രാജ്യത്തെ ഏറ്റവും പ്രമുഖ സർവകലാശാലകളിൽ ഒന്നായ ജവഹർലാൽ നെഹ്റു യൂണിവേഴ്സിറ്റിയിലെ വിവിധ കോഴ്സുകൾകളിലെ അഡ്മിഷനു നടത്തുന്ന പ്രവേശന പരീക്ഷയായ ജെഎൻയു എൻട്രൻസ് എക്സാമിനേഷനും (ജഐൻയുഇഇ) ബയോടെക്നോളജി പ്രവേശനത്തിനുള്ള കംബൈൻഡ് എൻട്രൻസ് എക്സാമിനേഷൻ ഫോർ ബയോളജി (സിഇഇബി) പ്രവേശന പരീക്ഷയ്ക്ക് ഇപ്പോൾ അപേക്ഷിക്കാം. നാഷണൽ ടെസ്റ്റിംഗ് ഏജൻസിക്കാണു പരീക്ഷാ നടത്തിപ്പിന്റെ ചുമതല.
ഏപ്രിൽ 15നകം അപേക്ഷിക്കണം. ഏപ്രിൽ 16നകം അപേക്ഷാ ഫീസ് അടയ്ക്കണം. മൂന്നു മണിക്കൂറാണു പ്രവേശന പരീക്ഷാ സമയം. ആകെ 100 മാർക്കിന്റെ ചോദ്യങ്ങൾ ഉണ്ടായിരിക്കും. നെഗറ്റീവ് മാർക്ക് ഇല്ല. മേയ് 27, 28,29,30 തീയതികളിലാണു പ്രവേശന പരീക്ഷ. രാവിലെ 9.30 മുതൽ 12.30 വരെയും ഉച്ച കഴിഞ്ഞ് 2.30 മുതൽ 5.30 വരെയും രണ്ടു സെഷനുകളിലാണു പരീക്ഷ.
https://ntajnu.nic.in. എന്ന വെബ്സൈറ്റിലൂടെ ഓണ്ലൈനായി വേണം അപേക്ഷിക്കാൻ. ഒരാൾക്ക് മൂന്നു കോഴ്സുകൾക്കു വരെ അപേക്ഷിക്കാം.
ആലപ്പൂഴ, തിരുവനന്തപുരം, എറണാകുളം, കണ്ണൂർ, കാസർഗോഡ്, കൊല്ലം, കോഴിക്കോട് എന്നിവിടങ്ങളിൽ പരീക്ഷാ കേന്ദ്രങ്ങളുണ്ട്.
അപേക്ഷാ ഫീസ് പിജി പ്രോഗ്രാമുകൾക്ക് 530 രൂപ, സംവരണ വിഭാഗങ്ങൾക്ക് 310, ദാരിദ്യ്രരേഖയ്ക്കു താഴെയുള്ളവർക്ക് 110 രൂപ. രണ്ടു കോഴ്സുകൾക്ക് യഥാക്രമം 800, 415,215. മൂന്നു കോഴ്സുകൾക്ക് 1000, 500, 300 രൂപ. ബിഎ (ഓണേഴ്സ്) കോഴ്സിന് 400 രൂപ. സംവരണ വിഭാഗങ്ങൾക്ക് 265, ദാരിദ്യ്ര രേഖയ്ക്കു താഴെയുള്ളവർക്ക് 65 രൂപ. രണ്ടു കോഴ്സുകൾക്ക് യഥാക്രമം 575, 325,125. മൂന്നു കോഴ്സുകൾക്ക് 750, 380, 180 രൂപ.
ബയോ ടെക്നോളജി കോഴ്സിന് അ
പേക്ഷാ ഫീസ് 1000 രൂപ. സംവരണ വിഭാഗങ്ങൾക്ക് 500 രൂപ.
ജെഎൻയു
ഇന്റർനാഷണൽ സ്റ്റഡീസ്, ലാംഗ്വേജ്, ലിറ്ററേച്ചർ ആൻഡ് കൾച്ചറൽ, സോഷ്യൽ സയൻസസ്, ആർട്സ് ആൻഡ് എയ്സ്തറ്റിക്സ്, ലൈഫ് സയൻസസ്, എൻവയണ്മെന്റൽ സയൻസസ്, ഫിസിക്കൽ സയൻസസ്, കംപ്യൂട്ടേഷണൽ ആൻഡ് ഇന്റഗ്രേറ്റീവ് സയൻസസ്, ബയോടെക്നോളജി, സാൻസ്ട്രിറ്റ് ആൻഡ് ഇൻഡിക് സ്റ്റഡീസ്, എൻജിനിയറിംഗ്, മാനേജ്മെന്റ് ആൻഡ് എന്റർപ്രണർഷിപ്, സെന്റർ ഫോർ ഇ ലേണിംഗ്, മോളിക്യൂളാർ മെഡിസിൻസ്, സ്റ്റഡി ഓഫ് ലോ ആൻഡ് ഗവേണൻസ്, നാനോ സയൻസസ്, ഡിസാസ്റ്റർ റിസർച്ച്, സ്റ്റഡി ഓഫ് നോർത്ത് ഈസ്റ്റ് ഇന്ത്യ, നാഷണൽ സെക്യൂരിറ്റി സ്റ്റഡീസ് എന്നീ പഠന വകുപ്പുകളുടെ കീഴിലാണ് പിജി, ഗവേഷണ പ്രോഗ്രാമുകൾ.
