ഭീകരരെ പിന്തുണയ്ക്കുന്നത് അവസാനിപ്പിക്കണം; പാക്കിസ്ഥാന് ശക്തമായ മുന്നറിയിപ്പുമായി യുഎസ്

വാഷിംഗ്ടൺ: ഭീകരർക്ക് പിന്തുണ നൽകുന്ന നടപടി പാക്കിസ്ഥാൻ അടിയന്തരമായി അവസാനിപ്പിക്കണമെന്ന് അമേരിക്ക. പുൽവാമ ഭീകരാക്രമണത്തെ അപലപിച്ച് യുഎസ് നടത്തിയ പ്രസ്താവനയിലാണ് ട്രംപ് ഭരണകൂടം പാക്കിസ്ഥാനെ രൂക്ഷമായി വിമർശിച്ചത്. ഭീകരർക്ക് സുരക്ഷിത താവളം ഒരുക്കുന്നതും അവർക്ക് പിന്തുണ നൽകുന്നതുമായ നടപടി അടിയന്തരമായി അവസാനിപ്പിക്കണമെന്ന് പാക്കിസ്ഥാനോട് യുഎസ് ആവശ്യപ്പെട്ടു.

മേഖലയിൽ ഭീകരപ്രവർത്തനവും കുഴപ്പങ്ങളും ആക്രമണങ്ങളും സംഘടിപ്പിക്കുക എന്ന ലക്ഷ്യത്തോടെ പാക് മണ്ണ് ഉപയോഗപ്പെടുത്തി പ്രവർത്തിക്കുന്ന എല്ലാ ഭീകരസംഘടനകൾക്കും പിന്തുണ നൽകുന്ന നടപടി പാക്കിസ്ഥാൻ അവസാനിപ്പിക്കണം- വൈറ്റ്ഹൗസ് പ്രസ് സെക്രട്ടറി സാറാ സാൻഡേഴ്സ് പുറത്തിറക്കിയ പ്രസ്താവനയിൽ പറഞ്ഞു. ഈ ആക്രമണം ഇന്ത്യയും യുഎസും തമ്മിലുള്ള ഭീകരവാദ വിരുദ്ധ സഹകരണത്തെയും ഏകോപനത്തെയും ശക്തിപ്പെടുത്തുക മാത്രമാണ് ചെയ്തിരിക്കുന്നതെന്നും സാറാ സാൻഡേഴ്സ് പ്രസ്താവനയിൽ ചൂണ്ടിക്കാട്ടി.

പുൽവാമ ആക്രമണത്തിന്‍റെ ഉത്തരവാദിത്തം ജയ്ഷ് ഇ മുഹമ്മദ് (ജെഇഎം) ഏറ്റെടുത്തിരുന്നു. പുൽവാമ ജില്ലയിലെ അവന്തിപോരയിൽ സിആർപിഎഫ് സം ഘത്തിന്‍റെ വാഹനവ്യൂഹത്തിനു നേർക്ക് ഭീകരർ നടത്തിയ ചാവേർ ആക്രമണത്തിൽ 44 ജവാൻമാരാണു കൊല്ലപ്പെട്ടത്. ജവാൻമാർ സഞ്ചരിച്ചിരുന്ന ബസുക ൾക്കു നേർക്ക് 350 കിലോ സ്ഫോടകവസ്തുക്കൾ നിറച്ച സ്കോർപിയോ ഇടിച്ചുകയറ്റിയായിരുന്നു ആക്രമണം. ബസിനു നേർക്ക് വെടിവയ്പുമുണ്ടായി.