കൽപ്പറ്റ:വയനാട്ടിൽ സിപിഎം ജില്ലാ കമ്മിറ്റി രൂപീകരിച്ചതുമുതൽ ജില്ലാ സെക്രട്ടറിയേറ്റംഗവും ജില്ലയുടെ രൂപീകരണത്തിന് ശേഷം കാൽനൂറ്റാണ്ടുകാലം ജില്ലാ സെക്രട്ടറിയുമായിരുന്ന പി.എ. മുഹമ്മദ് (84) അന്തരിച്ചു. പക്ഷാഘാതത്തെ തുടർന്ന് ഒരുമാസമായി ചികിത്സയിലായിരുന്നു.
1973ൽ സിപിഎം വയനാട് ജില്ലാ കമ്മിറ്റി രൂപീകരിച്ചപ്പോൾ മുതൽ സെക്രട്ടറിയേറ്റംഗമായി പ്രവർത്തിച്ച അദ്ദേഹം കാൽനൂറ്റാണ്ട് കാലം ജില്ലാ സെക്രട്ടറിയായി പാർട്ടിയെ നയിച്ചു. സിപിഎം സംസ്ഥാന കമ്മിറ്റി അംഗം , സിഐടിയു ജില്ലാ പ്രസിഡന്‍റ്, വൈത്തിരി പ്രാഥമിക കാർഷിക ഗ്രാമവികസന ബാങ്ക് പ്രസിഡന്‍റ്, മേപ്പാടി പഞ്ചായത്ത് പ്രസിഡന്‍റ്, ദേശാഭിമാനി ഡയറക്ടർ ബോർഡംഗം എന്നിങ്ങനെ വ്യത്യസ്ത മേഖലകളിൽ സംഘാടകനായും സഹകാരിയായും നേതൃപാടവം പ്രകടിപ്പിച്ചു.
കണിയാന്പറ്റ പന്തനംകുന്നൻ ആലിക്കുട്ടിയുടേയും കുഞ്ഞാമിയുടെയും മകനായി 1937ലാണ് പി.എ. മുഹമ്മദ് ജനിച്ചത്. കണിയാന്പറ്റ മലബാർ ഡിസ്ട്രിക്ട് ബോർഡ് ഹയർസെക്കൻഡറി സ്കൂൾ, കൽപ്പറ്റ എസ്കഐംജെ സ്കൂൾ, എന്നിവിടങ്ങളിലായിരുന്നു പഠനം. കോഴിക്കോട് മലബാർ ക്രിസ്ത്യൻ കോളജിൽ പിയുസിക്ക് ചേർന്നെങ്കിലും സാന്പത്തിക പരാധീനത കാരണം പഠനം പാതിവഴിയിൽ ഉപേക്ഷിക്കേണ്ടി വന്നു. സ്കൂൾ പഠനകാലം മുതൽ തന്നെ കമ്യൂണിസ്റ്റ് ആശയങ്ങളിൽ ആകൃഷ്ടനായിരുന്ന പിഎക്ക് മടക്കിമല സർവീസ് സഹകരണബാങ്കിൽ ജോലി കിട്ടിയെങ്കിലും കമ്യൂണിസ്റ്റ്കാരനായതിനാൽ പിരിച്ചുവിട്ടു. രാഷ്ട്രീയ പ്രവർത്തനം നടത്തിയതിന്‍റെ പേരിൽ വീട്ടിൽനിന്നും ഇറക്കി വിട്ടതും ഇക്കാലത്തായിരുന്നു.
1958ൽ പാർട്ടി അംഗത്വം ലഭിച്ച പിഎ കർഷകസംഘം വില്ലേജ് ജോ. സെക്രട്ടറിയായണ് പ്രവർത്തനം തുടങ്ങിയത്. 1973ൽ സിപിഎം വയനാട് ജില്ലാ കമ്മിറ്റി രൂപീകരിച്ചപ്പോൾ സെക്രട്ടറിയേറ്റംഗമായി. 1982 മുതൽ 2007 വരെ ജില്ലാ സെക്രട്ടറിയും സംസ്ഥാന കമ്മിറ്റി അംഗവുമായി. 2017ൽ ആരോഗ്യപരമായ കാരണങ്ങളാൽ ഒഴിവാകും വരെ സംസ്ഥാന സമിതി അംഗമായിരുന്നു. അടിയന്തരാവസ്ഥ കാലത്തും തൊഴിലാളികളുടേയും കർഷകരുടേയും അവകാശപ്പോരാട്ടങ്ങൾക്ക് നേതൃത്വം നൽകിയതിന്‍റെ പേരിലും നിരവധി തവണ ജയിൽ വാസം അനുഭവിച്ചു.
ഭാര്യ: പരേതയായ നബീസ. മക്കൾ: നിഷാദ്(കഐസ്ഇബി കോണ്ട്രാക്ടർ), നെരൂദ (എൻജിനിയർ, കഐസ്ഇബി), പരേതനായ സലിം. മരുമക്കൾ: ഹാജ്റ (എസ്എസ്എ ഓഫീസ്), സീന, മിസ്രി. സഹോദരങ്ങൾ: സെയ്ദ്, ഹംസ, ആസ്യ, നബീസ, കുഞ്ഞിപ്പാത്തുമ്മ, പരേതനായ ബീരാൻ.