റംസാന്‍റെ ദാർശനിക സൗന്ദര്യം

മനുഷ്യന്‍റെ ശീലങ്ങളേയും വിചാരങ്ങളേയും സംസ്കരിക്കാൻ ദൈവം നിശ്ചയിച്ച നിർബന്ധിത പരിശീലനമാണ് റംസാൻ മാസത്തിലെ വ്രതം. ആശയങ്ങൾ സംസാരിക്കാൻ എളുപ്പമാണ്. പ്രായോഗികവത്ക്കരിക്കാൻ പ്രയാസവും. ക്ഷമ, പരസ്പര സ്നേഹം, കാരുണ്യം, ദയ, അലിവ്, സമർപ്പണം തുടങ്ങിയവ സദ്ഗുണങ്ങളാണെന്ന് അറിയാത്തവരില്ല. പക്ഷെ അത് ജീവിതത്തിൽ കാണിക്കാൻ ഏറെ പ്രയാസം അനുഭവിക്കുന്നുണ്ട്. റംസാൻ എന്ന വാക്കിന്‍റെ അർഥം കരിച്ചുകളയുക എന്നാണ്. ദേഹേഛയെ അല്ലാഹുവിന്‍റെ പ്രീതിക്കായി വെടിയുന്പോഴാണ് നോന്പ് അർഥവത്താകുന്നത്.

ദൈവത്തിന്‍റെ കൽപ്പനകൾ അനുസരിക്കുന്നവനാണല്ലോ മുസ്‌ലിം. അഞ്ചുനേരത്തെ നിസ്കാരം നിർവഹിക്കുന്നവർക്ക് അന്യന്‍റെ പട്ടിണിയുടെ ആഴം അറിഞ്ഞുകൊള്ളണമെന്നില്ല. ഉള്ളവൻ ഇല്ലാത്തവന്‍റെ വിഷമങ്ങൾ വായിച്ചറിഞ്ഞിട്ടുണ്ടാവും. അതിൽ അനുഭവമില്ല. ഒരു മാസക്കാലത്തെ വ്രതത്തിലൂടെ വിശ്വാസി അടുത്തറിയുന്നത് ലോകത്തിലെ പട്ടിണിപ്പാവങ്ങളുടെ വിളിയാണ്. അരച്ചാണ്‍ വയറിന്‍റെ വിശപ്പകറ്റാൻ അവർ തെരുവിൽ കൈനീട്ടുന്നതിന്‍റേയും എല്ലുമുറിയെ പണിയെടുക്കുന്നതിന്‍റേയും പ്രാധാന്യം മുതലാളിമാർ അനുഭവിച്ചറിയണം. പരസ്പരം പങ്കുവയ്പുകളും വാങ്ങൽ കൊടുക്കലുകളും നടക്കുന്പൊഴേ മനുഷ്യർക്കിടയിലെ അകലങ്ങൾ ഇല്ലാതാവൂ. ഉള്ളവനും ഇല്ലാത്തവനും മുതലാളിയും തൊഴിലാളിയും ഭരിക്കുന്നവരും ഭരണീയരും മുനഷ്യരാണ്. എല്ലാവരുടേയും വികാരങ്ങൾ ഒന്നാണ്. ഇതിൽ ഏറ്റ വ്യത്യാസങ്ങൾ ഉണ്ടാവുന്നത് അനുഭവങ്ങളുടെ പരിസരത്തുനിന്നുകൂടിയാണ്. വിശപ്പ് അനുഭവമാകുന്നതിനുള്ള അവസരമാണ് റംസാൻ.

അന്നപാനീയങ്ങൾ നിശ്ചിത സമയത്തേക്ക് വർജിക്കുന്നതോടൊപ്പം വിവിധ നിയന്ത്രണങ്ങളും ചിട്ടകളും നിർദേശിക്കുന്നുണ്ട് ഇസ്‌‌ലാമിലെ വ്രതത്തിൽ. നോന്പ് കാരനായിരിക്കെ ഇണചേരൽ നിഷിദ്ധമാണ്. വിവാഹപ്രായം കഴിഞ്ഞിട്ടും മംഗല്യ സൗഭാഗ്യം ലഭിക്കാത്ത അനേകം പച്ച മനുഷ്യരുടെ വൈകാരിക അനുഭവം എന്താണെന്ന് തിരിച്ചറിയാനുള്ള അവസരം കൂടിയാണ് റംസാനിലെ വ്രതക്കാലം.

സിദ്ധീഖ് പനക്കൽ, കൊടിഞ്ഞി (മതപണ്ഡിതൻ)

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.