അവധിക്കു മൂന്നുമാസം മുന്പ് അപേക്ഷിക്കണം

സർക്കാർ ജീവനക്കാരുടെ ശൂന്യവേതനാവധി സംബന്ധിച്ച പുതിയ ഉത്തരവ് പുറപ്പെടുവിച്ചതായി അറിയാൻ കഴിഞ്ഞു. ശൂന്യവേതനാവധി പ്രകാരം അപേക്ഷ സ്വീകരിക്കേണ്ടതിന്‍റെയും തുടർനടപടികൾ സ്വീകരിക്കേണ്ടതിന്‍റെയും സമയം ക്രമീകരിച്ച് ഉത്തരവായതായാണ് അറിയാൻ കഴിഞ്ഞത്. ഇതിൽ ഏതെല്ലാം അവധികളാണ് ബാധകമായിട്ടുള്ളത് എന്ന വിവരം കൂടി ലഭിച്ചാൽ കൂടുതൽ സൗകര്യപ്രദമായിരുന്നു. എല്ലാ ശൂന്യവേതനാവധികളേയും ഇതു ബാധിക്കുമോ എന്നുള്ള വിവരം കൂടി അറിയാൻ കഴിയുമോ?
കെ.ആർ. ആനി,
തിരുവല്ല

കെഎസ്ആർ പാർട്ട് ഒന്ന് അനുബന്ധം 12എ, 12 സി പ്ര കാരം സ്വദേശത്തോ വിദേശത്തോ ജോലി നോക്കുന്നതിനും പങ്കാളിയോടൊത്ത് വിദേശത്ത് താമസിക്കുന്നതിനുമുള്ള അവധികൾക്ക് അപേക്ഷിക്കുന്നതിന് അപേക്ഷകളിൽ സമയക്രമം സംബന്ധിച്ചും തുടർനടപടികൾ എടുക്കുന്നതു സംബന്ധിച്ചും സർക്കാർ പുതിയ ഉത്തരവ് ഇറക്കിയിട്ടുണ്ട്. സ.ഉ (പി)നം.170/2018 ധന. തീയതി 05/11/2018 എന്നുള്ള സർക്കാർ ഉത്തരവിൽ ഇത് വിശദീകരിച്ചിട്ടുണ്ട്. ഇതിൻപ്രകാരം അവധി ആരംഭിക്കേണ്ട തീയതിക്ക് മൂന്നു മാസം മുന്പ് ഓഫീസ് മേധാവിക്ക് അപേക്ഷ സമർപ്പിക്കണം. അപേക്ഷ ലഭിച്ച ഓഫീസ് മേധാവി ഒരാഴ്ചയ്ക്കകം തുടർനടപടികൾക്കായി മേലധികാരിക്ക് സമർപ്പിക്കണം എന്നാണ് നിർദേശിച്ചിട്ടുള്ളത്.