കൗതുകം സമ്മാനിച്ച് ഫ്രാൻസ്വ ഇരട്ടക്കുട്ടികൾ

Tuesday, May 15, 2018 9:32 AM IST

ഒരു അപൂർവ സംഭവത്തിനാണ് കഴിഞ്ഞ ദിവസം ചൈനയിലെ ഗ്യാൻഷു നഗരത്തിലുള്ള വന്യജീവി മൃഗശാല സാക്ഷിയായത്. ഫ്രാൻസ്വ ലാംഗൂർ എന്ന കുരങ്ങുവർഗത്തിൽ ഇരട്ടക്കുട്ടികൾ പിറന്നു. പീജിയൻസ് ട്വിൻസ് എന്നു വിളിക്കപ്പെടുന്ന ഒരാണും ഒരു പെണ്ണും എന്ന രീതിയിലാണ് ഇരട്ടകളുടെ പിറവി. ചരിത്രത്തിലാദ്യമായാണ് ഫ്രാൻസ്വ കുരങ്ങുവർഗത്തിൽ ഇങ്ങനെ രണ്ടു ലിംഗത്തിൽപ്പെട്ട ഇരട്ടകൾ ജനിക്കുന്നത്.

വംശനാശഭീഷണി നേരിടുന്ന ഈ കുരങ്ങുവർഗത്തിൽ കുഞ്ഞുങ്ങൾ ജനിക്കുന്നതുതന്നെ അപൂർവമാണെന്നിരിക്കെയാണ് ഇരട്ടകളുടെ ജനനം. സ്വർണനിറത്തിലുള്ള രോമങ്ങളാൽ പൊതിഞ്ഞിരിക്കുന്ന കുഞ്ഞുങ്ങളെ മൃഗശാലയിൽ എത്തുന്നവർക്ക് കാണാം. മൂന്നു മാസം പ്രായമാകുന്നതോടെ മാതാപിതാക്കളെപ്പോലെതന്നെ ഇവരുടെ രോമത്തിനും കറുപ്പുനിറമാകും.

മുഖത്തിനിരുവശവും ചെവി മുതൽ താടിവരെ കാണപ്പെടുന്ന വെളുത്ത രോമങ്ങളുടെ വരയാണ് ഇക്കൂട്ടരുടെ പ്രത്യേകത.ചൈനീസ് സർക്കാരിന്‍റെ ഫസ്റ്റ് ക്ലാസ് സംരക്ഷണം ലഭിക്കുന്ന മൃഗങ്ങളാണ് ഫ്രാൻസ്വ ലാംഗൂറുകൾ. ഇന്‍റർനാഷണൽ യൂണിയൻ ഫോർ കണ്‍സർവേഷൻ ഓഫ് നേച്ചർ ആൻഡ് നാച്ചുറൽ റിസോഴ്സസ് വംശനാശ ഭീഷണി നേരിടുന്ന ജന്തുക്കളുടെ പട്ടികയിൽ ഇവയെ ഉൾപ്പെടുത്തിയിട്ടുണ്ട്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.