രണ്ടാം സെമസ്റ്റർ യുജി മൂല്യനിർണയ ക്യാന്പ്: 26ന് ക്ലാസുകൾക്ക് അവധി
രണ്ടാം സെമസ്റ്റർ യുജി (സിയുസിബിസിഎസ്എസ്) ഏപ്രിൽ 2018 പരീക്ഷകളുടെ സെൻട്രലി മോണിറ്റേഡ് വാല്വേഷൻ ക്യാന്പ് നടക്കുന്നതിനാൽ 26ന് എല്ലാ അഫിലിയേറ്റഡ് ആർട്സ് ആൻഡ് സയൻസ് കോളജുകളിലും റഗുലർ ക്ലാസുകൾ ഉണ്ടായിരിക്കുന്നതല്ല. ക്യാന്പിന്റെ വിവരങ്ങൾ അറിയാൻ ചെയർമാൻമാരുമായി ബന്ധപ്പെടണം.
നിയമന ഉത്തരവ് ലഭിക്കാത്തവർ രാവിലെ പത്തിന് ക്യാന്പിലെത്തി ഉത്തരവ് കൈപ്പറ്റണം. എല്ലാ അധ്യാപകരും ക്യാന്പിൽ നിർബന്ധമായും പങ്കെടുക്കണമെന്ന് പരീക്ഷാ കണ്ട്രോളർ അറിയിച്ചു. വിവരങ്ങൾ വെബ്സൈറ്റിൽ.
പരാതികൾ പരിഹരിക്കാൻ അദാലത്ത്
സംസ്ഥാന ഉന്നത വിദ്യാഭ്യാസ വകുപ്പിന്റെ ആഭിമുഖ്യത്തിൽ കാലിക്കട്ട് സർവകലാശാലയുമായി ബന്ധപ്പെട്ട പരാതികൾ തീർപ്പാക്കാൻ മാർച്ച് രണ്ടിന് രാവിലെ പത്തിന് അദാലത്ത് സംഘടിപ്പിക്കുന്നു. മന്ത്രി ഡോ. കെ.ടി. ജലീൽ പങ്കെടുക്കും. വിദ്യാർഥികൾ, അധ്യാപകർ, പ്രിൻസിപ്പൽമാർ, മാനേജർമാർ തുടങ്ങിയവർക്ക് ഓണ്ലൈനായി 21 വരെ പരാതി സമർപ്പിക്കാം. പരാതി സമർപ്പിക്കുന്നതിനുള്ള ലിങ്ക് www.uoc.ac.in വെബ്സൈറ്റിൽ ലഭ്യമാവും. സംസ്ഥാനത്തെ സർവകലാശാലകളിൽ തീരുമാനാകാതെ കിടക്കുന്ന ഫയലുകൾ തീർപ്പാക്കുന്നതിന്റെ ഭാഗമായാണ് അദാലത്ത്.
സംവരണം സാമൂഹിക നീതിക്ക്: സെമിനാർ 14ന്
കാലിക്കട്ട് സർവകലാശാലാ സി.എച്ച്. മുഹമ്മദ് കോയ ചെയർ "സംവരണം സാമൂഹിക നീതിക്ക്’ എന്ന വിഷയത്തിൽ 14ന് സെമിനാർ സംഘടിപ്പിക്കും. സർവകലാശാലാ സെമിനാർ കോംപ്ലക്സിൽ വൈകുന്നേരം മൂന്നിന് ഇ.ടി. മുഹമ്മദ് ബഷീർ എംപി, വൈസ് ചാൻസലർ ഡോ. കെ. മുഹമ്മദ് ബഷീർ, കെ. കുട്ടി അഹമ്മദ്കുട്ടി, ഡോ. ഫസൽ ഗഫൂർ, വി.ആർ. ജോഷി (പിന്നോക്ക വിഭാഗ വികസന വകുപ്പ് മുൻ ഡയറക്ടർ), കെ.കെ. ബാബുരാജ് എന്നിവർ പങ്കെടുക്കും.
പ്രബന്ധങ്ങൾ ക്ഷണിച്ചു
കാലിക്കട്ട് സർവകലാശാലാ ഇസ്ലാമിക് ചെയർ കുനിയിൽ അൻവാറുൽ ഇസ്ലാം അറബിക് കോളജുമായി സഹകരിച്ച് 27, 28 തിയതികളിൽ ഇസ്ലാമിക് ഫിനാൻസ്: ആധുനിക സാന്പത്തിക പ്രതിസന്ധികൾക്കുള്ള പരിഹാരം എന്ന വിഷയത്തിൽ സെമിനാർ സംഘടിപ്പിക്കുന്നു. പ്രബന്ധം അവതരിപ്പിക്കാനാഗ്രഹിക്കുന്നവർ 18നകം രജിസ്റ്റർ ചെയ്യണം. ഫോണ്: 9400458047, 9746904678.
