എയ്ഡഡ് സ്കൂൾ അധ്യാപക- അനധ്യാപക നിയമനാംഗീകാരം ഓണ്‍ലൈനിൽ

എയ്ഡഡ് സ്കൂൾ അധ്യാപ ക- അനധ്യാപകരുടെ 2019-20 വർഷത്തെ നിയമനാംഗീകാരം ഓണ്‍ലൈൻ ആയി നിർവഹിക്കുന്നതിനുള്ള പ്രവർത്തനങ്ങൾ നടക്കുന്നു. എല്ലാ വിദ്യാഭ്യാസ ഓഫീസുകളിലെയും ബന്ധപ്പെട്ട ജീവനക്കാർക്ക് ഇതിനകംതന്നെ പരിശീലനം നൽകിയിട്ടുണ്ട്. ഇതുമായി ബന്ധപ്പെട്ട് താഴെപ്പറയുന്ന തുടർപ്രവർത്തനങ്ങൾ എല്ലാ വിദ്യാഭ്യാസ ഓഫീസർമാരും ജില്ലാ നോഡൽ ഓഫീസർമാരുടെ സഹായത്തോടെ സമയബന്ധിതമായി നിർവഹിക്കേണ്ടതാണ്.
സംസ്ഥാനത്തെ എല്ലാ വിദ്യാഭ്യാസ ഓഫീസുകളിലും റീസെറ്റ് ചെയ്തു ഡാറ്റ പരിശോധിക്കേണ്ടതാണ്. ഓഫീസുകളിലെ ജീവനക്കാരുടെ പേര്, പിഇഎൻ, മൊബൈൽ നന്പർ, ഇമെയിൽ ഐഡി എന്നിവ കൃത്യമായി രേഖപ്പെടുത്തിയിട്ടുണ്ടെന്ന് ഉറപ്പുവരുത്തേണ്ടതാണ്. എല്ലാ ഓഫീസുകളിലേയും ജീവനക്കാരുടെ യൂസർ ഐഡി അവരുടെ പിഇഎൻ തന്നെയാണെന്നും ആയത് കൃത്യമായി തന്നെയാണ് യൂസർ ലോഗിനിൽ രേഖപ്പെടുത്തിയിട്ടുള്ളതെന്നും ഉറപ്പുവരുത്താൻ അതാത് വിദ്യാഭ്യാസ ഓഫീസർമാർ പ്രത്യേകം ശ്രദ്ധിക്കേണ്ടതാണ്.

ജില്ലാ/ഉപ ജില്ലാ വിദ്യാഭ്യാസ ഓഫീസുകളുടെ പരിധിയിൽ വരുന്ന എല്ലാ സ്കൂളുകളുടേയും പേരുവിവരം, സ്കൂൾ ലിസ്റ്റുമായി ഒത്തുനോക്കി ആയത് തന്നെയാണ് വെബ് സൈറ്റിൽ എന്‍റർ ചെയ്തിരിക്കുന്നതെന്ന് ഉറപ്പാക്കേണ്ടതാണ്. ഒന്നിലധികം സ്കൂളുകളുള്ള വ്യക്തിഗത/കോർപറേറ്റ് മാനേജ് മെന്‍റിന്‍റെ കീഴിലെ എല്ലാ സ്കൂളുകളും മാപ്പ് ചെയ്തിട്ടുണ്ടെന്നുകൂടി ഉറപ്പുവരുത്തേണ്ടത് അതാത് ഹെഡ്ക്വാർട്ടർ ഡിഇഒമാരാണ്.

മാനേജർമാർക്കുകൂടി ഈ സോഫ്റ്റ്‌‌വെയർ സംബന്ധിച്ച് അവബോധം നൽകേണ്ടതുണ്ട്. സോഫ്റ്റ് വെയർ പരിചയപ്പെടുത്തൽ പരിപാടി ഉപജില്ലാ തലത്തിൽ നടത്തേണ്ടതും അതിൽ ഉപജില്ലയുടെ പരിധിയിൽ വരുന്ന ഹൈസ്കൂൾ മാനേജർമാരെ കൂടി ഉൾപ്പെടുത്തേണ്ടതുമാണ്. ഉപജില്ലയിലെ എയ്ഡഡ് സ്കൂളുകളുടെ എണ്ണത്തെ അടിസ്ഥാനപ്പെടുത്തി ഒന്നിലധികം ഉപജില്ലകളെ കൂട്ടിച്ചേർത്ത് ഈ പരിപാടി നടത്താം. ജില്ലാ വിദ്യാഭ്യാസ ഒാഫീസർമാരുടെ നിയന്ത്രണത്തിലും അവരുടെ സാന്നിധ്യത്തിലും ഉപജില്ലാ വിദ്യാഭ്യാസ ഒാഫീസർമാരാണ് ഈ പരിപാടി നടത്തേണ്ടത്. മുന്പ് പരിശീലനം ലഭിച്ച ജീവനക്കാരുടെ സേവനം ഇതിന് ഉപയോഗപ്പെടുത്താവുന്നതാണ്. ഈ പരിപാടി സംബന്ധിച്ച വിശദാംശങ്ങൾ, വേദി, തീയതി എന്നീ വിവരങ്ങൾ അതാത് ജില്ലാ നോഡൽ ഒാഫീസർമാരെ മുൻകൂട്ടി അറിയിക്കേണ്ടതും ജില്ലാ നോഡൽ ഒാഫീസർമാർ വിവരങ്ങൾ ക്രോഡീകരിച്ച് ബന്ധപ്പെട്ട സംസ്ഥാന നോഡൽ ഒാഫീസർമാരെ അറിയിക്കേണ്ടതുമാണ്.

നിർദിഷ്ട സമയപരിധിക്കുള്ളിൽ വെബ്സൈറ്റ് പരിശോധിച്ച് കൃത്യത ഉറപ്പുവരുത്താത്തതു കാരണം ഏതെങ്കിലും മാനേജർക്ക് അപേക്ഷ ഒാൺലൈനായി സമർപ്പിക്കാൻ സാധിക്കാതെ വരികയോ ഒാഫീസിൽനിന്ന് തുടർനടപടികൾ സ്വീകരിക്കാൻ കഴിയാതെ വരികയോ ഉണ്ടായാൽ ആയതിന്‍റെ പൂർണ ഉത്തരവാദിത്വം അതാത് ജില്ലാ ഉപജില്ലാ ഒാഫീസർമാർക്കായിരിക്കും.