അടിസ്ഥാന സാക്ഷരതയിൽ തുടങ്ങി തുടർ വിദ്യാഭ്യാസത്തിലൂടെ കടന്ന് ആജീവനാന്ത വിദ്യാഭ്യാസം എന്ന ലക്ഷ്യപ്രാപ്തിക്കായി സാധാരണക്കാരെ സജ്ജരാക്കുക, കഴിഞ്ഞ നാലു ദശാബ്ദങ്ങളായി സ്റ്റേറ്റ് റിസോഴ്‌സ് സെന്‍റർ നിർവഹിക്കുന്നത് ആ ദൗത്യമാണ്.
കാലാനുസൃതമായ മാറ്റങ്ങൾ പ്രവർത്തനങ്ങളിൽ വരുത്തിയ കേരള എസ്ആർസിയുടെ നൂതനാശയ സാക്ഷാത്ക്കാരമാണ് എസ്ആർസി കമ്യൂണിറ്റി കോളജ്. വർഷത്തിൽ രണ്ടു സെഷനുകളായാണ് എസ്ആർസി കമ്യൂണിറ്റി കോളജ് കോഴ്സുകളിൽ പ്രവേശനം. അവധി ദിവസങ്ങളിൽ മാത്രമുള്ള സന്പർക്ക ക്ലാസുകൾ, പ്രാക്ടിക്കൽ സെഷനുകൾ, ഇന്‍റേണ്‍ഷിപ് എന്നിവ എസ്ആർസി കമ്യൂണിറ്റി കോളജുകളുടെ സവിശേഷതകളാണ്. സംസ്ഥാന/ജില്ലാ/പ്രാദേശിക തലങ്ങളിൽ നേരിട്ടും അഫിലിയേറ്റ് ചെയ്ത പഠനകേന്ദ്രങ്ങൾ വഴിയും എസ്ആർസി കമ്യൂണിറ്റി കോളജ് ക്ലാസുകൾ നടത്തുന്നു.
ആറു മാസം ദൈർഘ്യമുള്ള സർട്ടിഫിക്കറ്റ് കോഴ്സ്, ഒരു വർഷം ദൈർഘ്യമുള്ള ഡിപ്ലോമ കോഴ്സ് എന്നീ രീതിയിലുള്ള കോഴ്സുകളാണ് പ്രധാനമായും ഇപ്പോൾ നടത്തുന്നത്. മൂന്നു മാസം ദൈർഘ്യമുള്ള ഷോർട്ട് ടേം കോഴ്സുകളും ഉണ്ട്. കേരളത്തിന്‍റെ സന്പൂർണ സാക്ഷരതാ യജ്ഞത്തിന്‍റെ അക്കഡേമിക സഹായി ആയിരുന്ന സ്റ്റേറ്റ് റിസോഴ്‌സ് സെന്‍ററിന്‍റെ പ്രവർത്തനങ്ങൾ പൊതു വിദ്യാഭ്യാസ സെക്രട്ടറി ചെയർമാനായുള്ള പതിനാലംഗ ഭരണസമിതിയാണ് നിയന്ത്രിക്കുന്നത്. പ്രായപരിധി ഇല്ലാതെ മുതിർന്ന ആളുകളെ (18+) വിദ്യാഭ്യാസ രംഗത്തേക്കു കൊണ്ടുവരാനും അവരുടെ താല്പര്യമനുസരിച്ചുള്ള കോഴ്സുകളിൽ അവരെ പങ്കാളികളാക്കാനും കഴിയുന്ന കമ്യൂണിറ്റി കോളജുകൾ ഓപ്പണ്‍ ഡിസ്റ്റൻസ് രീതിയിലാണ് പഠനം സാധ്യമാക്കുന്നത്.
പ്രധാന കോഴ്സുകൾ
മാനേജ്മെന്‍റ് ഓഫ് ലേണിംഗ് ഡിസബിലിറ്റീസ്: തീർത്തും തിരിച്ചറിയപ്പെടാതെ പോകുന്ന ഒരു മേഖലയാണ് പഠനവൈകല്യത്തിന്‍റേത്. ഇതിനൊരു പരിഹാരം എന്ന രീതിയിൽ രൂപകല്പന ചെയ്ത കോഴ്സാണ് മാനേജ്മെന്‍റ് ഓഫ് ലേണിംഗ് ഡിസബിലിറ്റീസ്. ആറു മാസത്തെ സർട്ടിഫിക്കറ്റ്, ഒരു വർഷത്തെ ഡിപ്ലോമ കോഴ്സുകൾ നടത്തുന്നു. പഠനവൈകല്യം കാരണങ്ങൾ, തിരിച്ചറിയൽ, പരിഹാരമാർഗങ്ങൾ, വ്യക്ത്യാധിഷ്ഠിത പഠനബോധന തന്ത്രങ്ങൾ തുടങ്ങിയവയാണ് പ്രാധാന ഉള്ളടക്കം. പ്രായോഗിക പരിശീലനത്തിന് കൂടുതൽ പ്രാധാന്യം നൽകുന്ന കോഴ്സിന്റെ സർട്ടിഫിക്കറ്റ് കോഴ്സിന് 8000 രൂപയും ഡിപ്ലോമയ്ക്ക് 15000 രൂപയുമാണ് ഫീസ്. പ്ലസ്ടൂ അല്ലെങ്കിൽ പത്താം ക്ലാസും ഏതെങ്കിലും ടീച്ചർ ട്രെയിനിംഗ് പരിശീലനവും പാസായിട്ടുള്ളവർക്ക് കോഴ്സിന് ചേരാം. ജില്ലാ തലങ്ങളിൽ പഠന കേന്ദ്രങ്ങളുണ്ട്.
