ADVERTISEMENT

ADVERTISEMENT

മികവ്-2024 സംഘടിപ്പിച്ചു

നെടുമങ്ങാട്: തോട്ടുമുക്ക് പൊതുജന ഗ്രന്ഥശാലയുടെ നേതൃത്വത്തിൽ സംഘടിപ്പിച്ച "മികവ് 2024" മന്ത്രി ജി .ആർ.അനിൽ ഉദ്ഘാടനം ചെയ്തു .

എസ്എസ്എൽസി പ്ലസ്ടു പരീക്ഷകളിൽ വിജയികളായ വിദ‍്യാർഥികളെ മന്ത്രി ചടങ്ങിൽ ആദരിച്ചു. കൗൺസിലർ പി. രാജീവ് അധ്യക്ഷത വഹിച്ചു. എം.എസ്.മോഹനകുമാർ, കെ .പി.പ്രമോഷ്, കെ.റഹിം , രാജശേഖരൻ നായർ, ശ്യാമള, മധുസൂദനൻ നായർ എന്നിവർ പ്രസംഗിച്ചു.

ADVERTISEMENT

ചിന്താര്‍മണി നാട്ടു വൈദ്യ സംഗമവും ഗുരുപൂര്‍ണ്ണിമ മഹോത്സവവും

പാറശാല: ചിന്താര്‍മണി നാട്ടു വൈദ്യ സംഗമവും ഇരുപത്തി രണ്ടാമത് ഗുരുപൂര്‍ണ്ണിമ മഹോത്സവവും സംഘടിപ്പിച്ചു. പടന്താലുമൂട് പൂര്‍ണ്ണ ജ്യോതി സെന്‍ററില്‍ നാഗര്‍കോവില്‍ ശിവന്തി ആദിത്യനാര്‍ കോളജ് കറസ്‌പോണ്ടന്‍റ് അഡ്വ. ഡി. ജയശീലന്‍ ഉദ്ഘാടനം ചെയ്തു. എടിഎംഎ (എഐടിയുസി) തിരുവനന്തപുരം ജില്ലാ കോ-ഓർഡിനേറ്റര്‍ ഡോ. ഡി. സുരേഷ്‌കുമാര്‍ അദ്ധ്യക്ഷത വഹിച്ചു. അവാര്‍ഡ് ദാനവും പുസ്തകപ്രകസനവും ഡോ.സി. സാം രാജ് നിര്‍വഹിച്ചു. തിരുവനന്തപുരം സിടിടിസി ഡയക്ടര്‍ ഡോ. പി. മോഹനന്‍ നായര്‍ മുഖ്യാതിഥിയായിരുന്നു. പി. ശശികുമാര്‍ മുഖ്യ പ്രഭാഷണം നടത്തി. പാരമ്പര്യ വൈദ്യശാസ്ത്രത്തെ അടിസ്ഥാനപ്പെടുത്തി വിവിധ സെമിനാറുകളും വിശിഷ്ട വ്യക്തികളെ ആദരിക്കലും വിവിധങ്ങളായ സസ്യജാല പ്രദര്‍ശനങ്ങളും, മെഡിക്കല്‍ ക്യാമ്പും സംഘടിപ്പിച്ചു . പ്രസിദ്ധരായ പാരമ്പര്യ വൈദ്യന്‍മാരും, സിദ്ധ, ആയുര്‍വേദ, അലോപ്പതി ഡോക്ടര്‍മാരും പരിപാടിയില്‍ പങ്കെടുത്തു.

വെള്ളറടയില്‍ വൈദ്യുതി പ്രതിസന്ധി; മരങ്ങള്‍ ഒടിഞ്ഞുവീണ് നാശനഷ്ടം

വെള്ളറട: പാറശാലയില്‍ നിന്ന് വെള്ളറട സബ്‌സ്‌റ്റേഷന്‍ വരെയുള്ള 33 കെവി ലൈനില്‍ കേബിള്‍ വലിക്കാത്തത് വലിയ വൈദ്യുതി പ്രതിസന്ധിക്ക് കാരണമായി. മലയോര ഹൈവേ റോഡുമായി ബന്ധപ്പെട്ട് പോകുന്ന ഇലക്ട്രിക് പോസ്റ്റിലാണ് 33 കേബിള്‍ വലിക്കുന്നത്. കേബിള്‍ വലിക്കുന്നതോടെ പാറശാല 110 കെ വി സബ്‌സ്‌റ്റേഷനില്‍ നിന്നും വെള്ളറട 110 കെവി സബ്‌സ്‌റ്റേഷന്‍ വരെയുള്ള പ്രധാന റോഡിലൂടെ വൈദ്യുതി തടസമില്ലാതെ എത്തിക്കാന്‍ കഴിയും. കേബിള്‍ വലിക്കല്‍ കൃത്യമായി നടക്കാത്തത് കാരണം ഗ്രാമീണ മേഖലയിലെ ഇട റോഡുകളിലെ വൈദ്യുതി കമ്പികളുടെ പുറത്ത് മരങ്ങള്‍ വീണു വൈദ്യുതി തടസം സൃഷ്ടിക്കുന്നതിനാല്‍ വെള്ളറട മേഖലയാകെ ഇരുട്ടിലാവുകയാണ് ചെയ്യുന്നത്. കെഎസ്ഇബി അവസരോചിതമായി കേബിള്‍ വലിക്കാത്തതാണ് ദിവസങ്ങളായി വെള്ളറട പ്രദേശം ഇരുട്ടിലാകാന്‍ കാരണം. ദിവസങ്ങളിലായി തിമിര്‍ത്തു പെയ്യുന്ന മഴ പ്രദേശമാകെ വൈദ്യുതി തടസത്തിനും വ്യാപക കൃഷി നാശത്തിനും ഇടവരുത്തിയിട്ടുണ്ട്. മരങ്ങള്‍ വീഴുന്നത് ജീവനക്കാര്‍ക്ക് തക്കസമയത്ത് നീക്കം ചെയ്യാന്‍ കഴിയുന്നില്ല.

കടലിൽ കുടുങ്ങിയ മത്സ്യത്തൊഴിലാളികളെ രക്ഷിച്ചു

വിഴിഞ്ഞം: വള്ളത്തിന്‍റെ എൻജിൻ തകരാറിലായി കടലിൽ കുടുങ്ങിയ അഞ്ച് മത്സ്യത്തൊഴിലാളികളെയും അവരുടെ വള്ളവും മറൈൻ എൻഫോഴ്സ്മെന്‍റ് രക്ഷിച്ച് കരയിലെത്തിച്ചു. ഇന്നലെ വൈകുന്നേരം നാലിന് വിഴിഞ്ഞം ഹാർബറിൽ നിന്നും മത്സ്യബന്ധത്തിനായി പോയ വള്ളക്കടവ് സ്വദേശി ലൂർദ് റൂബി എന്ന വ്യക്തിയുടെ ഉടമസ്ഥതയിലുള്ള റൂബി എന്ന വള്ളം വിഴിഞ്ഞം മൗത്തിനു സമീപത്തുവച്ച് എൻജിൻ തകരാറിലാവുകയായിരുന്നു . വിവരം ലഭിച്ചതിന്‍റെ അടിസ്‌ഥാനത്തിൽ വിഴിഞ്ഞം ഫിഷറീസ് അസിസ്റ്റന്‍റ് ഡയറക്ടർ രാജേഷിന്‍റെ നിർദേശപ്രകാരം മറൈൻ എൻഫോഴ്സ്‌മെന്‍റ് സിപിഒമാരായ അനന്തു, രഞ്ജിത്ത് ലൈഫ്ഗാർഡുമാരായ ബനാൻഷ്യസ്, പി.പനിയടിമ , റോബർട്ട്, മാർട്ടിൻ, വിനു എന്നിവരുടെ നേതൃത്വത്തിൽ മറൈൻ റെസ്ക്യൂ വള്ളത്തിൽ രക്ഷാപ്രവർത്തനം നടത്തി. വളത്തിലുണ്ടായിരുന്ന ഡോണി, ജോസഫ്, ജോമോൻ, ജോൺസൻ, സിൽവർസ്റ്റർ എന്നീ ത്സ്യത്തൊഴിലാളികളെയും വള്ളത്തെയും സുരക്ഷിതമായി കരയിലെത്തിച്ചു.

ചെങ്കല്ല് നിര്‍മാണത്തിനുള്ള മണ്ണെടുക്കൽ നാട്ടുകാർ തടഞ്ഞു

പാറശാല: അനധികൃത മണ്ണ് ഖനനം നാട്ടുകാര്‍ തടയാന്‍ ശ്രമിച്ചതിനെ തുടര്‍ന്ന് വാക്കേറ്റം. ചെങ്കല്‍ പഞ്ചായത്തിലെ നൊച്ചിയൂരില്‍ പ്രവര്‍ത്തിക്കുന്ന ചെങ്കല്ല് നിര്‍മാണ കേന്ദ്രമാണ് നെയ്യാറിന്‍റെ ബണ്ടിനോട് ചേര്‍ന്ന് അനധികൃത മണ്ണ് ഖനനം നടത്തുന്നതായി ആരോപിച്ച് നാട്ടുകാര്‍ രംഗത്തെത്തിയത്. പുറത്തു നിന്നെത്തിക്കുന്ന കളിമണ്ണ് നെയ്യാറിന്‍റെ ബണ്ടില്‍ നിക്ഷേപിച്ചശേഷം ബണ്ടിലെ മണ്ണും കളിമണ്ണും യന്ത്രസഹായത്താല്‍ ചേര്‍ത്ത് ചെങ്കല്‍ നിര്‍മാണ കേന്ദ്രത്തിലേക്ക് കൊണ്ടുപോകുവാനുള്ള ശ്രമമാണ് നാട്ടുകാരുടെ നേതൃത്വത്തില്‍ തടഞ്ഞത്. മണ്ണ് ഖനനം നടത്തിയ തൊഴിലാളികളും തടയാന്‍ ശ്രമിച്ച നാട്ടുകാരും തമ്മിലുണ്ടായ വാക്കേറ്റം സംഘര്‍ഷത്തിന്‍റെ വക്കോളമെത്തി. തുടര്‍ന്ന് സ്ഥലത്തെത്തിയ പാറശാല പോലീസ് ഖനനം താത്കാലികമായി നിര്‍ത്തിവയ്പിച്ചു. കൃഷിയിടങ്ങളോട് ചേര്‍ന്നുള്ള പ്രദേശത്ത് നടക്കുന്ന അനധികൃതഖനനം ബണ്ടിന്‍റെ തകര്‍ച്ചയ്ക്ക് കാരണമാകുമെന്ന് ആരോപിച്ചാണ് നാട്ടുകാര്‍ ഖനനം തടഞ്ഞത്. പുറത്തുനിന്ന് ജെസിബി അടക്കമുള്ള യന്ത്രങ്ങളെത്തിച്ച് വന്‍തോതിലുള്ള ഖനനമാണ് ഇവിടെ നടക്കുന്നത്. മൂന്ന് വര്‍ഷങ്ങള്‍ക്ക് മുന്‍പെ അനധികൃത മണ്ണ് ഖനനം നടത്തിയതിനെ തുടര്‍ന്ന് പ്രദേശത്ത് സംഘര്‍ഷങ്ങളുണ്ടായിരുന്നു. അന്ന് നിര്‍ത്തി വച്ച ഖനനമാണ് ഇപ്പോള്‍ പുനരാരംഭിച്ചിരിക്കുന്നത്. ചെങ്കല്‍ പഞ്ചായത്തിലെ കാര്‍ഷിക മേഖലയ്ക്കാകെ ഭീഷണിയായി മാറിയിട്ടുള്ള അനധികൃത മണ്ണ് ഖനനം തടയണമെന്നാവശ്യപ്പെട്ട് പ്രക്ഷോഭത്തിന് ഒരുങ്ങുകയാണ് പ്രദേശവാസികള്‍‌.

തൊഴിലുറപ്പു പണിക്കിടെ പാമ്പിന്‍റെ കടിയേറ്റു

വെള്ളറട: സ്വകാര്യ ഭൂമിയില്‍ തൊഴിലുറപ്പു പണികള്‍ ചെയ്യുന്നതിനിടെ തൊഴിലാളിക്ക് പാമ്പിന്‍റെ കടിയേറ്റു. തേക്കുപാറ സന്തോഷ് ഭവനില്‍ വത്സലകുമാരി(63)യെയാണ് പാന്പ് കടിച്ചത്. രാവിലെ 11 ഓടെയായിരുന്നു സംഭവം. അമ്പൂരി പഞ്ചായത്തിലെ തേക്കുപാറ വാര്‍ഡിലെ തേക്കുപാറകൊണ്ടകെട്ടി റോഡരികിലെ സ്വകാര്യ പുരയിടത്തില്‍ പണിചെയ്യുന്നതിനിടയിലാണ് വത്സലകുമാരിക്ക് അണലിയുടെ കടിയേറ്റത്. കൂടെയുണ്ടായിരുന്ന മറ്റ് തൊഴിലാളികളുടെ സഹായത്തോടെ ഉടനെ നെയ്യാറ്റിന്‍കര ആശുപത്രിയിലെത്തിച്ചു. നെയ്യാറ്റിന്‍കരയില്‍ ചികിത്സയ്ക്കിടയില്‍ കൈയില്‍ നീര് കൂടിയതിനാല്‍ മോതിരവും വളയും ഊരിമാറ്റാന്‍ സാധിച്ചില്ല. പിന്നീട് അഗ്‌നിരക്ഷാസേന അധികൃതരെത്തിയാണ് അവ നീക്കിയത്. പിന്നീട് വത്സലകുമാരിയെ വിദഗ്ധ ചികിത്സയ്ക്കായി തിരുവനന്തപുരം മെഡിക്കല്‍ കോളജാശുപത്രിയിലേക്കു മാറ്റി.

വാട്ടർ അഥോറിറ്റി പെൻഷൻ കുടിശിക വിതരണം ചെയ്യാൻ നടപടിവേണം: സി. ദിവാകാരൻ

നെടുമങ്ങാട്: കേരള വാട്ടർ അഥോറിറ്റി പെൻഷനേഴ്സ് അസോസിയേഷന്‍റെ 28-ാം ജില്ലാ സമ്മേളനം മുൻ ഭക്ഷ്യ സിവിൽ സപ്ലെയിസ് മന്ത്രി സി. ദിവാകരൻ ഉദ്ഘാടനം ചെയ്തു. ജില്ലാ പ്രസിഡന്‍റ് ജി. ശശിയുടെ അധ്യക്ഷത വഹിച്ചു. കേരള വാട്ടർ അഥോറിറ്റിയിലെ പെൻഷൻകാരുടെ പെൻഷൻ കുടിശിക മുടങ്ങിയത് അടിയന്തരമായി നൽകണമെന്ന് അദ്ദേഹം ആവശ്യപ്പെട്ടു. സംസ്ഥാന ജനറൽ സെക്രട്ടറി പി. കൃഷ്ണൻകുട്ടി നായർ സംഘടന റിപ്പോർട്ട് അവതരിപ്പിച്ചു. സംസ്ഥാന സെക്രട്ടറി എൻ. ജയകുമാർ,സംസ്ഥാന കൌൺസിൽ അംഗം കേശവദാസപുരം വിജയൻ, ജില്ലാ സെക്രട്ടറി അരുവിക്കര വിജയൻ നായർ, വെള്ളനാട് വിജയൻ , കെ. വിജയ കുമാർ തുടങ്ങിയവർ പ്രസംഗിച്ചു. സമ്മേളനം 20 അംഗ ജില്ലാ കൗൺസിലിനെ തെരഞ്ഞെടുത്തു. ഭാരവാഹികളായി ജില്ലാ പ്രസിഡന്‍റായി ജി. ശശിയെയും വൈസ് പ്രസിഡന്‍റായി വെള്ളനാട് വിജയനേയും, സെക്രട്ടറിയായി അരുവിക്കര വിജയൻ നായരേയും ജോയിന്‍റ് സെക്രട്ടറിയായി കേശവദാസപുരം വിജയനെയും ട്രഷറർ ആയി കെ. വിജയകുമാറിനെയും തെരഞ്ഞെടുത്തു.

