെ ചിത്രങ്ങൾ പുറത്തുവിട്ടത്. ഇതിന് 32 ഇഞ്ച് നീളവും 15 ഇഞ്ച് വീതിയുമാണ് കാൽപ്പാടിന്‍റെ അളവ്. ദുരൂഹമായ ഈ കാൽപ്പാടുകൾ യെതിയുടേതാണെന്ന് സൈന്യം അവകാശപ്പെടുന്നു.

മക്കാലു ബാരുണ്‍ ദേശീയോദ്യാനത്തിനു സമീപവും ഒരിക്കൽ ഇതിനെ കണ്ടതായി സൈന്യത്തിന്‍റെ ട്വീറ്റിൽ പറയുന്നു. സൈന്യം പുറത്തുവിട്ട ചിത്രങ്ങളിൽ ഒരു കാൽപ്പാടിന്‍റെ ദൃശ്യം മാത്രമാണുള്ളത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.