എയിംസ് പിജി കോഴ്സുകളിലേക്കുള്ള പ്രാരംഭ രജിസ്ട്രേഷൻ 21 വരെ
മെഡിക്കൽ വിദ്യാഭ്യാസ രംഗത്തു രാജ്യത്തെ ഏറ്റവും പ്രമുഖ സ്ഥാപനമായ ന്യൂഡൽഹിയിലെ ഓൾ ഇന്ത്യാ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിൽ (എയിംസ്) ബിരുദാനന്തര ബിരുദ കോഴ്സുകളിലേക്കുള്ള ബേസിക് രജിസ്ട്രേഷൻ ആരംഭിച്ചു. ഈ മാസം 21 വരെ രജിസ്ട്രേഷൻ നടത്താം.
ബേസിക് രജിസ്ട്രേഷൻ സ്വീകരിച്ചതും നിരാകരിച്ചതുമായി വിവരങ്ങൾ 26നു പ്രസിദ്ധീകരിക്കും.ബേസിക് രജിസ്ട്രേഷൻ അന്തിമനില മാർച്ച് 11ന് പ്രഖ്യാപിക്കും. മാർച്ച് 12 ന് പ്രോസ്പെക്ടസ് പ്രസിദ്ധീകരിക്കും. ബേസിക് രജിസ്ട്രേഷൻ വിജയകരമായി പൂർത്തിയാക്കിയവർക്കു മാത്രമേ ഈ ഘട്ടത്തിൽ അപേക്ഷ സമർപ്പിക്കാൻ കഴിയൂ.
എംഎസ്‌സി നഴ്സിംഗ്, എംഎസ്‌സി (ബയോ കെമിസ്ട്രി, ബയോ ഫിസിക്സ്, ഫാർമക്കോളജി, ഫിസിയോളജി, പെർഫ്യൂഷൻ ടെക്നോളജി, റീപ്രൊഡക്ടീവ് ബയോളജി ആൻഡ് ക്രിമിനൽ എംബ്രിയോളജി, ന്യൂക്ലിയർ മെഡിസിൻ ടെക്നോളജി, കാർഡിയോ വാസ്കുലർ ഇമേജിംഗ് ആൻഡ് എൻഡോ വാസ്കുലാർ ടെക്നോളജീസ്) , എം ബയോടെക്നോളജി കോഴ്സുകൾക്കും അപേക്ഷ ക്ഷണിച്ചിട്ടുണ്ട്. ജൂണ്‍ രണ്ടിനാണു പ്രവേശന പരീക്ഷ.
എംഎസ്‌സി/ എംബയോടെക്നോളജി കോഴ്സിന് എംബിബിഎസ്, ബിഡിഎസ്, ബിവിഎസ്‌സി, ബിപിടി, ബിഎസ്‌സി കോഴ്സുകൾ 55 ശതമാനം മാർക്കോടെ പാസായവർക്ക് അപേക്ഷിക്കാം. എംഎസ്‌സി അനാറ്റമി, ബയോകെമിസ്ട്രി, ബയോഫിസിക്സ്, ഫിസിയോളജി, ഫാർമക്കോളജി എന്നിവയ്ക്കും മുകളിൽ പറഞ്ഞതു തന്നെയാണ് അപേക്ഷിക്കാനുള്ള യോഗ്യത.
എം ബയോടെക്നോളജിക്ക് ബയോടെക്നോളജിയിൽ ബിടെക് നേടിയവർക്കും അപേക്ഷിക്കാം.
എംഎസ്‌സി പെർഫ്യൂഷൻ ടെക്നോളജി കോഴ്സിനു ബോട്ടണി, സുവോളജി, പെർഫ്യൂഷൻ ടെക്നോളജി എന്നിവയിൽ ബിരുദം നേടിയവർക്കും റിപ്രൊഡക്ടീവ് ബയോളജി ആൻഡ് ക്ലിനിക്കൽ എംബ്രിയോളജി കോഴ്സിന് ബയോളജിയിലും ബന്ധപ്പെട്ട വിഷയങ്ങളിലും ബിരുദം നേടിയവർക്കും ന്യൂക്ലിയാർ മെഡിസിൻ ടെക്നോളജി കോഴ്സിന് ഫിസിക്സ്, കെമിസ്ട്രി, മാത്തമാറ്റിക്സ്, ന്യൂക്ലിയാർ മെഡിസിൻ, റേഡിയോ തെറാപ്പി എന്നിവയിൽ ബിരുദം നേടിയവർക്കും കാർഡിയോ വാസ്കുലാർ ഇമേജിംഗ് ആൻഡ് എൻഡോ വാസ്കുലാർ ടെക്നോളജിക്ക് റേഡിയോഗ്രാഫിയിൽ ബിരുദം നേടിയവർക്കും അപേക്ഷിക്കാം.എംഎസ്‌സി നഴ്സിംഗ് കോഴ്സിന് 60 ശതമാനം മാർക്കോടെ ബിഎസ്‌സി നഴ്സിംഗ് പാസായവരായിരിക്കണം അപേക്ഷകർ.
ഫോണ്: 26589900, 26588500.