ആശങ്ക, ആശ്വാസമായി; പറയാൻ നന്ദിയുടെ വാക്കുകൾ ‌ : Deepika.com Nattu Visesham

പത്തനംതിട്ട: ഡോക്ടർമാരും നഴ്സുമാരും നൽകിയ മരുന്നിനേക്കാൾ ശക്തി തങ്ങളോടു ചേർന്നു നിന്നു പരിചരിച്ച സുമനസുകൾക്കു നന്ദി പറഞ്ഞാണ് ഐത്തല സ്വദേശികളായ അഞ്ചുപേരും ഇന്നലെ പത്തനംതിട്ട ജനറൽ ആശുപത്രിയിൽ നിന്നു പടിയിറങ്ങിയത്. ‌

കഴിഞ്ഞ ആറിനു പത്തനംതിട്ട ജനറൽ ആശുപത്രിയിലെ ഐസൊലേഷൻ വാർഡിൽ പ്രവേശിപ്പിക്കപ്പെട്ടവരാണിവർ. കോവിഡ് 19 സംശയത്തോടെ ആശുപത്രിയിലെത്തിച്ച അഞ്ചുപേരുടെയും ഫലം ആറിനു രാത്രി തന്നെ എത്തി. ഫലം പോസിറ്റീവാണെന്നറിഞ്ഞപ്പോൾ ഇവരിൽ സമ്മിശ്ര വികാരമായിരുന്നു. ഇറ്റലിയിൽ നിന്നെത്തിയ മോൻസിയുടെ സഹോദരൻ ജോസഫും ഭാര്യ ഓമനയും ആദ്യം വിശ്വസിച്ചില്ല. തങ്ങൾക്ക് കുഴപ്പമൊന്നുമില്ലെന്നായിരുന്നു ഇവരുടെ നിലപാട്. പിന്നീട് ഡോക്ടർമാർ പറഞ്ഞു മനസിലാക്കിയപ്പോഴേക്കും ചികിത്സയോടെ അവർ പൂർണമായി സഹകരിച്ചെന്ന് വാർഡ് ഡ്യൂട്ടിയിലുണ്ടായിരുന്നവർ പറഞ്ഞു. ‌

റാന്നി താലൂക്ക് ആശുപത്രിയിൽ ആറിനു രാവിലെ പനിക്കു ചികിത്സ തേടി എത്തിയതാണ് ജോസഫും ഓമനയും. ഡ്യൂട്ടി ഡോക്ടറായ ആനന്ദിനെയാണ് കണ്ടത്. അദ്ദേഹം വിവരങ്ങൾ ചോദിച്ച് അറിയുന്നതിനിടെയിൽ ഇറ്റലിയിൽ നിന്ന് സഹോദരനും കുടുംബവും വന്ന വിവരം പറഞ്ഞു. ഉടൻതന്നെ അദ്ദേഹം ആശുപത്രിയുടെ മുകളിലത്തെ നിലയിലേക്ക് കൊണ്ടുപോയി. സൂപ്രണ്ടുമായി സംസാരിച്ച് ചില തീരുമാനങ്ങളിലെത്തുകയും ആംബുലൻസിൽ തങ്ങളെ കൂട്ടിക്കൊണ്ട് വീട്ടിലേക്ക് പോകുകയും ആശുപത്രിയിൽ അഡ്മിറ്റാകണമെന്ന് നിർദേശിക്കുകയുമായിരുന്നുവെന്ന് ജോസഫ് പറഞ്ഞു. പിന്നാലെ സഹോദരൻ മോൻസിയെയും കുടുംബത്തെയും ആശുപത്രിലെത്തിച്ചു. എന്നാൽ ഇരുകുടുംബങ്ങളും ആശുപത്രിയിൽ രണ്ട് മുറികളിലായിരുന്നു. പരസ്പരം സന്പർക്കമുണ്ടായിരുന്നില്ല. ‌

ഇന്നലെ ആശുപത്രി വിട്ടിറങ്ങുന്പോൾ ആശുപത്രി ജീവനക്കാരും ആരോഗ്യവകുപ്പും ചേർന്ന് ഇവർക്ക് യാത്രയയപ്പ് നൽകി. ഇന്നത്തേക്കുളള ഭക്ഷ്യധാനങ്ങൾ കൈമാറിയും മധുരം പങ്കിട്ടും ഡോക്ടർമാരും ആശുപത്രി ജീവനക്കാരും അഞ്ചുപേരെയും യാത്രയാക്കിയപ്പോൾ സന്തോഷത്തിന്‍റെ കൈയടികൾ ഉയർന്നു. ‌

