പ്രമോഷൻ വേണ്ടെന്നുവച്ചാൽ സമയബന്ധിത ഹയർഗ്രേഡിനെ ബാധിക്കും

ഗവ. ഹൈസ്കൂളിൽ എച്ച് എസ്എ ആയി 21 വർഷമായി ജോലി ചെയ്യുന്നു. മൂന്നു വർഷം മുന്പ് ഒരു വർഷത്തേക്ക് താത്കാലികമായി പ്രമോഷൻ ആവശ്യമില്ലായെന്ന് രേഖാമൂലം റിപ്പോർട്ട് ചെയ്തിരുന്നു. പ്രമോഷൻ ലഭിച്ചാൽ ദൂരെ സ്ഥലത്തേക്ക് പോകേണ്ടിവരുന്നതുകൊണ്ടാണ് ഇപ്രകാരം ചെയ്തത്. എന്നാൽ 2019 ജൂണിൽ എനിക്ക് 22 വർഷത്തെ സർവീസ് പൂർത്തിയാകും. അപ്പോൾ 22 വർഷത്തെ സെലക്ഷൻ ഗ്രേഡ് ലഭിക്കുന്നതിന് എന്തെങ്കിലും തടസമുണ്ടോ?
ജിസമ്മ തോമസ്,
കടുത്തുരുത്തി

നിലവിൽ സർവീസിലുള്ള ജീവനക്കാർ പ്രമോഷൻ സ്ഥിരമായോ താത്കാലിക സമയത്തേക്കോ വേണ്ടെന്നു വച്ചാൽ അത് സമയബന്ധിത ഹയർ ഗ്രേഡിനെ ബാധിക്കും. എത്രവർഷത്തേക്കാണോ പ്രമോഷൻ വേണ്ടെന്നു വച്ചത്, ആ കാലയ ളവ് ഒഴിവാക്കിക്കൊണ്ടാണ് സമയബന്ധിത ഹയർഗ്രേഡിന് അർഹത ലഭിക്കുന്നത്. അതായത് പ്രമോഷൻ വേണ്ടെന്നുവച്ച അത്രയും കാലം കൂടി മുന്പോട്ടു പോയെങ്കിൽ മാത്രമേ ആ സമയബന്ധിത ഹയർഗ്രേഡ് ലഭിക്കുകയുള്ളൂ. പത്താം ശന്പള പരിഷ്കരണത്തിലെ ഉത്തരവിന്‍റെ അനക്സർ മൂന്നിലെ 17-ാം പാരഗ്രാഫിൽ ഇത് വ്യക്തമാക്കിയിട്ടുണ്ട്. സ.ഉ(പി) 7/2016 ധന. തീയതി. 20/01/2016.