പ്രളയകാലത്തെ കൈത്താങ്ങ്; മുതുക് ചവിട്ടുപടിയാക്കിയ ജെയ്സലിന് മഹീന്ദ്രയുടെ സമ്മാനം

Sunday, September 9, 2018 9:50 AM IST

പ്രളയക്കെടുതിയിൽപ്പെട്ടവർക്ക് രക്ഷപ്പെടാൻ സ്വന്തം ശരീരം ചവിട്ടുപടിയാക്കിയ താനൂർ സ്വദേശി ജെയ്സലിന് മഹീന്ദ്ര കമ്പനിയുടെ സമ്മാനം. കമ്പനിയുടെ പുതിയ മള്‌ട്ടി പർപ്പസ് വാഹനമായ "മറാസോ’ ആണ് ജെയ്സലിനു കൈമാറിയത്.

ഇന്നലെ കോഴിക്കോട്ടെ ഷോറൂമിൽ നടന്ന ചടങ്ങിൽ മന്ത്രി ടി.പി. രാമകൃഷ്ണൻ വാഹനത്തിന്‍റെ താക്കോൽ കൈമാറി. മഹീന്ദ്ര ആൻഡ് മഹീന്ദ്രയും വിതരണക്കാരായ ഇറാം മോട്ടോഴ്സുമാണ് കാർ സമ്മാനമായി നല്കിയത്. ഇറാം ഗ്രൂപ്പ് ചെയർമാനും മാനേജിംഗ് ഡയറക്ടറുമായ സിദീഖ് അഹമ്മദ്, മേയർ തോട്ടത്തിൽ രവീന്ദ്രൻ, കളക്ടർ യു.വി. ജോസ് തുടങ്ങിയവർ പങ്കെടുത്തു.

സമ്മാനം ലഭിച്ചതിൽ വലിയ സന്തോഷമുണ്ടെന്ന് ജെയ്സൽ പറഞ്ഞു. മലപ്പുറം വേങ്ങര മുതലമാട് പെരുമ്പുഴയ്ക്കടുത്ത് രക്ഷാപ്രവർത്തനം നടത്തുന്നതിനിടെയാണ് ട്രോമാകെയർ വോളണ്ടിയറും മത്സ്യത്തൊഴിലാളിയുമായ ജെയ്സൽ മുതുക് ചവിട്ടുപടിയാക്കിയത്.

തേർക്കയം പാലത്തിനു സമീപത്തുനിന്നുള്ള പ്രായമായ സ്ത്രീകൾ ദേശീയ ദുരന്തനിവാരണ സേനയുടെ ഡിങ്കി ബോട്ടിൽ കയറാൻ പ്രയാസപ്പെടുന്നതു കണ്ട ജെയ്സൽ ഡിങ്കി ബോട്ടിനടുത്തു കുനിഞ്ഞിരുന്ന് തന്‍റെ പുറത്ത് ചവിട്ടി കയറാൻ ആവശ്യപ്പെടുകയായിരുന്നു. ജെയ്സലിന്‍റെ ചിത്രം ദീപിക പ്രസിദ്ധീകരിക്കുകയും ചെയ്തിരുന്നു.

രക്ഷാപ്രവർത്തനത്തിൽ പങ്കുചേർന്ന പ്രവാസിയായ നയിം പകർത്തിയ രക്ഷാപ്രവർത്തന വീഡിയോ ദൃശ്യങ്ങൾ സോഷ്യൽ മീഡിയയിൽ അതിവേഗം വൈറലായി. അമ്പതിലധികം കുടുംബങ്ങളെയാണ് ജെയ്സലും സംഘവും രക്ഷപ്പെടുത്തിയത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.