നന്ദിനിയുടെ ഭാഗ്യം

Home |

Editorial |

Leader Page Article |

Local News |

Star Chat

നന്ദിനിയുടെ ഭാഗ്യം

ലേലം എന്ന സിനിമ മലയാളത്തിലെ എക്കാലത്തേയും ബ്ലോക്ക്ബസ്റ്റർ സിനിമകളിലൊന്നാണ്. സുരേഷ്ഗോപിയുടെ നായകവേഷം തിയറ്ററുകളിൽ ഏറെ കൈയടി നേടിയപ്പോൾ നായികയായി വന്ന നന്ദിനിക്കും ചിത്രം ഏറെ ഗുണം ചെയ്തു. ഇപ്പോൾ ലേലം രണ്ടാംഭാഗം ഒരുങ്ങുന്പോഴും സുരേഷ്ഗോപിയുടെ ജോഡിയായി ഗൗരി പാർവതി എന്ന കഥാപാത്രത്തെ അവതരിപ്പിക്കാനുള്ള ഭാഗ്യം നന്ദിനിയെതേടിയെത്തിയിരിക്കുകയാണ്. കുറേനാളായി അഭിനയരംഗത്തുനിന്നു വിട്ടുനിന്ന് ഒരു തിരിച്ചുവരവിന്‍റെ പാതയിലാണ് നന്ദിനിയിപ്പോൾ. നെപ്പോളിയന്‍റെ നായികയായി ഐന എന്ന ചിത്രം പൂർത്തിയാക്കിയ നന്ദിനിയെ സംബന്ധിച്ച് രണ്ടാംവരവിൽ കിട്ടുന്ന മികച്ച അവസരമായിരിക്കും ലേലം-2. നന്ദിനിയുടെ വിശേഷങ്ങളിലൂടെ...

സുരേഷ്ഗോപിയുടെ നായികായയി ലേലം-2 വിൽ വീണ്ടുമെത്തുന്നതിനെക്കുറിച്ച്?

ഒരുപാട് സന്തോഷമുണ്ട് മനസിൽ. സാധാരണ ഒരു സിനിമയുടെ രണ്ടാംഭാഗം ഒരുക്കുന്പോൾ നായകൻ മാത്രമേ പഴയ ആൾ വരൂ. ഇതിപ്പോൾ ഇത്രയും കാലത്തിനുശേഷം രണ്ടാം ഭാഗം വരുന്പോൾ എന്നെ തന്നെ അവർ വിളിച്ചത് വലിയ ഭാഗ്യം തന്നെ. സുരേഷ്ഗോപിയുടെ കൂടെ വീണ്ടും അഭിനയിക്കാൻ പറ്റുന്നതും വലിയ കാര്യം തന്നെ. സുന്ദരപൂരുഷനിലാണ് ഞങ്ങൾ അവസാനം ഒന്നിച്ചത്. ലേലത്തിൽ അഭിനയിക്കുന്ന സമയത്ത് എനിക്കു മലയാളം തീരെ അറിയില്ലായിരുന്നു. പലപ്പോഴും റീടേക്ക് വരുന്പോൾ സുരേഷ്ഗോപിയുടെ സപ്പോർട്ടിലാണ് പിടിച്ചു നിന്നത്. വാക്കുകളുടെ അർത്ഥവും ഉച്ഛാരണവുമൊക്കെ അദ്ദേഹം പറഞ്ഞു തരുമായിരുന്നു. അന്ന് ലേലത്തിൽ എനിക്ക് ആ കഥാപാത്രം തന്നത് രണ്‍ജിപണിക്കരാണെങ്കിൽ ഇപ്പോൾ അദ്ദേഹത്തിന്‍റെ മകൻ നിതിനാണ് ലേലം 2 ഒരുക്കുന്നതെന്നതും എടുത്തുപറയേണ്ടതാണ്.

ഒരുകാലത്ത് മലയാളത്തിൽ വളരെ പോപ്പുലറായിരുന്നല്ലോ. തിരിച്ചുവരവിലും ഈ സ്നേഹം പ്രതീക്ഷിക്കുന്നുണ്ടോ?

തീർച്ചയായും. ഇപ്പോൾ തന്നെ ലൊക്കേഷനിൽ എന്നോടു സംസാരിക്കാനും ഫോട്ടോയെടുക്കാനും എത്ര പേരാണ് വരുന്നത്. രണ്ടാം വരവിൽ ഞാൻ അഭിനയിച്ച ഐനയുടേയും മന്ദാരത്തിന്‍റെയും ലൊക്കേഷനിൽ ആ സ്നേഹം ഞാൻ തിരിച്ചറിഞ്ഞു. ആരും എന്നെ മറന്നിട്ടില്ല. സ്വന്തം വീട്ടിലെ അംഗത്തെപ്പോലെയാണ് മലയാളികൾ എന്നോടു പെരുമാറുന്നത്. എനിക്കവരോടു വളരെ നന്ദിയും കടപ്പാടുമുണ്ട്.

