ദുഃഖങ്ങൾ അകറ്റാൻ സജ്ജനസംഗമം വേണം

രാമ-സീത-ലക്ഷ്മണൻമാരുടെ വനയാത്ര ഭരദ്വാജമുനിയുടെ ആശ്രമത്തിൽ നിന്നാരംഭിക്കുന്നു. വാല്മീകി, അത്രി, ശരഭംഗൻ, അഗസ്ത്യർ തുടങ്ങിയ മുനിശ്രേഷ്ഠൻമാരെ സമീപിക്കുകയും ആതിഥ്യം സ്വീകരിക്കുകയും ചെയ്യുന്നു. സംശയം തോന്നാം, ആശ്രമയാത്രകൾ എന്തിനായിരുന്നു ? ഉത്തരം വ്യക്തം. സജ്ജന സംഗമം തന്നെ ലക്ഷ്യം. സജ്ജന സംഗമം തന്നെ നമ്മെ മാനസികമായി ഉയർത്തുന്ന ഘടകം. സീതാദേവിയെ മാനസികമായി ഉയർത്താൻ തന്നെയായിരിക്കാം ശ്രീരാമദേവൻ സദ്സംഘ വേദികളായ ആശ്രമങ്ങൾ സന്ദർശിച്ചത്.

ദുഃഖങ്ങളെ സധൈര്യം നേരിടാനുള്ള കരുത്ത് സജ്ജനസംഗമം നൽകുന്നു. ശ്രീരാമദേവന്‍റെ വാക്കുകൾ തന്നെ കേൾക്കാം - സർഗത്തിലല്ല, യജ്ഞഭൂമിയിലല്ല, തപോഭൂമിയിലല്ല, തീർഥയാത്ര പോകുന്നതിലല്ല, സന്യാസികളുടെ കമണ്ഡലുവിലല്ല, ദാനധർമങ്ങൾ ചെയ്യുന്നതിലല്ല... മറിച്ച് മുക്തി വന്നീടുവാനായ് മുഖ്യസാധനമല്ലൊ സജ്ജനസംഗമം (ശബര്യാശ്രമ പ്രവേശം). പരമാത്മാവായ ശ്രീരാമദേവൻ ശബരിക്ക് നൽകിയ ഉപദേശമാണിത്. നമ്മുടെ മനസുകളിൽ ഈ രാമമന്ത്രം നിറച്ചുവച്ചാൽ എത്ര ധന്യം.

ഈ സജ്ജന സന്ദർശനം തന്നെയാണ് സീതാദേവിയെ രാവണന്‍റെ പ്രലോഭനങ്ങൾ സധൈര്യം നേരിടാൻ സഹായിച്ചത്. രാമൻ ഉദ്ദേശിച്ചതും അതുതന്നെയായിരിക്കാം. മാനസികമായി ഉയരാനും ആത്മവിശ്വാസം ലഭിക്കാൻ സജ്ജന സംഗമം സഹായിക്കും എന്നത് തീർച്ച.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.