രാമായണത്തിന്‍റെ മഹത്വം

രാമായണത്തെ പലരും പല രീതിയിലാണ് സമീപിച്ചത്. ഏത് രീതിയിൽ കണ്ടാലും തങ്ങളുടെ ചിന്തയാണ് ശരി എന്ന് എല്ലാവരും ധരിക്കുന്നു. പക്ഷെ, ഒരേ രീതിയിൽ സമീപിക്കുന്പോഴേ ഈ മഹാകാവ്യത്തെ അറിയാൻ കഴിയൂ. ആദികവി വാല്മീകിയും ഭാഷാപിതാവ് എഴുത്തച്ഛനും സമീപിച്ചത് ഒരേ രീതിയിലായിരിക്കണം. അതുകൊണ്ട് തന്നെയായിരിക്കാം രാമന്‍റെ കഥ ഇത്രയധികം മഹത്വമുള്ളതായി തീരുന്നത്. എഴുത്തച്ഛന്‍റെ വാക്കുകളിൽ തന്നെ രാമകഥയെ എത്ര മഹത്വത്തോടെ വിശേഷിപ്പിക്കുന്നുവെന്ന് നോക്കാം.

"രാമായണത്തെ സദാകാലവും ഭജിച്ചീടും
കാമനാശനനുമാവല്ലഭൻ മഹേശ്വരൻ
ശ്രീമഹാദേവൻ പരമേശ്വരൻ സർവേശ്വരൻ
മാമകേ മനസീവാണീടുവാൻ വന്ദിക്കുന്നേൻ'

രാമനാമം മനസിൽ തന്നെ നിൽക്കേണമെന്നു പറയുന്പോൾ അത്രയും ഉത്തമൻ തന്നെ രാമൻ. രാമൻ ഉത്തമനായത് എങ്ങനെ. ധർമനീതി മാത്രം ചിന്തിച്ച് ശത്രുക്കളോട് പോലും ധർമത്തിലൂന്നിയ പ്രവൃത്തിയാലാണ് രാമൻ ഉന്നതനായത്. രാമൻ എന്നത് ജ്ഞാനം തന്നെ. ജ്ഞാനം അധർമം എന്ന ശത്രുവിനെ എല്ലാ മനസുകളിൽ നിന്നും നീക്കുന്നു. ശാന്തിയും സമാധാനവും മനുഷ്യമനസുകളിൽ കുടിയിരുത്തുന്നു.

കുടുംബ ബന്ധങ്ങൾക്ക് ഇത്രയധികം മഹത്വം നൽകിയ മറ്റൊരു കാവ്യവും ഇന്നേവരെ പിറന്നിട്ടില്ലെന്ന് നിസംശയം പറയാം. സഹോദര സ്നേഹവും പിതാവിനോടുള്ള സ്നേഹവും ഭക്തിയും മാതാക്കൾ മക്കൾക്ക് നൽകുന്ന അറിവും ഇത്രയധികം പകർന്നു ലഭിച്ച ഒരു കാവ്യവും ഇന്നേ വരെ ലോകം കണ്ടിട്ടില്ല. രാമൻ എന്ന ഉത്തമനായ കഥാപാത്രം കേന്ദ്രബിന്ദുവായ രാമായണത്തിന് ഇത്രയേറെ പ്രചാരം സിദ്ധിച്ചതും അതുകൊണ്ടുതന്നെയായിരിക്കാം. മിക്കവാറും എല്ലാ ലോകഭാഷകളിലും പരാവർത്തനം ചെയ്യാൻ രാമായണത്തിന് അർഹത നേടിക്കൊടുത്തതും മറ്റൊന്നല്ലതന്നെ.

സി.കെ. ഗോപാലകൃഷ്ണൻ മാസ്റ്റർ

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.