സിനിമയിൽ തിരക്കുണ്ടായിരുന്ന സമയത്തു തന്നെ പെട്ടെന്നൊരു പിന്മാറ്റമായിരുന്നല്ലോ?

ആരോഗ്യപരമായ കാരണങ്ങളാലാണ് സിനിമയിൽ നിന്നു മാറി നിന്നത്. ഒരു ബ്രേക്ക് ആവശ്യമായിരുന്നു. ഈറ്റിംഗ് ഡിസ്ഓർഡർ എന്ന രോഗമായിരുന്നു എനിക്ക്. വല്ലാതെ തടിച്ചു. സിനിമയുമായി എനിക്ക് യാതൊരു ബന്ധവുമില്ലായിരുന്നു. ആരുമായും കോണ്‍ടാക്ട് ഇല്ലായിരുന്നു. യോഗയും വായനയുമൊക്കെയായി ആ കാലം കടന്നുപോയി.

ഇപ്പോൾ വളരെ സ്ലിം ആണല്ലോ?

എക്സർസൈസ് ചെയ്തും ഭക്ഷണം നിയന്ത്രിച്ചും ഈറ്റിംഗ് ഡിസോർഡർ ശരിയായി. അപ്പോൾ സ്ലിം ആകുകയും ചെയ്തു.

തിരിച്ചുവരാൻ തീരുമാനിച്ചപ്പോൾ ഏതു ഭാഷയിൽ നിന്നാണ് ആദ്യം ഓഫർ വന്നത്?

തമിഴിൽ നിന്ന്. 2014ൽ പൂജൈ എന്ന ചിത്രത്തിലൂടെ. തമിഴിലും ഞാൻ മലയാളത്തിലേതുപോലെ പോപ്പുലറായിരുന്നു. വിജയിനും സൂര്യക്കുമൊപ്പം നായികയായിട്ടുണ്ട്. 35-ൽ കൂടുതൽ തമിഴ് സിനിമകളിൽ അഭിനയിച്ചിട്ടുണ്ട്.

അനുരാഗ കരിക്കിൻ വെള്ളത്തിലെ ഗസ്റ്റ്റോൾ സ്വീകരിക്കാൻ കാരണം?

സംവിധായകൻ എന്നോട് കഥ പറഞ്ഞപ്പോഴേ ഞാൻ ചെയ്യാം എന്നു പറഞ്ഞു. രണ്ടു സീനിലെ ഞാൻ വരുന്നുള്ളൂവെങ്കിലും കഥയിൽ ആ സന്ദർഭത്തിന് വളരെ പ്രാധാന്യമുണ്ട്. അതുകൊണ്ടാണ് അത് സ്വീകരിച്ചത്.

പുതിയ സിനിമകൾ ഏതൊക്കെയാണ്?

തെലുങ്കിൽ നാഗാർജുനയുടെ ഒരു ചിത്രം ചെയ്യുന്നു. തമിഴിൽ അടുത്തിടെ കളക്ടറായി ഒരു സിനിമയിൽ ചെയ്തു. മലയാളത്തിൽ ആസിഫ് അലിയോടൊപ്പം മന്ദാരം, നെപ്പോളിയനൊപ്പം ഐന എന്നീ സിനിമകൾ.

മലയാളത്തിൽ ചെയ്തിട്ടുള്ള കഥാപാത്രങ്ങളിൽ ഇപ്പോഴും ഓർത്തു വയ്ക്കുന്നത് ഏതൊക്കെയാണ്?

അയാൾ കഥയെഴുതുകയാണ്, ലേലം, കരുമാടിക്കുട്ടൻ, സുന്ദരപുരുഷൻ... കുറേയുണ്ട്.

വീട്ടിലെ വിശേഷങ്ങൾ?

ബാംഗ്ലൂരാണ് എന്‍റെ നാട്. വീട്ടിൽ അച്ഛനും അമ്മയും സഹോദരനും ഭാര്യയും അവരുടെ കുട്ടിയുമുണ്ട്.

വിവാഹം വേണ്ടെന്നു വച്ചോ?

ഇതുവരേയും അതിനേക്കുറിച്ച് ആലോചിച്ചിട്ടില്ലായിരുന്നു. ഇപ്പോൾ വിവാഹം വേണമെന്ന ചിന്ത വന്നു തുടങ്ങിയിട്ടുണ്ട്. ഇനി നോക്കാം.

അന്ന് നായികയായി അഭിനയിച്ചയാൾ ഇപ്പോൾ കാരക്ടർ വേഷങ്ങൾ ചെയ്യുന്പോൾ എന്തു തോന്നുന്നു?

അന്ന് ഹിറോയിൻ എന്ന ഇമേജുണ്ടായിരുന്നു. പക്ഷേ ഇപ്പോൾ വ്യത്യസ്ത കഥാപാത്രങ്ങളെ അവതരിപ്പിക്കാൻ സാധിക്കുന്നുണ്ട്. ഏതു കാരക്ടറും ചെയ്യാനുള്ള മാനസികാവസ്ഥയുണ്ട് ഇപ്പോൾ.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.