പ്ലസ്ടു കഴിഞ്ഞാൽ എന്തെന്ന ചോദ്യത്തിന് മെഡിസിൻ അല്ലെങ്കിൽ എൻജിനിയറിംഗ് എന്ന ഉത്തരത്തിനപ്പുറം ഒന്നുമില്ലായിരുന്ന കാലം കടന്നു പോയി. ഇന്ന് ഹോട്ടൽ മാനേജ്മെന്റ് അഥവാ ഹോസ്പിറ്റാലിറ്റി മാനേജ്മെന്റ് പോലുള്ള മേഖലകളും ആകർഷകമായിത്തുടങ്ങി. ചുറുചുറുക്കും ഊർജസ്വലതയും ഏതിനേയും പോസിറ്റീവ് ആയി കാണാൻ കഴിയുകയും ചെയ്താൽ ഈ രംഗത്തു ശോഭിക്കാൻ കഴിയും. കൂടാതെ ഇംഗ്ലീഷ് അനായാസമായി കൈകാര്യം ചെയ്യാനും ഫ്രഞ്ചുപോലുള്ള ഒരു ഭാഷ കൂടി സ്വായത്തമാക്കുകയും ചെയ്താൽ ആകാശം പോലും അതിരിടാത്ത ഒരു കരിയർ സ്വപ്നം കാണാം.
എവിടെ പഠിക്കാം?
കേന്ദ്ര സർക്കാർ ടൂറിസം മന്ത്രാലയത്തിന്റെ കീഴിൽ നോയിഡയിലുള്ള നാഷണൽ കൗണ്സിൽ ഫോർ ഹോട്ടൽ മാനേജ്മെന്റ് ആൻഡ് കാറ്ററിംഗ് ടെക്നോളജിയാ(എൻസിഎച്ച് എംസിടി)ണ് ഈ രംഗത്തെ പ്രവർത്തനങ്ങൾക്കു പ്രധാനമായും ചുക്കാൻ പിടിക്കുന്നത്.
ബിഎസ്സി (ഹോസ്പിറ്റാലിറ്റി ആൻഡ് ഹോട്ടൽ അഡ്മിനിസ്ട്രേഷൻ) ത്രിവത്സര ബിരുദമാണ് എൻസിഎച്ച്എംസിടിയുമായി അഫിലിയേറ്റ് ചെയ്തിട്ടുള്ള സ്ഥാപനങ്ങളിൽ നടത്തുന്ന പ്രധാന കോഴ്സ്. ആറ് സെമസ്റ്ററുകളിലായി മൂന്നു വർഷമാണ് കാലാവധി. കൂടാതെ എഐസിടിഇയുടെ അംഗീകാരത്തോടെ ചതുർവത്സര ബിഎച്ച്എം കോഴ്സുകൾ കേരളാ, കാലിക്കട്ട്, എംജി യൂണിവേഴ്സിറ്റികൾ നടത്തുന്നുണ്ട്. കേരളത്തിലെ യൂണിവേഴ്സിറ്റികളിൽ നിരവധി കോളജുകളിൽ ബിഎസ്സി ഹോട്ടൽ മാനേജ്മെന്റ് ആൻഡ് കാറ്ററിംഗ് സയൻസ്, ബിഎച്ച്എം കോഴ്സുകൾ നടത്തുന്നു.
ഏതൊക്കെ വിഷയങ്ങൾ ?
ഹോട്ടൽ മാനേജ്മെന്റ് കോഴ്സുകളിൽ വൈവിധ്യമാർന്ന വിഷയങ്ങളുടെ ഒരു നീണ്ടനിരതന്നെയുണ്ട്. നാല് പ്രധാന വിഷയങ്ങൾ (കോർ സബ്ജക്ട്) എല്ലാ സെമസ്റ്ററിലും പഠിക്കണം. ഫുഡ് പ്രൊഡക്ഷൻ, ഫുഡ് ആൻഡ് ബെവറേജ് സർവീസ്, ഫ്രണ്ട് ഓഫീസ്, ഹൗസ് കീപ്പിംഗ്. ഇവ കൂടാതെ അക്കൗണ്ടിംഗ്, ഫുഡ് സയൻസ് ആൻഡ് ന്യൂട്രീഷ്യൻ, ഫുഡ് സേഫ്ടി ആൻഡ് ക്വാളിറ്റി, കംപ്യൂട്ടർ അവയർനെസ്, ഫിനാൻഷൽ മാനേജ്മെന്റ്, ഫുഡ് ആൻഡ് ബെവറേജ് കണ്ട്രോൾ, ഹോട്ടൽ എൻജിനിയറിംഗ്, റിസർച് പ്രോജക്ട്സ്, ഫെസിലിറ്റി പ്ലാനിംഗ് മുതലായവ.
