കിഷൻ മാജിക്; മുംബൈക്ക് 102 റൺസ് ജയം

ഇഷൻ കിഷന്‍റെ വെടിക്കെട്ട് ബാറ്റിംഗ് കരുത്തിൽ കോൽക്കത്ത നൈറ്റ് റൈഡേഴ്സിനെതിരേ മുംബൈ ഇന്ത്യൻസിന് 102 റൺസിന്‍റെ മിന്നും ജയം. ആദ്യം ബാറ്റ് ചെയ്ത മുംബൈ 20 ഓവറിൽ ആറ് വിക്കറ്റ് നഷ്ടത്തിൽ 210 റണ്‍സ് എടുത്തു. 21 പന്തിൽ ആറ് സിക്സും അഞ്ച് ഫോറും അടക്കം 62 റണ്‍സ് എടുത്ത ഇഷൻ കിഷനാണ് മുംബൈ ഇന്നിംഗ്സിന്‍റെ നട്ടെല്ലായത്. ബെൻ കട്ടിംഗും (ഒന്പത് പന്തിൽ 24 റണ്‍സ്) ഹർദിക് പാണ്ഡ്യയും (13 പന്തിൽ 19 റണ്‍സ്) കൃനാൽ പാണ്ഡ്യയും (രണ്ട് പന്തിൽ എട്ട് നോട്ടൗട്ട്) തകർത്തടിച്ചതോടെ മുംബൈ 210ൽ എത്തി. കോൽക്കത്ത 18.1 ഓവറിൽ 108നു പുറത്തായി.

മുംബൈ ഇന്ത്യൻസിന്‍റെ സ്കോറിംഗിന് സൂര്യകുമാർ യാദവും (32 പന്തിൽ 36 റണ്‍സ്) എവിൻ ലെവിസും (13 പന്തിൽ 18 റണ്‍സ്) തരക്കേടില്ലാത്ത രീതിയിൽ തുടക്കമിട്ടു. സ്കോർ 46ൽ നിൽക്കുന്പോൾ ലെവിസ് മടങ്ങി. മുംബൈയുടെ അക്കൗണ്ടിൽ ആദ്യ 50 എത്തിയത് 41 പന്തുകളിൽനിന്നായിരുന്നു. രോഹിത് ശർമയും (31 പന്തിൽ 36 റണ്‍സ്) സൂര്യകുമാറും മുന്നോട്ട് നയിക്കുന്നതിനിടെ വീണ്ടും വിക്കറ്റ് വീണു. സൂര്യകുമാറായിരുന്നു മടങ്ങിയത്. തുടർന്നെത്തിയ ഇഷാൻ കൂറ്റൻ അടികളോടെ കളംവാണു. സീസണിൽ ഇഷാൻ കിഷന്‍റെ രണ്ടാം അർധസെഞ്ചുറിയാണിത്. മുംബൈ ഇന്നിംഗ്സിൽ 14 സിക്സറും 16 ഫോറുകളുമാണ് പിറന്നത്.

211 റണ്‍സ് വിജയലക്ഷ്യവുമായി ക്രീസിലെത്തിയ കോൽക്കത്ത നൈറ്റ് റൈഡേഴ്സിനു കാര്യമായൊന്നും ചെയ്യാൻ സാധിച്ചില്ല. ഇന്നിംഗ്സിന്‍റെ രണ്ടാം പന്തിൽ വിക്കറ്റ് നഷ്ടപ്പെട്ടുതുടങ്ങിയ നൈറ്റ് റൈഡേഴ്സ് 93 റണ്‍സ് എടുത്തപ്പോഴേക്കും എട്ട് വിക്കറ്റുകൾ നഷ്ടപ്പെട്ടു. സുനിൽ നരെയ്ൻ (നാല് റണ്‍സ്), ക്രിസ് ലിൻ (21 റണ്‍സ്), റോബിൻ ഉത്തപ്പ (14 റണ്‍സ്), നിതീഷ് റാണ (21 റണ്‍സ്), ആന്ദ്രേ റസൽ (രണ്ട് റണ്‍സ്), ദിനേശ് കാർത്തിക് (അഞ്ച് റണ്‍സ്) തുടങ്ങിയവരെല്ലാം നിരാശരായി മടങ്ങി.

ഐപിഎൽ പോയിന്‍റ് നില

ടീം, മത്സരം, ജയം, തോൽവി, സമനില, പോയിന്‍റ്

സൺറൈസേഴ്സ് 10 8 2 0 16
സൂപ്പർ കിംഗ്സ് 10 7 3 0 14
കിംഗ്സ് ഇലവൻ 10 6 4 0 12
മുംബൈ ഇന്ത്യൻസ് 11 5 6 0 10
നൈറ്റ് റൈഡേഴ്സ് 11 5 6 0 10
രാജസ്ഥാൻ റോയൽസ് 10 4 6 0 8
റോയൽ ചലഞ്ചേഴ്സ് 10 3 7 0 6
ഡയർ ഡെവിൾസ് 10 3 7 0 6