ഇന്‍റഗ്രേറ്റഡ് പഞ്ചവത്സര എൽഎൽബി: രണ്ടാം ഘട്ട അലോട്ട്മെന്റ് പ്രസിദ്ധീകരിച്ചു
തിരുവനന്തപുരം : കേരളത്തിലെ സർക്കാർ ലോ കോളജുകളിലെയും സ്വകാര്യ സ്വാശ്രയ ലോ കോളജുകളിലെയും ഇന്‍റഗ്രേറ്റഡ് പഞ്ചവത്സര എൽഎൽബി കോഴ്സിലേക്ക് പ്രവേശനത്തിനുള്ള രണ്ടാമത്തെയും അവസാനത്തെയും കേന്ദ്രീകൃത ഓണ്‍ലൈൻ അലോട്ട്മെന്റ് എന്ന വെബ്സൈറ്റിൽ പ്രസിദ്ധീകരിച്ചു.
വെബ്സൈറ്റിലെ Integrated Five Year LL.B 2018Candidate Portal ലൂടെ ആപ്ലിക്കേഷൻ നമ്പരും പാസ്‌വേഡും കൃത്യമായി നൽകി ഹോം പേജിൽ പ്രവേശിച്ച ശേഷം അലോട്ട്മെന്റ് റിസൾട്ട് എന്ന മെനു ഐറ്റത്തിൽ ക്ലിക്ക് ചെയ്ത് വിദ്യാർഥികൾക്ക് തങ്ങളുടെ അലോട്ട്മെന്റ് മെമ്മോ ഡൗണ്ലോഡ് ചെയ്യാം.
അലോട്ട്മെന്റ് മെമ്മോയിൽ വിദ്യാർഥിയുടെ പേര്, റോൾ നമ്പർ, അലോട്ട്മെന്റിന്റെ വിശദാംശങ്ങൾ, ടൂഷൻ ഫീസ്, ഡെപ്പോസിറ്റ് തുക തുടങ്ങിയ വിവരങ്ങൾ ലഭ്യമാണ്. വിദ്യാർഥികൾ അലോട്ട്മെന്റ് മെമ്മോയുടെ പ്രിന്‍റൗട്ട് എടുക്കണം. കൂടാതെ ഹോം പേജിൽ പ്രവേശിച്ചതിനു ശേഷം ഡാറ്റാ ഷീറ്റ് എന്ന മെനു ഐറ്റം ക്ലിക് ചെയ്ത് വിദ്യാർഥികൾക്ക് അവരുടെ ഡാറ്റാഷീറ്റിന്‍റെ പ്രിന്‍റൗട്ട് എടുക്കാം.
അലോട്ട്മെന്റ് ലഭിച്ച എല്ലാ വിദ്യാർഥികളും അവരുടെ അലോട്ട്മെന്റ് മെമ്മോയും പ്രോസ്പെക്ടസ് ഖണ്ഡിക 18ൽ പറയുന്ന അസൽ രേഖകളും സഹിതം 22, 24, 25 എന്നീ തീയതികളിലൊന്നിൽ ബന്ധപ്പെട്ട കോളജിൽ നേരിട്ട് ഹാജരായി പ്രവേശനം നേടണം. അഡ്മിഷൻ സമയത്ത് ബന്ധപ്പെട്ട സർക്കാർ ഉത്തരവുകൾ പ്രകാരമുള്ള മുഴുവൻ ഫീസും കോളജിൽ ഒടുക്കേണ്ടതാണ്. കോളജ് പ്രിൻസിപ്പൽമാർ 25നു വൈകുന്നേരം 5.30നുള്ളിൽ പ്രവേശനം നേടിയ വിദ്യാർഥികളുടെ വിവരങ്ങൾ അംഗീകരിച്ചു പ്രവേശന പരീക്ഷാ കമ്മീഷണർക്കു ഓണ്‍ലൈൻ അഡ്മിഷൻ മാനേജ്മെന്‍റ് സിസ്റ്റം മുഖേന സമർപ്പിക്കണം.
നിർദിഷ്ട തീയതികളിൽ കോളജുകളിൽ അഡ്മിഷൻ നേടാത്ത വിദ്യാർഥികൾക്ക് നിലവിലുള്ള അലോട്ട്മെന്റ് നഷ്ടപ്പെടുന്നതാണ്.
രണ്ടാം ഘട്ട അലോട്ടുമെന്റിൽ ഹയർ ഓപ്ഷനിലേക്ക് അലോട്ട്മെന്റ് ലഭിക്കുന്നവർ നിലവിൽ പ്രവേശനം നേടിയിരിക്കുന്ന കോളജിൽ നിന്നും ടിസിയും അനുബന്ധ രേഖകളും കോളജിൽ പ്രവേശനം നേടിയ സമയത്തു അടച്ച ട്യൂഷൻ ഫീസും ഡെപ്പോസിറ്റ് തുകയും തിരികെ വാങ്ങി പുതിയ കോളജിൽ നിർദിഷ്ട തീയതികളിൽ തന്നെ പ്രവേശനം നേടേണ്ടതാണ്. അല്ലാത്ത പക്ഷം അവർക്കു നിലവിലുള്ള അഡ്മിഷൻ നഷ്ടപ്പെടുന്നതാണ്.
ഭവൻസ് എൻ.എ. പാൽഖിവാലാ അക്കാഡമി ഫോർ അഡ്വാൻസ്ഡ് ലീഗൽ സ്റ്റഡീസ് ആൻഡ് റിസർച്ച് എന്ന സ്വാശ്രയ ലോ കോളജിലേക്കുള്ള അലോട്ട്മെന്‍റും ഫീസ് തുകയായ 15,000 രൂപയും താൽക്കാലികവും കേരള ഹൈക്കോടതിയുടെ അന്തിമവിധിക്ക് വിധേയവുമായിരിക്കും.
സ്പോട്ട് അലോട്ട്മെന്റ് : 25നു ശേഷം സർക്കാർ/സ്വകാര്യസ്വാശ്രയ ലോ കോളജുകളിലെ ഇന്‍റഗ്രേറ്റഡ് പഞ്ചവത്സര എൽഎൽബി കോഴ്സിലേക്ക് സീറ്റുകൾ ഒഴിവുള്ള പക്ഷം പ്രസ്തുത ഒഴിവുകൾ 27നു പ്രവേശന പരീക്ഷാ കമ്മീഷണർ തിരുവനന്തപുരത്ത് നടത്തുന്ന സ്പോട്ട് അലോട്ട്മെന്റ് മുഖേന നികത്തുന്നതാണ്. ഇതു സംബന്ധിച്ച വിശദമായ വിജ്ഞാപനം പ്രവേശന പരീക്ഷാ കമ്മീഷണറുടെ , എന്നീ വെബ്സൈറ്റുകളിൽ പിന്നീട് പ്രസിദ്ധീകരിക്കും.
ഫോണ് : 04712339101, 102, 103, 104, 2332123.