സാൽവേഷൻ ആർമി; സ്ഥാനാരോഹണ ശുശ്രൂഷ നാളെ

തിരുവനന്തപുരം: സാൽവേഷൻ ആർമിയുടെ പുതിയ ടെറിട്ടോറിയൽ കമാൻഡർ കേണൽ പ്രകാശ് ചന്ദ്ര പ്രധാൻ, വനിതാ ശുശ്രൂഷകളുടെ സംസ്ഥാന പ്രസിഡന്‍റ് കേണൽ റാണി ഫൂല പ്രധാൻ എന്നിവരുടെ സ്ഥാനാരോഹണ ശുശ്രൂഷ നാളെ നടക്കും. കവടിയാർ കമ്മീഷണർ പി. ഇ. ജോർജ് മെമ്മോറിയൽ ചർച്ചിൽ നടക്കുന്ന ശുശ്രൂഷയിൽ മുഖ്യ കാര്യദർശി ലെഫ്.കേണൽ ജേക്കബ് ജോണ്‍ ജോസഫ് അധ്യക്ഷനാകും. ഉച്ചയ്ക്ക് 2.30 ന് പുതിയ സംസ്ഥാന നേതാക്കളെ സ്വീകരിച്ച് ദേവാലയത്തിലേക്ക് ആനയിക്കും. കമ്മീഷണർ എം.സി. ജയിംസിന്‍റെ പ്രാർഥനയോടെയാണ് ശുശ്രൂഷകൾ ആരംഭിക്കുന്നത്. മുഖ്യ കാര്യദർശി ലെഫ്.കേണൽ ജേക്കബ് ജോസഫ് പുതിയ നേതൃത്വത്തെ പരിചയപ്പെടുത്തും. തുടർന്ന് കമ്മീഷണർമാരായ വിൽഫ്രഡ് വർഗീസ്, പ്രേമ വിൽഫ്രഡ് എന്നിവർ സ്ഥാനാരോഹണ ശുശ്രൂഷയ്ക്ക് നേതൃത്വം നൽകും. സാൽവേഷൻ ആർമി ജനറൽ ലിൻഡൻ ബക്കിംഗ്ഹാമിന്‍റെ സന്ദേശം ചടങ്ങിൽ കമ്മീഷണർ വിൽഫ്രഡ് വർഗീസ് വായിക്കും. സെൻട്രൽ ചർച്ച് സോംങ് സ്റ്റേഴ്സ് ബ്രിഗേഡ് സ്വാഗത ഗാനം ആലപിക്കുന്പോൾ പുതിയ നേതാക്കൾക്ക് സംസ്ഥാനത്തിന്‍റെ സ്വീകരണം നൽകും.മേജർ ആശാ ജസ്റ്റിൻ, ലെഫ്.കേണൽ ഡേവിഡ്സണ്‍ വർഗീസ്, ജൂനി കോശി മറിയം, ശ്യം അരുവിക്കര, പോൾ രാജ് കുമാർ എന്നിവർ ആശംസകൾ അർപ്പിക്കും. കേണൽ റാണി ഫൂലെ പ്രധാൻ മറുപടി പ്രസംഗം നടത്തും. കേണൽ പ്രകാശ് ചന്ദ്ര പ്രധാൻ തിരുവചന സന്ദേശം നൽകും. ലെഫ്.കേണൽ സോണിയാ ജേക്കബ് സമാപന പ്രാർത്ഥന നടത്തും.സംസ്ഥാനാധിപൻ കേണൽ പ്രകാശ് ചന്ദ്ര പ്രധാൻ ആശീർവദിക്കും.

വർണോത്സവം -2025

നെടുമങ്ങാട്: ഉഴമലയ്ക്കൽ ശ്രീനാരായണ ഹയർ സെക്കൻഡറി സ്കൂളിൽ എസ്എസ്എൽസി, പ്ലസ് ടു,വിവിധ സ്കോളർഷിപ്പ് പരീക്ഷകളിൽ ഉന്നത വിജയം നേടിയ വിദ്യാർഥികളെയും കലാകായിക മേഖലയിൽ മികച്ച പ്രകടനം കാഴ്ചവച്ച പ്രതിഭകളെയും ആദരിക്കുന്ന വർണോത്സവം -2025 ജി.സ്റ്റീഫൻ എംഎൽഎ ഉദ്ഘാടനം ചെയ്തു. പിടിഎ പ്രസിഡന്‍റ് എം.നകുലൻ അധ്യക്ഷത വഹിച്ചു. സിനിമാ പിന്നണി ഗായിക രാജലക്ഷ്മി,കവി ഗിരീഷ് പുലിയൂർ എന്നിവർ മുഖ്യാതിഥികളായി പങ്കെടുത്തു. പഞ്ചായത്ത് പ്രസിഡന്‍റ് ജെ. ലളിത സരസ്വതി ടീച്ചർ മെമ്മോറിയൽ ക്യാഷ് അവാർഡ് വിതരണവും യുഎസ്എസ് സ്കോളർഷിപ്പ് വിജയികൾക്കുള്ള സമ്മാനദാനം മാനേജർ ആർ. സുഗതനും നിർവഹിച്ചു.

മാതാപിതാക്കളുടെ കല്ലറ പൊളിച്ചു നീക്കാനൊരുങ്ങി മകന്‍

നെയ്യാറ്റിന്‍കര: "അച്ഛനെയും അമ്മയെയുമായിരുന്നു ഒരുപാടിഷ്ടം. അവരെ കൊന്നവര്‍ക്കെതിരെ യാതൊരു നടപടിയുമില്ല." നെയ്യാറ്റിന്‍കര വെണ്‍പകല്‍ നെട്ടത്തോട്ടം ലക്ഷംവീട് കോളനിയില്‍ ഡി. രാജയുടെയും ടി.അന്പിളിയുടെയും മകന്‍ ആര്‍. രഞ്ജിത്ത് രാജ് വീട്ടുമുറ്റത്തിരുന്ന് പൊട്ടിക്കരയുന്പോള്‍ വാക്കുകള്‍ക്ക് വല്ലാത്ത മൂര്‍ച്ച... സര്‍ക്കാരിനും മുഖ്യമന്ത്രിക്കും നിയമവ്യവസ്ഥയ്ക്കും എതിരേ രഞ്ജിത്ത് വിമര്‍ശനവും ഉന്നയിച്ചു. അഞ്ചു വര്‍ഷം മുന്പും രഞ്ജിത്തിന്‍റെ അണ പൊട്ടിയൊഴുകുന്ന സങ്കടവും രോഷവും കേരളം കണ്ടതാണ്. മാതാപിതാക്കള്‍ക്ക് വേണ്ടിയുള്ള കല്ലറയൊരുക്കാന്‍ കുഴിയെടുത്തുനിന്ന രഞ്ജിത്ത് പോലീസുകാരുടെ മുഖത്ത് നോക്കി വിരല്‍ ചൂണ്ടി പറഞ്ഞു- `നിങ്ങളെല്ലാപേരും കൂടിയാണ് എന്‍റെ അച്ഛനെയും അമ്മയെയും കൊന്നത്...` അന്ന് നിര്‍മിച്ച കല്ലറ പൊളിക്കാന്‍ പോവുകയാണെന്ന് രഞ്ജിത്ത് ഇന്നലെ ലോകത്തോട് വിളിച്ചു പറഞ്ഞു. വീടും കല്ലറയും പൊളിച്ച് സ്ഥലം പഴയതുപോലെ ഉടമയ്ക്ക് തിരിച്ചു നല്‍കണമെന്ന കോടതി വിധിയുടെ പശ്ചാത്തലത്തിലാണ് തീരുമാനം കൈക്കൊണ്ടതെന്ന് രഞ്ജിത്ത് കൂട്ടിച്ചേര്‍ത്തു. 2020 ഡിസംബര്‍ 20 നാണ് രാജനും അന്പിളിക്കും തീപ്പൊള്ളലേല്‍ക്കുന്നത്. മൂന്നു സെന്‍റ് ഭൂമിയില്‍ തകര ഷീറ്റുകള്‍ മറച്ച വീടായിരുന്നു ആ കുടുംബത്തിന്‍റെ ആകെയുള്ള കിടപ്പാടം. മാനസിക വെല്ലുവിളി നേരിടുന്ന അന്പിളി ചികിത്സ പൂര്‍ത്തിയാക്കി വീട്ടില്‍ തിരിച്ചെത്തിയെങ്കിലും അധികകാലം മക്കളോടൊപ്പം കഴിയാന്‍ വിധി അനുവദിച്ചില്ല. ഇവര്‍ താമസിക്കുന്ന പുരയിടത്തിന്‍റെ ഉടമസ്ഥാവകാശം തനിക്കാണെന്ന കോടതിവിധിയുമായി അയല്‍വാസി വസന്ത എത്തിയതോടെയാണ് വിവാദങ്ങള്‍ തല പൊക്കിയത്. ഒഴിപ്പിക്കല്‍ നടപടി നടക്കുന്നതിനിടയില്‍ രാജനും അന്പിളിയും ശിരസ്സില്‍ കൂടി മണ്ണെണ്ണ ഒഴിച്ച് പ്രതിഷേധിച്ചു. ഇരുവരെയും പിടിച്ചു മാറ്റുന്നതിനിടയില്‍ തീ പടര്‍ന്നു. ഇരുവരും ദാരുണമായി മരണമടഞ്ഞു. വിവാദ പുരയിടത്തില്‍ ഒരു സന്നദ്ധ സംഘടന രാജന്‍റെയും അന്പിളിയുടെയും മക്കളായ രാഹുലിനും രഞ്ജിത്തിനുമായി പുതിയ വീട് നിര്‍മ്മിച്ചു നല്‍കി. കഴിഞ്ഞ ദിവസം ഈ പുരയിടം വസന്തയുടേതു തന്നെയെന്ന് വീണ്ടും കോടതി വിധിച്ചുവെന്ന് രഞ്ജിത്ത് പറയുന്നു. ഇതോടെ സര്‍ക്കാരില്‍ നിന്നും നീതി കിട്ടിയില്ലായെന്ന ആരോപണവുമായി രഞ്ജിത്ത് ബാങ്കിന്‍റെ രേഖകളും ആധാര്‍, എടിഎം, തിരിച്ചറിയല്‍ കാര്‍ഡുകളും കത്തിച്ച് പ്രതിഷേധിച്ചു.

ജെ.സി. ഡാനിയേലിന്‍റെ വെങ്കല പ്രതിമ; നിർമാണം പുരോഗമിക്കുന്നു

നേമം: മലയാള സിനിമയുടെ പിതാവ് എന്നറിയപ്പെടുന്ന ജെ.സി. ഡാനിയേലിന്‍റെ വെങ്കല പ്രതിമ നിർമാണത്തിന്‍റെ ആദ്യഘട്ടം പൂർത്തിയായി. ചിത്രാഞ്ജലി സ്റ്റുഡിയോയിൽ സ്ഥാപിക്കുന്നതിനായാണ് പ്രതിമ നിർമിക്കുന്നത്. ചലച്ചിത്ര വികസന കോർപ്പറേഷനാണ് നിർമ്മാണത്തിന്‍റെ ചെലവ് വഹിക്കുന്നത്. കുന്നുവിള മുരളിയാണ് ശില്പി. നാല് മാസം കൊണ്ടാണ് ശില്പത്തിന്‍റെ ആദ്യഘട്ടം കളിമണ്ണിൽ പൂർത്തിയാക്കിയത്. ജെ.സി. ഡാനിയേലിന്‍റെ മകൻ സി.ജെ. ഹാരിസ് സാനിയേലും ഭാര്യ സുശീല റാണിയും പാപ്പനംകോട് എസ്റ്റേറ്റിലുള്ള മുരളിയുടെ ശിൽപ്പ കേന്ദ്രത്തിലെത്തി സന്തുഷ്ടി അറിയിച്ചു. ഇനി നാല് മാസം കൊണ്ട് പ്രതിമ പൂർത്തിയാക്കാനാകുമെന്ന് ശില്പി കുന്നുവിള മുരളി പറഞ്ഞു. നാല് ഘട്ടങ്ങളിലൂടെയാണ് പ്രതിമ നിർമാണം പൂർത്തിയാക്കുന്നത്.

മനുഷ്യാവകാശ സംരക്ഷണത്തിനായി പ്രതിഷേധ സംഗമം

തിരുവനന്തപുരം: വർധിച്ച തെരുവുനായ ശല്യം, സർക്കാർ ആശുപത്രികളിലെ മരുന്ന്, ശസ്ത്രക്രിയ ഉപകരണക്ഷാമം, പൊതുകെട്ടിടങ്ങളുടെ സുരക്ഷാഭീഷണി എന്നീ വിഷയങ്ങളിൽ മനുഷ്യാവകാശ സംരക്ഷണം ഉറപ്പു വരുത്തണമെന്ന് ആവശ്യപ്പെട്ടുകൊണ്ട് ’നീതിക്കായി’ എന്നപേരിൽ സൊസൈറ്റി ഫോർ പീപ്പിൾസ് റൈറ്റ്സ് പ്രതിഷേധമാർച്ചും സെക്രട്ടേറിയറ്റ് നടയിൽ പ്രതിഷേധസംഗമവും സംഘടിപ്പിച്ചു. പ്രതിഷേധ സംഗമം ചെയർമാൻ എം.എം. സഫർ ഉദ്ഘാടനം ചെയ്തു. സാമൂഹിക പ്രവർത്തകൻ മുക്കന്പാലമൂട് രാധാകൃഷ്ണൻ, ഗാന്ധിയൻ അഡ്വ. ഹരീന്ദ്രനാഥ്, വേൾഡ് മലയാളി കൗണ്‍സിൽ പ്രതിനിധി ഷാഫി മണക്കാട് എന്നിവർ പ്രസംഗിച്ചു. സ്പെൻസർ ജംഗ്ഷനിൽ നിന്നും ആരംഭിച്ച പ്രതിഷേധ റാലിക്കും സെക്രട്ടേറിയറ്റ് നടയിൽ നടയിൽ നടന്ന പ്രതിഷേധസംഗമത്തിനും സംസ്ഥാന വർക്കിംഗ് പ്രഡിഡന്‍റ് വി.എസ്. പ്രദീപ്, ജനറൽ സെക്രട്ടറി വേണുഹരിദാസ്, സംസ്ഥാന വൈസ് പ്രസിഡന്‍റ്, സി. വേണുഗോപാൽ തിരുവനന്തപുരം ജില്ലാ പ്രസഡന്‍റ് ബി. ശശിധരൻ നായർ, ജില്ലാ ജനറൽ സെക്രട്ടറി പാളയം സിയാദ് എന്നിവർ നേതൃത്വം നൽകി.

പഞ്ചഗുസ്തി താരത്തിന് ജന്മനാടിന്‍റെ സ്നേഹാദരം

നെയ്യാറ്റിന്‍കര : പഞ്ചഗുസ്തിയില്‍ ദേശീയതലത്തില്‍ വെള്ളി മെഡല്‍ പൊരുതി നേടിയ എ.എസ്. ദേവനാരായണന് ജന്മനാടിന്‍റെ സ്നേഹാദരം. നല്ല കൈക്കരുത്തും മനോധൈര്യവും കൃത്യസമയത്ത് എതിരാളിയുടെ വീഴ്ച മനസിലാക്കി പരാജയപ്പെടുത്താനുള്ള കഴിവും ഒത്തു ചേര്‍ന്നാല്‍ വിജയം ഉറപ്പിക്കാവുന്ന പഞ്ചഗുസ്തി മത്സരത്തില്‍ 75 കിലോഗ്രാം വിഭാഗത്തിലാണ് നെയ്യാറ്റിന്‍കര രാമേശ്വരം സ്വദേശി ദേവനാരായണന്‍ രണ്ടാം സ്ഥാനം കരസ്ഥമാക്കിയത്. ജിം മാസ്റ്റർ ആയ മുഹമ്മദ് റാസിയുടെ നിര്‍ദേശപ്രകാരം പഞ്ചഗുസ്തിയില്‍ ശ്രദ്ധ ചെലുത്തി തുടങ്ങിയ ദേവനാരായണന്‍ അധികം വൈകാതെ സംസ്ഥാന ചാന്പ്യനുമായി. രാജ്യത്തിന്‍റെ പ്രതിനിധിയായി വിശ്വമത്സരത്തിന് തയാറെടുക്കുന്ന സന്ദര്‍ഭത്തിലാണ് രാമേശ്വരം പൗരാവലി കായികതാരത്തെ ആദരിച്ചത്. ഗ്രേസ് ഗാർഡൻസിൽ നടന്ന ചടങ്ങില്‍ കെ. ആന്‍സലന്‍ എംഎല്‍എ അനുമോദന സമ്മേളനം ഉദ്ഘാടനം ചെയ്തു. രാമേശ്വരം കൗൺസിലറും ബിജെപി നെയ്യാറ്റിൻകര നഗരസഭ പാർലമെന്‍ററി പാർട്ടി ലീഡറുമായ ഷിബുരാജ് കൃഷ്ണ അധ്യക്ഷനായി. ബിജെപി തിരുവനന്തപുരം ജില്ല സൗത്ത് പ്രസിഡന്‍റ് മുക്കംപാലമൂട് ബിജു, മണ്ഡലം പ്രസിഡന്‍റ് ഗോപാലകൃഷ്ണൻ, ഫ്രാൻ പ്രസിഡന്‍റ് എസ്. കെ. ജയകുമാർ, നെയ്യാറ്റിൻകര നഗരസഭ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. ഷിബു, രാമേശ്വരം റസിഡൻസ് അസോസിയേഷൻ പ്രസിഡന്‍റ് എസ്.വി.സാജൻ, രാമേശ്വരം ശ്രീ മഹാദേവക്ഷേത്ര ഉപദേശക സമിതി പ്രസിഡന്‍റ് എസ്.എസ്. മനു, നെയ്യാറ്റിൻകര നഗരസഭ കൗണ്‍സിലര്‍മാരായ മഞ്ചന്തല സുരേഷ്, ഗ്രാമം പ്രവീൺ, മരുതത്തൂർ ബിനു, കല മുതലായവരും രാമേശ്വരം അക്ഷയശ്രീ, കുടുംബശ്രീ ഉൾപ്പെടെയുള്ള യൂണിറ്റംഗങ്ങളും ചടങ്ങില്‍ സംബന്ധിച്ചു.