ഏറ്റവും കൂടുതൽ തൊഴിൽ സാധ്യതകളുള്ള കോഴ്സ് ആയതിനാൽ ഈ മേഖലയിൽ പരിചയ സന്പന്നരായ പ്രഫഷണൽസിനെ കിട്ടാൻ പ്രയാസമാണ്.
ജോലി ലഭിക്കാവുന്ന മേഖലകൾ: ഫ്ലൈറ്റ് കിച്ചൻ, കാബിൻ ക്രൂ, ലക്ഷ്വറി ഷിപ്പ്/ക്രൂസ് ഷിപ്പ്, ഫാസ്റ്റ് ഫുഡ് ഔട്ലെറ്റ്സ്, ഹോട്ടൽസ്, കെടിഡിസി, ഐആർസിടിസി, ഐഎച്ച്എം ഫാക്കൽറ്റി, ഹോസ്പിറ്റൽസ് ഡയറ്റീഷ്യൻ, ഹോസ്പിറ്റൽസ് കാറ്ററിംഗ്, ഫൈവ് സ്റ്റാർ ഹോട്ടൽസ് (എച്ച്ആർ മാനേജർ/ട്രെയിനിംഗ് മാനേജർ), ടെക്നോപാർക്ക്/ഇൻഫോപാർക്ക്/ഐടി മേഖല, ഗസ്റ്റ് ഹൗസ് മാനേജർ.
ഹോസ്പിറ്റാലിറ്റി -ജെഇഇ പൂർണമായും ഓണ്ലൈൻ പരീക്ഷ
വിദേശത്തും സ്വദേശത്തും വൻ തൊഴിൽ സാധ്യതകൾ ഉള്ള ടൂറിസം/ ഹോസ്പിറ്റാലിറ്റി മേഖലയിൽ ജോലി ഉറപ്പാക്കാൻ സഹായിക്കുന്ന കോഴ്സ് ആണ് നാഷണൽ കൗണ്സിൽ ഫോർ ഹോട്ടൽ മാനേജ്മെന്റ് ആൻഡ് കേറ്ററിംഗ് ടെക്നോളജി ഇന്ത്യയിലെ ഹോസ്പിറ്റാലിറ്റി മാനേജ്മെന്റിലുള്ള ബിഎസ്സി പ്രോഗ്രാം ഉന്നത നിലവാരത്തിലുള്ളതാണ്. ഇതിൽ താത്പര്യമുള്ള ചുറുചുറുക്കുള്ള യുവതി, യുവാക്കൾ ജെഇഇ 2019 നു അപേക്ഷിക്കാൻ തയാറെടുക്കുക. കെട്ടിലും മട്ടിലും പുതുമകളുമായാണ് 2019-ലെ ജെഇഇ. ഏപ്രിൽ 27ന് നടക്കുന്ന ജെഇഇ പൂർണമായും ഓണ്ലൈൻ പരീക്ഷയാണ്.ഭാരതസർക്കാരിന്റെ മാനവവിഭവശേഷി മന്ത്രാലയത്തിന്റെ നിയന്ത്രണത്തിലുള്ള സ്വയം ഭരണ സ്ഥാപനമായ നാഷണൽ ടെസ്റ്റിംഗ് ഏജൻസി (www.nta.ac.in) യാണ് പരീക്ഷയുടെ പൂർണ ചുമതല.
രാജ്യത്തെ തെരഞ്ഞെടുക്കപ്പെട്ട 33 നഗരങ്ങളിൽ പരീക്ഷ എഴുതാം. കേരളത്തിൽ തിരുവനന്തപുരത്തും എറണാകുളത്തും പരീക്ഷ കേന്ദ്രങ്ങൾ ഉണ്ട്. തിരുവനന്തപുരത്ത് ആറ്റിങ്ങലിന് അടുത്ത് നഗരൂരിൽ സ്ഥിതി ചെയ്യുന്ന രാജധാനി ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജി, എറണാകുളം കാക്കനാടുള്ള രാജഗിരി ഇൻസ്റ്റിട്യൂട്ട് ഓഫ് ബിസിനസ് സ്റ്റഡീസ് തുടങ്ങിയ കോളജുകൾ പരീക്ഷാ കേന്ദ്രം ആയിരിക്കും. കേന്ദ്ര സർക്കാർ നേരിട്ടു നടത്തുന്ന 21 ഇൻസ്റ്റിറ്റ്യൂട്ടുകൾ, ( കോവളത്തുള്ള ഇൻസ്റ്റിറ്റ്യൂട്ട് ഓഫ് ഹോട്ടൽ മാനേജ്മെന്റ് ഇതിൽ പ്രമുഖമാണ്), സംസ്ഥാന സർക്കാരുകളുടെ വിനോദസഞ്ചാര വകുപ്പുകൾ നടത്തുന്ന 23 ഇൻസ്റ്റിറ്റ്യൂട്ടുകൾ, ( കോഴിക്കോട് വെസ്റ്റ് ഹിലിൽ സ്ഥിതി ചെയ്യുന്ന സ്റ്റേറ്റ് ഇൻസ്റ്റിറ്റ്യൂട്ട് ഓഫ് ഹോട്ടൽ മാനേജ്മെന്റ് , 24 സ്വകാര്യ ഇൻസ്റ്റിറ്റ്യൂട്ടുകൾ) എന്നിവിടങ്ങളിൽ പഠനം നടത്താം.