പരീക്ഷാഫലം
എംഫിൽ വിമണ്സ് സ്റ്റഡീസ് ഒന്ന് (ഒക്ടോബർ 2017), രണ്ട് (ജൂണ് 2018) സെമസ്റ്റർ പരീക്ഷാഫലം വെബ്സൈറ്റിൽ.
2018 നവംബറിൽ നടത്തിയ ഒന്നാം സെമസ്റ്റർ എംഎസ്സി ഫിസിക്സ് (സിസിഎസ്എസ്) പരീക്ഷാഫലം വെബ്സൈറ്റിൽ.
ഗണിത ശാസ്ത്ര സെമിനാർ സമാപിച്ചു
തേഞ്ഞിപ്പലം: കാലിക്കട്ട് സർവകലാശാലാ ഗണിത ശാസ്ത്ര പഠനവിഭാഗം ടോപ്പോളജിയിലെ സമീപകാല പ്രവണതകൾ എന്ന വിഷയത്തിൽ സംഘടിപ്പിച്ച ത്രിദിന ദേശീയ സെമിനാർ സമാപിച്ചു.
ഗണിത ശാസ്ത്ര വിഭാഗത്തിൽ നിന്നും വിരമിക്കുന്ന പഠനവകുപ്പ് മേധാവി ഡോ. പി.ടി. രാമചന്ദ്രന്റെ ബഹുമാനാർഥമായിരുന്നു പരിപാടി. വൈസ് ചാൻസലർ ഡോ. കെ. മുഹമ്മദ് ബഷീർ ഉദ്ഘാടനം ചെയ്തു.
ഡോ. ടി.കെ. നാരായണൻ (കേരള കലാമണ്ഡലം വൈസ് ചാൻസലർ), പ്രഫ. ഇ. കൃഷ്ണൻ (തിരുവനന്തപുരം യൂണിവേഴ്സിറ്റി കോളജ് മുൻ പ്രഫസർ), പ്രഫ. വി. കണ്ണൻ (ഹൈദരാബാദ് സർവകലാശാലാ മുൻ പ്രോവൈസ് ചാൻസലർ), പ്രഫ. എ.ജെ. പരമേശ്വരൻ (മുംബൈ ടിഐഎഫ്ആർ), പ്രഫ. ലക്ഷ്മണ ഗോമതി നായഗം (തിരുച്ചിറപ്പള്ളി എൻഐടി), പ്രഫ. എസ്. സോമസുന്ദരം (മനോൻമണീയം സുന്ദരനാർ സർവകലാശാല), പ്രഫ. കെ.എസ്. സുബ്രമണ്യൻ മൂസത് (തിരുവനന്തപുരം ഐഐഎസ്ടി), പ്രഫ.കെ.അലി അക്ബർ (കാസർഗോഡ് കേന്ദ്ര സർവകലാശാല), പ്രഫ. എ.ജെ. ജയന്തൻ (ഗോവ സർവകലാശാല) തുടങ്ങിയ പ്രമുഖർ വിഷയങ്ങൾ അവതരിപ്പിച്ചു. വിവിധ സംസ്ഥാനങ്ങളിൽ നിന്നായി ഇരുന്നൂറോളം വിദ്യാർഥികളും അധ്യാപകരും പങ്കെടുത്തു.
ദേശീയ സെമിനാർ തുടങ്ങി
തേഞ്ഞിപ്പലം: കാലിക്കട്ട് സർവകലാശാലാ മനഃശാസ്ത്ര പഠനവിഭാഗത്തിന്റെ ആഭിമുഖ്യത്തിൽ ത്രിദിന ദേശീയ സെമിനാർ സർവകലാശാലാ സെമിനാർ കോംപ്ലക്സിൽ ആരംഭിച്ചു. മനഃശാസ്ത്ര കരിക്കുലത്തിലെയും പഠനത്തിലെയും പുതിയ ചിന്തകൾ എന്ന വിഷയത്തിൽ നടക്കുന്ന സെമിനാറിന്റെ ഉദ്ഘാടനം പ്രോവൈസ് ചാൻസലർ പ്രഫ. പി. മോഹൻ നിർവഹിച്ചു.
ഉന്നത വിദ്യാഭ്യാസ കൗണ്സിൽ മെംബർ സെക്രട്ടറി രാജൻ വർഗീസ്, പ്രഫ. എസ്. രാജൻ, പ്രഫ. കെ. മണികണ്ഠൻ, ഡോ. ബേബി ശാരി തുടങ്ങിയവർ പ്രസംഗിച്ചു. സെമിനാർ നാളെ സമാപിക്കും.