ജനറൽ ആശുപത്രി സൂപ്രണ്ട് ഇൻ ചാർജ് ഡോ. സാജൻ മാത്യൂസും ആർഎംഒ ഡോ, ആശിഷ് മോഹൻ കുമാറും ആശുപത്രി വിട്ടൊഴിയുന്നവർക്കുള്ള നിർദേശങ്ങൾ നൽകി. ഡോ.ശരത് തോമസ് റോയി, ഡോ.നസ്ലിൻ എം. സലാം, ഡോ.ജയശ്രി, പരിചരിച്ച നഴ്സുമാർ, ആശുപത്രിയിലെ മറ്റു ജീവനക്കാർ എല്ലാവരും ചേർന്നു കൈയടിച്ചാണ് ഇവരെ പുറത്തേക്കുകൊണ്ടുവന്നത്. ജില്ലാ കളക്ടർ പി.ബി നൂഹിന്‍റെ നിർദ്ദേശപ്രകാരം ആദ്യം മധുരംനൽകി. അത്താഴത്തിനുള്ള ഭക്ഷണവും ജനറൽ ആശുപത്രി സ്റ്റാഫ് കൗണ്‍സിലിന്‍റെ വകയായി ഒരു ദിവസത്തേക്കുള്ള അരിയും പലവ്യഞ്ജനങ്ങളും പച്ചക്കറിയും ഉൾപ്പെടെ നൽകിയാണ് ഇവരെ വീട്ടിലേക്കു യാത്രയാക്കിയത്. ‌
’ജീവനോടെ തിരിച്ചു പോകുമെന്ന് പ്രതീക്ഷിച്ചില്ല. ദൈവത്തിന് ഒരുപാട് നന്ദി ’-ഡോക്ടർമാരോടും നഴ്സുമാരോടും യാത്ര പറയുന്പോൾ മോൻസിയുടെ ഭാര്യ രമണിയുടെ വാക്കുകൾ ഇടറി. കണ്ണുകൾ നിറഞ്ഞു. ‌

’’അറിയാതെ സംഭവിച്ച പിഴവാണ്, എല്ലാവരും മനസിലാക്കണം...’’ ഇറ്റലികുടുംബത്തിലെ മകൻ നിറകണ്ണുകളോടെ പറഞ്ഞു. ഒപ്പം ചികിൽസിച്ച ഡോക്ടർമാർക്കും നഴ്സുമാരുൾപ്പെടെയുള്ള ജീവനക്കാർക്കും കൂപ്പുകൈയോടെ കണ്ണീരിൽ കുതിർന്ന നന്ദി പ്രകടിപ്പിച്ചു. ’’ഒരിക്കലും വീട്ടിലേക്കു തിരിച്ചുപോകാമെന്നു ഞങ്ങൾ കരുതിയിരുന്നില്ല. സർക്കാരും, മന്ത്രി കെ.കെ. ഷൈലജ, ജില്ലാ കളക്ടർ, ആരോഗ്യവകുപ്പ് ഉദ്യോഗസ്ഥർ എന്നിവരുടെ അവസരോചിതമായ ഇടപെടലുകൾ ഞങ്ങളുടെ ജീവൻ രക്ഷിച്ചു. ദൈവത്തിന്‍റെ തുണയും... ഞങ്ങൾക്ക് ഇവിടെ വീട്ടിലേക്കാൾ സുഖമായിരുന്നു.

ഒന്നിനും ഒരുകുറവും ഉണ്ടായില്ല...ആവശ്യത്തിന് ഭക്ഷണം, വസ്ത്രം, മറ്റ് അവശ്യവസ്തുക്കൾ, പരിചരിക്കാൻ ആവശ്യത്തിന് ആശുപത്രി ജീവനക്കാർ. രാത്രി സമയങ്ങളിൽ പോലും ഡോക്ടർമാരുൾപ്പെടെയുള്ളവർ ആരോഗ്യനില അറിയുന്നതിനായി നിരവധി തവണ എത്തിയിരുന്നു. ഇത്രയും ദിവസം ആശുപത്രിയിൽ കഴിഞ്ഞതിലും ഒരു വിഷമവും ഇല്ല. ആദ്യം കുറച്ചുവിഷമം തോന്നി, പിന്നീട് അതും മാറി...’’ തങ്ങളിൽ നിന്നു കുടുംബാംഗങ്ങൾക്കല്ലാതെ മറ്റാർക്കും രോഗം ബാധിക്കാതിരുന്നത് ഏറെ ആശ്വാസത്തോടെയാണ് കാണുന്നതെന്ന് റിജോ പറഞ്ഞു. തങ്ങൾ മുഖേന ഒരു നാട് മുഴുവൻ സ്തംഭനത്തിലാണെന്ന് അറിഞ്ഞപ്പോൾ ഏറെ ദുഃഖിച്ചു. ‌

അഞ്ചുപേരെയും ആരോഗ്യ വകുപ്പിന്‍റെ ആംബുലൻസിലാണ് ഐത്തലയിലെത്തിച്ചത്. രണ്ട് ഘട്ടങ്ങളിലായി ഇവർക്ക് ചികിത്സ നൽകിയ ആശുപത്രി ജീവനക്കാർ എന്നിവരെല്ലാം ചേർന്നാണ് ഇവരെ യാത്രയാക്കിയത്. കേട്ടുകേഴ് വി മാത്രമായിരുന്ന കോവിഡ് 19 ചികിത്സാരീതികൾ സ്വയം പരിശീലിച്ച് നടപ്പാക്കി വിജയിച്ചതിന്‍റെ സന്തോഷം ഇവരുടെ മുഖത്തുണ്ടായിരുന്നു. ഏറെ ആശങ്ക തങ്ങൾക്കുമുണ്ടായിരുന്നെന്ന് ജീവനക്കാർ പറഞ്ഞു. ഇന്ന് അതെല്ലാം മാറിയതിലും അവർക്ക് സന്തോഷം. ‌