മൂന്നു മണിക്കൂർ ദൈർഘ്യമുള്ള പരീക്ഷയ്ക്ക് ആകെ 200 ചോദ്യങ്ങൾ ഉണ്ടായിരിക്കും. ന്യൂമറിക്കൽ എബിലിറ്റി ആൻഡ് അനലിറ്റിക്കൽ ആപ്റ്റിറ്റ്യൂഡ്-30, റീസണിംഗ് ആൻഡ് ലോജിക്കൽ എഡ്യൂക്കേഷൻ-30, ജനറൽ നോളജ് ആൻഡ് കറന്റ് അഫയേഴ്സ്-30, ഇംഗ്ലീഷ്-60, ആപ്റ്റിറ്റ്യൂഡ് ഫോർ സർവീസ് സെക്ടർ-50 ചോദ്യങ്ങളാണ് ഉണ്ടായിരിക്കുക.
നീറ്റ്, എൻജിനിയറിംഗ് എൻട്രൻസ് പരീക്ഷകളുമായി താരതമ്യപ്പെടുത്തുന്പോൾ ജെഇഇ (ഹോസ്പിറ്റാലിറ്റി മാനേജ്മെന്റ്) വളരെ എളുപ്പമാണ്. പ്രധാനമായും ഇതിൽ നെഗറ്റീവ് മാർക്കിംഗ് ഇല്ല. കണക്കും ഇംഗ്ലീഷും പത്താംക്ലാസ് നിലവാരത്തിലുള്ളതാണ്. ജനറൽ നോളേജ് ആൻഡ് കറന്റ് അഫയേഴ്സ് കടക്കാൻ എല്ലാ ദിവസവും പത്രം വായിച്ചാൽ മതിയാകും.
മൂന്ന് മണിക്കൂർ പരീക്ഷ ആയിരിക്കും. കൃത്യമായ ടൈം മാനേജ്മെന്റ് അത്യാവശ്യമാണ്. ജെഇഇ പ്രവേശന പരീക്ഷയുമായി ബന്ധപ്പെട്ട പുസ്തകങ്ങൾ തിരുവനന്തപുരത്തും എറണാകുളത്തും ലഭ്യമാണ്.
അപേക്ഷ ജനുവരി 15 മുതൽ
ജനുവരി 15 മുതൽ ഓണ്ലൈനായി അപേക്ഷിക്കാം.വെജിറ്റേറിയൻ ആഹാര പരിശീലനത്തിന് താല്പര്യമുള്ളവർക്ക് തെരഞ്ഞെടുക്കപ്പെട്ട ഇൻസ്റ്റിറ്റ്യൂട്ടുകളിൽ സൗകര്യം ലഭിക്കും. അപേക്ഷാ സമയത്ത് ഇതിനുള്ള ഓപ്ഷൻ നൽകണം.ഈ സ്കീം അനുസരിച്ച് പ്രവേശന പരീക്ഷ എഴുതാതെ തന്നെ താഴെ പറയുന്ന വിഭാഗങ്ങൾക്ക് അഡ്മിഷൻ ലഭിക്കും. ഇതിന്റെ ഭാഗമായി എല്ലാ ഇൻസ്റ്റിറ്റ്യൂട്ടുകളിലും പ്ലസ് റാങ്ക് ജേതാക്കൾക്ക് ( 3 സീറ്റ് ആർട്സ്-1, സയൻസ്-1, കൊമേഴ്സ്-1) മാറ്റി വച്ചിട്ടുണ്ട്. വിവിധ ബോർഡ് പരീക്ഷകളിൽ റാങ്ക് കിട്ടിയവർക്കാണ് ഇങ്ങനെ അഡ്മിഷൻ നൽകുന്നത്.കൂടാതെ വിദേശ വിദ്യാർഥികൾ, പ്രവാസികൾ എന്നിവർക്കും ജെഇഇ എഴുതേണ്ട. പ്രവേശന പരീക്ഷ ഏപ്രിൽ 27-ന്.
www.nchm.nic/in/admissin
ഡോ. ജെ. പ്രേംചന്ദ്
(സീനിയർ ഫാക്കൽറ്റി, ഇൻസ്റ്റിറ്റ്യൂട്ട് ഓഫ് ഹോട്ടൽ മാനേജ്മെന്റ്,
കോവളം)