300 പേർ കൊല്ലപ്പെട്ടെന്നു മോദി പറഞ്ഞോ?, ഷാ പറഞ്ഞോ?; ചോദ്യവുമായി കേന്ദ്രമന്ത്രി

പാക്കിസ്ഥാനിലെ ബാലക്കോട്ടിൽ ഇന്ത്യ നടത്തിയ വ്യോമാക്രമണത്തിന്‍റെ ലക്ഷ്യം ആൾനാശമായിരുന്നില്ലെന്ന് കേന്ദ്രമന്ത്രി എസ്.എസ്. അലുവാലിയ. പ്രധാനമന്ത്രിയോ അമിത് ഷായോ ബിജെപി വക്താക്കളോ 300 പേർ കൊല്ലപ്പെട്ടെന്ന് പറഞ്ഞിരുന്നോ എന്നു മന്ത്രി ചോദിച്ചതായി എഎൻഐ വാർത്താ ഏജൻസി റിപ്പോർട്ട് ചെയ്യുന്നു.

മാധ്യമങ്ങളിൽ വന്ന വാർത്തകൾ ഞാനും കണ്ടിരുന്നു. ആക്രമണത്തിനുശേഷം പ്രധാനമന്ത്രി നരേന്ദ്ര മോദി രാജസ്ഥാനിലെ ചുരുവിൽ പ്രസംഗിച്ചതു കേട്ടു. 300 പേർ കൊല്ലപ്പെട്ടന്ന് അദ്ദേഹം പറഞ്ഞിരുന്നോ? ഏതെങ്കിലും ബിജെപി വക്താവ് പറഞ്ഞോ? അമിത് ഷാ പറഞ്ഞോ?- കോൽക്കത്തയിൽ മാധ്യമങ്ങളോടു സംസാരിക്കവെ അലുവാലിയ ചോദിച്ചു. ആൾനാശമായിരുന്നില്ല ലക്ഷ്യമെന്നും ഭീകരകേന്ദ്രങ്ങൾ തകർക്കാനാകുമെന്നു തെളിയിക്കലായിരുന്നെന്നും മന്ത്രി കൂട്ടിച്ചേർത്തു.

ഇന്ത്യയുടെ വ്യോമാക്രമണത്തിൽ ആരും കൊല്ലപ്പെട്ടില്ലെന്ന അന്താരാഷ്ട്ര മാധ്യമങ്ങളിലെ വാർത്തകളെകുറിച്ചുള്ള ചോദ്യത്തിനായിരുന്നു അലുവാലിയയുടെ മറുപടി.

കേന്ദ്രമന്ത്രിയുടെ പരാമർശത്തിന്‍റെ വീഡിയോ ദൃശ്യങ്ങൾ സാമൂഹികമാധ്യമങ്ങളിൽ വ്യാപകമായി പ്രചരിക്കുന്നുണ്ട്. സിപിഎമ്മും തൃണമൂൽ കോണ്‍ഗ്രസും ഉൾപ്പെടെയുള്ള പ്രതിപക്ഷ പാർട്ടികൾ അലുവാലിയയുടെ വീഡിയോ ട്വീറ്റ് ചെയ്തു. 300 ആളുകൾ കൊല്ലപ്പെട്ട വാർത്തയുടെ നിജസ്ഥിതി എന്താണെന്ന് മോദി വെളിപ്പെടുത്തണമെന്ന് ബംഗാൾ മുഖ്യമന്ത്രി മമത ബാനർജി കഴിഞ്ഞ ദിവസം ആവശ്യപ്പെട്ടിരുന്നു.