ബിസിനസ് അനലിറ്റിക്സിൽ പിജി ഡിപ്ലോമ
വിവര സാങ്കേതിക വിദ്യയുടെ വളർച്ചയോടെ ഓരോ സ്ഥാപനത്തിനും ബിസിനസ് രംഗത്ത് ഒരു ചോദ്യത്തിന് ഉത്തരം കണ്ടെത്താൻ നിരവധി സ്ഥിതി വിവരക്കണക്കുകളുടെ വിശകലനം അനിവാര്യമായി വന്നു. ഓരോ ചുവടു മുന്നോട്ടു വയ്ക്കുന്പോഴും ഇത്തരമൊരു വിശകലനം വിജയത്തിലേക്ക് നയിക്കുമെന്നു കന്പനികൾ മനസിലാക്കി തുടങ്ങിയതോടെ പ്രമുഖ സ്ഥാപനങ്ങളും ഈ രംഗത്തു പരിശീനലനം നൽകാൻ മുന്നോട്ടു വന്നിട്ടുണ്ട്.
ഈ സാഹചര്യത്തിലാണ് ഇന്ത്യയിലെ ഏറ്റവും പ്രമുഖമായ മൂന്നു വിദ്യാഭ്യാസ സ്ഥാപനങ്ങളായ കോൽക്കത്തയിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്മെന്റ്, ഖരഗ്പുരിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി, കോൽക്കത്തയിലെ ഇന്ത്യൻ സ്റ്റാറ്റിസ്റ്റിക്കൽ ഇൻസ്റ്റിറ്റ്യൂട്ട് എന്നിവ ചേർന്നു നടത്തുന്ന പോസ്റ്റ് ഗ്രാജ്വേറ്റ് ഡിപ്ലോമ ഇൻ ബിസിനസ് അനലിറ്റിക്സ് കോഴ്സിന്റെ പ്രസക്തി. കോഴ്സിന്റെ വിവിധ ഘടകങ്ങൾ ഓരോ സ്ഥാപനത്തിലും ആറു മാസം വീതം ചെലവിട്ടു വേണം പഠിക്കാൻ. രണ്ടു വർഷത്തെ മുഴുവൻ സമയ കോഴ്സാണിത്. ഏതെങ്കിലും വിഷയത്തിൽ 65 ശതമാനം മാർക്കോടെ ബിരുദമോ ബിരുദാനന്തര ബിരുദമോ നേടയവർക്ക് അപേക്ഷിക്കാം. 60 സീറ്റുകളാണുള്ളത്. 20 ലക്ഷം രൂപയോളമാണു കോഴ്സ് ഫീസ്.
ഫെബ്രുവരി 17നു നടത്തുന്ന എഴുത്തു പരീക്ഷയുടെയും തുടർന്ന് ഇന്റർവ്യുവിന്റെയും അടിസ്ഥാനത്തിലാണ് അഡ്മിഷൻ. വെർബൽ എബിലിറ്റി, ഡാറ്റാ ഇന്റർപ്രറ്റേഷൻ, ക്വാണ്ടിറ്റേറ്റീവ് ആപ്റ്റീറ്റ്യൂഡ് എന്നിവയാണു പ്രവേശന പരീക്ഷയിൽ ഉൾപ്പെടുത്തിയിരിക്കുന്നത്. മാതൃകാ ചോദ്യ പേപ്പർ വെബ്സൈറ്റിലുണ്ട്.
കോൽക്കത്ത, മുംബൈ, ന്യൂഡൽഹി, ബംഗളൂരു, ചെന്നൈ എന്നിവിടങ്ങളിലാണു പ്രവേശന പരീക്ഷ. ജനുവരി മൂന്നിനകം അപേക്ഷിക്കണം. അപേക്ഷാ ഫീസ് 2000 രൂപ. സംവരണ വിഭാഗങ്ങൾക്ക് 1000 രൂപ.
കൂടുതൽ വിവരങ്ങൾക്ക്: www.iitkg p.ac.in/pgdba.