റീജണൽ ഇൻസ്റ്റിറ്റ്യൂട്ടുകളിൽ ബിഎഡ്; പ്ലസ്ടുക്കാർക്ക് അപേക്ഷിക്കാം
നാഷണൽ കൗണ്സിൽ ഓഫ് എഡ്യൂക്കേഷൻ ആൻഡ് റിസർച്ചിന്റെ കീഴിലുള്ള റീജണൽ ഇൻസ്റ്റിറ്റ്യൂട്ട് ഓഫ് എഡ്യൂക്കേഷനുകളിൽ ഹൈസ്കൂൾ തലത്തിൽ മികച്ച അധ്യാപകരെ വാർത്തെടുക്കുക എന്ന ലക്ഷ്യത്തോടെ നടത്തുന്ന വിവിധ വിദ്യാഭ്യാസ കോഴ്സുകളിലേക്ക് പ്ലസ്ടുക്കാർക്ക് അപേക്ഷിക്കാം.
സയൻസ്, മാത്തമാറ്റിക്സ്, ഇംഗ്ലീഷ്, ഹ്യുമാനിറ്റീസ് വിഷയങ്ങളിൽ ബിഎഡിനു തുല്യമായ നാലു വർഷത്തെയും ആറു വർഷത്തെയും ഇന്റഗ്രേറ്റഡ് കോഴ്സുകളും റഗുലർ ബിഎഡ്, എംഎഡ് കോഴ്സുകളും മൂന്നു വർഷത്തെ ബിഎഡ്എംഎഡ് കോഴ്സുകളുമാണ് നടത്തുന്നത്. നാഷണൽ കൗണ്സിൽ ഓഫ് എഡ്യൂക്കേഷണൽ റിസർച്ച് ആൻഡ് ട്രെയിനിംഗി (എൻസിഇആർടി)നു കീഴിൽ ആജ്മിർ, ഭോപ്പാൽ, ഭുവനേശ്വർ, മൈസൂർ, ഷില്ലോംഗ്, ന്യൂഡൽഹി എന്നീ റീജണൽ ഇൻസ്റ്റിറ്റ്യൂട്ട് ഓഫ് എഡ്യൂക്കേഷനുകളിലും ന്യൂഡൽഹിയിലെ സെൻട്രൽ ഇൻസ്റ്റിറ്റ്യൂട്ട് ഓഫ് എഡ്യൂക്കേഷണൽ ടെക്നോളജി, ഭോപ്പാലിലെ പണ്ഡിറ്റ് സുന്ദർലാൽ ശർമ സെൻട്രൽ ഇൻസ്റ്റിറ്റ്യൂട്ട് ഓഫ് വൊക്കേഷണൽ എഡ്യൂക്കേഷൻ എന്നീ സ്ഥാപനങ്ങളിലും നടത്തുന്ന കോഴ്സുകളിലേക്കാണ് പ്രവേശനം.
ജൂണ് ഒന്പതിനു നടത്തുന്ന പൊതു പ്രവേശന പരീക്ഷയുടെ അടിസ്ഥാനത്തിലാണ് അഡ്മിഷൻ. ഓണ് ലൈനായി മേയ് 12നകം അപേക്ഷിക്കണം. അപേക്ഷാ ഫീസ് 900 രൂപ. സംവരണ വിഭാഗങ്ങൾക്കും വികലാംഗർക്കും 450 രൂപ. ഒരാൾക്ക് ഒന്നിലേറെ കോഴ്സുകൾക്ക് അപേക്ഷിക്കാം. കേരളത്തിൽ എറണാകുളത്തു മാത്രമാണു പരീക്ഷാ കേന്ദ്രം. മാതൃകാ ചോദ്യ പേപ്പർ വെബ്സൈറ്റിലുണ്ട്.
വെബ്സൈറ്റ്: https://cee.nce rt.gov.in.