അക്യുപ്രഷർ ആൻഡ് ഹോളിസ്റ്റിക് ഹെൽത്ത് കെയർ: ഔഷധരഹിത സമഗ്ര ചികിത്സ എന്ന രീതിയിൽ വളരെയധികം പ്രാധാന്യം നേടിയിട്ടുള്ള അക്യുപ്രഷർ സർട്ടിഫിക്കറ്റ് ഡിപ്ലോമ കോഴ്സുകൾ എസ്ആർസി കമ്യൂണിറ്റി കോളജ് വഴി നടത്തുന്നു. സർട്ടിഫിക്കറ്റ് കോഴ്സിന് 8000 രൂപയും ഡിപ്ലോമ കോഴ്സിന് 17000 രൂപയുമാണ് ഫീസ്.
യോഗ: മറ്റു സ്ഥാപനങ്ങളുടെ യോഗ കോഴ്സുകളിൽ നിന്നും വ്യത്യസ്ഥമായി ശാസ്ത്രീയമായ തിയറി പഠനത്തിനെ അടിസ്ഥാനമാക്കിയുള്ള പ്രായോഗിക രീതിയാണ് അവലംബിക്കുന്നത്. സർട്ടിഫിക്കറ്റ് കോഴ്സിന് 4500 രൂപയും ഡിപ്ലോമ കോഴ്സിന് 9000 രൂപയുമാണ് ഫീസ്.
ബ്യൂട്ടി കെയർ മാനേജ്മെന്‍റ്: ശാസ്ത്രീയ അടിത്തറയിലൂന്നിയ സൗന്ദര്യ പരിചരണ മാർഗങ്ങൾ നൽകി ബ്യൂട്ടീഷ്യൻമാരെയും അക്കാഡമിക രംഗത്ത് വിദഗ്ധരായവരെയും സൃഷ്ടിക്കാൻ സഹായിക്കുന്ന സർട്ടിഫിക്കറ്റ്, ഡിപ്ലോമ കോഴ്സുകൾ നൽകിവരുന്നു. സർട്ടിഫിക്കറ്റ് കോഴ്സിന് 7000 രൂപയാണ് ഫീസ്. യോഗ്യത എട്ടാം ക്ലാസ്. അക്കാഡമിക രംഗത്ത് വിദഗ്ധരെ സൃഷ്ടിക്കാനുതകുന്ന ഡിപ്ലോമ കോഴ്സിന് 12000 ഫീസും 12 -ാം ക്ലാസ് യോഗ്യതയും വേണം.
ഡിപ്ലോമ ഇൻ അപ്ലൈഡ് കൗണ്‍സലിംഗ്: പ്രായോഗിക കൗണ്‍സലിംഗിന് പ്രാധാന്യം നൽകി രൂപപ്പെടുത്തിയിട്ടുള്ള ഒരു വർഷത്തെ ഡിപ്ലോമ കോഴ്സാണിത്. 15000 രൂപ ഫീസ്. യോഗ്യത ബിരുദം.
സർട്ടിഫിക്കറ്റ് ഇൻ ജെറിയാട്രിക് കൗണ്‍സലിംഗ്: വാർധക്യ കാലത്തെ വിവിധതരം പ്രശ്നങ്ങളെ, എല്ലാറ്റിനുമുപരിയായി മാനസിക പ്രശ്നങ്ങളെ അഭിമുഖീകരിക്കാൻ പ്രായമായവരെ പ്രാപ്തരാക്കുന്നതിന് കൗണ്‍സലിംഗ് പ്രയോജനകരമാണ്. അത്തരം കൗണ്‍സലിംഗ് വിദഗ്ധരെ വാർത്തെടുക്കാൻ സഹായിക്കുന്ന സർട്ടിഫിക്കറ്റ് ഇൻ ജെറിയാട്രിക് കൗണ്‍സലിംഗ് കോഴ്സ് ഫീസ് 6500 രൂപ. പന്ത്രണ്ടാം ക്ലാസാണു യോഗ്യത.
