മാതാപിതാക്കളെ സംരക്ഷിക്കുമെന്ന് സത്യവാങ്മൂലം നൽകിയാൽ ജോലി കിട്ടും

സമാശ്വാസ തൊഴിൽദാന പദ്ധതിപ്രകാരമുള്ള നിയമനം ലഭിക്കുന്നതിന് വിവാഹിതരായ മകൻ/മകൾ എന്നിവരെ പരിഗണിക്കുന്നതായി അറിയാൻ കഴിഞ്ഞു. എന്‍റെ അച്ഛൻ സർവീസിലിരിക്കെ ഒരുമാസം മുന്പ് മരണമടഞ്ഞു. ഞാൻ ഏക മകളാണ്. മറ്റ് ജോലികളൊന്നുംതന്നെയില്ല. വിവാഹിതയായിട്ട് മൂന്നു വർഷം കഴിഞ്ഞു. ഭർത്താവിന് സർക്കാർ ജോലി ഇല്ല. ഞാൻ അമ്മയോടൊപ്പമാണ് താമസിക്കുന്നത്. ആശ്രിത നിയമനം ലഭിക്കുന്നതിന് എനിക്ക് അർഹതയുണ്ടോ? ഉണ്ടെങ്കിൽ എന്തൊക്കെ നിബന്ധനകളാണ് ഇപ്പോഴുള്ളത്?
ശ്രീജ, രാമപുരം

സമാശ്വാസ തൊഴിൽദാന പദ്ധതിപ്രകാരമുള്ള നിയമനം ലഭിക്കുന്നതിന് വിവാഹിതനായ മകനേയും വിവാഹിതയായ മകളേയും ഇപ്പോൾ പരിഗണിക്കും. ഇതോടൊപ്പം വരുമാന സർട്ടിഫിക്കറ്റ് ആവശ്യമാണ്. കൂടാതെ മരണമടഞ്ഞ ഉദ്യോഗസ്ഥനെ ആശ്രയിച്ചാണ് വിവാഹത്തിനുശേഷവും കഴിഞ്ഞിരുന്നത് എന്ന തഹസീൽദാറിന്‍റെ സർട്ടിഫിക്കറ്റ് കൂടി ഇതിന് ആവശ്യമാണ്. ഇപ്പോൾ പുതിയതായി മറ്റൊരു നിബന്ധന കൂടി കൂട്ടി ചേർത്തിട്ടുണ്ട്. അതായത് സമാശ്വാസ തൊഴിൽദാന പദ്ധതി പ്രകാരം ജോലി ലഭിച്ചാൽ അച്ഛനെ /അമ്മയെ സംരക്ഷിച്ചുകൊള്ളാമെന്നുള്ള സത്യവാങ്മൂലം കൂടി സമർപ്പിക്കണം.