ഭരതന്‍റെ ദൃഢനിശ്ചയം

"മന്വബ്ദപൂർണേ പ്രഥമദിനേഭവാൻ
വന്നതില്ലെന്നു വന്നീടുകിൽ പിന്നെ ഞാൻ
അന്യദിവസമുഷസി ജ്വലിപ്പിച്ചു
വഹ്നിയിൽ ചാടി മരിക്കുന്നതുണ്ടല്ലൊ'

ശ്രീരാമനെ തിരികെ അയോധ്യയിലേക്ക് കൂട്ടിക്കൊണ്ടു പോകാൻ വന്ന ഭരതനെ സമാശ്വസിപ്പിക്കുന്നു ശ്രീരാമൻ. പക്ഷെ, ഭരതന്‍റെ ദൃഢനിശ്ചയം ആരിലും ആദരവ് ഉണ്ടാക്കും. പതിനാലുകൊല്ലം അവസാനിച്ചതിന് തൊട്ടടുത്ത ദിവസം അങ്ങ് അയോധ്യയിലുണ്ടാകണമെന്നും മറിച്ചാണെങ്കിൽ അഗ്നിയിൽ ചാടി മരിക്കുമെന്നും ഉറച്ചുബോധിപ്പിക്കുന്നു ഭരതൻ.

തങ്ങൾക്കു ലഭിച്ച അധികാരത്തോട് ഭരണാധികാരികളുടെ സമീപനം എങ്ങിനെയായിരിക്കണമെന്ന് ഇതിലും നന്നായി അവതരിപ്പിക്കാൻ എഴുത്തച്ഛനല്ലാതെ മറ്റാർക്കു കഴിയും.

അധികാരത്തിന്‍റെ തണലിൽ എല്ലാം മറക്കുന്ന ഭരണവർഗത്തെ ചരിത്രം പരതിയാൽ എങ്ങും കാണാവുന്നതാണ്. അധികാരം നിലനിർത്താൻ ഒരു കൊന്പിൽ നിന്നും മറുകൊന്പിലേക്ക് ചാടുന്ന കുരുങ്ങൻമാരും നിരവധി. തങ്ങളുടെ സുഖം മാത്രം ലക്ഷ്യം വച്ച് ജനങ്ങളുടെ ദു8ഖം ഓർക്കാതെ നിഷ്ഠൂരൻമാരായി തീരുന്നു ഭരണാധികാരികൾ.

രാജ്യമല്ല സഹോദരനാണ് വലുത് എന്ന് വിലപിക്കുന്ന ഭരതൻ ഉത്തമരിൽ ഉത്തമൻ തന്നെ. അധികാരം കൈയിലുണ്ടെങ്കിലും തന്നെ നിയന്ത്രിക്കേണ്ടത് പരമാത്മാവാണെന്ന സത്യം മനസിലാക്കി ജീവിതം നയിക്കണം. രാമപാദുകം സിംഹാസനത്തിൽവച്ച് ഭരണം നടത്തുന്ന ഭരതൻമാരെ ലഭിക്കാൻ നമുക്ക് ഒരുമിച്ച് പ്രാർഥിക്കാം.

സി.കെ. ഗോപാലകൃഷ്ണൻ മാസ്റ്റർ

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.