"ഓറഞ്ച് കടുവകൾ'; ഇംഗ്ലണ്ടിനെതിരെ ഇന്ത്യ ഇറങ്ങുക എവേ ജഴ്സി അണിഞ്ഞ്
സതാംപ്ടൺ: ലോകകപ്പ് ക്രിക്കറ്റിൽ എവേ ജഴ്സിയണിഞ്ഞ് ഇന്ത്യ കളത്തിലിറങ്ങുന്നു. ജൂൺ 30ന് ഇംഗ്ലണ്ടിനെതിരെയുള്ള മത്സരത്തിലാണ് ഇന്ത്യൻ ടീം ഓറഞ്ച് ജഴ്സി ധരിച്ചിറങ്ങുയെന്ന് ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു. 'നീലക്കടുവുകൾ' എന്ന വിളിപ്പേരുള്ള ഇന്ത്യയെ ഓറഞ്ച് ജഴ്സിയിൽ കാണാനുള്ള കാത്തിരിപ്പിലാണ് ക്രിക്കറ്റ് ആരാധകർ.
ആതിഥേയരായ ഇംഗ്ലണ്ട് ഒഴികെ ഒരേ നിറമുള്ള ജഴ്സികൾ ഉപയോഗിക്കുന്ന രാജ്യങ്ങൾക്കെല്ലാം ഐസിസി എവേ ജഴ്സി നിർബന്ധമാക്കിയിരുന്നു. ഇതേത്തുടർന്നാണ് ഇംഗ്ലണ്ടിനെതിരെ കളിക്കുമ്പോൾ ഇന്ത്യ ഓറഞ്ച് ജഴ്സി ധരിച്ച് ഇറങ്ങുന്നത്. ഔദ്യോഗിക കിറ്റ് സ്പോൺസറായ നൈക്കി പുറത്തിറക്കുന്ന ഓറഞ്ച് ജഴ്സിയിലെ കോളറില്‍ നീല സ്ട്രിപ്പുമുണ്ടാകും.
ജൂൺ 22ന് അഫ്ഗാനിസ്ഥാനെയും 27ന് വിൻഡീസിനെയും നേരിടുമ്പോൾ ഇന്ത്യ നീല ജഴ്സി തന്നെയാകും ധരിക്കുകയെന്നാണ് റിപ്പോർട്ട്.