വൈവ വോസി; ഡിസർട്ടേഷൻ സമർപ്പിക്കണം
201617 ബാച്ച് എംഫിൽ (പൊളിറ്റിക്സ് ആൻഡ് ഇന്റർനാഷണൽ റിലേഷൻസ്) പരീക്ഷയുടെ വൈവ വോസി 27ന് രാവിലെ 10ന് സ്കൂൾ ഓഫ് ഇന്റർനാഷണൽ റിലേഷൻസ് ആൻഡ് പൊളിറ്റിക്സിൽ നടക്കും. വിദ്യാർഥികൾ ഡിസർട്ടേഷനുകൾ 25ന് മുന്പായി സമർപ്പിക്കണം.
സുരക്ഷാ ജീവനക്കാരുടെ ഒഴിവ്
സർവകലാശാലയിൽ താൽക്കാലികാടിസ്ഥാനത്തിൽ സുരക്ഷാ ജീവനക്കാരെ നിയമിക്കുന്നു. ദിവസവേതന വ്യവസ്ഥയിൽ 30 സുരക്ഷാഭടന്മാരെയും എട്ടു വനിതാ ജീവനക്കാരെയുമാണ് നിയമിക്കുന്നത്. ഒരു വർഷത്തേക്കാണ് നിയമനം. നിയമനത്തിനുള്ള ശാരീരിക ക്ഷമതാ പരീക്ഷ 19, 20 തീയതികളിൽ നടക്കും. പുരുഷന്മാർക്കായി 19ന് രാവിലെ 7.30നും വനിതകൾക്കായി 20ന് രാവിലെ 7.30നും സർവകലാശാലയിലെ ഫിസിക്കൽ എജ്യൂക്കേഷൻ ഗ്രൗണ്ടിലാണ് പരീക്ഷ. യോഗ്യത: പുരുഷന്മാർ വിമുക്തഭടൻ, ബിഎസ്എഫ്, സിആർപിഎഫ് തുടങ്ങി സൈനിക, അർധസൈനിക സേവന പരിചയം. വനിതകൾ എൻസിസി ബി, സി സർട്ടിഫിക്കറ്റ് നേടിയവർ, എൻഎസ്എസിൽ റിപ്പബ്ലിക് പരേഡിൽ പങ്കെടുത്തവർ, ബിഎസ്എഫ് സിആർപിഎഫ്, അർധസൈനിക വിഭാഗങ്ങളിൽ സേവനപരിചയം. താത്പര്യമുള്ളവർ രേഖകളുടെ സ്വയംസാക്ഷ്യപ്പെടുത്തിയ പകർപ്പുകളുമായി രാവിലെ ഏഴിന് ഗ്രൗണ്ടിലെത്തണം. ശാരീരിക ക്ഷമതാ പരീക്ഷയിൽ വിജയിക്കുന്നവർക്കുള്ള അഭിമുഖ പരീക്ഷ 26, 27 തീയതികളിൽ രാവിലെ 8.30ന് സർവകലാശാലയിൽ നടക്കും. വിശദവിവരങ്ങൾ സർവകലാശാല വെബ്സൈറ്റിൽ.
ഡിപ്ലോമ കോഴ്സ് പ്രവേശനം
സർവകലാശാല ഡിപ്പാർട്ട്മെന്റ് ഓഫ് ലൈഫ് ലോംഗ് ലേണിംഗ് ആൻഡ് എക്സ്റ്റൻഷൻ നടത്തുന്ന ഡിപ്ലോമ കോഴ്സുകളിലേക്ക് പ്രവേശനം നേടാം. ഡിപ്ലോമ ഇൻ യോഗിക് സയൻസ് കോഴ്സിലേക്കുള്ള പ്രവേശനം 15ന് രാവിലെ 10ന് സർവകലാശാലയിലെ ലൈഫ് ലോംഗ് ലേണിംഗ് ആൻഡ് എക്സ്റ്റൻഷൻ ഡിപ്പാർട്ട്മെന്റിൽ നടക്കും. യോഗ്യത: പ്ലസ്ടു, പ്രിഡിഗ്രി ജയം, സർട്ടിഫിക്കറ്റ് കോഴ്സ് ഇൻ യോഗിക് സയൻസ് ജയം. ഡിപ്ലോമ ഇൻ ഓർഗാനിക് ഫാമിംഗ് കോഴ്സിലേക്കുള്ള പ്രവേശനം 19ന് നടക്കും. യോഗ്യത: പ്ലസ്ടു, പ്രിഡിഗ്രി ജയം, സർട്ടിഫിക്കറ്റ് കോഴ്സ് ഇൻ ഓർഗാനിക് ഫാമിംഗ് ജയം.