ഐഐഎംസിയിൽ പിജി ഡിപ്ലോമ പ്രവേശന പരീക്ഷ മേയ് 25, 26 തീയതികളിൽ
കേന്ദ്ര വാർത്താ വിതരണ പ്രക്ഷേപണ മന്ത്രാലയത്തിനു കീഴിലുള്ള ഇന്ത്യൻ ഇൻസ്റ്റിറ്റ്യൂട്ട് ഓഫ് മാസ് കമ്യൂണിക്കേഷനിൽ ബിരുദാനന്തര ബിരുദ ഡിപ്ലോമ കോഴ്സിന് അപേക്ഷ ക്ഷണിച്ചു. ഇൻസ്റ്റിറ്റ്യൂട്ടിന്റെ കോട്ടയം ഉൾപ്പെടെയുള്ള കേന്ദ്രത്തിൽ പ്രിന്റ്, ഇലക്ട്രോണിക്, അഡ്വർടൈസിംഗ്, പബ്ലിക് റിലേഷൻസ് കോഴ്സുകൾക്കാണ് അപേക്ഷ ക്ഷണിച്ചിട്ടുള്ളത്.
കോട്ടയം, ന്യൂഡൽഹി, ഐസ്വാൾ (മിസോറാം), അമരാവതി (മഹാരാഷ്ട്ര), ജമ്മു കേന്ദ്രങ്ങളിലാണു ജേർണലിസം കോഴ്സ്. റേഡിയോ ആൻഡ് ടെലിവിഷൻ ജേർണലിസം, അഡ്വർടൈസിംഗ് ആൻഡ് പബ്ലിക് റിലേഷൻസ് കോഴ്സുകൾ ന്യൂഡൽഹി കേന്ദ്രത്തിൽ മാത്രമാണുള്ളത്.
ബിരുദധാരികൾക്കും അവസാന വർഷ വിദ്യാർഥികൾക്കും അപേക്ഷിക്കാം. 1994 ഓഗസ്റ്റ് ഒന്നിനോ അതിനു ശേഷമോ ജനിച്ചവരായിരിക്കണം അപേക്ഷകർ. സംവരണ വിഭാഗങ്ങൾക്ക് ഇളവുണ്ട്. ജേർണലിസം കോഴ്സിനു കോട്ടയം സെന്ററിൽ 17 സീറ്റാണുള്ളത്. ഒരു വർഷത്തെ ജേർണലിസം കോഴ്സിനു ഫീസ് 95500 രൂപ. റേഡിയോ ആൻഡ് ടെലിവിഷൻ ജേർണലിസം കോഴ്സിനു ഫീസ് 1,68,500 രൂപ. അഡ്വർടൈസിംഗ് ആൻഡ് പബ്ലിക് റിലേഷൻസ് കോഴ്സിനു ഫീസ് 1,31, 500 രൂപ. കോട്ടയത്തു നടത്തുന്ന മലയാളം ജേർണലിസം കോഴ്സിന് 55,500 രൂപയാണു ഫീസ്.
പ്രവേശന പരീക്ഷ മേയ് 25, 26 തീയതികളിൽ നടത്തും. കേരളത്തിൽ കോഴിക്കോടും കോട്ടയവും പരീക്ഷാ കേന്ദ്രങ്ങളാണ്. ന്യൂഡൽഹി, അഹമ്മദാബാദ്, ഐസോൾ, ബംഗളൂരു, ഭോപ്പാൽ, ഭുവനേശ്വർ, ചെന്നൈ, ഗോഹട്ടി, ഹൈദരാബാദ്, ജമ്മു, കോൽക്കത്ത, ലക്നോ, മുംബൈ, നാഗ്പുർ, പാറ്റ്ന, റായ്പുർ, റാഞ്ചി, ശ്രീനഗർ എന്നിവിടങ്ങളിലാണു മറ്റു പരീക്ഷാ കേന്ദ്രങ്ങൾ. ഓൺലൈനായി അപേക്ഷ സമർപ്പിക്കാം. അപേക്ഷിക്കേണ്ട അവസാന തീയതി മേയ് 12. ഓരോ കോഴ്സിനും പ്രത്യേകം അപേക്ഷിക്കണം. അപേക്ഷാ ഫീസ് 1,500 രൂപ. സംവരണ വിഭാഗങ്ങൾക്ക് 1,000 രൂപ.
മലയാളം ജേർണലിസത്തിനുള്ള പ്രവേശന പരീക്ഷ മേയ് 25നാണ്. വിലാസം: രജിസ്ട്രാർ, ഇന്ത്യൻ ഇൻസ്റ്റിറ്റ്യൂട്ട് ഓഫ് മാസ് കമ്യൂണിക്കേഷൻ, അരുണ അസഫ് അലി മാർഗ്, ന്യൂഡൽഹി110067. വെബ്സൈറ്റ്: www.iimc. gov.in. ഫോണ്: കോട്ടയം 914812730161. ന്യൂഡൽഹി: +911126741073.