ആശ്രിത നിയമനം: അപേക്ഷ വേഗത്തിൽ നൽകുക

എന്‍റെ പിതൃ സഹോദരന്‍റെ മകൻ മൃഗസംരക്ഷണ വകുപ്പിൽ ലൈവ് സ്റ്റോക്ക് ഇൻസ്പെക്ടർ ആയി ജോലി ചെയ്തുവരവേ ഓഗസ്റ്റ് 10ന് രോഗബാധിതനായി മരണമടഞ്ഞു. അദ്ദേഹത്തിന് 11 വർഷത്തെ സർവീസുണ്ട്. ഭാര്യയും മൈനറായ ആറും മൂന്നും വയസുള്ള രണ്ടു കുട്ടികളുമുണ്ട്. ആശ്രിതനിയമനം ലഭിക്കേണ്ടത് അദ്ദേഹത്തിന്‍റെ ഭാര്യക്കാണ്. ഭാര്യ പ്ലസ്ടു പാസായതാണ്. ഇതിന് ആവശ്യമായ രേഖകൾ എന്തൊക്കെയാണ്? ആർക്കാണ് അപേക്ഷ നൽകേണ്ടത്? എന്തൊക്കെ നടപടികളാണ് കൈക്കൊള്ളേണ്ടത്?
രഘുവരൻ, കൂത്താട്ടുകുളം

ആശ്രിത നിയമനത്തിനായുള്ള അപേക്ഷ എത്രയും പെട്ടെന്ന് ജോലി ചെയ്തിരുന്ന സ്ഥാപനം മുഖേന മേലധികാരിക്കാണ് കൊടുക്കേണ്ടത്. നിർദിഷ്ട അപേക്ഷയോടൊപ്പം അവകാശ സർട്ടിഫിക്കറ്റിന്‍റെയും മരണമടഞ്ഞ ജീവനക്കാരന്‍റെ മരണസർട്ടിഫിക്കറ്റിന്‍റെ കോപ്പിയും സമർപ്പിക്കേണ്ടതാണ്. കൂടാതെ ആശ്രിത നിയമനത്തിന് അപേക്ഷിക്കുന്ന ആളിന്‍റെ വിദ്യാഭ്യാസ യോഗ്യത, ജനനത്തീയതി എന്നിവ തെളിയിക്കുന്നതിനുള്ള സർട്ടിഫിക്കറ്റുകളുടെ പകർപ്പ് ആവശ്യമാണ്. അച്ഛൻ, അമ്മ, കുട്ടികൾ എന്നിവരുടെ സമ്മതപത്രം (അപേക്ഷിക്കുന്ന ആളിന് ജോലി നൽകുന്നതിന് എതിർപ്പില്ല എന്നു കാണിക്കുന്ന സമ്മതപത്രം) കുടുംബവരുമാന സർട്ടിഫിക്കറ്റിന്‍റെ കോപ്പി എന്നിവ കൂടി അപേക്ഷയോടൊപ്പം സമർപ്പിക്കേണ്ടതാണ്.