കര്‍മല മാതാവിന്‍റെ തിരുനാളിനു കൊടിയേറി

തിരുവനന്തപുരം: വഴുതക്കാട് കാര്‍മ്മല്‍ഹില്‍ ആശ്രമ ദേവാലയത്തില്‍ കരർമല മാതാവിന്‍റെ തിരുനാളിനു കൊടിയേറി. ഇന്നലെ വൈകുന്നേരം 5.30ന് ആരംഭിച്ച കൊടിയേറ്റ്, ജപമാല, ദിവ്യകാരുണ്യ ആശിര്‍വാദം, നൊവേന എന്നീ തിരുക്കര്‍മങ്ങള്‍ക്ക് മലബാര്‍ പ്രോവിന്‍സ് കൗണ്‍സിലര്‍ റവ.ഡോ. ഫ്രാന്‍സിസ് ചിറ്റൂപ്പറമ്പില്‍ ഒസിഡി മുഖ്യകാര്‍മികനായിരുന്നു. തുടര്‍ന്ന് കാര്‍മ്മല്‍ഹില്‍ ആശ്രമം പ്രിയോര്‍ റവ.ഡോ. കുര്യന്‍ ആലുങ്കല്‍ ഒസിഡി കര്‍മ്മല മാതാവും കര്‍മ്മല സഭയും എന്ന വിഷയത്തില്‍ സന്ദേശം നല്‍കി. ഇന്നു വൈകുന്നേരം 5.30ന് ആരംഭിക്കുന്ന ദിവ്യബലിക്ക് പാളയം സെന്‍റ് ജോസഫ്‌സ് കത്തീഡ്രല്‍ ഫൊറോനാ വികാരി മോണ്‍.ഡോ.ഇ. വില്‍ഫ്രഡ് മുഖ്യകാര്‍മികനായിരിക്കും. ലൂര്‍ദ് ഫൊറോന വികാരി മോണ്‍.ഡോ. ജോണ്‍ തെക്കേക്കര വചനസന്ദേശം നല്‍കും. നാളെ രാവിലെ 6.30നും 8.30നും 11ന് ഇംഗ്ലീഷിലും വൈകുന്നേരം നാലിനും ദിവ്യബലിയുണ്ടാകും. തിങ്കള്‍, ചൊവ്വ ദിവസങ്ങളില്‍ വൈകുന്നേരം 5.30ന് വിശുദ്ധ കുര്‍ബാന. ബുധന്‍ വൈകുന്നേരം 5.30ന് ആരംഭിക്കുന്ന ജപമാല, ദിവ്യകാരുണ്യ ആശിര്‍വാദം, നൊവേന എന്നീ തിരുക്കര്‍മങ്ങള്‍ക്ക് ഒസിഡി മലബാര്‍ പ്രോവിന്‍സ് പ്രൊവിന്‍ഷ്യാള്‍ റവ.ഡോ. പീറ്റര്‍ ചക്യത്ത് ഒസിഡി മുഖ്യകാര്‍മികനായിരിക്കും. വ്യാഴം, വെള്ളി, ശനി ദിവസങ്ങളില്‍ വൈകുന്നേരം 5.30ന് ആരംഭിക്കുന്ന വിശുദ്ധ കുര്‍ബാനയ്ക്ക് ചങ്ങനാശേരി അതിരൂപത ആര്‍ച്ച് ബിഷപ് മാര്‍ തോമസ് തറയില്‍‌, മാവേലിക്കര രൂപതാധ്യക്ഷന്‍ മാത്യൂസ് മാര്‍ മാര്‍ പോളികാര്‍പ്പസ്, നെയ്യാറ്റിന്‍കര സഹായമെത്രാന്‍ ഡോ.സെല്‍വരാജന്‍ ദാസന്‍ എന്നിവര്‍ മുഖ്യകാര്‍മികരാകും. സമാപന ദിവസമായ 20ന് രാവിലെ 6.30നും 8.30നും 11ന് ഇംഗ്ലീഷിലും ദിവ്യബലി. ഉച്ചകഴിഞ്ഞ് 4.30ന് ആഘോഷമായ ദിവ്യബലി, ദിവ്യകാരുണ്യ പ്രദക്ഷിണം. മുഖ്യകാര്‍മികന്‍ തിരുവനന്തപുരം ലത്തീന്‍ അതിരൂപത ആര്‍ച്ച് ബിഷപ്പ് ഡോ.തോമസ് ജെ.നെറ്റോ. സ്‌നേഹവിരുന്നോടെ തിരുനാള്‍ സമാപിക്കും.

ജയിലില്‍ കൈഞരമ്പ് മുറിച്ച പ്രതി ആംബുലന്‍സില്‍ നിന്നു ചാടി

പേരൂര്‍ക്കട: ജയിലില്‍ കൈഞരമ്പ് മുറിച്ച പ്രതി ചികിത്സയ്ക്കായി ആശുപത്രിയിലേക്കു കൊണ്ടുപോകുന്നതിനിടെ ആംബുലന്‍സില്‍ നിന്നു ചാടി. നെയ്യാറ്റിന്‍കര സ്‌പെഷല്‍ സബ്ജയിലില്‍ പാര്‍പ്പിച്ചിരുന്ന മുഹമ്മദ് കബീര്‍ ആണ് ആംബുലന്‍സില്‍ നിന്നു ചാടിയശേഷം രക്ഷപ്പെടാന്‍ ശ്രമിച്ചത്. ഇന്നലെ വൈകുന്നേരം ആറോടുകൂടി മ്യൂസിയം സ്റ്റേഷന്‍ പരിധിയില്‍ ബാര്‍ട്ടണ്‍ഹില്‍ റോഡിലായിരുന്നു സംഭവം. മാനസികവിഭ്രാന്തി പ്രകടിപ്പിച്ചിരുന്നയാളായിരുന്നു മുഹമ്മദ് കബീര്‍. സബ്ജയിലില്‍ ഇയാളെ പാര്‍പ്പിച്ചിരുന്ന സെല്ലില്‍ ബാത്ത്‌റൂമില്‍ വച്ച് മുഹമ്മദ് കബീര്‍ കൈഞരമ്പു മുറിച്ചു. രക്തം വാര്‍ന്നൊഴുകിയതോടെ സംഭവം ശ്രദ്ധയില്‍പ്പെട്ട ജയിലധികൃതര്‍ ഉടന്‍തന്നെ ഇയാളെ ആംബുലന്‍സില്‍ കയറ്റി തിരുവനന്തപുരം മെഡിക്കല്‍കോളജ് ആശുപത്രിയിലേക്കു കൊണ്ടുപോയി. ജയില്‍ ജീവനക്കാരുടെ സുരക്ഷയില്‍ കൊണ്ടുപോയിട്ടും ബാര്‍ട്ടണ്‍ ഹില്ലിലെത്തിയപ്പോള്‍ ഇയാള്‍ ആംബുലന്‍സില്‍ നിന്ന് പുറത്തേക്ക് ചാടുകയായിരുന്നു. ഓടിരക്ഷപ്പെടാന്‍ ശ്രമിക്കുന്നതിനിടെ ജയില്‍ ജീവനക്കാര്‍ ഇയാളെ പിടികൂടി തിരികെ ആംബുലന്‍സില്‍ കയറ്റി. വീഴ്ചയില്‍ കൈകള്‍ക്കും കാലുകള്‍ക്കും സാരമായി പരിക്കേറ്റ മുഹമ്മദ് കബീറിനെ ആദ്യം അത്യാഹിതവിഭാഗത്തിലും പിന്നീട് സര്‍ജറി വാര്‍ഡിലും പ്രവേശിപ്പിച്ചു. ആത്മഹത്യാശ്രമം നടത്തിയ പ്രതിയെ ആംബുലന്‍സില്‍ കൊണ്ടുപോയതിലുള്ള സുരക്ഷാവീഴ്ചയാണ് ഇയാള്‍ വാഹനത്തില്‍ നിന്നു ചാടാന്‍ ഇടയാക്കിയതെന്ന ആക്ഷേപം ഉയര്‍ന്നിട്ടുണ്ട്.

നിരവധി മോഷണ കേസുകളിലെ പ്രതി പിടിയിൽ

നെടുമങ്ങാട്: നിരവധി വാഹനമോഷണ കേസുകളിലേയും കാണിക്കവഞ്ചി കവർച്ചാ കേസുകളിലേയും പ്രതിയായ നെടുമങ്ങാട് കൊല്ലങ്കാവ് സ്വദേശി ജിബിൻ( 28 )നെ നെടുമങ്ങാട് പൊലീസ് അറസ്റ്റ് ചെയ്തു. നെടുമങ്ങാട് ആറ്റിങ്ങൽ, നെയ്യാറ്റിൻകര ഭാഗങ്ങളിൽ വർക്കഷോപ്പുകളിൽ നടന്ന മോഷണവുമായി ബന്ധപ്പെട്ട അന്വേഷണത്തിലാണ് പ്രതി പിടിയിലായത്. കല്ലമ്പാറ, കൊല്ലങ്കാവ്, പനവൂർ , പോത്തൻകോട് തുടങ്ങിയ സ്ഥലങ്ങളിലെ വർക്ക്ഷോപ്പുകളിൽ നിന്ന് ബാറ്ററികൾ, ഡ്രില്ലിംഗ് മെഷീൻ, കട്ടിംഗ് മെഷീൻ, മറ്റിതര ഉപകരണങ്ങൾ എന്നിവ കവർന്നതായി പ്രതി സമ്മതിച്ചിട്ടുണ്ട്. പ്രതി ഇരുപതിൽ പരം മോഷണ കേസുകളിൽ പ്രതിയാണ്. പ്രതിയെ ഗുണ്ടാ ആക്ട് പ്രകാരം തടങ്കലിലക്കാൻ നടപടികൾ സ്വീകരിച്ചു വരുകയാണ്.

യുവാവിനെ തട്ടിക്കൊണ്ടുപോയി മര്‍ദിച്ചശേഷം മൊട്ടയടിച്ചു

പേരൂര്‍ക്കട: യുവാവിനെ സ്‌കൂട്ടറില്‍ തട്ടിക്കൊണ്ടുപോയി മര്‍ദ്ദിക്കുകയും തല മൊട്ടയടിക്കുകയും ചെയ്ത സംഭവത്തില്‍ മൂന്നുപേരെ മണ്ണന്തല പോലീസ് പിടികൂടി. നാലാഞ്ചിറ അക്ഷയ ഗാര്‍ഡന്‍സ് അമരത്തില്‍ കാപ്പിരി ജിതിന്‍ എന്നുവിളിക്കുന്ന ജിതിന്‍ (35), മെഡിക്കല്‍കോളജ് സ്വദേശി സച്ചു (27), മരുതൂര്‍ മങ്കാരം സ്വദേശി ജ്യോതിസ് (20) എന്നിവരാണ് പിടിയിലായത്. എട്ടിനായിരുന്നു കേസിന്നാസ്പദമായ സംഭവം. മെഡിക്കല്‍കോളജ് സ്വദേശി അബ്ദുള്ള (20) യെയാണ് അഞ്ചംഗസംഘം തട്ടിക്കൊണ്ടുപോയി ക്രൂരമായി മര്‍ദ്ദിക്കുകയും മൊട്ടയടിക്കുകയും ചെയ്തത്. സംഭവദിവസം ചാക്കയില്‍ സുഹൃത്തിനെ വിളിക്കാന്‍ എത്തിയ അബ്ദുള്ളയെ സ്‌കൂട്ടറിലെത്തിയ പ്രതികള്‍ ബലംപ്രയോഗിച്ച് കൊണ്ടുപോകുകയും നാലാഞ്ചിറ കുരിശടിയിലുള്ള ഇടവഴിയില്‍ വച്ച് കമ്പികൊണ്ട് മര്‍ദ്ദിച്ചവശനാക്കുകയും ചെയ്തു. പിന്നീട് ഇയാളെ തിരികെ ചാക്കയില്‍ കൊണ്ടുവിട്ടു. സംഭവം അബ്ദുള്ള പുറത്തു പറഞ്ഞിരുന്നില്ല. എന്നാല്‍ മറ്റൊരു ദിവസം വീണ്ടും അബ്ദുള്ളയെ തട്ടിക്കൊണ്ടുപോയ പ്രതികള്‍ വട്ടിയൂര്‍ക്കാവിലെ ഒരു ഫാമിനുള്ളില്‍വച്ച് ക്രൂരമായി ആക്രമിക്കുകയും തലമുടി മുഴുവന്‍ മുറിച്ചുകളയുകയും ചെയ്യുകയായിരുന്നു. പ്രതികളുടെ സംഘത്തില്‍പ്പെട്ട ജ്യോതിസ് എന്നയാളെ എക്‌സൈസ് സംഘത്തിന് കാട്ടിക്കൊടുത്തതിലുള്ള വിരോധമായിരുന്നു ആക്രമണത്തിനു കാരണം. കഴിഞ്ഞവര്‍ഷം നവംബറില്‍ കഞ്ചാവുമായി ജ്യോതിസിനെ എക്‌സൈസുകാര്‍ പിടികൂടിയിരുന്നു. മണ്ണന്തല സി.ഐ വി. കണ്ണന്‍, എസ്.ഐ ആര്‍.എസ് വിപിന്‍, സി.പി.ഒമാരായ വിനോദ്, അനീഷ്, പ്രദീപ്, പ്രശാന്ത്, സജിത്ത്, പാര്‍ത്ഥന്‍ എന്നിവര്‍ ചേര്‍ന്ന് വിവിധ സ്ഥലങ്ങളില്‍നിന്നാണ് പ്രതികളെ കസ്റ്റഡിയിലെടുത്തത്. സംഘത്തില്‍ ഉള്‍പ്പെട്ട രണ്ടുപേര്‍കൂടി ഇനി പിടിയിലാകാനുണ്ട്. വട്ടിയൂര്‍ക്കാവില്‍ പ്രതികള്‍ യുവാവിനെ എത്തിച്ച ഫാം ഹൗസ് കേന്ദ്രീകരിച്ച് അന്വേഷണം നടന്നുവരികയാണ്. പ്രതികളെ കോടതിയില്‍ ഹാജരാക്കും.