കോഴ്സുകൾ
ബിഎസ്സി ബിഎഡ്, ബിഎ ബിഎഡ്നാലു വർഷം. എംഎസ്സി എഎഡ് ആറുഅഞ്ചു വർഷം. ബിഎഡ്രണ്ടു വർഷം. എംഎഡ്രണ്ടു വർഷം. ബിഎഡ്എംഎഡ്മൂന്നു വർഷം. ഫിസിക്സ്, കെമിസ്ട്രി, മാത്തമറ്റിക്സ് സ്ട്രീമിലും ബോണി, സുവോളജി, കെമിസ്ട്രി സ്ട്രീമിലുമായി നടത്തുന്ന ബാച്ചിലർ ഓഫ് സയൻസ് എഡ്യൂക്കേഷന് ബന്ധപ്പെ വിഷയത്തിൽ 50 ശതമാനം മാർക്കോടെ പ്ലസ്ടു പാസായവർക്കും അവസാന വർഷ വിദ്യാർഥികൾക്കും അപേക്ഷിക്കാം. ഇംഗ്ലീഷ് ലിറ്ററേച്ചർ, സോഷ്യൽ സയൻസസ്, ലാംഗ്വേജ് സ്റ്റഡീസ് സ്ട്രീമിലും ഇംഗ്ലീഷ് ലിറ്ററേച്ചർ, സോഷ്യൽ സയൻസസ്, ജ്യോഗ്രഫി സ്ട്രീമിലുമായി നടത്തുന്ന ബാച്ചിലർ ഓഫ് ആർട്സ് എഡ്യൂക്കേഷൻ കോഴ്സിന് ഇംഗ്ലീഷ്, മലയാളം എന്നിവയും ഹിസ്റ്ററി, ജ്യോഗ്രഫി, ഇക്കണോമിക്സ്, പൊളിറ്റിക്കൽ സയൻസ്, സോഷ്യോളജി എന്നിവയിൽ ഏതെങ്കിലും രണ്ടു വിഷയവും പഠിച്ച് 50 ശതമാനം മാർക്കോടെ പ്ലസ്ടു പാസായവർക്ക് അപേക്ഷിക്കാം.
ഫിസിക്സ്, കെമിസ്ട്രി, മാത്തമറ്റിക്സ് എന്നിവയിൽ പ്ലസ്ടു അധ്യാപകരാകാൻ പരിശീലനം നൽകുന്ന ആറു വർഷത്തെ മാസ്റ്റർ ഓഫ് സയൻസ് എഡ്യൂക്കേഷൻ കോഴ്സിന് ഫിസിക്സ്, കെമിസ്ട്രി, മാത്തമറ്റിക്സ് എടുത്ത് 50 ശതമാനം മാർക്കോടെ പ്ലസ്ടു പാസായവർക്ക് അപേക്ഷിക്കാം. രണ്ടു വർഷത്തെ മാസ്റ്റർ ഓഫ് എഡ്യൂക്കേഷൻ കോഴ്സിന് 50 ശതമാനം മാർക്കോടെ ബിഎഡ് നേടിയവർക്ക് അപേക്ഷിക്കാം.
55 ശതമാനം മാർക്കോടെ ബിരുദാനന്തര ബിരുദം നേടിയവർക്ക് ബിഎഡ്എംഡ് കോഴ്സിന് അപേക്ഷിക്കാം.ഗൈഡൻസ് ആൻഡ് കൗണ്സലിംഗിൽ ഒരു വർഷത്തെ ഡിപ്ലോമ കോഴ്സിനും അപേക്ഷ ക്ഷണിച്ചിട്ടുണ്ട്. 50 ശതമാനം മാർക്കോടെ ബിഎഡ് നേടിയവർക്ക് അപേക്ഷിക്കാം.
പ്രവേശന പരീക്ഷ
ഇംഗ്ലീഷ് ഭാഷയിൽ 40 മാർക്കിന്റെ 20 ചോദ്യങ്ങളും അധ്യാപന അഭിരുചി അളക്കുന്നതിന് 60 മാർക്കിന്റെ 30 ചോദ്യങ്ങളും ബൗദ്ധിക നിലവാരം പരീക്ഷിക്കുന്നതിന് 60 മാർക്കിന്റെ 30 ചോദ്യങ്ങളുമാണ് ഉണ്ടായിരിക്കുക. രണ്ടു മണിക്കൂറാണു പരീക്ഷയുടെ ദൈർഘ്യം.