നീറ്റ് എംഡിഎസ് ഡിസംബർ 20ന്
രാജ്യ വ്യാപകമായി ഡെന്റൽ പിജി കോഴ്സുകളിലെ അഡ്മിഷനു നടത്തുന്ന നീറ്റ് എംഡിഎസ് ഡിസംബർ 20ന്. ജനുവരി 20ന് ഫലം പ്രഖ്യാപിക്കും. ഈ മാസം 31നകം അപേക്ഷിക്കണം. ബിഡിഎസ് പാസായവർക്കും മാർച്ച് 31നകം ഇന്റേണ്ഷിപ് പൂർത്തിയാക്കുന്നവർക്കും അപേക്ഷിക്കാം. അപേക്ഷാ ഫീസ് 3,750 രൂപ.
പട്ടിക ജാതി വർഗക്കാർക്ക് 2,750 രൂപ. സംസ്ഥാന ഡെന്റൽ കോളജുകളിലെ സ്റ്റേറ്റ് ക്വോട്ട സീറ്റുകളിലേക്കും 50 ശതമാനം അഖിലേന്ത്യാ ക്വോട്ട സീറ്റുകളിലേക്കും സ്വകാര്യ, കൽപ്പിത സർവകലാശാലകളിലെയും സായുധ സേനാ മെഡിക്കൽ കോളജിലെ എംഡിഎസ് സീറ്റുകളിലേക്കും നീറ്റ് എംഡിഎസ് വഴിയായിരിക്കും അഡ്മിഷൻ. കേരളത്തിൽ എറണാകുളം, കൊല്ലം, കോഴിക്കോട്, കണ്ണൂർ, തിരുവനന്തപുരം എന്നിവിടങ്ങളിൽ പരീക്ഷാ കേന്ദ്രങ്ങളുണ്ട്.
ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസ്ന്യൂഡൽഹി, പോസ്റ്റ് ഗ്രാജ്വേറ്റ് ഇൻസ്റ്റിറ്റ്യൂട്ട് ഓഫ് മെഡിക്കൽ എഡ്യൂക്കേഷൻ ആൻഡ് റിസർച്ച് ചണ്ഡിഗഡ്, ജിപ്മെർ പോണ്ടിച്ചേരി, നിംഹാൻസ്ബംഗളൂരു, ശ്രീ ചിത്ര ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ആൻഡ് ടെക്നോളജി തിരുവനന്തപുരം എന്നിവിടങ്ങളിലെ അഡ്മിഷനു നീറ്റ് പിജി ബാധകമല്ല. www.nbe.edu.in.
ഡിഎൻബി പിഡി സിഇടി
ഡിപ്ലോമേറ്റ് ഓഫ് നാഷണൽ ബോർഡ് പോസ്റ്റ് ഡിപ്ലോമ സെൻട്രലൈസ്ഡ് എൻട്രൻസ് ടെസ്റ്റ് (ഡിഎൻബി പിഡി സിഇടി) ഡിസംബർ 20 നാണു നിശ്ചയിച്ചിരിക്കുന്നത്. ഈ മാസം 31 നകം ഓണ്ലൈനായി അപേക്ഷിക്കണം. മെഡിക്കൽ പോസ്റ്റ് ഗ്രാജ്വേറ്റ് ഡിപ്ലോമ ഉള്ളവർക്ക് അപേക്ഷിക്കാം. കേരളത്തിലെ ടെസ്റ്റ് സെന്ററുകൾ: കോഴിക്കോട്, തിരുവനന്തപുരം.www.nbe.edu.in.
ഫോറിൻ മെഡിക്കൽ ഗ്രാജ്വേറ്റ് എക്സാം
വിദേശ മെഡിക്കൽ കോളജുകളിൽ പഠിച്ച എംബിബിഎസ് ബിരുദം നേടിയവർക്ക് ഇന്ത്യയിൽ പ്രാക്ടീസ് ചെയ്യാനുള്ള സ്ക്രീനിംഗ് ടെസ്റ്റായ ഫോറിൻ മെഡിക്കൽ ഗ്രാജ്വേറ്റ് എക്സാമിനേഷൻ ഡിസംബർ 20നു നടത്തും. ഈ മാസം 31നകം അപേക്ഷിക്കണം.
നാഷണൽ ബോർഡ് ഓഫ് എക്സാമിനേഷനാണു പരീക്ഷാ നടത്തിപ്പിന്റെ ചുമതല. ഇന്ത്യക്കാർക്കും വിദേശ ഇന്ത്യക്കാർക്കും അപേക്ഷിക്കാം. അപേക്ഷാ ഫീസ് 5,550 രൂപ.
www.nbe.edu.in. കേരളത്തിൽ കോഴിക്കോട്ടും തിരുവനന്തപുരത്തും പരീക്ഷാ കേന്ദ്രങ്ങളുണ്ട്.