പുനരധിവാസമില്ല; തീരദേശ മേഖലയിൽ കൂട്ടായ്മ ഒരുങ്ങുന്നു

തിരുവനന്തപുരം: കടലാക്രമണത്തെ തുടർന്നു വീടുകൾ തകരുകയും ഉപജീവനമാർഗം നഷ്ടമാകുകയും ചെയ്യുന്ന തീരദേശവാസികളെ പുനരധിവസിപ്പിക്കാനുള്ള തീരുമാനമെടുക്കാത്ത സർക്കാർ സമീപനത്തിൽ ഒറ്റക്കെട്ടായി പ്രതിഷേധിക്കാൻ തീരദേശ മേഖലയിൽ കൂട്ടായ്മ രൂപീകരിച്ചു തുടങ്ങി. വൻകിട കുത്തകകൾക്കായി തീരമൊന്നാകെ വിട്ടു കൊടുക്കുന്പോഴുണ്ടാകുന്ന തീരശോഷണത്തെക്കുറിച്ചും മത്സ്യത്തൊഴിലാളി മേഖലയ്ക്കുണ്ടാകുന്ന നഷ്ടത്തെക്കുറിച്ചും ശാസ്ത്രീയ പഠനം നടത്താനും കേന്ദ്ര-സംസ്ഥാന സർക്കാരുകൾ തയാറാകുന്നില്ല. കാലവർഷക്കെടുതി, സുനാമി, ഓഖി, കപ്പൽ ദുരന്തം, കടലാക്രമണം തുടങ്ങിയവ മൂലം മത്സ്യത്തൊഴിലാളി സമൂഹത്തിന്‍റെ എക്കാലത്തേയും സ്വപ്നമായി സൂക്ഷിച്ച കടലും തീരവും മത്സ്യബന്ധന യാനങ്ങൾ ഉൾപ്പെടെയുള്ള ഉപജീവനം തന്നെ ഇല്ലാതാകുന്ന സാഹചര്യമാണ് കാലാകാലങ്ങളിൽ വരുന്ന രാഷ്ട്രീയ നേതൃത്വവും ഉദ്യോഗസ്ഥ വൃന്ദങ്ങളും അവകാശപ്പെട്ട നീതി നിഷേധിക്കപ്പെടുന്ന സമീപനമാണ് സ്വീകരിക്കുന്നത്. തീരദേശവാസികളെ മേഖലയിൽ നിന്നു കുടിയൊഴിപ്പിക്കാനുള്ള മുതലാളിത്ത അജൻഡ നടപ്പാക്കുന്നതിനെതിരേ കൂടിയാണ് തീരദേശ മേഖലയിൽ കൂട്ടായ്മ രൂപീകരിച്ചു തുടങ്ങിയത്. ആദ്യ കൂട്ടായ്മ തുന്പ മുതൽ പൂന്തുറ വരെയുള്ള കൂട്ടായ്മ കൊച്ചുവേളിയിൽ ചേർന്നു. അടുത്തത് വർക്കല മുതൽ കഴക്കൂട്ടം സെന്‍റ് ആൻഡ്രൂസ് വരെയുള്ള കൂട്ടായ്മയ്ക്ക് രൂപം നൽകും. നീതി നടപ്പാക്കുന്നത് വരെ പോരാട്ടങ്ങൾക്കു നേതൃത്വം നൽകുമെന്നു മാഗ്ലിൻ വലിയ വേളി,റവ. ഡോ. ഫ്രാൻസിസ് ആൽബർട്ട് ഒഎഫ്എസ്, പി. സ്റ്റെലസ്, ഡോ. എഫ്.എം. ലാസർ, ബിബിൻ ദാസ്, വിഴിഞ്ഞം അരുൾ ദാസ്, ഇസാക്ക്ജോണി, ആന്‍റണി പത്രോസ് മെഡോണ, ദീപ്തി ഷാജി വെട്ടുകാട്, ബീമാപള്ളി റഷീദ്, ടി.ബഷീർ, പാക്ട്രിക് മൈക്കിൾ, സേവിയർ ലോപ്പസ്, ജോണി ചെക്കിട്ട, ലിബിൻദാസ്, റംല ബീവി നിത എന്നിവർ അറിയിച്ചു.

ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥൻ വീട്ടിൽ തൂങ്ങിമരിച്ച നിലയിൽ

കഴക്കൂട്ടം: സ്പെഷൽ ഡ്യൂട്ടിക്കുള്ള പരിശീലനത്തിന് പോയ ടെലികമ്യൂണിക്കേഷൻ സിറ്റി ഓഫീസിലെ സർക്കിൾ ഇൻസ്പെക്ടറെ വീട്ടിൽ തൂങ്ങി മരിച്ച നിലയിൽ കണ്ടെത്തി. ചേങ്കോട്ടുകോണം തുണ്ടത്തിൽ കീരിക്കുഴി ബഥേൽ ഹൗസിൽ ജയ്സൻ അലക്സ് (48) ആണ് മരിച്ചത്. കഴിഞ്ഞ രണ്ടു വർഷമായി ഇവിടെ താമസിച്ചുവരികയായിരുന്നു. വ്യാഴാഴ്ച രാത്രി 11.30ന് ഡ്യൂട്ടി കഴിഞ്ഞ് വന്നശേഷം വിഐപി സന്ദർശനത്തിന്‍റെ ഭാഗമായ സ്പെഷൽ ഡ്യൂട്ടിക്ക് പുലർച്ചെ അഞ്ചിന് ഉച്ചഭക്ഷണവും എടുത്ത് ബൈക്കിൽ പോവുകയായിരുന്നു. എന്നാൽ രാവിലെ പത്ത് മണിയോടെ തിരിച്ചെത്തിയതായി അയൽ വീട്ടുകാർ പറഞ്ഞു. ഈ സമയം വീട്ടിൽ ഭാര്യയും മക്കളും ഇല്ലായിരുന്നു. പോലീസും ഫോറൻസിക് വിദഗ്ധരും ഉന്നത ഉദ്യോഗസ്ഥരുമെത്തി പരിശോധന നടത്തിയ ശേഷം മൃതദേഹം പോസ്റ്റുമോർട്ടത്തിനായി മെഡിക്കൽ കോളജ് ആശുപത്രിയിലേക്ക് മാറ്റി. ഭാര്യ സോമി പുതുക്കുറിച്ചി 'ഔവർ ലേഡി ഓഫ് മേഴ്സി' സ്കൂളിലെ അധ്യാപികയാണ്. മക്കൾ: ആൻമി ജയ്സൺ, ആൻസി ജയ്സൺ. ഇരുവരും മേരി നിലയം വിദ്യാലയത്തിലെ വിദ്യാർഥികളാണ്. സഹോദരങ്ങൾ: ജിൽജ അലക്സ്, ജീജാ അലക്സ്, ജൂണാ അലക്സ്. മാനസിക സമ്മർദമാണ് ആത്മഹത്യയ്ക്ക് പ്രേരിപ്പിച്ചതെന്ന് മാതാവും ബന്ധുക്കളും പറയുന്നു. പോസ്റ്റ്മോർട്ടത്തിനുശേഷം മൃതദേഹം കുണ്ടറ കാഞ്ഞിരക്കോട് പള്ളി സെമിത്തേരിയിൽ നടക്കും. കൊല്ലം കുണ്ടറ കാഞ്ഞിരക്കോട് തെങ്ങുവിള വീട്ടിൽ പരേതനായ അലക്സാണ്ടറുടേയും പട്ടത്താനം വിമലഹൃദയ സ്കൂളിലെ കായിക അധ്യാപികയായി വിരമിച്ച ജമ്മയുടേയും മകനാണ്.

യുവാവ് സുഹൃത്തിന്‍റെ വീട്ടിൽ തൂങ്ങിമരിച്ച നിലയിൽ

വെഞ്ഞാറമൂട് : യുവാവിനെ സുഹൃത്തിന്‍റെ വീട്ടിൽ തൂങ്ങിമരിച്ച നിലയിൽ കണ്ടെത്തിയതിൽ ദുരൂഹതയെന്ന് ബന്ധുക്കൾ. കാരേറ്റ് മേലാറ്റുമുഴി ഗായത്രി മന്ദിരത്തിൽ രാധാകൃഷ്ണൻ നായരുടെയും ബേബിയുടെയും മകൻ അനന്ദു കൃഷ്ണൻ (24) നെയാണ് ബുധനാഴ്ച നാലുമണിയോടെ സുഹൃത്തിന്‍റെ വീട്ടിലെ കിടപ്പുമുറിയിൽ തൂങ്ങി മരിച്ച നിലയിൽ കണ്ടെത്തിയത്. ഉച്ചയോടെയാണ് അനന്ദു സുഹൃത്തിന്‍റെ വീട്ടിൽ എത്തിയത്. അനന്ദു ഒഴികെ അവിടെ ഉണ്ടായിരുന്നവർ പുറത്തുപോയിരുന്നു. ഇവർ തിരിച്ചെത്തി നോക്കുമ്പോഴാണ് അനന്ദു തൂങ്ങി മരിച്ച നിലയിൽ കണ്ടത്തിയത്. കാല് നിലത്ത് മുട്ടിയ നിലയിലായിരുന്നുവെന്നും മരണത്തിൽ ദുരൂഹതയുണ്ടെന്നുമാണ് ബന്ധുക്കൾ പോലീസിൽ മൊഴി നൽകിയിരിക്കുന്നത്. പരാതിയുടെ അടിസ്ഥാനത്തിൽ ഫോറൻസിക്, വിരലടയാള വിദഗ്ധർ ഉൾപ്പടെയുള്ളവർ സ്ഥലത്തെത്തി പരിശോധന നടത്തി. പോസ്റ്റ്മോർട്ടത്തിന് ശേഷം മോർച്ചറിയിൽ സൂക്ഷിച്ചിരിക്കുന്ന മൃതദേഹം ഇന്നലെ വീട്ടുവളപ്പിൽ സംസ്കരിച്ചു. എന്നാൽ വീട് അകത്ത് നിന്ന് പൂട്ടിയ ശേഷമാണ് അനന്ദു ആത്മഹത്യ ചെയ്തതെന്നും പ്രാഥമിക പരിശോധനയിൽ ദുരൂഹതയില്ലെന്നും വെഞ്ഞാറമൂട് എസ്എച്ച്ഒ ആസാദ് അബ്ദുൾ കലാം അറിയിച്ചു. ഗോകുലം മെഡിക്കൽ കോളജിലെ ജീവനക്കാരനാണ് മരിച്ച അനന്ദു കൃഷ്ണൻ.

യുവാവ് തൂങ്ങിമരിച്ച നിലയിൽ

തിരുവനന്തപുരം: മന്ത്രി വി. അബ്ദുറഹ്മാന്‍റെ പഴ്സണൽ സ്റ്റാഫംഗം മാനന്തവാടി തൃശ്ശിലേരി ചേക്കോട്ട്കുന്ന് ഉന്നതിയിൽ സി. വി. ബിജു (25)വിനെ തിരുവനന്തപുരം നന്തൻകോടുള്ള ക്വാർട്ടേഴ്സിൽ തൂങ്ങി മരിച്ച നിലയിൽ കണ്ടെത്തി. എസ്എഫ്ഐ മുൻ സംസ്ഥാന കമ്മിറ്റിയംഗമാണ് മരിച്ച ബിജു. പിതാവ്: വിജയൻ, അമ്മ: ബിന്ദു. ഭാര്യ: ശ്യാമിലി. സഹോദരങ്ങൾ: ബിബിൻകുമാർ, ഹരി, വിനോദ്, ദിവ്യ.

പോസ്റ്റ്‌ ഓഫീസ് മാർച്ചും ധർണയും

നെടുമങ്ങാട്: ബിജെപി സർക്കാരിന്‍റെ തൊഴിലാളി വിരുദ്ധ കർഷകദ്രോഹ നയങ്ങൾക്കെതിരെ സംയുക്ത ട്രേഡ് യൂണിയൻ ആഹ്വാനം ചെയ്ത ദേശീയ പണിമുടക്കുമായി ബന്ധപ്പെട്ട് സംഘടിപ്പിച്ച നെടുമങ്ങാട് പോസ്റ്റ്‌ ഓഫീസ് മാർച്ചും ധർണയും സിപിഎം ജില്ലാ സെക്രട്ടേറിയേറ്റ് അംഗം ബി. സത്യൻ ഉദ്ഘാടനം ചെയ്തു. മന്നൂർക്കോണം രാജേന്ദ്രൻ അധ്യക്ഷത വഹിച്ചു. കെ.പി. പ്രമോഷ്, ചെറ്റച്ചൽ സഹദേവൻ, എസ്.എസ്.ബിജു, ഹരികേശൻ നായർ, എസ്.ആർ. ഷൈൻലാൽ, കെ. റഹീം, കെ.എ.അസീസ്, സി. സാബു, ശ്രീകേശ്, ആർ. മധു എന്നിവർ സംസാരിച്ചു.

അമ്പൂരി ദ്രവ്യപ്പാറയിലെ ഗുഹാക്ഷേത്രം പ്രകൃതിരമണീയം

വെള്ളറട: പ്രകൃതിരമണീയമായ പച്ചപ്പുനിറഞ്ഞ കുന്നുകളും ജലാശയങ്ങളും വെള്ളച്ചാട്ടവും കടത്തുവള്ള സഞ്ചാരവും ഉള്‍പ്പെടുന്ന അമ്പൂരി പഞ്ചായത്തിലെ ടൂറിസം പദ്ധതികള്‍ യാഥാര്‍ഥ്യമാവുന്നു. ഇവിടത്തെ വിവിധ ടൂറിസം പദ്ധതികള്‍ക്കായി സര്‍ക്കാര്‍ ഏഴുകോടി രൂപ അനുവദിച്ചു. ആറു കിലോമീറ്റര്‍ ചുറ്റളവില്‍ സ്ഥിതിചെയ്യുന്ന ഇവിടത്തെ പ്രധാന ടൂറിസം സ്‌പോട്ടുകളെ ബന്ധിപ്പിച്ചുള്ള പദ്ധതികളാണ് നടപ്പിലാക്കാന്‍ പോകുന്നത്. നിലവില്‍ നെയ്യാറിന്‍റെ തീരത്ത് ചെറുതും വലുതുമായി റിസോര്‍ട്ടുകള്‍ ഉയര്‍ന്നു തുടങ്ങിയിട്ടുണ്ട്. ഇവിടെ അവധി ദിവസങ്ങളില്‍ സഞ്ചാരികളും എത്തുന്നുണ്ട്. അമ്പൂരി പഞ്ചായത്തിലെ ദ്രവ്യപ്പാറ, കുമ്പിച്ചല്‍ക്കടവ്, കൂനിച്ചിമല, ഏണിപ്പാറ, ആനക്കുള വെള്ളച്ചാട്ടം, കരമാങ്കുളം, വെള്ളറട പഞ്ചായത്തിലെ പ്ലാങ്കുടിക്കാവ്, കള്ളിക്കാട് പഞ്ചായത്തിലെ നെയ്യാര്‍ഡാം എന്നിവ ബന്ധിപ്പിച്ചുള്ള വിനോദസഞ്ചാര പദ്ധതിയാണ് നടപ്പിലാക്കാന്‍ ലക്ഷ്യമിടുന്നത്. കരിമാങ്കുളം തീരവും ഇരപ്പന്‍കുഴിയും നെയ്യാറിന്‍റെ ആഴമില്ലാത്ത തീരങ്ങളില്‍ ഒന്നാണ് കരിമാങ്കുളം തീരം. അമ്പൂരി പഞ്ചായത്തിലെ മായം വാര്‍ഡിലാണ് ഈ കടവ്. നാലുവശത്തെയും മനോഹരങ്ങളായ കാഴ്ചകള്‍ കാണാനും ഫോട്ടോ ഷൂട്ടിനും അനുയോജ്യമായ തീരമാണിത്. നെയ്യാറിന്‍റെ വനത്തില്‍നിന്നുള്ള ഉത്ഭവ കൈവഴി ആറുകളില്‍ ഒന്നാണ് ഇരപ്പാന്‍കുഴി. നിരവധി കൈത്തോടുകള്‍ ഒന്നിച്ച് ഇവിടെയെത്തുന്നു. ശാന്തസുന്ദരവും വിജനവുമായ സ്ഥലമാണിത്. തെളിഞ്ഞ വെള്ളംനിറഞ്ഞ ഈ ജലാശയത്തിലെ കുളിയും തീരത്തെ വിശ്രമവും സഞ്ചാരികളെ ഏറെ ആകര്‍ഷിക്കുന്നുണ്ട്. അമ്പൂരി തൊടുമല വാര്‍ഡിലുള്ള ആനക്കുളം വെള്ളച്ചാട്ടത്തില്‍ മഴയെത്തിയാല്‍ നീരൊഴുക്കും കൂടും. പാറയിടുക്കുകളിലൂടെ ഒഴുകിയെത്തുന്ന ശുദ്ധമായ തണുത്ത വെള്ളത്തിലുള്ള കുളി സഞ്ചാരികള്‍ക്ക് ഏറെ പ്രിയമാണ്. അവധിദിനങ്ങള്‍ ഉള്‍പ്പെടെ മിക്കവാറും ദിവസങ്ങളിലും യുവാക്കള്‍ ഉള്‍പ്പെടെയുള്ള സംഘങ്ങള്‍ എത്തുന്നുണ്ട്. ഡിപിആര്‍ പരിശോധിച്ച് പദ്ധതി നടപ്പിലാക്കും. ജില്ലാ ടൂറിസം പ്രമോഷന്‍ കൗണ്‍സിലിന്‍റെ നേതൃത്വത്തില്‍ പദ്ധതിയുടെ ഡിപിആര്‍ തയാറാക്കും. അവരുടെ റിപ്പോര്‍ട്ട് പരിശോധിച്ചശേഷം അനുയോജ്യമായ പ്രദേശങ്ങളെ ഫണ്ടിന് അനുസൃതമായി ഉന്നതനിലവാരത്തിലുള്ള വിനോദസഞ്ചാരകേന്ദ്രങ്ങളാക്കാനുള്ള നടപടികള്‍ ബന്ധപ്പെട്ട ജനപ്രതിനിധികളുടെയും ഗ്രാമപഞ്ചായത്തുകളുടെയും സഹകരണത്തോടെ നടപ്പിലാക്കുമെന്നു ജില്ലാ കളക്ടര്‍ അനുകുമാരി അവലോകന യോഗത്തില്‍ പറഞ്ഞു. അമ്പൂരിയില്‍ നടന്നയോഗം സി.കെ. ഹരീന്ദ്രന്‍ എംഎല്‍എ ഉദ്ഘാടനം ചെയ്തു. അമ്പൂരി പഞ്ചായത്ത് പ്രസിഡന്‍റ് വത്സലാ രാജു, വൈസ് പ്രസിഡന്‍റ് തോമസ് മംഗലശേരി, വനം, ടൂറിസം, റവന്യു, പഞ്ചായത്ത് ഉദ്യോഗസ്ഥര്‍, വിവിധ സംഘടന പ്രതിനിധികള്‍ തുടങ്ങിയവര്‍ പങ്കെടുത്തു. കുമ്പിച്ചല്‍ക്കടവ് മലയോരമേഖലയിലെ ഏറ്റവും വലിയ പാലമാണ് കുമ്പിച്ചല്‍ക്കടവില്‍ നിര്‍മിച്ചുവരുന്നത്. നെയ്യാര്‍ സംഭരണിയുടെ കുറുകേ ആദിവാസിമേഖലകള്‍ ഉള്‍പ്പെട്ട തൊടുമല വാര്‍ഡിനെ ബന്ധിപ്പിക്കുന്ന ഈ പാലത്തിന്‍റെ പണികള്‍ ഏറക്കുറെ പൂര്‍ത്തിയായിക്കഴിഞ്ഞു. പാലത്തിന്‍റെ വശങ്ങളില്‍ നിന്നാല്‍ നെയ്യാറിന്‍റെ ഇരുവശത്തെയും മനോഹരങ്ങളായ കാഴ്ചകളും ചുറ്റുമുള്ള മലകളും കാണാവുന്നതാണ്. ഈ പാലത്തിലൂടെ സഞ്ചരിച്ച് അക്കരെയുള്ള വനഭംഗിയും ദര്‍ശിക്കാം.

