രണ്ടിലധികം കുട്ടികളുണ്ടായാൽ പഞ്ചായത്ത് മെമ്പറാകാൻ പറ്റില്ല: സോഷ്യൽ മീഡിയയിൽ പ്രചരിക്കുന്ന വാർത്ത സത്യമോ..‍?

Friday, October 26, 2018 11:49 AM IST

രണ്ടിലധികം കുട്ടികളുണ്ടായാൽ പഞ്ചായത്ത് അംഗമാകാൻ കഴിയില്ലെന്ന് സുപ്രീം കോടതി വിധിച്ചു എന്ന തരത്തിൽ വാർത്തകൾ സോഷ്യൽ‌ മീഡിയയിൽ പ്രചരിക്കുകയാണ്. മൂന്നാമത്തെ കുട്ടി പിറന്നാൽ ഉടൻ പഞ്ചായത്തംഗം അയോഗ്യനാകുമെന്നും ഒരാളെ ദത്തുകൊടുത്താലും അയോഗ്യത ബാധകമാണെന്നും സുപ്രീം കോടതി വിധിച്ചതായാണ് വാർത്തകൾ പ്രചരിക്കുന്നത്. സുപ്രീം കോടതിയുടെ വിധി കേരളത്തിലും ബാധകമാകുമെന്ന തരത്തിൽ ഫേസ്ബുക്കിലും വാട്ട്സ്ആപ്പിലും പ്രചാരണങ്ങളുമുണ്ട്. എന്താണ് ഈ വാർത്തയുടെ സത്യാവസ്ഥ..?

മൂന്നാമതു കുട്ടിയുണ്ടായതിന്‍റെ പേരിൽ പഞ്ചായത്തംഗത്തെ അയോഗ്യനാക്കിയ ഒഡീഷ ഹൈക്കോടതിയുടെ ഉത്തരവ് സുപ്രീം കോടതി ശരിവയ്ക്കുകയാണുണ്ടായത്. ഒഡീഷയിലെ ആദിവാസി സർപഞ്ച് മിനാസിംഗ് മാഞ്ജിയെ അയോഗ്യനാക്കിയ ഒഡീഷ ഹൈക്കോടതി ഉത്തരവിനെതിരേ നൽകിയ ഹർജി തള്ളിക്കൊണ്ടാണ് ചീഫ് ജസ്റ്റീസ് രഞ്ജൻ ഗൊഗോയി അധ്യക്ഷനായ മൂന്നംഗ ബെഞ്ചിന്‍റെ നടപടി.

പഞ്ചായത്ത് അംഗമായോ സർപഞ്ചായോ ചുമതലയിലിരിക്കേ മൂന്നാമത് കുട്ടിയുണ്ടായാൽ അയോഗ്യരാകുമെന്ന ഒഡീഷ പഞ്ചായത്തിരാജ് നിയമത്തിലെ വ്യവസ്ഥ അംഗീകരിച്ചാണ് ഹൈക്കോടതി ഉത്തരവിട്ടത്. ഇതു സുപ്രീം കോടതിയും ശരിവയ്ക്കുകയായിരുന്നു. കൂടാതെ, ഹിന്ദു അഡോപ്ഷൻ ആൻഡ് മെയിന്‍റനൻസ് ആക്‌ട് പ്രകാരം ഹൈക്കോടതി ഉത്തരവ് സാധുതയുള്ളതാണെന്നും ബെഞ്ച് ചൂണ്ടിക്കാട്ടി.

രണ്ട് കുട്ടികളിൽ കൂടുതലുള്ളവർ പഞ്ചായത്ത് അംഗമാകുകയോ ഏതെങ്കിലും പദവി വഹിക്കുകയോ ചെയ്യരുതെന്ന് ഒഡീഷ പഞ്ചായത്തിരാജ് നിയമത്തിൽ വ്യവസ്ഥ ചെയ്യുന്നുണ്ടെങ്കിലും കേരളത്തിൽ ഈ നിയമ വ്യവസ്ഥ ബാധകമാക്കിയിട്ടില്ല.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.