വിദേശത്ത് ജോലിക്കു പോകാം, സർവീസിനെ ബാധിക്കും

സ്റ്റാറ്റിസ്റ്റിക്സ് വകുപ്പിൽ ഇൻവെസ്റ്റിഗേറ്ററാണ്. എന്‍റെ പ്രൊബേഷൻ ഡിക്ലയർ ചെയ്തിട്ടില്ല. എനിക്ക് ഉടൻ വിദേശത്ത് പോകേണ്ടതുണ്ട്. വിദേശത്ത് ജോലി ചെയ്യുന്നതിനാണ് പോകുന്നത്. അഞ്ചു വർഷത്തെ അവധി ലഭിക്കുന്നതിന് തടസമുണ്ടോ? അഞ്ചു വർഷം കാലാവധി പൂർത്തിയാകുന്നതിനു മുന്പ് തിരികെ വന്നാൽ അവധി തീർന്നതിനുശേഷം മാത്രമേ ജോലിയിൽ പ്രവേശിക്കാൻ സാധിക്കുകയുള്ളോ? അതുപോലെ എന്‍റെ സർവീസ്, സീനിയോറിറ്റി എന്നിവ നഷ്ടപ്പെടുമോ? ശൂന്യവേതനാവധി എടുക്കുന്നതുകൊണ്ട് മറ്റ് എന്തെങ്കിലും പ്രശ്നം ഉണ്ടോ?
ജേക്കബ്, ഇരിട്ടി

പ്രൊബേഷൻ ഡിക്ലയർ ചെയ്യുന്നതിനു മുന്പ് ശൂന്യവേതനാവധി എടുത്ത് വിദേശത്തു പോകുന്നതിന് മറ്റ് സാങ്കേതിക പ്രശ്നം ഒന്നുംതന്നെയില്ല. തുടർച്ചയായി അഞ്ചു വർഷത്തേക്കുള്ള ശൂന്യവേതനാവധിയാണ് അനുവദിക്കുക. പിന്നീട് ഇതു വീണ്ടും നീട്ടി എടുക്കുന്നതിന് പ്രശ്നമൊന്നുമില്ല. പ്രൊബേഷൻ ഡിക്ലയർ ചെയ്യാതെ ശൂന്യവേതനാവധി എടുത്താൽ അത് സർവീസിനെ ബാധിക്കും. അവധിക്കുശേഷം വീണ്ടും തിരികെ ജോലിയിൽ പ്രവേശിക്കുന്പോൾ ആദ്യംതൊട്ട് സർവീസിൽ പ്രവേശിച്ചതായി കണക്കാക്കും. അതായത് സർവീസ് നഷ്ടപ്പെടും. അതുപോലെ സീനിയോറിറ്റി ഇല്ലാതാകും. ആദ്യമായി സർവീസിൽ പ്രവേശിച്ചതായേ കണക്കാക്കുകയുള്ളൂ. അവധി പൂർത്തീകരിക്കുന്നതിനു മുന്പ് ബാക്കി അവധി കാൻസൽ ചെയ്ത് ജോലിയിൽ തിരികെ പ്രവേശിക്കുന്നതിന് തടസമില്ല.