ബിജെപി പ്രതിഷേധിച്ചു

വെഞ്ഞാറമൂട്: സംസ്ഥാനത്തെ ആരോഗ്യമേഖലയിലെ ശോച്യാവസ്ഥയിൽ പ്രതിഷേധിച്ച്, ബിജെപി കല്ലറ പഞ്ചായത്ത് കമ്മിറ്റിയുടെ ആഭിമുഖ്യത്തിൽ കല്ലറ തറട്ട ഗവ. ആശുപത്രിയിലേക്ക് നടത്തിയ ധർണ, നോർത്ത് ജില്ലാ അധ്യക്ഷൻ എസ്.ആർ. രജികുമാർ ഉദ്ഘാടനം ചെയ്തു. കല്ലറ പഞ്ചായത്ത് കമ്മിറ്റി പ്രസിഡന്‍റ് രമേശ് അധ്യക്ഷത വഹിച്ചു. ബിജെപി വാമനപുരം മണ്ഡലം പ്രസിഡന്‍റ് പി.ടി. രാജേഷ്, കല്ലറ പഞ്ചായത്ത്‌ കമ്മിറ്റി ജനറൽ സെക്രട്ടറി രമേശൻ, പഞ്ചായത്ത്‌ കമ്മിറ്റി വൈസ് പ്രസിഡന്‍റ് സുദേവൻ മറ്റു മണ്ഡലം പഞ്ചായത്ത് നേതാക്കന്മാർ തുടങ്ങിയവർ പങ്കെടുത്തു.

അരുവിക്കര പോസ്റ്റ് ഓഫീസിനു മുന്നിൽ പ്രതിഷേധ ധർണ

നെടുമങ്ങാട്: സംയുക്ത ട്രേഡ് യൂണിയൻ പൊതുപണി മുടക്കിന്‍റെ ഭാഗമായി അരുവിക്കര പോസ്റ്റ് ഓഫീസിനു മുന്നിൽ നടത്തിയ പ്രതിഷേധ ധർണ സിഐടിയു സംസ്ഥാന സെക്രട്ടറി കെ.എസ്. സുനിൽകുമാർ ഉദ്ഘാടനം ചെയ്തു. എഐടിയുസി നേതാവ് അഡ്വ. എസ്.എ. റഹീം അധ്യക്ഷത വഹിച്ചു. വിവിധ ട്രേഡ് യൂണിയൻ നേതാക്കളായ അരുവിക്കര വിജയൻ നായർ, വെള്ളനാട് ഹരിഹരൻ, എ. ആന്‍റണി, കെ. സുകുമാരൻ, മുണ്ടേല പ്രവീൺ, വെള്ളനാട് ശോഭനൻ, ബിനു കുമാർ, കളത്തുകാർ രാധാകൃഷ്ണൻ, ഇരുമ്പ അനിൽ, ഇ.എം. റഹീം, പ്രഭു, സിഡിഎസ് ചെയർപേഴ്സൺ പ്രീത, മോഹനൻ, അങ്കണവാടി യൂണിയൻ നേതാവ് ശൈലജ, ജനപ്രതിനിധികളായ ഷജിത, ഗീതാ ഹരികുമാർ, മറിയക്കുട്ടി തുടങ്ങിയവർ പ്രസംഗിച്ചു. സഹകരണ യൂണിയനും ട്രാൻസ്പോർട്ട് യൂണിയനും പ്രകടനം നടത്തി.

ലൈഫ് ഭവന പദ്ധതി സിപിഎമ്മിന്‍റെ തട്ടിപ്പ്: എം. വിൻസന്‍റ് എംഎൽഎ

വെഞ്ഞാറമൂട്: ലൈഫ് ഭവന പദ്ധതി സിപിഎമ്മിന്‍റെ തട്ടിപ്പു പദ്ധതിയാണെന്ന് എം. വിൻസന്‍റ് എംഎൽഎ. പനവൂർ മണ്ഡലം കോൺഗ്രസ് കമ്മിറ്റി സംഘടിപ്പിച്ച ഏകദിന പഞ്ചായത്ത് ഓഫീസ് സത്യാഗ്രഹം ഉദ്ഘാടനം ചെയ്യുകയായിരുന്നു അദ്ദേഹം . 540 ലൈഫ് ഭവന പദ്ധതി ഉപഭോക്തർ ലിസ്റ്റ് പ്രസിദ്ധീകരിച്ചിട്ടും നാളിതുവരെയായി പനവൂർ പഞ്ചായത്തിൽ ഒരാളിനു പോലും വീടിനുള്ള പണം നൽകിയിട്ടില്ലല്ലെന്നും അദ്ദേഹം കുറ്റപ്പെടുത്തി. പനവൂർ മണ്ഡലം കോൺഗ്രസ് കമ്മിറ്റി പ്രസിഡന്‍റ് കുന്നിൽ ശശി അധ്യക്ഷത വഹിച്ചു. ആനാട് ജയൻ, ആനക്കുഴി ഷാനവാസ്, ബിനു എസ്. നായർ, അഡ്വ. മുജീബ്, പുരുഷോത്തമൻ നായർ, രഘുനാഥൻ നായർ, വി.എസ്. പ്രവീൺ, എസ്എൻ പുരം ജലാൽ, തോട്ടുമുക്ക് റഷീദ്, ലാൽ, വാഴോടു ഹുസൈൻ, പനവൂർ രാജശേഖരൻ നായർ, സരസ്വതി അമ്മ, എസ് എൻ പുരം ഷൈല, ശോഭ, ജലീൻ, ദാദുഷ എന്നിവർ പങ്കെടുത്തു.

‘ഒരു തൈ നടാം’ ജനകീയ വൃക്ഷവത്കരണ കാമ്പയിൻ

തിരുവനന്തപുരം: നെറ്റ് സീറോ എമിഷൻ കേരളത്തിനു മാതൃകയാണു നിംസ് മെഡിസിറ്റിയെന്ന് ഹരിത കേരള മിഷൻ ചെയർപേഴ്സൺ ഡോ. ടി.എൻ. സീമ. ഹരിതകേരളം മിഷന്‍റെ ഒരുകോടി വൃക്ഷത്തൈകള്‍ നട്ടുപിടിപ്പിക്കുന്ന ‘ഒരു തൈ നടാം’ ജനകീയ വൃക്ഷവത്കരണ കാന്പയിൻ ഉദ്ഘാടനം ചെയ്യുകയായിരുന്നു അവർ. നിംസ് മെഡിസിറ്റി എംഡി ഫൈസൽ ഖാൻ ആമുഖ അവതരണം നിർവഹിച്ചു. അഡ്വ. മഞ്ചവിളാകം ജയൻ, ഹരിത കേരള മിഷൻ സംസ്ഥാന അസിസ്റ്റന്‍റ് കോ-ഓർഡിനേറ്റർ ടി.പി. സുധാകരൻ, സംസ്ഥാന പ്രോഗ്രാം ഓഫീസർ ഹരി പ്രിയ, ജില്ലാ കോ-ഓർഡിനേറ്റർ അശോക്, ജെയിംസ്, സൂര്യ, ഐശ്വര്യ, നിംസ് അഡ്മിനിസ്ട്രേറ്റീവ് കോ-ഓർഡിനേറ്റർ ശിവകുമാർ രാജ്, നിംസ് കോളജ് ഓഫ് നഴ്സിംഗ് പ്രിൻസിപ്പൽ ജോസഫൈൻ വിനിത, നിംസ് കോളജ് ഓഫ് ദന്തൽ സയൻസ് പ്രിൻസിപ്പൽ ഡോ. മഞ്ചുഷ തുടങ്ങിയവർ പ്രസംഗിച്ചു. ഓലത്താന്നി വിക്ടറി വൊക്കേഷണൽ ഹയർ സെക്കൻഡറി സ്കൂളിലെയും, ആറാലുംമൂട് വിവേകാനന്ദ സ്കൂളിലെയും വിദ്യാർഥികളും കാന്പയിന്‍റെ ഭാഗമായി പങ്കെടുത്തു.

ബോധരഹിതനായി കിടന്നയാളുടെ വസ്തുവകകൾ മോഷ്ടിച്ചു; പ്രതിക്കായി ലുക്ക് ഔട്ട് നോട്ടീസ്

പേരൂർക്കട: വഴിയോരത്ത് ബോധരഹിതനായി കിടന്നയാളുടെ വസ്തുവകകൾ കവർന്നതുമായി ബന്ധപ്പെട്ടു പ്രതിയെന്നു സംശയിക്കുന്ന ആൾക്കെതിരേ പോലീസ് ലുക്ക് ഔട്ട് നോട്ടീസ് പുറപ്പെടുവിച്ചു. ഒരാഴ്ച മുമ്പ് അട്ടക്കുളങ്ങരയ്ക്കു സമീപം റോഡു ക്കിൽ ബോധരഹിതനായി കിടന്ന വയോധികന്‍റെ കൈവശം ഉണ്ടായിരുന്ന സ്വർണമാല, വാച്ച്, മൊബൈൽ ഫോൺ എന്നിവയാണ് കവർച്ച ചെയ്യപ്പെട്ടത്. ഉണർന്നെണീറ്റപ്പോഴാണു മൊബൈലും മറ്റു സാധനങ്ങളും നഷ്ടപ്പെട്ടതായി ഇയാൾ അറിയുന്നത്. തുടർന്ന് ഫോർട്ട് സ്റ്റേഷനിൽ പരാതി നൽകുകയായിരുന്നു. പോലീസ് നടത്തിയ പരിശോധനയെ തുടർന്നു കവർച്ച നടത്തിയ ആൾ എന്നു സംശയിക്കുന്ന യുവാവ് ഒരു ഓട്ടോറിക്ഷയ്ക്ക് സമീപത്തുകൂടി ഫോണിൽ സംസാരിച്ചുകൊണ്ടു പോകുന്ന ദൃശ്യം ലഭിച്ചു. ഇതിന്‍റെ സഹായത്തോടുകൂടിയാണ് ലുക്ക്ഔട്ട് നോട്ടീസ് പുറപ്പെടുവിച്ചിരിക്കുന്നത്. ഇയാളെക്കുറിച്ച് എന്തെങ്കിലും വിവരം ലഭിക്കുന്നവർ ഫോർട്ട് സ്റ്റേഷനുമായി ബന്ധപ്പെടണം. ഫോൺ: 0471 2461105, 94979 87010.

മൂഴിനട-ചെല്ലാംകോട്-പൂവത്തൂർ ഏലാ റോഡ് ചെളിക്കുളമായി

നെടുമങ്ങാട്: നഗരസഭയിലെ പേരയത്തുകോണം, ഇരിഞ്ചയം വാർഡുകളുടെ അതിർത്തിയിലൂടെ കടന്നുപോകുന്ന മൂഴിനട-ചെല്ലാംകോട്-പൂവത്തൂർ ഏലാ റോഡ് ചെളിക്കളമായി. മഴയിൽ കോലാംകുടി നട മുതൽ മണ്ണാറപറമ്പ് കൈതറ വരെ റോഡിലൂടെ യാത്ര ദുർഘടമാണ്. കുഴികളിൽ വെള്ളം കെട്ടിനിന്നു കാൽനട പോലും ദുരിതപൂർണമായി. ഒട്ടുമിക്ക ഭാഗത്തും ടാറിന്‍റെ അംശം പോലും കാണാനില്ല. ഓട്ടോകൾ ഇതുവഴിയുള്ള ഓട്ടം അവസാനിപ്പിച്ചു. ഇരുചക്ര വാഹനയാത്രക്കാർ ചെളിയിൽ പുതഞ്ഞു അപകടത്തിൽപ്പെടുന്നത് പതിവായി. ഇരുനൂറോളം കുടുംബങ്ങൾ റോഡിന്‍റെ ഇരുവശത്തുമായി താമസിക്കുന്നുണ്ട്. ഒന്നര പതിറ്റാണ്ടു മുമ്പാണ് ഏറ്റവും ഒടുവിൽ ടാറിംഗ് നടത്തിയതെന്നു നാട്ടുകാർ പറഞ്ഞു. നാട്ടുകാരുടെ നേതൃത്വത്തിൽ മന്ത്രിക്കും നഗരസഭാധികൃതർക്കും പരാതി നൽകിയിട്ടുണ്ട്.