സ്കൂൾ ഓഫ് ലാംഗ്വേജ്, ലിറ്ററേച്ചർ ആൻഡ് കൾച്ചറൽ സ്റ്റഡീസിനു കീഴിലാണു ബിഎ (ഓണേഴ്സ്) കോഴ്സുകൾ.
ബയോടെക്നോളജി
ഈ സംയുക്ത പ്രവേശനപരീക്ഷയുടെ മാർക്കിന്റെ അടിസ്ഥാനത്തിൽ രാജ്യത്തെ അന്പത്തിനാലു സർവകലാശാലകൾ, സ്ഥാപനങ്ങൾ നടത്തുന്ന എംഎസ്സി ബയോടെക്നോളജി, എംഎസ്സി അഗ്രികൾച്ചറൽ ബയോടെക്നോളജി, എംവിഎസ്സി ബയോടെക്നോളജി, എംടെക് ബയോടെക്നോളജി പ്രോഗ്രാമുകളിൽ പ്രവേശനം ലഭിക്കും.
കേരള കാർഷിക സർവകലാശാലയിലെയും കാലിക്കട്ട് സർവകലാശാലയിലെയും എംഎസ്സി ബയോടെക്നോളജി കോഴ്സുകളിലേക്കും കൊച്ചി ശാസ്ത്ര സാങ്കേതിക സർവകലാശാലയിലെ എംടെക് മറൈൻ ബയോടെക്നോളജി കോഴ്സിലേക്കും ഈ പ്രവേശന പരീക്ഷയിലൂടെയാണ് അഡ്മിഷൻ.
എംഎസ്സി ബയോടെക്നോളജി യോഗ്യത: ഫിസിക്കൽ, ബയോളജിക്കൽ, അഗ്രികൾച്ചറൽ, വെറ്ററിനറി ആൻഡ് ഫിഷറി സയൻസ്, ഫാർമസി, എൻജിനിയറിംഗ് ടെക്നോളജി വിഷയങ്ങളിലൊന്നിൽ 55 ശതമാനത്തിൽ കുറയാതെ ബാച്ചിലേഴ്സ് ഡിഗ്രി അല്ലെങ്കിൽ ബിഎസ് (ഫിസിഷ്യൻ അസിസ്റ്റന്റ്) ബിരുദം അല്ലെങ്കിൽ എംബിബിഎസ്/ബിഡിഎസ് ബിരുദം 55 ശതമാനം മാർക്കിൽ കുറയാതെ നേടി വിജയിച്ചിരിക്കണം.
എംഎസ്സി അഗ്രി. ബയോടെക്നോളജി/ എംവിഎസ്സി ബയോടെക്നോളജി യോഗ്യത: 55 ശതമാനം മാർക്കിൽ കുറയാതെ ബിഎസ്സി അഗ്രികൾച്ചർ, ഫോറസ്ട്രി, ബയോടെക്നോളജി, ബിവിഎസ്സി ആൻഡ് എഎച്ച് തുടങ്ങിയ യോഗ്യതയുള്ളവർക്ക് അപേക്ഷിക്കാം.
എംടെക് ബയോടെക്നോളജി യോഗ്യത: 60 ശതമാനം മാർക്കിൽ കുറയാതെ കെമിക്കൽ എൻജിനിയറിംഗ്/ബയോകെമിക്കൽ ഇൻഡ്സട്രിയൽ ബയോടെക്നോളജി/ ലതർ ടെക്നോളജി/ബയോടെക്നോളജി/ബയോമെഡിക്കൽ എൻജിനിയറിംഗ്/ബയോകെമിസ്ട്രി/ബയോ എൻജിനിയറിംഗ്/ ഫാർമസ്യൂട്ടിക്കൽ ടെക്നോളജി/ ഫുഡ് ടെക്നോളജി ബ്രാഞ്ചുകളിലൊന്നിൽ ബിഇ/ബിടെക് ബിരുദം അല്ലെങ്കിൽ കെമിസ്ട്രി, ഫിസിക്സ് ബയോഎൻജിനിയറിംഗ്/ മറൈൻ ബയോടെക്നോളജി/മറൈൻ ബയോളജി/അക്വാറ്റിക് ബയോളജി ആൻഡ് ഫിഷറീസ്/ എൻവയണ്മെന്റൽ ബയോടെക്നോളജി വിഷയങ്ങളിൽ 60 ശതമാനം മാർക്കിൽ കുറയാതെ എംഎസ്സി ഉള്ളവർക്ക് അപേക്ഷിക്കാം.
മുംബൈയിലെ ഇൻസ്റ്റിറ്റ്യൂട്ട് ഓഫ് കെമിക്കൽ ടെക്നോളജിയിൽ ബയോ പ്രോസസ് ടെക്നോളജി, ഫുഡ് ടെക്നോളജി, ഫാർമസ്യൂട്ടിക്കൽ ബയോ ടെക്നോളജി എന്നിവയിൽ എംടെക് കോഴ്സ് പ്രവേശനവും സിഇഇബിയുടെ അടിസ്ഥാനത്തിലാണ്.