കംഗാരുകളെ വിരട്ടിയോടിച്ച് കടുവകൾ; ഇന്ത്യയ്ക്ക് 36 റണ്‍സ് ജയം

ലണ്ടൻ: ലോകകപ്പിൽ ഓസ്ട്രേലിയയ്ക്കെതിരെ ഇന്ത്യയ്ക്ക് മിന്നും ജയം. ഇന്ത്യ ഉയർത്തിയ കൂറ്റൻ വിജയലക്ഷ്യം പിന്തുടർന്ന ഓസീസിനെ ഇന്ത്യ 316 റണ്‍സിന് പുറത്താക്കി. 36 റണ്‍സിനായിരുന്നു ഇന്ത്യൻ ജയം. ഇതോടെ ലോകകപ്പിലെ രണ്ടാം ജയം ഇന്ത്യ സ്വന്തമാക്കി.

ശിഖർ ധവാന്‍റെ സെഞ്ചുറിയുടെയും വിരാട് കോഹ്‌ലിയുടെയും രോഹിത് ശർമയുടെയും അർധ സെഞ്ചുറികളുടെയും കരുത്താണ് ഇന്ത്യയെ കൂറ്റൻ സ്കോറിലെത്തിച്ചത്. അഞ്ച് വിക്കറ്റ് നഷ്ടത്തിൽ ഇന്ത്യ ഉയർത്തിയ 353 റണ്‍സ് വിജയലക്ഷ്യം പിന്തുടർന്ന ഓസീസിനെ ഭൂവനേശ്വർ കുമാറും ജസ്പ്രിത് ബുംമ്രയും എറിഞ്ഞിടുകയായിരുന്നു.

ഇന്ത്യൻ പേസ് ആക്രമണത്തെയും കരുതലോടെയാണ് ഓസീസ് നേരിട്ടത്. ഡേവിഡ് വാർണറും ആരോൺ ഫിഞ്ചും ചേർന്ന് 61 റണ്‍സാണ് ഓപ്പണിംഗ് കൂട്ടുക്കെട്ടിൽ നേടിയത്. ഫിഞ്ച് (36) റണ്‍ഒൗട്ട് ആയതോടെ ഇന്ത്യ പതുക്കെ കളിയിലേക്ക് തിരിച്ചുവരികയായിരുന്നു.

ഫിഞ്ചിനു പിന്നാലെ ക്രീസിലെത്തിയ സ്മീത്തിനൊപ്പം ചേർന്ന് വാർണർ ഓസീസ് സ്കോർ ഉയർത്തി. വാർണറും (56) സ്മിത്തും(69) അർധ സെഞ്ചുറികൾ നേടി ഇന്ത്യയ്ക്ക് വെല്ലുവിളി ഉയർത്തി. ഇതോടെ കോഹ്ലി പന്ത് ചാഹലിനെ ഏൽപ്പിച്ചു. കോഹ്‌ലിയുടെ പ്രതീഷകൾ നിലനിർത്തി ചാഹൽ വാർണറെ വീഴ്ത്തി.

പിന്നീട് സ്മീത്ത് കവാജയ്ക്കൊപ്പം ചേർന്ന് ഓസീസിനെ രക്ഷപ്പെടുത്താൻ ശ്രമിച്ചു. എന്നാൽ പന്ത് കോഹ്‌ലി ബുംമ്രയ്ക്കു നൽകി. കോഹ്‌ലിയുടെ കണക്കുകൾ പിഴച്ചില്ല. 42 റണ്‍സെടുത്ത കവാജയെ ബുംമ്ര പവലിയൻ കയറ്റി. പിന്നാലെ സ്മിത്തിനെ ഭൂവനേശ്വർ കുമാറും വീഴ്ത്തി.

അവസാന ഓവറുകളിൽ അലക്സ് കാരെ കത്തിക്കയറിയെങ്കിലും ഓസീസിനെ വിജയിപ്പിക്കാൻ അദ്ദേഹത്തിനു സാധിച്ചില്ല. 35 പന്തിൽ 55 റൺസെടുത്ത കാരെയെ പിന്തുണയ്ക്കാൻ ആരും ഉണ്ടായില്ല. അഞ്ച് ഓസീസ് താരങ്ങൾക്ക് രണ്ടക്കം കാണാൻ സാധിച്ചില്ല.