അമ്പൂരി-നെയ്യാര്‍ കനാൽ : സമാന്തര റോഡിലെ ബണ്ട് ഇടിഞ്ഞ് അപകടാവസ്ഥയില്‍

വെള്ളറട: അമ്പൂരി- നെയ്യാര്‍ഡാം റോഡിലെ ബണ്ട് ഇടിയുന്ന ഭാഗത്ത് പാര്‍ശ്വഭിത്തിയോ ഇരുമ്പുവേലിയോ സ്ഥാപിക്കാന്‍ വൈകുന്നത് അപകടങ്ങള്‍ക്കിടയാക്കുന്നു. ഇവിടെ മണ്ണ് ഇടിയുന്നതിലൂടെ രൂപപ്പെട്ട കുഴിവരുന്നഭാഗം "എഫ്.ആര്‍.പി. ഡിവൈഡര്‍' ഉപയോഗിച്ച് പോലീസ് വേര്‍തിരിച്ചതിനു സമീപമാണ് റോഡ് അപകടാവസ്ഥയിലായത്. രണ്ടുവര്‍ഷത്തിലേറെയായി ഇവിടെ കനാല്‍ ബണ്ട് ഇടിഞ്ഞുവീണിട്ട്. മഴക്കാലത്താണ് നെയ്യാര്‍ഡാം വലതുകര കനാലിനോടു ചേര്‍ന്നുവരുന്ന ഈഭാഗത്തെ മണ്ണിടിയുന്നത്. തുടര്‍ച്ചയായി മണ്ണിടിഞ്ഞു കനാല്‍വരുന്ന ഭാഗമാകെ വലിയ കുഴിയായിട്ടുണ്ട്. കഷ്ടിച്ച് രണ്ട് വാഹനങ്ങള്‍ക്ക് കടന്നുപോകാവുന്ന റോഡില്‍ മണ്ണിടിയുന്ന ഭാഗം വേര്‍തിരിച്ചു മാറ്റിയതോടെ റോഡിന്‍റെ വീതി വീണ്ടും കുറഞ്ഞു. വേര്‍തിരിച്ചഭാഗത്തിനു മുമ്പ് വളവായതിനാല്‍ വേഗത്തില്‍വരുന്ന വാഹനങ്ങള്‍ക്ക് ഇവിടെയെത്തുമ്പോള്‍ മാത്രമേ റോഡിന്‍റെ സ്ഥിതി അറിയാനാകൂ. ഇതാണ് അപകടങ്ങള്‍ക്ക് കാരണമാകുന്നത്. ജില്ലയിലെ പ്രധാന വിനോദസഞ്ചാര കേന്ദ്രത്തിലേക്കുള്ള പാത എന്നതിനുപുറമേ പന്ത, അമ്പൂരി, മായം എന്നിവിടങ്ങളിലേക്കു പോകാനുള്ള നൂറുകണക്കിനു വാഹനങ്ങളും കടന്നുപോകുന്നത് ഈ വഴിയാണ്. വലിയ വാഹനങ്ങള്‍ വളരെ ബുദ്ധിമുട്ടിയാണ് ഇതുവഴി കടന്നുപോകുന്നത്. മണ്ണിടിയുന്നത് ഒഴിവാക്കാന്‍ ഇവിടെ സംരക്ഷണ ഭിത്തി കെട്ടാനും ഇരുമ്പ് കൈവരി സ്ഥാപിക്കാനും ജലസേചനവകുപ്പ് 45 ലക്ഷം രൂപയുടെ അടങ്കല്‍ തയാറാക്കി നല്‍കിയതല്ലാതെ അനുമതിക്കായി ശ്രമിക്കുന്നില്ലെന്നും പരാതിയുണ്ട്.

"ഒരു പാഥേയം കൂടി': ഉച്ചഭക്ഷണ വിതരണം നടത്തി

നെടുമങ്ങാട്: കേരള സ്റ്റേറ്റ് എക് സൈസ് സ്റ്റാഫ് അസോസിയേഷന്‍റെ 45 -ാം സംസ്ഥാന സമ്മേളനത്തിന്‍റെ പ്രചാരണാർഥം "ഒരു പാഥേയം കൂടി 'എന്ന പേരിൽ ഉച്ചഭക്ഷണ വിതരണം നടത്തി. തിരുവനന്തപുരം ജില്ലയിലെ താലൂക്ക് ആശുപത്രികളിലും വിവിധ അനാഥാലയങ്ങളിലുമാണ് ഉച്ചഭക്ഷണം വിതരണം ചെയ്തത്. ജീവനക്കാരിൽ നിന്നും സമാഹരിച്ച പൊതിച്ചോറും സംഘടനാംഗങ്ങൾ പാചകം ചെയ്തു തയാറാക്കിയ ഭക്ഷണവുമാണു വിവിധ കേന്ദ്രങ്ങളിൽ വിതരണം ചെയ്തത്. അസോസിയേഷൻ ജില്ലാ കമ്മിറ്റിയുടെ ആഭിമുഖ്യത്തിലാണ് പരിപാടി സംഘടിപ്പിച്ചത്. നെടുമങ്ങാട് ജില്ലാ ആശുപത്രിയിൽ നടത്തിയ ഉച്ചഭക്ഷണ വിതരണം അസിസ്റ്റന്‍റ് എക്സൈസ് കമ്മീഷണർ ബി.എൽ. ഷിബു ഉദ്ഘാടനം ചെയ്തു. സംഘടനയുടെ സംസ്ഥാന സെക്രട്ടറി പി.ഡി. പ്രസാദ്, ജില്ലാ വൈസ് പ്രസിഡന്‍റ് എ. നാസറുദീൻ, ജില്ലാ കമ്മിറ്റി അംഗം നജുമുദ്ദീൻ അസിസ്റ്റന്‍റ് എക്സൈസ് ഇൻസ്പെക്ടർ വി. അനിൽകുമാർ തുടങ്ങിയവർ പരിപാടിക്ക് നേതൃത്വം നൽകി. നെടുമങ്ങാട്, ആര്യനാട്, വാമനപുരം എന്നീ എക്സൈസ് ഓഫീസുകളിലെ ജീവനക്കാരുടേയും ഉദ്യോഗസ്ഥരുടേയും സഹകരണത്തോടെയാ ണ് ജില്ലാ ആശുപത്രിയിലും നഗരിക്കുന്ന് തൃപ്പാദം വയോജനകേന്ദ്രത്തിലും ഉച്ചഭക്ഷണം ലഭ്യമാക്കിയത്. ലഹരി വിപത്തിനെതിരെയുള്ള സന്ദേശം കൂടി പൊതുജനങ്ങളിലെത്തിക്കുവാനും ലക്ഷ്യമിടുന്നു.

പൗർണമിക്കാവിൽ ദർശനത്തിനെത്തി ഗവർണർ

വിഴിഞ്ഞം: വെങ്ങാനൂർ പൗർണമിക്കാവ് ശ്രീ ബാല ത്രിപുര സുന്ദരി ദേവീ ക്ഷേത്രത്തിൽ ഗവർണർ രാജേന്ദ്ര വിശ്വനാഥ് ആർലേക്കർ ദർശനം നടത്തി. ഇന്നലെ വൈകുന്നേരം അഞ്ചരയോടെ ക്ഷേത്ര സന്നിധിയിൽ എത്തിയ ഗവർണർ വിവിധ ചടങ്ങുകളിൽ പങ്കെടുത്ത ശേഷമാണ് മടങ്ങിയത്. വ്യാസ പൗർണമിയോടനുബന്ധിച്ചു ഉഗ്ര രക്തചാമുണ്ഡി ദേവിയുടെ ശ്രീകോവിൽ സമർപ്പണവും അദ്ദേഹം നിർവഹിച്ചു. സമർപ്പണ ചടങ്ങിൽ ജില്ലാ കളക്ടർ അനുകുമാരി, കേരള യൂണിവേഴ്സിറ്റി വൈസ് ചാൻസിലർ ഡോ. മോഹനൻ കുന്നുമ്മൽ, എറണാകുളം സിബിഐ ജഡ്ജ് ശേഷാദ്രി, പോക്സോ കോടതി ജഡ്ജ് ഷിബു, ശ്രീപത്മനാഭ ടെമ്പിൾ അഡ്മിനിസ്ട്രേറ്റീവ് മെമ്പറും ജില്ലാ ജഡ്ജിയുമായ അനിൽ, ഐ എസ് ആർ ഒ മുൻ ചെയർമാൻ ഡോ സോമനാഥ് തുടങ്ങിയവർ ഭദ്രദീപം തെളിയിച്ചു. വിവിധ കലാപരിപാടികളും തുടർന്ന് അരങ്ങേറി.

കെടിയു ബി.ടെക് ഫലം: എൽബിഎസ് വനിതാ കോളജ് ഒന്നാം സ്ഥാനത്ത്

തിരുവനന്തപുരം: എപിജെ അബ്ദുൾ കലാം സാങ്കേതിക സർവകലാശാലയുടെ ഈ വർഷത്തെ ബി.ടെക് ഫലത്തിൽ പൂജപ്പുര എൽബിഎസ് വനിതാ എൻജിനിയറിംഗ് കോളജിന് മികച്ച വിജയം. 87.46 ശതമാനം വിജയത്തോടെ സർവകലാശാലയിൽ അഫിലിയേറ്റ് ചെയ്ത 130 കോളജുകളിൽ ഒന്നാമതെത്തി. 83.44 ശതമാനം വിജയത്തോടെ മുത്തൂറ്റ് എൻജിനിയറിംഗ് കോളജ് രണ്ടാമതും, 83. 42 ശതമാനം വിജയത്തോടെ തിരുവനന്തപുരം സിഇടി മൂന്നാം സ്ഥാനത്തുമാണ്. പാപ്പനംകോട് ശ്രീചിത്തിര തിരുനാൾ എൻജിനിയറിംഗ് കോളജ് 73.82 ശതമാനത്തോടെ 12 ആം സ്ഥാനത്തും തിരുവനന്തപുരത്തെ ബട്ടൺ ഹിൽ എൻജിനിയറിംഗ് കോളജ് 72. 78 ശതമാനം വിജയത്തോടെ പതിനാറാം സ്ഥാനത്തുമാണ്. ഒൻപതു സർക്കാർ എൻജിനിയറിംഗ് കോളജുകളും മൂന്ന് എയ്ഡഡ് കോളജുകളും 23 സർക്കാർ നിയന്ത്രിത എൻജിനിയറിംഗ് കോളജുകളും സർവകലാശാലയുടെ കീഴിൽ ഉണ്ട്.

സെക്രട്ടേറിയറ്റ് അസോസിയേഷൻ: എം.എസ് ഇർഷാദ് പ്രസിഡന്‍റ്, കെ.പി പുരുഷോത്തമൻ ജന. സെക്രട്ടറി

തിരുവനന്തപുരം: കേരള സെക്രട്ടേറിയറ്റ് അസോസിയേഷൻ പ്രസിഡന്‍റായി എം. എസ്.ഇർഷാദിനെയും ജനറൽ സെക്രട്ടറിയായി കെ.പി പുരുഷോത്തമനെയും വീണ്ടും തെരഞ്ഞെടുത്തു. ട്രഷററായി കെ.എം. അനിൽകുമാറിനെയും വൈസ് പ്രസിഡന്‍റുമാരായി എ. സുധീർ, ആർ. രഞ് ജിഷ് കുമാർ എന്നിവരെയും സെക്രട്ടറിമാരായി ജി.ആർ. ഗോവിന്ദ്, സജീവ് പരിശവിള, റൈസ്റ്റണ്‍ പ്രകാശ് സിസി എന്നിവരെയും തെരഞ്ഞെടുത്തു. അജിത് സാം ജോണ്‍സ്, എം.എസ്. അരുണ്‍, എസ്. അനിൽകുമാർ, ടി.ആർ. അലക്സ്, എം.എം. ജസീർ, ജയകുമാർ, ബി. സതീഷ്, സുശീൽകുമാരി, എസ്. തുഷാർ എന്നിവരാണ് നിർവാഹക സമിതി അംഗങ്ങൾ. സെക്രട്ടേറിയറ്റ് അസോ. വജ്രജൂബിലി സമ്മേളനത്തിന്‍റെ ഭാഗമായി ജൂണ്‍ 26ന് നടന്ന അസോ. സമ്മേളനത്തിനു പിന്നാലെയാണ് തെരഞ്ഞെടുപ്പ്.

മെറ്റലില്‍ സ്കൂട്ടർ തെന്നിവീണ് അപകടം : യാത്രക്കാരിക്ക് 22,500 രൂപ നഷ്ടപരിഹാരം നല്‍കാൻ മനുഷ്യാവകാശ കമ്മീഷന്‍

തിരുവനന്തപുരം: പൊതുമരാമത്ത് റോഡില്‍ അലക്ഷ്യമായി ഇറക്കിയിട്ടിരുന്ന മെറ്റലില്‍ സ്‌കൂട്ടര്‍ തെന്നിവീണ് യാത്രക്കാരിക്കു പരിക്കേറ്റ സംഭവത്തില്‍ തൊളിക്കോട് പഞ്ചായത്ത് 22,500 രൂപ നഷ്ടപരിഹാരം നല്‍കണമെന്നു മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റീസ് അലക്‌സാണ്ടര്‍ തോമസ് ഉത്തരവിട്ടു. രണ്ടുമാസത്തിനുള്ളില്‍ നഷ്ടപരിഹാര തുകയായ 22,500 രൂപ നല്‍കിയില്ലെങ്കില്‍ എട്ടുശതമാനം പലിശ നല്‍കേണ്ടി വരുമെന്നും ഉത്തരവില്‍ പറഞ്ഞു. തുക നല്‍കിയ ശേഷം തൊളിക്കോട് പഞ്ചായത്ത് സെക്രട്ടറി നടപടി റിപ്പോര്‍ട്ട് സമര്‍പ്പിക്കണം. നഷ്ടപരിഹാരം പഞ്ചായത്തു നല്‍കിയ ശേഷം ഉത്തരവാദികളില്‍ നിന്നും നിയമാനുസരണം ഈടാക്കാന്‍ തൊളിക്കോട് പഞ്ചായത്തിന് സ്വാതന്ത്ര്യമുണ്ടായിരിക്കുമെന്നും ഉത്തരവില്‍ പറഞ്ഞു. 2023 മേയ് ഒന്‍പതിനാണ് അപകടമുണ്ടായത്. മൈലാമൂട് ട്രാന്‍സ്‌ഫോര്‍മറിനു സമീപം റോഡിലുണ്ടായിരുന്ന മെറ്റലിലാണ് നെടുമങ്ങാട് സ്വദേശിനി സ്മിതാ ഭാസ്‌കറിന്‍റെ സ്‌കൂട്ടര്‍ തെന്നി മറിഞ്ഞത്. ഹര്‍ജിക്കാരിക്കുസാരമായി പരിക്കറ്റിരുന്നു. തുടര്‍ന്നു കൊച്ചിയില്‍ നേവി ഉദ്യോഗസ്ഥനായ ഭര്‍ത്താവിന് അവധിയെടുത്തുവന്നു ഭാര്യയെ ശുശ്രൂഷിക്കേണ്ടതായും വന്നു. ഒന്നര ലക്ഷം രൂപ നഷ്ടപരിഹാരം ആവശ്യപ്പെട്ടാണു പരാതിക്കാരി കമ്മീഷനെ സമീപിച്ചത്.

എസ്എഫ്ഐ മാർച്ചിൽ സംഘർഷം

തിരുവനന്തപുരം: ഗവർണർ രാജേന്ദ്ര വിശ്വനാഥ് അർലേക്കർ രാജ്ഭവനെ കാവിവത്കരിക്കുന്നൂവെന്നാരോപിച്ചു എസ്എഫ്ഐ രാജ്ഭവനിലേയ്ക്കു നടത്തിയ മാർച്ചിൽ സംഘർഷം. ഇന്നലെ ഉച്ചയ്ക്കു പന്ത്രണ്ടു മണിയോടെ രാജ്ഭവനിലേയ് ക്കു മാർച്ചു നടത്തിയ പ്രവർത്തകരെ പോലീസ് ബാരിക്കേഡ് ഉപയോഗിച്ചു തടഞ്ഞു. എസ്എഫ്ഐ പ്രവർത്തകർ ബാരിക്കേഡ് തള്ളിയിടാൻ ശ്രമിച്ചതോടെ പ്രവർത്തകർക്കെതിരെ ജലപീരങ്കി പ്രയോഗിച്ചു. എന്നാൽ പോലീസ് ജലപീരങ്കി പ്രയോഗിച്ചിട്ടും പിരിഞ്ഞുപോകാൻ തയാറാകാത്ത പ്രവർത്തകർ ബാരിക്കേഡിനു മുകളിൽ കയറിനിന്നു പ്രതിഷേധം തുടർന്നു. ഉന്നത പോലീസ് ഉദ്യോഗസ്ഥരുടെ നേതൃത്വത്തിൽ വലിയ സുക്ഷയാണു രാജ്ഭവനു മുന്നിൽ പോലീസ് ഇന്നലെ ഒരുക്കിയത്.

