കാലിക്കട്ട് വിദൂര വിദ്യാഭ്യാസ വിഭാഗത്തിൽ ഏഴു കോഴ്സുകൾക്കു കൂടി യുജിസി അംഗീകാരം
തേഞ്ഞിപ്പലം: കാലിക്കട്ട് സർവകലാശാലയുടെ വിദൂര വിദ്യാഭ്യാസ വിഭാഗം നടത്തിയിരുന്ന എല്ലാ കോഴ്സുകൾക്കും യുജിസി അംഗീകാരമായി. ആദ്യഘട്ടത്തിൽ അംഗീകാരം പുനഃസ്ഥാപിച്ച 19 കോഴ്സുകളിലേക്ക് ഒക്ടോബർ 20 വരെ അപേക്ഷ സമർപ്പിക്കാൻ സമയം ദീർഘിപ്പിച്ചതിനിടെയാണ് ഏഴു കോഴ്സുകൾക്ക് കൂടി യുജിസി അംഗീകാരം ലഭിച്ചത്.
യുജിസി നിബന്ധനകൾക്കനുസരിച്ച് സൗകര്യമൊരുക്കുന്നതിൽ വിദൂര വിദ്യാഭ്യാസ വിഭാഗം നടത്തിയ പ്രവർത്തന ഫലമായാണ് ബാക്കി കോഴ്സുകൾക്ക് കൂടി അംഗീകാരം പുനഃസ്ഥാപിച്ചുനൽകിയത്. അംഗീകാരം ലഭിച്ചതോടെ കോഴ്സുകളിലേക്ക് അപേക്ഷ സ്വീകരിക്കാനുള്ള നടപടികളും ആരംഭിച്ചിട്ടുണ്ട്. എംകോം, എംഎ ഇക്കണോമിക്സ്, എംഎ ഇംഗ്ലീഷ്, എംഎ പൊളിറ്റിക്കൽ സയൻസ്, എംഎ സംസ്കൃതം, എംഎസ് സി മാത്തമാറ്റിക്സ്, ബിഎസ്സി മാത്തമാറ്റിക്സ് എന്നീ കോഴ്സുകൾക്കാണ് പുതുതായി അംഗീകാരം ലഭിച്ചത്.