കായിക പഠന വകുപ്പിൽ ഡെപ്യൂട്ടി ഡയറക്ടർ, അസിസ്റ്റൻറ് ഡയറക്ടർ ഡെപ്യൂട്ടേഷൻ നിയമനം
കായിക പഠന വിഭാഗത്തിൽ ഡെപ്യൂട്ടി ഡയറക്ടർ, അസിസ്റ്റന്റ് ഡയറക്ടർ (ഓരോ ഒഴിവു വീതം) തസ്തികകളിലേക്ക് ഡെപ്യൂട്ടേഷൻ നിയമനത്തിന് അപേക്ഷ ക്ഷണിച്ചു. യുജിസി റെഗുലേഷൻ പ്രകാരം യോഗ്യതയുള്ള സർവകലാശാല/ ഗവൺമെന്റ്/ എയ്ഡഡ് കോളജ് അധ്യാപകർക്ക് അപേക്ഷിക്കാം. ബയോഡേറ്റ, നിലവിലെ തൊഴില്ദാതാവിൽ നിന്നുള്ള എൻഒസി എന്നിവ സഹിതം 27 നകം രജിസ്ട്രാർ, യൂണിവേഴ്സിറ്റി ഓഫ് കാലിക്കട്ട്, കാലിക്കട്ട് യൂണിവേഴ്സിറ്റി പിഒ, 673635 എന്ന വിലാസത്തിൽ അപേക്ഷ സമർപ്പിക്കണം. വിവരങ്ങൾ www.uoc.ac.in വെബ്സൈറ്റിൽ.
എച്ച്എസ്ഇ എൻഎസ്ക്യുഎഫ് സ്കീമിൽ ഹയർസെക്കൻഡറി പൂർത്തീകരിച്ചവർക്ക് ബിരുദ രജിസ്ട്രേഷൻ
എച്ച്എസ്ഇ എൻഎസ്ക്യു എഫ് സ്കീമിൽ ഹയർസെക്കൻഡറി വിദ്യാഭ്യാസം പൂർത്തീകരിച്ചവർക്ക് ബിരുദ രജിസ്ട്രേഷനുള്ള സൗകര്യം സർവകലാശാല ഓൺലൈൻ രജിസ്ട്രേഷൻ പോർട്ടലിൽ 20 മുതൽ ലഭ്യമാണ്. പ്രസ്തുത സ്കീമിൽ ഉൾപ്പെട്ടവർ മറ്റേതെങ്കിലും രീതിയിൽ രജിസ്ട്രേഷൻ പൂർത്തീകരിച്ചിട്ടുണ്ടെങ്കിൽ എഡിറ്റിംഗ് സംവിധാനം ഉപയോഗപ്പെടുത്തുകയും ആവശ്യമായ തിരുത്തലുകൾ അപേക്ഷയിൽ വരുത്തുകയും അന്തിമ സമർപ്പണം നടത്തി പ്രിന്റൗട്ട് എടുത്ത് സൂക്ഷിക്കേണ്ടതുമാണ്. വിശദ വിവരങ്ങൾക്കും രജിസ്ട്രേഷനും www.cuonline.ac.in/ug സന്ദർശിക്കുക.