ചെമ്പഴന്തിയിൽ മൂന്നുപേർക്കു തെരുവു നായയുടെ കടിയേറ്റു

പോത്തൻകോട്: ചെന്പഴന്തിയിൽ വീണ്ടും മൂന്നുപേർക്കു തെരുവു നായയുടെ കടിയേറ്റു. ആനന്ദേശ്വരം സ്വദേശികളായ ഗീത (60), അനിൽകുമാർ (70), മുരളീധരൻ നായർ ( 55 )എന്നിവർക്കാണ് കടിയേറ്റത്. രണ്ടുപേർ പാങ്ങപ്പാറ ഹെൽത്ത് സെന്‍ററിലും ഒരാൾ മെഡിക്കൽ കോളേജിലും ചികിത്സ തേടി. രാവിലെ ആനന്ദേശ്വരത്ത് കടയിൽ പോയ ഗീതയുടെ കാലിലും സമീപത്തുണ്ടായിരുന്ന അനിൽകുമാറിന്‍റെ കാലിലും നായ കടിക്കുകയായിരുന്നു. തുടർന്നു സമീപപ്രദേശങ്ങളിലെ തെരുവുനായ്ക്കളെയും വളർത്തു മൃഗങ്ങളെയും ആക്രമിച്ചു. തുടർന്ന് കൗൺസിലർ ആശാ ബാബുവിനന്‍റെ നേതൃത്വത്തിൽ നഗരസഭയിലെ ജീവനക്കാരത്തി നായയെ പിടികൂടി ഷെൽട്ടറിൽ നിരീക്ഷണത്തിൽ പാർപ്പിച്ചു.

പത്മനാഭസ്വാമി ക്ഷേത്രത്തിലെ കാമറവിവാദം : ആധുനിക സംവിധാനങ്ങളില്ല; പരിശോധന ശക്തമാക്കാൻ പോലീസ്

പേരൂർക്കട: ഇതര സംസ്ഥാനക്കാരനായ വ്യക്തി പത്മനാഭസ്വാമി ക്ഷേത്രത്തിൽ രഹസ്യ കാമറയുമായി ഉള്ളിൽ കടന്ന വിഷയം ഗൗരവമായി കാണുന്നുവെന്നും പരിശോധന കൂടുതൽ ശക്തമാക്കുമെന്നും ഫോർട്ട് പോലീസ്. ഗുജറാത്ത് അഹമ്മദാബാദ് സ്വദേശി സുരേന്ദ്രഷാ (66) യാണു കഴിഞ്ഞദിവസം ഒളികാമറയുമായി ക്ഷേത്ര കവാടത്തിനുമുന്നിൽ എത്തിയത്. കണ്ണടയുടെ കാലുകളിൽ രണ്ടു കാമറകളാണ് ഉണ്ടായിരുന്നത്. വെയിൽ വെളിച്ചം കാമറയിൽ വീഴുകയും അതു കണ്ണിൽ അടിക്കുകയും ചെയ്തതു ശ്രദ്ധയിൽപ്പെട്ട ഒരു പോലീസുകാരനാണു വിഷയം ഉന്നതരെ അറിയിച്ചത്. തുടർന്നാണ് സുരേന്ദ്രഷാ പിടിയിലായത്. കൗതുകത്തിനു വേണ്ടിയാണു കാമറയുമായി ക്ഷേത്രത്തിനുള്ളിൽ കടന്നുവന്നതെന്നു സുരേന്ദ്രഷാ പറയുന്നുണ്ടെങ്കിലും ഗുരുതര സുരക്ഷാവീഴ്ചയിലേക്കാണ് ഇതു വിരൽ ചൂണ്ടുന്നത്. നിലവിൽ ഭക്തരെ പരിശോധിക്കുന്നതിന് വേണ്ടി മെറ്റൽ ഡിറ്റക്ടർ സംവിധാനം മാത്രമാണ് പത്മനാഭസ്വാമി ക്ഷേത്ര പരിസരത്തുള്ളത്. ക്ഷേത്രത്തിന്‍റെ നാലു നടകൾ വഴി ഉള്ളിലേക്ക് പ്രവേശിക്കാനാകും. ഈ ഭാഗത്തെല്ലാം പോലീസിന്‍റെ പരിശോധനയുണ്ട്. എന്നാൽ ലോഹഭാഗം അല്ലാത്തതൊന്നും മെറ്റൽ ഡിറ്റക്ടർ ഉപയോഗിച്ചു കണ്ടെത്താൻ സാധിക്കില്ല എന്നുള്ളത് ഒരു പ്രശ്നം തന്നെയാണ്. മുമ്പും ഇതേ രീതിയിൽ രഹസ്യ കാമറ കൈവശം വച്ചു ക്ഷേത്രത്തിനുള്ളിലേക്ക് ആരെങ്കിലും കടന്നിട്ടുണ്ടോ എന്നുള്ളതും വ്യക്തമല്ല. വീഡിയോ കാമറകളും മൊബൈൽ കാമറകളും ക്ഷേത്ര പരിസരത്തും ഉള്ളിലും കർശനമായി നിരോധിച്ചിട്ടുണ്ടെന്ന് അറിയിപ്പ് ബോർഡുകൾ ഇവിടെ സ്ഥാപിച്ചിട്ടുണ്ട്. ഇതിനിടെയാണ് കാമറയുമായി ക്ഷേത്രത്തിനുള്ളിൽ കടന്നയാളെ യാദൃശ്ചികമായി മാത്രം പോലീസ് പിടികൂടുന്നത്. മെറ്റൽ ഡിറ്റക്ടർ എന്ന ഉപകരണം അല്ലാതെ ആധുനിക സംവിധാനങ്ങൾ ക്ഷേത്ര പരിസരത്ത് ഉപയോഗിച്ചാൽ മാത്രമേ സുരക്ഷ കൂടുതൽ ശക്തമാക്കാൻ സാധിക്കുകയുള്ളൂ.

ബൈക്ക് അപകടത്തിൽ യുവാവ് മരിച്ചു

നേമം : കരമന-കളിയിക്കാവിള പാതയില്‍ പാപ്പനംകോട് തുലവിളയ്ക്ക് സമീപമുണ്ടായ അപകടത്തില്‍ ബൈക്ക് യാത്രികനായ യുവാവ് മരിച്ചു. നെയ്യാറ്റിന്‍കര കവലകുളം സായിഭവനില്‍ സായികുമാറിന്‍റെ മകന്‍ എസ്. കെ. ഉണ്ണിക്കണ്ണന്‍ (33) മരിച്ചത്. ബുധനാഴ്ച രാത്രി ഒന്‍പതരായോടെയാണ് അപകടം. ഉണ്ണിക്കണ്ണന്‍ ഓടിച്ചിരുന്ന ബൈക്ക് നിയന്ത്രണം വിട്ട് ഡിവൈഡറില്‍ ഇടിക്കുകയായിരുന്നു. ഗുരുതരമായി പരിക്കേറ്റ ഉണ്ണിക്കണ്ണനെ മെഡിക്കല്‍കോളജ് ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കനായില്ല. സ്വകാര്യ ആശുപത്രിയിലെ ജീവനക്കാരാനാണ്. ഭാര്യ: വൈഷ്ണവി. മകൻ: അദ്രിത്.

ബൈക്കിൽനിന്നു വീണ് പരിക്കേറ്റയാൾ മരിച്ചു

മാറനല്ലൂർ: ബൈക്കിൽനിന്നു വീണ് പരിക്കേറ്റയാൾ മരിച്ചു. മൂലക്കോണം ചെക്കിട്ടവിളാകം പുത്തൻവീട്ടിൽ മനോഹരൻ (59) ആണ് മരിച്ചത്. ജൂലൈ ഒന്നിന് രാത്രി 8.30ഓടെയാണ് അപകടം നടന്നത്. ബാലരാമപുരം-കാട്ടാക്കട റോഡിൽ ചെക്കിട്ടവിളാകത്തെ പാതയോരത്തെ വീട്ടിൽനിന്ന് മനോഹരൻ ബൈക്കിൽ റോഡിലേക്ക് ഇറങ്ങവേ കാട്ടാക്കട ഭാഗത്തുനിന്ന് ഊരൂട്ടമ്പലം ഭാഗത്തേക്കു പോവുകയായിരുന്ന സ്കൂട്ടറിൽ ഇടിക്കാതിരിക്കാൻ ബൈക്ക് പെട്ടെന്ന് നിർത്താൻ ശ്രമിച്ചപ്പോൾ റോഡിലേക്കു മറിഞ്ഞുവീഴുകയായിരുന്നു. തലയ്ക്കു പരിക്കേറ്റതിനെത്തുടർന്ന് മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരുന്നു. അടിയന്തര ശസ്ത്രക്രിയയ്ക്കുശേഷം തീവ്രപരിചരണ വിഭാഗത്തിൽ ചികിത്സയിൽ കഴിയവേ ഉച്ചയോടുകൂടി മരിച്ചു. ഭാര്യ: അജിത. മക്കൾ: മഞ്ജുനാഥ്, മണിനാഥ്.

"തിളക്കം 2025' സംഘടിപ്പിച്ചു

കോവളം: എം. അലിയാർ ചാരിറ്റബിൾ സൊസൈറ്റി സംഘടിപ്പിച്ച തിളക്കം 2025 സ്പീക്കർ എ.എൻ. ഷംസീർ ഉദ്ഘാടനം ചെയ്തു. ആതുര ശുശ്രൂഷാ രംഗത്തെ സേവനങ്ങൾക്ക് ശ്രീചിത്തിരതിരുനാൾ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിലെ ന്യൂറോ സർജൻ ഡോ. ഈശ്വറിനെ സ്പീക്കർ ആദരിച്ചു. കൂടുതൽ വിദ്യാർഥികൾ പരീക്ഷ എഴുതി നൂറുശതമാനം വിജയം നേടിയ കാഞ്ഞിരംകുളം പികെഎസ് ഹയർ സെക്കൻഡറി സ്കൂളിന് ഇഎംഎസ് പുരസ്കാരവും വെങ്ങാനൂർ ഹയർ സെക്കൻഡറി സ്കൂൾ ഫോർ ഗേൾസ് സ്കൂളിന് ജോസഫ് മുണ്ടശേരി പുരസ്കാരവും സമ്മാനിച്ചു. തുടർന്നു കോവളം ഏരിയയിൽ വിവിധ മേഖലകളിൽ കഴിവ് തെളിയിച്ച പ്രതിഭകളെയും സ്എസ്എൽസിയ്ക്കും പ്ലസ് ടുവിനും തിളക്കമാർന്ന വിജയം നേടിയ മുഴുവൻ വിദ്യാർഥികളേയും ആദരിച്ചു. ചാരിറ്റബിൾ സൊസൈറ്റി പ്രസിഡന്‍റ് പി. എസ്. ഹരികുമാർ അധ്യക്ഷനായി. വിഴിഞ്ഞം അർച്ചന ഓഡിറ്റോറിയത്തിൽ നടന്ന പരിപാടിയിൽ ചാരിറ്റബിൾ സൊസൈറ്റി സെക്രട്ടറി എസ്. അജിത്ത് സ്വാഗതം പറഞ്ഞു.

കോവളം എൻ. നാഗപ്പന്‍റെ 27-ാമത് അനുസ്മരണ സമ്മേളനം

കോവളം : ശ്രീനാരായണ പ്രസ്ഥാനങ്ങളെ തിരുവനന്തപുരം ജില്ലയിൽ അരക്കിട്ട് ഉറപ്പിച്ച നേതാവായിരുന്നു കോവളം എൻ. നാഗപ്പനെന്ന് മന്ത്രി വി. ശിവൻകുട്ടി. സാമൂഹ്യ പ്രവർത്തകനും എസ്എൻ ട്രസ്റ്റ് ബോർഡ് മെമ്പറും എസ്എൻഡിപി യോഗം നെയ്യാറ്റിൻകര യൂണിയനിൽ ദീർഘകാലം പ്രസിഡന്‍റുമായിരുന്ന കോവളം എൻ. നാഗപ്പന്‍റെ 27-ാമത് അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. അസി. സെക്രട്ടറി കെ.എ. ബാഹുലേയൻ, അധ്യക്ഷത വഹിച്ചു. രാജധാനി ഗ്രൂപ്പ് എംഡി ഡോ. ബിജു രമേശ്, കെപിസിസി മുൻ വൈസ് പ്രസിഡന്‍റ് ടി. ശരത്ചന്ദ്ര പ്രസാദ്, നെയ്യാറ്റിൻകര സനൽ, സിപിഎം ജില്ലാ കമ്മിറ്റി അംഗം പി.എസ്. ഹരികുമാർ, കോവളം ഏരിയാ സെക്രട്ടറി കരുംകുളം അജിത്ത്, അമ്പലത്തറ ചന്ദ്രബാബു, ആർജെഡി ജില്ലാ പ്രസിഡന്‍റ് മലയിൻകീഴ് ചന്ദ്രൻ നായർ, എസ്എൻഡിപി യോഗം കോവളം യൂണിയൻ പ്രസിഡന്‍റ് കോവളം ടി.എൻ. സുരേഷ്, സെക്രട്ടറി തോട്ടം പി. കാർത്തികേയൻ, ജില്ലാ പഞ്ചായത്തംഗം ഭഗത് റൂഫസ്, നഗരസഭ കൗൺസിലർമാരായ നിസാമുദീൻ, പനത്തുറ ബൈജു, അഡ്വ എസ്.പി. ദീപക്, യൂണിയൻ വൈസ് പ്രസിഡന്‍റ് പെരിങ്ങമ്മല എസ്. സുശീലൻ തുടങ്ങിയവർ പങ്കെടുത്തു.

ഡിവൈഎഫ്ഐ പഠനോത്സവം സംഘടിപ്പിച്ചു

നെടുമങ്ങാട്: ഡിവൈഎഫ്ഐ ഉളിയൂർ, കന്യാകോട് യൂണിറ്റുകൾ സംയുക്തമായി പഠനോത്സവം സംഘടിപ്പിച്ചു. സിപിഎം ജില്ലാ സെക്രട്ടറിയേറ്റംഗം ബി. സത്യൻ ഉദ്ഘാടനം ചെയ്തു. കേരളാ സർവകലാശാലയിൽ നിന്നും സുവോളജിയിൽ റാങ്ക് നേടിയ ജെ.എസ്. അനുപമ, പ്ലസ് ടു, എസ്എസ്എൽസി പരീക്ഷകളിൽ ഉന്നത വിദയം നേടിയ വിദ്യാർഥികൾ എന്നിവർക്ക് സ്നേഹോപഹാരം സമ്മാനിച്ചു. ഡിവൈഎഫ്ഐ കന്യാകോട് യൂണിറ്റ് പ്രസിഡന്‍റ് അഭിനവ് അധ്യക്ഷനായി. എസ്.എസ്. ബിജു, സി. സാബു, ബി. സതീശൻ, ഡോ. ബി. ബാലചന്ദ്രൻ, എം.പി. സജിത, എസ്.ആർ. രതീഷ്, എസ്. വിഷ്ണു, നിഖിൽ പരിയാരം എന്നിവർ പ്രസംഗിച്ചു. ശ്രീജിത്ത് സ്വാഗതവും, ആർ.വി. ബിജു നന്ദിയും പറഞ്ഞു.

വെള്ളായണി കാർഷിക കോളജിൽ ടെഡ് എക്സ് ടോക് ഷോ നടത്തി

നേമം: വെള്ളായണി കാർഷിക കോളജ് ലോകപ്രശസ്തമായ ടെഡ്എക്സ് ടോക് ഷോയുടെ വേദിയായി. പൊതുപരിപാലനം, പ്രതിരോധം, ആരോഗ്യപരിചരണം, സംരംഭകത്വം, സാമൂഹിക ഇടപെടൽ എന്നീ മേഖലകളിൽനിന്നും പ്രശസ്തരായ അമൽ മനോജ്, ഡോ. സഞ്ജയ് ബെഹാരി, ലെഫ്. കേണൽ ഋഷി രാജലക്ഷ്മി, സഞ്ജന ജോർജ്, ഡോ. അരുൺ എസ്. നായർ, ബാബു രാമചന്ദ്രൻ എന്നിവർ പ്രസംഗിച്ചു. കേരള കാർഷിക സർവകലാശാല വൈസ് ചാൻസലർ ഡോ. ബി. അശോക് ഉദ്ഘാടനം ചെയ്ത പരിപാടിയിൽ വെള്ളായണി കാർഷിക കോളജ് ഡീൻ ഡോ. റോയ് സ്റ്റീഫൻ, കാർഷിക വിജ്ഞാന വ്യാപന വിദ്യാഭ്യാസ വിഭാഗം മേധാവി ഡോ. അലൻ തോമസ്, പ്രോഗ്രാം കോ-ഓർഡിനേറ്ററായ ഡോ. അർച്ചന ആർ. സത്യൻ, വിദ്യാർഥി പ്രതിനിധി ജി. മാളവിക എന്നിവർ പ്രസംഗിച്ചു. 2025-ൽ ടെഡ്എക്‌സ് ലൈസൻസ് ലഭിച്ച കേരളത്തിലെ മൂന്ന് വിദ്യാഭ്യാസ സ്ഥാപനങ്ങളിൽ ഒന്നാണ് കാർഷിക സർവകലാശാല. സർവകലാശാലയ്ക്ക് കീഴിൽ ടെഡ്എക്‌സ് വേദിയാകുന്ന ആദ്യ സ്ഥാപനമാണ് വെള്ളായണി കാർഷിക കോളേജ്.