കൗണ്‍സലിംഗ് സൈക്കോളജി: അടിസ്ഥാന മനഃശാസ്ത്രത്തിനും സ്കൂൾ കൗണ്‍സലിംഗിനും പ്രാധാന്യം നൽകി പ്രമുഖ മാനസികാരോഗ്യ വിദഗ്ധരുടെ സഹായത്തോടെ രൂപകല്പന ചെയ്ത കൗണ്‍സലിംഗ് സൈക്കോളജി സർട്ടിഫിക്കറ്റ് കോഴ്സിന് 6500 രൂപയും ഡിപ്ലോമ കോഴ്സിന് 15000 രൂപയുമാണ് ഫീസ്.
ആയുർവേദിക് പഞ്ചകർമ അസിസ്റ്റൻസ്: കേരളത്തിലെ പ്രമുഖ ആയുർവേദ ആശുപത്രികളുടെ സഹകരണത്തോടെ നടത്തുന്ന ഡിപ്ലോമ കോഴ്സാണ് ഇത്. യോഗ്യത പ്ലസ്ടൂവും ഫീസ് 12000 രൂപയുമാണ്.
ഡിപ്ലോമ ഇൻ കംപ്യൂട്ടർ ആപ്ലിക്കേഷൻസ്: എസ്ആർസി കമ്യൂണിറ്റി കോളജ് നടത്തുന്ന ആറു മാസത്തെ ഡിസിഎ കോഴ്സിന്റെ യോഗ്യത പത്താം ക്ലാസും ഫീസ് 6500 രൂപയുമാണ്. ഡിസിഎ കോഴ്സിന് പിഎസ്‌സിയുടെ അംഗീകാരമുണ്ട്.
മറ്റു കോഴ്സുകൾ: സർട്ടിഫിക്കറ്റ് ഇൻ മൊബൈൽ ജേർണലിസം, സർട്ടിഫിക്കറ്റ് ഇൻ സെർച്ച് എൻജിൻ ഓപ്റ്റിമൈസേഷൻ, ഡിപ്ലോമ ഇൻ സെർച്ച് എൻജിൻ ഓപ്റ്റിമൈസേഷൻ, സർട്ടിഫിക്കറ്റ് ഇൻ അറബിക് ലാംഗ്വേജ്, സർട്ടിഫിക്കറ്റ് ഇൻ സാൻസ്ക്രിറ്റ് ലാംഗ്വേജ്, സർട്ടിഫിക്കറ്റ് ഇൻ ലൈഫ് സ്കിൽ എഡ്യുക്കേഷൻ, സർട്ടിഫിക്കറ്റ് ഇൻ മോണ്ടിസോറി ടീച്ചേഴ്സ് ട്രെയിനിംഗ്, ഡിപ്ലോമ ഇൻ മോണ്ടിസോറി ടീച്ചേഴ്സ് ട്രെയിനിംഗ്, സർട്ടിഫിക്കറ്റ് ഇൻ ഡ്രോയിംഗ് ആൻഡ് പെയിന്‍റിംഗ്, സർട്ടിഫിക്കറ്റ് ഇൻ ക്ലാസിക്കൽ ആൻഡ് കൊമേഴ്സ്യൽ ആർട്സ്, ഡിപ്ലോമ ഇൻ ക്ലാസിക്കൽ ആൻഡ് കൊമേഴ്സ്യൽ ആർട്സ്, പ്രഫഷണൽ ഡിപ്ലോമ ഇൻ ഹോട്ടൽ മാനേജ്മെന്‍റ് ആൻഡ് കാറ്ററിംഗ്, സർട്ടിഫിക്കറ്റ് ഇൻ വേഡ് പ്രോസസിംഗ്, സർട്ടിഫിക്കറ്റ് ഇൻ ഡാറ്റാ എൻട്രി ഓപ്പറേഷൻ, സർട്ടിഫിക്കറ്റ് ഇൻ ഫിനാൻഷൽ അക്കൗണ്ടിംഗ്, സർട്ടിഫിക്കറ്റ് ഇൻ ഫിറ്റ്നസ് ട്രെയിനിംഗ്, സർട്ടിഫിക്കറ്റ് ഇൻ ഫാർമസി അസിസ്റ്റൻസ്, സർട്ടിഫിക്കറ്റ് ഇൻ ഓഫ്ത്താൽമിക് അസിസ്റ്റൻസ്, സർട്ടിഫിക്കറ്റ് ഇൻ ഡന്‍റൽ അസിസ്റ്റൻസ്, ഡിപ്ലോമ ഇൻ ബാന്‍ഡ് ഓർക്കസ്ട്ര, സർട്ടിഫിക്കറ്റ് ഇൻ ലൈറ്റിംഗ് ഡിസൈൻ.
വിലാസം: ഡയറക്ടർ,എസ്ആർസി കമ്യൂണിറ്റി കോളജ്, സ്റ്റേറ്റ് റിസോഴ്‌സ് സെന്‍റർ,നന്ദാവനം, വികാസ്ഭവൻ പിഒ, തിരുവനന്തപുരം - 695 033.ഫോണ് : 04712325101, 2326101.
ഡോ. ഇ.ബി. ബൈജു
(വൈസ് പ്രിൻസിപ്പൽ,
എസ്ആർസി കമ്യൂണിറ്റി കോളജ്, തിരുവനന്തപുരം)