ആവേശം അലയടിച്ചു; വോട്ടിംഗ് ശതമാനം ഉയരങ്ങളിൽ : Deepika.com Nattu Visesham

KOTTAYAM

ആവേശം അലയടിച്ചു; വോട്ടിംഗ് ശതമാനം ഉയരങ്ങളിൽ

Tuesday, April 23, 2019 10:50 PM IST

കോട്ടയം: ആവേശത്തിനു ചോർച്ചയില്ല. പൗരബോധത്തിനു മങ്ങലുമില്ല. ഉച്ചയോടെ കോട്ടയം, പത്തനംതിട്ട, മാവേലിക്കര മണ്ഡലങ്ങളിലും പോളിംഗ് ശതമാനം 50 കടന്നു. നഗരസ്വഭാവമുള്ള കോട്ടയം അസംബ്ലി മണ്ഡലത്തിലായിരുന്നു രാവിലെ മുതൽ വോട്ടിംഗ് ശതമാനം ഉയർന്നുനിന്നത്.

വൈകുന്നേരം മഴയുണ്ടാകുമെന്ന പ്രതീക്ഷയിൽ രാവിലെ മുതൽ ബൂത്തുകളിൽ തിരക്കുണ്ടായി. 12നുശേഷമാണു ക്യൂവിൽ പലയിടങ്ങളിലും നേരിയ കുറവുണ്ടായത്. ജില്ലയിൽ ഒരിടത്തും അനിഷ്ടസംഭവങ്ങളുണ്ടായില്ല. പ്രശ്ന ബാധിത ബൂത്തുകളിൽ സിആർപിഎഫ് ഉൾപ്പെടെ കനത്ത പോലീസ് കാവലുണ്ടായിരുന്നു.

കന്നിവോട്ടർമാരുടെ ജനാധിപത്യ ബോധം തെരഞ്ഞെടുപ്പിൽ പ്രതിഫലിച്ചു. അര ലക്ഷം നവവോട്ടർമാരിൽ 85 ശതമാനം സമ്മതിദാനാവകാശം വിനിയോഗിച്ചു.

വോട്ടിംഗ് യന്ത്രങ്ങൾ കേടായതിനാൽ നിരവധി ബൂത്തുകളിൽ വോട്ടിംഗ് രാവിലെ മുതൽ തടസപ്പെട്ടു. ഒന്നര മണിക്കൂർ വരെ പലർക്കും ക്യൂവിൽ കാത്തുനിൽക്കേണ്ടവന്നു. സാങ്കേതിക പ്രശ്നങ്ങളിൽ ചുമതലക്കാരായ ഉദ്യോഗസ്ഥരാണ് ഏറെ വലഞ്ഞത്.

തുടക്കം മുതൽ ഉയർന്ന പോളിംഗ് ഏവരെയും അന്പരപ്പിച്ചെങ്കിലും ചില കേന്ദ്രങ്ങളിൽ ഉച്ചയോടെ അൽപം താഴ്ന്നു. എന്നിരിക്കെയും 2014ലെ ലോക്സഭാ തെരഞ്ഞെടുപ്പിനെക്കാൾ ഉയരത്തിലായിരുന്നു ശതമാനനിരക്ക്. യുഡിഎഫ്, എൽഡിഎഫ്, എൻഡിഎ ശക്തി കേന്ദ്രങ്ങളിലെല്ലാം തുടക്കം മുതൽ പോളിംഗ് ഉയർന്നുനിന്നു. തുടക്കത്തിൽ കടുത്തുരുത്തി, കൊല്ലാട്, വടവാതൂർ, ചങ്ങനാശേരി, എരുമേലി തുടങ്ങിയ സ്ഥലങ്ങളിൽ വോട്ടിംഗ് യന്ത്രത്തിൽ തകരാറുകൾ കണ്ടതിനാൽ വോട്ടിംഗ് വൈകി. പിറവമൊഴികെ മുഴുവൻ നിയോജക മണ്ഡലങ്ങളിലും സജീവമായ പോളിംഗായിരുന്നു രാവിലെ മുതൽ.

ആദ്യ ഒരു മണിക്കൂറിൽ പോളിംഗ് ശതമാനം 4.27 ആയിരുന്നു. എട്ടിന് 5.77 ശതമാനം. ഒന്പതിനു 11.42. അപ്പോഴേക്കും ഭൂരിഭാഗം ബൂത്തുകളിലും നീണ്ട ക്യൂ അനുഭവപ്പെട്ടു. പോളിംഗ് സ്റ്റേഷനുകളിൽ എത്തുന്നതിനിടെ രണ്ടു പേർ മരണപ്പെട്ടു.