ഭിന്നശേഷിക്കാർക്കായി ഓൺലൈൻ പരിശീലനവും ഇന്റഗ്രേറ്റഡ് ടെലിറിഹാബിലിറ്റേഷൻ പ്രവർത്തനവുമായി സിഡിഎംആർപി
തേഞ്ഞിപ്പലം: കോവിഡ് പ്രത്യേക സാഹചര്യം കണക്കിലെടുത്ത് ഭിന്നശേഷിക്കാരുടെ തുടർപരിശീലനവും തെറാപ്പിയും കരുതലും ഉറപ്പു വരുത്തുന്നതിനായി വിവിധ റിഹാബിലിറ്റേഷൻ പ്രഫഷണലുകളെ ഏകോപിപ്പിച്ചു കൊണ്ട് കോഴിക്കോട് ജില്ലാ സാമൂഹികനീതി വകുപ്പിന്റെയും കാലിക്കട്ട് സർവകലാശാല സിഡിഎംആർപിയുടെയും നേതൃത്വത്തിൽ ഇന്റഗ്രേറ്റഡ് ടെലി റിഹാബ് ടീം തയ്യാറായി. ഇതിന്റെ ഭാഗമായി ഭിന്നശേഷിക്കാരായ കുട്ടികളെ വീടുകളിൽ വച്ച് തന്നെ പരിശീലിപ്പിക്കുവാനാവശ്യമായ വീഡിയോകൾ, മാർഗരേഖകൾ, ഇ വർക്ക്ഷീറ്റുകൾ, ടെലികൗൺസിലിംഗ്, പാരന്റൽ എഡ്യുക്കേഷൻ, തുടങ്ങിയവ സംവിധാനങ്ങൾ ഓൺലൈൻ വഴി കുട്ടികൾക്കും രക്ഷിതാക്കൾക്കും ലഭ്യമാക്കുന്നു. ക്ലിനിക്കൽ സൈക്കോളജിസ്റ്റ്, റിഹാബ്സൈക്കോളജിസ്റ്റ്, സ്പീച്ച് തെറാപ്പിസ്റ്റ്, സ്പെഷൽ എഡ്യുക്കേറ്റേർസ്, ഫിസിയോ തെറാപ്പിസ്റ്റ്, ഒക്യുപേഷണൽ തെറാപ്പിസ്റ്റ് എന്നിവരടങ്ങുന്നതാണ് ടീം. രക്ഷിതാക്കൾക്ക് ഫോൺ മുഖേന വിവിധ തെറാപ്പിസ്റ്റുകളുമായി നേരിട്ട് വിളിച്ച് സംസാരിക്കാനും കുട്ടിയുടെ വൈകല്യത്തിന്റെ അവസ്ഥയും തെറാപ്പികളുടെ ആവശ്യകതയും മനസിലാക്കി ബന്ധപെട്ട തെറാപ്പിസ്റ്റുകൾ തുടർന്നുള്ള നിർദേശങ്ങൾ നൽകുന്നതാണ്. ബുദ്ധി വികാസ വൈകല്യം, ഓട്ടിസം, എഡിഎച്ച്ഡി, സെറിബ്രൽ പാൾസി, ഡൗൺ സിൻഡ്രം, സംസാര വൈകല്യം, ശാരീരിക വൈകല്യം, പഠന വൈകല്യം എന്നീ അവസ്ഥകളിലുള്ള കുട്ടികൾക്കും ലോക് ഡൗൺ സമയത്ത് വീട്ടിൽ തന്നെ ആയതു കാരണം ഉണ്ടാകാവുന്ന മറ്റുസ്വഭാവ പെരുമാറ്റ പ്രശ്നങ്ങൾക്കുമുള്ള പരിഹാര നിർദേശങ്ങളാണ് ഇന്റഗ്രേറ്റഡ് ടെലിറിഹാബിലൂടെ ലഭ്യമാവുന്നത്. കൂടാതെ കുട്ടികൾക്ക് ആവശ്യമായ പരിശീലനങ്ങൾ വീട്ടിൽ തന്നെ നൽകുന്നതിനാവശ്യമായ നിർദ്ദേശങ്ങൾ അടങ്ങിയ വ്യത്യസ്ത പരിശീലന വീഡിയോകളും മാർഗരേഖകളും ഇന്റഗ്രേറ്റഡ് ടെലി റിഹാബിന്റെ തുടർച്ചയെന്നോണം ലഭ്യമായി കൊണ്ടിരിക്കുന്നതാണ്. മേൽപ്പറഞ്ഞ തെറാപ്പി സംവിധാനങ്ങൾ ആവശ്യമുള്ള കുട്ടിയുടെ പേര്, വയസ്, ഭിന്നശേഷി അവസ്ഥ /ഡയഗ്നോസിസ്, ആവശ്യമായ തെറാപ്പി സേവനങ്ങൾ, ഫോൺ നമ്പർ എന്നിവ അതത് ദിവസങ്ങളിൽ രാവിലെ 10ന് മുമ്പായി 9810163896 (ബുധൻ, വെള്ളി), 9446855765 (ചൊവ്വ, വ്യാഴം), 7736529952 (തിങ്കൾ, ശനി) എന്ന നമ്പറിൽ വാട്സ് ആപ്പ് ചെയ്യേണ്ടതാണ്. കൂടുതൽ വിവരങ്ങൾക്ക് ബന്ധപ്പെടുക 9061146222, 9061086222.