ആകാശം അതിരിടുന്ന ആവേശമുള്ള യുവതലമുറയ്ക്ക് ചിറകുകൾ നൽകി യംഗ് ഇന്ത്യാ ഫെലോഷിപ്. വൈവിധ്യമാർന്ന പാഠ്യ പദ്ധതിയിലൂടെ പ്രഗത്ഭരായ അധ്യാപകരുടെ മേൽനോട്ടത്തിൽ ഉപരി പഠനത്തിനുള്ള അവസരമാണ് അശോകാ യൂണിവേഴ്സിറ്റി ഒരുക്കുന്ന യംഗ് ഇന്ത്യാ ഫെലോഷിപ്. ന്യൂഡൽഹി ആസ്ഥാനമായി ലാഭേഛയില്ലാതെ പ്രവർത്തിക്കുന്ന സ്വകാര്യ സർവകലാശാലയായ അശോകാ യൂണിവേഴ്സിറ്റിയുടെ ഫെലോഷിപ് പ്രോഗ്രാമിലേക്കാണ് ഇപ്പോൾ അപേക്ഷ ക്ഷണിച്ചിരിക്കുന്നത്. ഒരു വർഷത്തെ പോസ്റ്റ് ഗ്രാജ്വേറ്റ് ഡിപ്ലോമാ കോഴ്സാണ് ഇത്.
യൂണിവേഴ്സിറ്റി ഓഫ് പെൻസിൽവാനിയ സ്കൂൾ ഓഫ് എൻജിനിയറിംഗ് ആൻഡ് അപ്ലൈഡ് സയൻസ്, കാൾട്ടണ് കോളജ്, യൂണിവേഴ്സിറ്റി ഓഫ് കാലിഫോർണിയ, യൂണിവേഴ്സിറ്റി ഓഫ് മിഷിഗണ്, കിംഗ്സ് കോളജ് ലണ്ടൻ, ട്രിനിറ്റി കോളജ് ഡബ്ലിൻ, സയൻസസ് പോ പാരിസ്, യേൽ യൂണിവേഴ്സിറ്റി, വെല്ലസ്ലി കോളജ് എന്നിവയുമായി സഹകരിച്ചാണ് ഫെലോഷിപ് നൽകുന്നത്. ഈ സ്ഥാപനങ്ങളുമായി ഉണ്ടാക്കിയിരിക്കുന്ന കരാർ അനുസരിച്ച് ഈ സ്ഥാപനങ്ങൾ സന്ദർശിക്കാനും അവസരമുണ്ടായിരിക്കും.
വൈവിധ്യമാർന്ന കോഴ്സുകളാണ് ഫെലോഷിപ്പിൽ ഉൾപ്പെടുത്തിയിരിക്കുന്നത്. ലിറ്ററേച്ചർ, ജെൻഡർ സ്റ്റഡീസ്, ഹിസ്റ്ററി, ആർട് അപ്രീസിയേഷൻ, സ്റ്റാറ്റിസ്റ്റിക്സ്, മാത്തമാറ്റിക്കൽ തിങ്കിംഗ്, സൈക്കോളജി, മാനേജ്മെന്റ് തുടങ്ങിയ വിഷയങ്ങളിലാണ് ഫെലോഷിപ്. ലോകോത്തര നിലവാരമുള്ള അധ്യാപകരാണ് ഫാക്കൽറ്റിയായി എത്തുന്നത്. കൂടാതെ രാജ്യത്തെ മുന്തിയ സ്ഥാപനങ്ങളിൽ പ്രൊജക്ട് ചെയ്യാനും അവസരം ലഭിക്കും.
ബിരുദാനന്തര ബിരുദമോ ബിരുദമോ നേടിയവർക്കും അവസാന വർഷ വിദ്യാർഥികൾക്കും അപേക്ഷിക്കാം. പ്രായം 2018 മേയ് 31ന് 28 വയസ് കവിയരുത്. അപേക്ഷാ ഫീസ് ഇല്ല. ഓരോ അപേക്ഷയും വിലയിരുത്തിയ ശേഷം ടെലിഫോണിക് ഇന്റർവ്യു, തത്സമയ ഉപന്യാസ രചന, ഇന്റർവ്യു എന്നിവയുടെ അടിസ്ഥാനത്തിലാണ് തെരഞ്ഞെടുപ്പ്.
നിശ്ചിത തീയതിക്കകം മൂന്നു ഘട്ടമായാണ് അഡ്മിഷൻ. ആദ്യ റൗണ്ടിലേക്ക് നവംബർ 15 വരെ അപേക്ഷിക്കാം. ടെലിഫോണിക് ഇന്റർവ്യു ജനുവരി 31 നകം നടത്തും. ഒക്ടോബർ ഒന്നിനും ജനുവരി 20 നും ഇടയ്ക്ക് ഇന്റർവ്യുവും നടത്തും. ഫെബ്രുവരി ഒന്നിന് അവസാന സെലക്ഷൻ രണ്ടാം റൗണ്ടിലേക്കുള്ള അപേക്ഷ നവംബർ 16നു സ്വീകരിച്ചു തുടങ്ങും. അവസാന തീയതി ജനുവരി 15. ടെലിഫോണിക് ഇന്റർവ്യു നവംബർ 26നും മാർച്ച് 29 നകവും പൂർത്തിയാക്കും. അവസാന സെലക്ഷൻ ഏപ്രിൽ ഒന്നിന് മൂന്നാം റൗണ്ടിലേക്കുള്ള അപേക്ഷ ജനുവരി 16നു സ്വീകരിച്ചു തുടങ്ങും. അവസാന തീയതി മാർച്ച് 30. ജൂണ് ഒന്നിനു തെരഞ്ഞെടുപ്പു പൂർത്തിയാക്കും.
6.60 ലക്ഷം രൂപ ട്യൂഷൻ ഫീസ് ഉൾപ്പടെ 8.35 ലക്ഷത്തോളം രൂപയാണ് ചെലവ്. ഇത് സ്പോണ്സർഷിപ്പിലൂടെ ലഭിക്കും. കൂടുതൽ വിവരങ്ങൾക്ക്: https://www.ashoka.edu.in. ഫോണ്: +91 11 30506130. വിലാസം: അശോകാ യൂണിവേഴ്സിറ്റി കാന്പസ്, പ്ലോട് 2, രാജീവ് ഗാന്ധി എഡ്യൂക്കേഷൻ സിറ്റി, കുണ്ട്ലി, ഹരിയാന 131029.