ജിനിക്കായി ദീപിക വായനക്കാർ ഒന്നിച്ചു : Deepika.com Charity News

ജിനിക്കായി ദീപിക വായനക്കാർ ഒന്നിച്ചു

Thursday, July 15, 2021 7:39 PM IST

അർബുദ രോഗത്താൽ ബുദ്ധിമുട്ടിയിരുന്ന വടവാതൂർ ഈരേച്ചേരിൽ ജിനി ഷിബുവിനായി ദീപിക വായനക്കാർ ഒന്നിച്ചു. ജിനിയുടെ ദുരിതജീവിതം വായിച്ചറിഞ്ഞ് വായനക്കാർ നൽകിയ സഹായം കുടുംബത്തിന് നൽകി. രാഷ്‌ട്രദീപിക എക്സിക്യൂട്ടീവ് ഡയറക്‌ടർ റവ. ഡോ. ജോൺ സി.സി 95,000 രൂപയുടെ ചെക്ക് ജിനിയുടെ ഭർത്താവ് ഷിബു ചാണ്ടിക്ക് കൈമാറി. സഹായത്തിന് കുടുംബം നന്ദി അറിയിച്ചു.

നാല്പത്തിരണ്ടാം വയസിൽ ഗർഭപാത്രത്തിലും അണ്ഡാശയത്തിലും അർ‌ബുദത്തിന്‍റെ രൂപത്തിലെത്തിയ വിധിയാണ് ജിനിയുടെ ജീവിതത്തിൽ കരിനിഴൽ വീഴ്ത്തിയത്. കഴിഞ്ഞ വർഷം ശാരീരിക ബുദ്ധിമുട്ടുകളെത്തുടർന്ന് കോട്ടയം മെഡിക്കൽ കോളജിൽ നടത്തിയ പരിശോധനയിലാണ് രണ്ടുതരത്തിലുള്ള അർബുദം ശരീരത്തെ പിടിമുറുക്കിയതായി കണ്ടെത്തിയത്.

തുടർന്ന് ജനുവരിയിൽ ഒരു ശസ്ത്രക്രിയ നടത്തി. അണ്ഡാശയത്തിലെ അർബുദം അപൂർവങ്ങളിൽ അപൂർവമാണെന്നാണ് ഡോക്ടർമാർ അഭിപ്രായപ്പെട്ടത്. ഗർഭാശയത്തിലെ അർബുദം മൂന്നാം സ്റ്റേജിലാണ്. അതിനാൽ എത്രയും വേഗം റേഡിയേഷനും കീമോ തെറാപ്പിയും ആരംഭിക്കണമെന്ന് ഡോക്ടർ നിർദേശിച്ചിരുന്നു.

ജിനിയുടെ ഭർത്താവ് ഹൃദ്രോഗബാധിതനാണ്. 2016ൽ ശസ്ത്രക്രിയയ്ക്കു ശേഷം സ്ഥിരമായി മരുന്ന് കഴിക്കുകയാണ്. സ്വന്തം ചികിത്സയ്ക്കൊപ്പം ഭർത്താവിന്‍റെ മരുന്നിനുമുള്ള പണം കണ്ടെത്താൻ ബുദ്ധിമുട്ടുകയാണ് ജിനി. ആരോഗ്യ ഇൻഷുറൻസ് പോലെയുള്ള ഒരു ആനുകൂല്യങ്ങളുമില്ല. ഇവർ താമസിക്കുന്ന വീട് ജപ്തി നിഴലിലാണ്. താങ്ങായി ഇവർക്ക് മക്കളുമില്ല. അത്തരത്തിൽ ദുരിതങ്ങൾ ഏറിയതോടെയാണ് കുടുംബം സുമനസുകളുടെ സഹായം അഭ്യർഥിച്ചത്.