ഇന്ത്യയ്ക്കായി ഭൂവനേശ്വർ കുമാറും ജസ്പ്രീത് ബുംമ്രയും മൂന്ന് വിക്കറ്റ് വീതം നേടി. ചാഹൽ രണ്ട് വിക്കറ്റും വീഴ്ത്തി.

നേരത്തെ ഓസീസിനെതിരെ സാവധാനത്തിൽ തുടങ്ങി കൊട്ടിക്കയറുകയായിരുന്നു ഇന്ത്യ. മിച്ചൽ സ്റ്റാർക്കും പാറ്റ് കമ്മിൻസും തുടക്കമിട്ട ഓസീസ് പേസ് ആക്രമണത്തെ ശ്രദ്ധയോടെയാണ് ഇന്ത്യൻ ഓപ്പണറുമാരായ രോഹിത് ശർമയും ശിഖർ ധവാനും നേരിട്ടത്. ഓപ്പണറുമാർ കരുതലോടെ തുടങ്ങിയതോടെ മത്സരത്തിൽ ഒരു ബ്രേക്ക് ത്രൂ ലഭിക്കാൻ 23-ാം ഓവർ വരെ ഓസീസിന് കാത്തിരിക്കേണ്ടിവന്നു.

രോഹിത്ത് ശർമയുടെ വിക്കറ്റാണ് ഇന്ത്യയ്ക്ക് ആദ്യം നഷ്ടമായത്. 70 പന്തിൽ 57 റണ്‍സാണ് രോഹിത്തിന്‍റെ സന്പാദ്യം. 127 റണ്‍സിന്‍റെ ഓപ്പണിംഗ് കൂട്ടുക്കെട്ടാണ് രോഹിത്തും ധവാനും ചേർന്ന് പടുത്തുയർത്തത്.

109 പന്തുകൾ നേരിട്ട ധവാൻ 16 ബൗണ്ടറികളോടെയാണ് 117 റൺസാണ് അടിച്ചുകൂടിയത്. ലോകകപ്പിൽ ധവാൻ നേടുന്ന മൂന്നാമത്തെ സെഞ്ചുറിയാണിത്. ഓസ്ട്രേലിയയ്ക്കെതിരെ ധവാൻ നേടുന്ന നാലാമത്തെ സെഞ്ചുറിയും.

രോഹിത്തിനു പിന്നാലെ ക്രീസിലെത്തിയ നായകൻ വിരാട് കോഹ്‌ലിയുടെ വെടിക്കെട്ടാണ് പിന്നീട് കാണുവാൻ സാധിച്ചത്. 77 പന്തിൽ രണ്ട് സിക്സും നാല് ഫോറും ഉൾപ്പെടെ 82 റൺസാണ് കോഹ്‌ലി നേടിയത്. ഹാർദിക് പാണ്ഡ്യയും കോഹ്‌ലിക്ക് ഉറച്ച പിന്തുണയാണ് നൽകിയത്. വെറും 27 പന്തിൽ മൂന്ന് സിക്സും നാല് ഫോറും ഉൾപ്പെടെ 48 റൺസാണ് പാണ്ഡ്യ അടിച്ചെടുത്തത്.

പാണ്ഡ്യയ്ക്കു പിന്നാലെ ക്രീസിലെത്തിയ എം.എസ്. ധോണിയും കരുതിവച്ചത് വെടിക്കെട്ട് ബാറ്റിംഗ് തന്നെ. 14 പന്തിൽ 27 റൺസാണ് ധോണി നേടിയത്. മൂന്ന് പന്തിൽ 11 റൺസ് ലോകേഷ് രാഹുലും നേടി.

ഓസ്ട്രേലിയയ്ക്കായി മാർക്കസ് സ്റ്റോയിനിസ് രണ്ട് വിക്കറ്റും പാറ്റ് കമ്മിൻസ്, മിച്ചൽ സ്റ്റാർക്ക്, കൂൾട്ടർനൈൽ എന്നിവർ ഓരോ വിക്കറ്റ് വീതം നേടി.