പോക്‌സോ കേസ് പ്രതി ലഹരിമരുന്നുസഹിതം പിടിയില്‍

പേരൂര്‍ക്കട: പോക്‌സോ കേസിലെ പ്രതിയെ ലഹരിമരുന്നുമായി ഫോര്‍ട്ട് പോലീസും ഡാന്‍സാഫ് ടീമും ചേര്‍ന്നു പിടികൂടി. മുട്ടത്ത പൊന്നറ നഗര്‍ സ്വദേശി ഗോപകുമാര്‍ (24) ആണ് പിടിയിലായത്. ബംഗലൂരുവിൽനിന്ന് ബസ് മാർഗം തിരുവനന്തപുരത്ത് എംഡിഎംഎ എത്തിക്കുകയായിരുന്നു ഇയാള്‍. ചില്ലറ വില്‍പ്പനയ്ക്ക് എത്തിച്ച 32 ഗ്രാം എംഡിഎംഎയുമായാണ് ചൊവ്വാഴ്ച ഇയാള്‍ പൊന്നറയില്‍നിന്ന് പിടിയിലായത്. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

കുടിവെള്ള വിതരണത്തില്‍ തടസം; വലഞ്ഞ് ഉപഭോക്താക്കള്‍

നെയ്യാറ്റിന്‍കര : നെയ്യാറ്റിന്‍കരയില്‍ കുടിവെള്ള വിതരണം മുടങ്ങി. പൈപ്പ് പൊട്ടല്‍ മുതല്‍ പ്ലാന്‍റ് ശുദ്ധീകരണം വരെയുള്ള കാരണങ്ങള്‍ നിരത്തി ഉപഭോക്താക്കളെ അധികൃതര്‍ വലയ്ക്കുന്നുവെന്ന് ഉപഭോക്താക്കള്‍. വാട്ടര്‍ അഥോറിറ്റിയുടെ അനാസ്ഥയെന്നാണു പരക്കെ ആരോപണം. നെയ്യാറ്റിൻകര കോടതി റോഡിലെ പൈപ്പ് പൊട്ടൽ കാരണം കഴിഞ്ഞ ദിവസങ്ങളിലൊന്നും നഗരപ്രദേശത്ത് കുടിവെള്ളം ലഭിച്ചില്ല. വെള്ളം കിട്ടാത്തതിനാല്‍ ആ പ്രദേശത്തെ ഹോട്ടലുകളും വ്യാപാര സ്ഥാപനങ്ങളും പോലും പ്രവര്‍ത്തിക്കാന്‍ ഏറെ ബുദ്ധിമുട്ടുന്നതായി നഗരസഭ കൗണ്‍സിലര്‍ മഞ്ചത്തല സുരേഷ് പറഞ്ഞു. ഇന്നും നാളെയും കാളിപ്പാറ പ്ലാന്‍റ് ശുദ്ധീകരിക്കുമെന്ന് നേരത്തെ അറിയിച്ചിട്ടുണ്ട്. സ്വാഭാവികമായി കുടിവെള്ള വിതരണത്തില്‍ തടസം നേരിടും. കഴിഞ്ഞ ദിവസങ്ങളിലുണ്ടായ കുടിവെള്ള വിതരണത്തിലെ പ്രതികൂല സാഹചര്യം കണക്കിലെടുത്ത് പ്ലാന്‍റ് ശുദ്ധീകരണം മറ്റൊരു ദിവസത്തേയ്ക്ക് മാറ്റിവയ്ക്കണമെന്ന് മഞ്ചത്തല സുരേഷ് ആവശ്യപ്പെട്ടു.

ആറുപേര്‍ക്ക് പുതുജീവിതം നല്‍കി അരുണ്‍ യാത്രയായി

മെഡിക്കല്‍കോളജ്: മസ്തിഷ്‌കരണം സംഭവിച്ച യുവാവ് ആറുപേര്‍ക്കു പുതുജീവന്‍ നല്‍കി ഒടുവില്‍ യാത്രയായി. തലച്ചോറിലുണ്ടായ രക്തസ്രാവത്തെ തുടര്‍ന്നാണ് കോട്ടയം തിരുവഞ്ചൂര്‍ മണര്‍കാട് പുത്തേട്ടില്‍ രോഹിണിയില്‍ പി.ആര്‍. ജനാര്‍ദനന്‍ നായര്‍-എം. രാധാമണിയമ്മ ദമ്പതികളുടെ മകന്‍ ജെ. അരുണ്‍ (44) മരണപ്പെട്ടത്. അരുണിന്‍റെ രണ്ടു വൃക്കകള്‍, കരള്‍, ഹൃദയവാല്‍വ്, രണ്ടു നേത്ര പടലങ്ങള്‍ എന്നിവയാണു കേരളത്തിലെ വിവിധ ആശുപത്രികളില്‍ ചികിത്സയിലുള്ളവര്‍ക്ക് ദാനം ചെയ്തത്. അവയവദാനത്തിന് അരുണിന്‍റെ കുടുംബം തയാറാകുകയായിരുന്നു. യെസ് ബാങ്ക് തിരുവനന്തപുരം വഴുതക്കാട് ബ്രാഞ്ചിലെ മാനേജരായിരുന്നു അരുണ്‍. ജൂണ്‍ 26-നാണ് തലച്ചോറിലെ രക്തസ്രാവത്തെ തുടര്‍ന്ന് അദ്ദേഹത്തെ തിരുവനന്തപുരത്തെ ഒരു സ്വകാര്യ ആശുപത്രിയില്‍ പ്രവേശിപ്പിച്ചത്. ജൂലൈ എട്ടിന് മസ്തിഷ്‌ക മരണം സ്ഥിരീകരിക്കുകയായിരുന്നു. അരുണിന്‍റെ കുടുംബത്തിന്‍റെ ദുഃഖത്തില്‍ പങ്കുചേരുന്നതായി ആരോഗ്യമന്ത്രി വീണ ജോര്‍ജ് അറിയിച്ചു. കേരള സ്റ്റേറ്റ് ഓര്‍ഗന്‍ ആന്‍ഡ് ടിഷ്യു ട്രാന്‍സ്പ്ലാന്‍റ് ഓര്‍ഗനൈസേഷന്‍റെ (കെ-സോട്ടോ) നേതൃത്വത്തിലാണ് അവയവ കൈമാറ്റ നടപടിക്രമങ്ങള്‍ പൂര്‍ത്തിയാക്കിയത്. അരുണിന്‍റെ സംസ്‌കാരം ഇന്ന് ഉച്ചയ്ക്ക് രണ്ടിനു കോട്ടയം മണര്‍കാട്ടെ വീട്ടുവളപ്പില്‍ നടത്തും. എസ്. ദേവിപ്രസാദ് ആണ് ഭാര്യ. ആദിത്യ നായര്‍, നിതാര നായര്‍ എന്നിവര്‍ മക്കളാണ്.

പാച്ചല്ലൂരിൽ കാറും ഒമിനി വാനും കൂട്ടിയിടിച്ചു

തിരുവല്ലം: പാച്ചല്ലൂര്‍ പാറവിളയ്ക്കു സമീപം അമിത വേഗത്തിലെത്തിയ മാരുതി ബൊലേനോ കാറും മാരുതി ഒമിനി വാനും കൂട്ടിയിടിച്ച് ഒമിനി വാന്‍ ഓടിച്ചിരുന്ന ചാക്ക സ്വദേശി പവി (25) ക്ക് കാലിനു ഗുരതരമായി പരിക്കേറ്റു. ഇയാളെ നാട്ടുകാരുടെ നേതൃത്വത്തില്‍ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇന്നലെ പുലര്‍ച്ചെ 2.30 ഓടുകൂടി പാറവിളയ്ക്കു സമീപം സൂര്യ സാമില്ലിനു മുന്നിലായിരുന്നു അപകടം. ഒമിനി വാന്‍ കോവളം ഭാഗത്തുനിന്നും തിരുവനന്തപുരത്തേയ്ക്ക് പോകുകയായിരുന്നു. തിരുവല്ലം ഭാഗത്തുനിന്നും കോവളത്തേയ്ക്ക് പോകുകയായിരുന്ന കോവളം സ്വദേശിയുടെ ബൊലേനോ കാറാണ് ഒമിനി വാനുമായി കൂട്ടിയിടിച്ചത്. അപകടത്തില്‍ ഒമിനി വാന്‍ റോഡിനു വശത്തായി തലകീഴായി മറിയുകയായിരുന്നു. വലിയ ശബ്ദം കേട്ട് സമീപവാസികള്‍ ഓടിയെത്തി വാനില്‍ കുടുങ്ങികിടന്ന പവിയെ ഏറെ പണിപ്പെട്ട് പുറത്തെടുക്കുകയായിരുന്നു. ഒമിനി വാനിന് സാരമായി കേടുപാടുകള്‍ സംഭവിച്ചു. ബൊലേനോ കാറിന്‍റെ മുന്‍ ഭാഗം പൂര്‍ണമായും തകര്‍ന്നിട്ടുണ്ട്. ഇരുവാഹനങ്ങളുടെയും അമിത വേഗതയാണ് അപകടത്തിനിടയാക്കിയതെന്നു തിരിവല്ലം പൊലീസ് പറഞ്ഞു.

വില്ലേജ് ഓഫീസ് വളപ്പിൽ തെരുവുനായ ശല്യവും മദ്യപരുടെ വിളയാട്ടവും

ഊരൂട്ടമ്പലം: നാലുവർഷം മുൻപ്‌ പൊളിച്ചുമാറ്റിയ ഊരൂട്ടമ്പലത്തെ മാറനല്ലൂർ വില്ലേജ് ഓഫീസിന്‍റെ മതിൽ പഞ്ചായത്ത് പുനർനിർമിക്കുന്നില്ലെന്ന് ആക്ഷേപം. പുതിയ കെട്ടിടത്തിൽ സ്മാർട് വില്ലേജ് ഓഫീസ് പ്രവർത്തനം ആരംഭിച്ച് മൂന്നുമാസം കഴിഞ്ഞപ്പോഴാണ് സ്ത്രീസൗഹൃദ ബസ് കാത്തിരിപ്പുകേന്ദ്രം നിർമിക്കുന്നതിനുവേണ്ടി വില്ലേജ് ഓഫീസിന്‍റെ മുൻവശത്തെ മതിൽ പൊളിച്ചുമാറ്റിയത്. മതിൽ പൊളിക്കുന്നതിനെ ജീവനക്കാർ എതിർത്തപ്പോൾ കാത്തിരിപ്പുകേന്ദ്രം മറ്റൊരിടത്തേക്കു മാറ്റാൻ തീരുമാനമായി. എന്നാൽ പൊളിച്ചുമാറ്റിയ മതിൽ പുനർനിർമിക്കാനോ, ബസ് കാത്തിരിപ്പുകേന്ദ്രം സ്ഥാപിക്കാനോ പഞ്ചായത്ത് അധികൃതർ തയാറായിട്ടില്ല. മതിൽ ഇല്ലാത്തതുകാരണം വില്ലേജ് ഓഫീസ് വളപ്പിൽ സദാസമയം തെരുവുനായകളുടെ ശല്യമാണ്. പലപ്പോഴും വിവിധ ആവശ്യങ്ങൾക്കായി വില്ലേജ് ഓഫീസിലെത്തുന്നവർ തെരുവുനായകളെ ഭയന്നാണ് അകത്തേക്കു കടക്കുന്നത്. രാത്രികാലങ്ങളിൽ വില്ലേജ് ഓഫീസ് പരിസരത്ത് മദ്യപാനസദസും നടക്കുന്നുണ്ട്. രാത്രികളിൽ ഇവർ ഉപേക്ഷിക്കുന്ന ഭക്ഷണാവശിഷ്ടങ്ങളാണ് തെരുവുനായകളെ ആകർഷിക്കുന്നത്. പ്രദേശത്തെ ചില സംഘടനകളും, നാട്ടുകാരും പലപ്പോഴും പരാതിപ്പെടുന്നെങ്കിലും പോലീസെത്തി വല്ലപ്പോഴും പരിശോധന നടത്തുന്നതല്ലാത മറ്റു നടപടികളൊന്നും ഉണ്ടാകുന്നില്ല. ജീവനക്കാർക്കും വില്ലേജ് ഓഫീസിലെത്തുന്നവർക്കും വേണ്ടി ഉപയോഗിക്കുന്നതിനു ശൗചാലയം വില്ലേജ് ഓഫീസ് വളപ്പിൽ നിർമിച്ചിട്ടുണ്ടെങ്കിലും ഇപ്പോൾ അതു പൊതുശൗചാലയമായി മാറിയനിലയിലാണ്.

പോക്സോ കേസിലെ പ്രതിക്ക് 23 വർഷം തടവും 10,000 രൂപ പിഴയും

കാട്ടാക്കട: പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച കേസിൽ പ്രതിക്ക് 23 വർഷം തടവും 10,000 രൂപ പിഴയും ശിക്ഷ വിധിച്ച് കോടതി. കാട്ടാക്കട മാറനല്ലൂർ അരുവിക്കര കുളത്തിൻകര സ്വദേശി രാജേഷ് കുമാറി (38)നെയാണ് കാട്ടാക്കട അതിവേഗ പോക്സോ കോടതി ജഡ്ജി എസ്. രമേഷ്കുമാർ ശിക്ഷിച്ചത്. പിഴത്തുക അതിജീവിതയ്ക്ക് നൽകണമെന്നും അല്ലാത്ത പക്ഷം ഏഴ് മാസം അധിക കഠിനതടവ് കൂടി അനുഭവവിക്കണമെന്നും വിധിയിൽ പറയുന്നു. 2022 ഓഗസ്റ്റിലായിരുന്നു കേസിനാസ്പദമായ സംഭവം. മൊബൈൽഫോൺ വഴി പരിചയപ്പെട്ട പെൺകുട്ടിയെ ഇയാൾ തന്‍റെ അരുവിക്കരയിലെ വീട്ടിലേക്കു ക്ഷണിച്ചു വരുത്തി ലൈംഗികമായി പീഡിപ്പിക്കുകയായിരുന്നു. വീട്ടിൽ കുട്ടിയെ കാണാതായ മാതാപിതാക്കൾ മാറനല്ലൂർ പോലീസിൽ പരാതിപ്പെടുകയും തുടർന്ന് നടത്തിയ അന്വേഷണത്തിൽ പ്രതിയുടെ വീടിനടുത്തു നിന്നും കുട്ടിയെ കണ്ടെത്തുകയുമായിരുന്നു. വൈദ്യപരിശോധനയിൽ പെൺകുട്ടി ലൈംഗിക പീഡനത്തിന് ഇരയായിട്ടുണ്ടെന്ന് കണ്ടെത്തി. കുട്ടിയും ഇക്കാര്യം സമ്മതിച്ചതോടെയാണ് കേസ് രജിസ്റ്റർ ചെയ്തത്. പ്രോസിക്യൂഷനുവേണ്ടി സ്പെഷൽ പബ്ലിക് പ്രോസിക്യൂട്ടർ അഡ്വ ഡി.ആർ പ്രമോദ് കോടതിയിൽ ഹാജരായി. 42 രേഖകൾ ഹാജരാക്കുകയും 27 സാക്ഷികളെ വിസ്തരിക്കുകയും എട്ട് തൊണ്ടിമുതലുകൾ കോടതിയിൽ ഹാജരാക്കുകയും ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]