തിരുവനന്തപുരം: സാന്പത്തിക ലക്ഷ്യങ്ങളോടെ മാത്രം പ്രവർത്തിക്കുന്ന സ്വകാര്യ ആശുപത്രികൾക്കിടയിൽ രോഗികൾക്കായി സൗജന്യ ശസ്ത്രക്രിയ അടക്കമുള്ള ക്ഷേമ പദ്ധതികൾ നടപ്പിലാക്കുന്ന നിംസ് മെഡിസിറ്റി സഞ്ചരിക്കുന്നത് വേറിട്ട വഴിയിലൂടെയാണെന്ന് സ്പീക്കർ എ.എൻ. ഷംസീർ. സാധാരണക്കാരെ സഹായിക്കുന്ന തരത്തിൽ സ്ഥാപനം നടത്തുന്ന സൗജന്യ മെഡിക്കൽ ക്യാന്പും വിദഗ്ധ പരിശോധനയും അടക്കമുള്ള കാര്യങ്ങൾ ശ്ലാഘനീയമാണ്. കേരളത്തിന്‍റെ ആരോഗ്യമേഖലയിൽ സ്വന്തം മുദ്ര പതിപ്പിച്ച നിംസ് കൂടുതൽ വളർച്ചയിലേക്കു കുതിക്കട്ടെ എന്നും അദ്ദേഹം ആശംസിച്ചു.
നെയ്യാറ്റിൻകര നിംസ് മെഡിസിറ്റിയിൽ നിംസ് ഹാർട്ട് ഫൗണ്ടേഷന്‍റെ പതിനഞ്ചാം വാർഷികവും അതോടനുബന്ധിച്ചുള്ള സൗജന്യ ക്ഷേമ പദ്ധതികളും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. തിരുവനന്തപുരം, കന്യാകുമാരി ജില്ലകളിലെ തദ്ദേശ സ്വയംഭരണ സ്ഥാപനങ്ങൾ കേന്ദ്രീകരിച്ച് നടത്തുന്ന സൗജന്യ പദ്ധതിയുടെ ഉദ്ഘാടനവും സ്പീക്കർ നിർവഹിച്ചു. നിംസ് മെഡിസിറ്റിയുടെ പ്രവർത്തനങ്ങളുമായി മുന്നോട്ടു പോകുന്പോൾ, ഒരു സംരംഭകനും ലഭിക്കാത്ത പിന്തുണയാണ് നെയ്യാറ്റിൻകരയിലെ നാട്ടുകാർ തനിക്കു നൽകിയതെന്നു നിംസ് മെഡിസിറ്റി എംഡി എം.എസ്. ഫൈസൽ ഖാൻ ആമുഖ പ്രഭാഷണത്തിൽ പറഞ്ഞു.
സ്പെഷ്യാലിറ്റി മെഡിക്കൽ ക്യാന്പും വിദഗ്ധ ചികിത്സക്കായി തിരുവനന്തപുരം ആർസിസി, മെഡിക്കൽ കോളജ്, നെയ്യാറ്റിൻകര നിംസ് മെഡിസിറ്റി എന്നിവിടങ്ങളിലെത്തുന്ന ഗുരുതര രോഗികൾക്കും ഭിന്നശേഷിക്കാർക്കുമുള്ള സൗജന്യ ചികിത്സാ യാത്ര പദ്ധതിയുടെ ഉദ്ഘാടനവും മന്ത്രി ആന്‍റണി രാജു നിർവഹിച്ചു. നിർധന കുടുംബത്തിലെ കുട്ടികൾക്ക് ഹൃദ്രോഗ ചികിത്സ സൗജന്യമായി ഒരുക്കുന്ന പദ്ധതികളുടെ ഉദ്ഘാടനം മുൻ എംഎൽഎ കെ.എസ്. ശബരീനാഥും ജില്ലയിലെ 100 പോലീസ് വാഹനങ്ങൾക്കുള്ള പ്രഥമ ശുശ്രുഷ കിറ്റ് വിതരണോദ്ഘാടനം മുതിർന്ന ബിജെപി നേതാവ് പി.പി. മുകുന്ദനും നിർവഹിച്ചു. കെ. ആൻസലൻ എംഎൽഎ അധ്യക്ഷത വഹിച്ചു. നെയ്യാറ്റിൻകരയിൽ നിർമിക്കുന്ന ഇൻഡസ്ട്രിയൽ പാർക്കിന്‍റെ താൽപര്യ പത്രം എസ്ഐ പ്രോപ്പർട്ടീസ് എംഡി എസ്.എൻ. രഘുചന്ദ്രൻ നായർക്കു നിംസ് മെഡിസിറ്റി മാനേജിംഗ് ഡയറക്ടർ എം.എസ്. ഫൈസൽ ഖാൻ കൈമാറി. കേരള യൂണിവേഴ്സിറ്റി മുൻ വൈസ് ചാൻസലർ ഡോ. എം.കെ. രാമചന്ദ്രൻ നായർ, നിംസ് ഹാർട് ഫൗണ്ടേഷൻ ഡയറക്ടർ ഡോ. മധു ശ്രീധരൻ, നെയ്യാറ്റിൻകര നഗരസഭാ സ്റ്റാന്‍റിംഗ് കമ്മിറ്റി ചെയർമാൻ ജോസ് ഫ്രാങ്ക്ലിൻ, നിംസ് മെഡിസിറ്റി എക്സികുട്ടീവ് ഡയറക്ടർ ശബ്നം ഷഫീക്, നിംസ് മെഡിസിറ്റി ജനറൽ മാനേജർ ഡോ. കെ.എ. സജു, നിംസ് കാർഡിയോ തൊറാസിക് വാസ്കുലാർ സർജൻ ആഷർ എന്നിസ് നായകം തുടങ്ങിയവർ ചടങ്ങിൽ പങ്കെടുത്തു.
ഇന്ന് രാവിലെ പത്തിന് നടക്കുന്ന ഹൃദയ സംഗമം പരിപാടി കേരള ഭക്ഷ്യ സിവിൽ സപ്ലൈസ് മന്ത്രി ജി.ആർ. അനിൽ ഉദ്ഘാടനം ചെയ്യും. സി.കെ. ഹരീന്ദ്രൻ എംഎൽഎ. അധ്യക്ഷത വഹിക്കും. ക്യാന്പിൽ പങ്കെടുക്കുന്ന ആദ്യത്തെ 100 പേർക്ക് എക്കോ, ടിഎംടി, ഇസിജി ടെസ്റ്റുകൾ പൂർണമായും സൗജന്യമായിരിക്കും. ക്യാന്പിലെത്തുന്ന മറ്റുള്ളവർക്ക് ഈ ടെസ്റ്റുകൾക്ക് അന്പത് ശതമാനം ഇളവുകളുണ്ടായിരിക്കും. തെരഞ്ഞെടുക്കുന്ന നിർധനരായ രോഗികൾക്ക് മമ്മുട്ടിയുടെ "ഹാർട്ട് ടു ഹാർട്ട്' പദ്ധതിയിലുൾപ്പെടുത്തി സൗജന്യ ശസ്ത്രക്രിയ നടത്തും. ക്യാന്പിൽ പങ്കെടുക്കുന്ന എല്ലാവർക്കും ഇസിജി, ജിആർബിസി, ബ്ലഡ് ഷുഗർ ടെസ്റ്റ്, കണ്‍സൽട്ടേഷൻ എന്നിവ സൗജന്യമായിരിക്കുമെന്നും ആശുപത്രി അധികൃതർ അറിയിച്ചു.