സത്യത്തിനു സാക്ഷ്യം നൽകുക

പൂർവികരോട് ഇങ്ങനെ പറയപ്പെട്ടു: “വ്യാജമായി ആണയിടരുത്, കർത്താവിനോടു ചെയ്ത ശപഥം നിറവേറ്റണം (മത്താ 5:33). സത്യം വദ ധർമം ചര! സത്യം പറയുക ധർമം ചെയ്യുക എന്നത് അടിസ്ഥാനമൂല്യമാണ്. പരമസത്യം ദൈവമാണ്. ആ ദൈവത്തിലാണ് നമ്മുടെയും ഭാഗധേയം. നമ്മൾ അവിടുത്തെ മക്കളാകയാൽ സത്യത്തിൽ ജീവിക്കാൻ വിളിക്കപ്പെട്ടിരിക്കുന്നു.

“വഴിയും സത്യവും ജീവനും’’ ഞാനാണെന്നായിരുന്നു ക്രിസ്തുവിന്‍റെ ആധികാരിക വചനം. സത്യത്തിന്‍റെ ആത്മാവിനാൽ ഇന്നു സഭയെ അവിടുന്ന് നയിക്കുകയും ചെയ്യുന്നു. ഈ സത്യത്തിനാണ് നാം സാക്ഷ്യം നൽകേണ്ടത്. സത്യത്തെ സ്ഥാപിക്കുകയോ അറിയിക്കുകയോ ചെയ്യുന്ന നീതിയുടെ പ്രവൃത്തിയാണ് സാക്ഷ്യം. ആ സാക്ഷ്യത്തിനുവേണ്ടി രക്തം ചിന്തിയ രക്തസാക്ഷികളുടെ ചുടുനിണത്തിലാണ് ക്രിസ്തു അനുയായികൾ ജീവനും മാർഗവും കണ്ടെത്തുന്നത്. റാണി മരിയയെപ്പോലെ സത്യത്തിനുവേണ്ടി രക്തം ചിന്തി സാക്ഷ്യം വഹിച്ചവർ!

ക്രിസ്തുശിഷ്യർ എല്ലാ തിന്മയും കാപട്യവും വഞ്ചനയും അസൂയയും ആത്മാർഥതാ രാഹിത്യവും വെടിയണം. കള്ളസാക്ഷ്യവും കള്ളസത്യവും അവരുടെ ജീവിതത്തിലുണ്ടാകരുത്. വാക്കിലൂടെയും പ്രവൃത്തിയിലൂടെയും വ്യക്തികളുടെ സത്പേരിനോടുള്ള ആദരവ് പാലിക്കണം. അവർക്കു ക്ഷതം വരുത്താൻ സാധ്യതയുള്ള മനോഭാവവും ചെയ്തികളും ഉപേക്ഷിക്കണം ‘നുണകൾ ആവർത്തിച്ച് സത്യങ്ങളാക്കുന്ന’വല്ലാത്തൊരു ലോകത്തിലാണ് നാം ജീവിക്കുന്നത്. അസത്യങ്ങളും അർധ സത്യങ്ങളും രാഷ്‌ട്രീയ-മത-മാധ്യമലോകത്ത് പൊതുവർത്തമാനമാകുന്ന കാലം.\

ഇവിടെ സത്യാനേഷികളുണ്ടാവണം. സത്യസാക്ഷികളുമുണ്ടാകണം. കഴുകി ശുദ്ധമാക്കപ്പെട്ട ഹൃദയവും വെടിപ്പാക്കപ്പെട്ട മനസ്സാക്ഷിയുമാണ് മനുഷ്യസൗന്ദര്യം. സത്യമേവ ജയതേ എന്നതായിരിക്കണം മുദ്രാവാക്യം. സത്യത്തിനെതിരായി പറഞ്ഞതിനും പ്രവർത്തിച്ചതിനും കൂട്ടുചേർന്നതിനും പരിഹാരം ചെയ്യാൻ ഈ നോന്പുകാലം നമ്മെ കടപ്പെടുത്തുന്നുണ്ട്. “സത്യസൗന്ദര്യമേ, നിൻ പ്രകാശത്തിനാൽ നിത്യം വിടരുമാറാവുകെൻ ജീവിതം’’ (ജി.).

കൃപാവസന്തം - 38/ ഫാ. ജോയി ചെഞ്ചേരിൽ എംസിബിഎസ്

മുന്‍വര്‍ഷങ്ങളിലെ നോമ്പുകാലചിന്തകള്‍ വായിക്കുന്നതിനായി താഴെക്കാണുന്ന ലിങ്കുകളില്‍ ക്ലിക്ക് ചെയ്യുക

ക്രൂശിതന്റെ വഴിയെ

ജറുസലേം തീര്‍ത്ഥാടനം

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.