സുൽത്താൻ ബത്തേരി: ഗവ.ഗസ്റ്റ് ഹൗസ് പുതിയ ബ്ലോക്ക് നിർമാണം പൂർത്തിയാക്കുന്നതിൽ അധികൃതർ ഉദാസീനത വെടിയണമെന്നു ആവശ്യപ്പെട്ട് സമരം സംഘടിപ്പിക്കാൻ കേരള കോണ്ഗ്രസ്-എം നിയോജകമണ്ഡലം കമ്മിറ്റി തീരുമാനിച്ചു. ഇതിന്‍റെ ഭാഗമായി ഗസ്റ്റ് ