പെൻഷൻ പാസാക്കി കിട്ടാൻ വൈകും

പഞ്ചായത്തുവകുപ്പിൽ എൽഡി ക്ലർക്കാണ്. പ്രൊബേഷൻ ഡിക്ലയർ ചെയ്യാൻ താമസിച്ചുപോയി. 50 വയസ് പൂർത്തിയായ ശേഷമാണ് പ്രൊബേഷൻ ഡിക്ലയർ ചെയ്തത്. അതിനുശേഷം ശന്പള പരിഷ്കരണമെല്ലാം ചേർത്ത് ലോക്കൽ ഫണ്ടിലേക്ക് അയച്ചെങ്കിലും ഇതേവരെ സർവീസ് ബുക്ക് ലഭിച്ചിട്ടില്ല. 2019 മേയ് 31ന് വിരമിക്കും. സർവീസ് ബുക്ക് തിരികെ കിട്ടാത്തത് എന്‍റെ പെൻഷനെ ബാധിക്കും. സർവീസ് ബുക്ക് പെട്ടെന്നു ലഭിക്കുവാൻ എന്തെങ്കിലും ചെയ്യേണ്ടതുണ്ടോ?
ജോസ് ജോസഫ് ,
രാമപുരം

വിരമിക്കുന്നതിന് ഒരു വർഷം മുന്പെങ്കിലും പെൻഷൻ ലഭിക്കുന്നതിനുള്ള അപേക്ഷ സമർപ്പിക്കേണ്ടതാണ്. കുറഞ്ഞത് ആറുമാസം മുന്പെങ്കിലും പെൻഷൻ സംബന്ധിച്ച വിവരങ്ങൾ പെൻഷൻ പാസാക്കുന്ന അധികാരിക്ക് അയച്ചിരിക്കേണ്ടതാണ്. കാലതാമസം വന്നാൽ അത് പെൻഷൻ പാസാക്കി കിട്ടുന്നതിൽ താമസം നേരിടും. പെൻഷൻ അനുവദിക്കുന്നതിനുവേണ്ടിയുള്ള രേഖകൾ തയാറാക്കാൻ സർവീസ് ബുക്ക് ലഭ്യമാക്കണം എന്നു കാണിച്ചുകൊണ്ടുള്ള അപേക്ഷ ഓഫീസ് മേധാവി മുഖേന പെൻഷൻ അനുവദിക്കുന്ന ഓഫീസർക്ക് സമർപ്പിക്കുക. താമസം വരുന്നത് പെൻഷൻ ലഭിക്കുന്നതിന് ബുദ്ധിമുട്ടുണ്ടാകും എന്ന വിവരം കൂടി അപേക്ഷ യിൽ കാണിക്കുക.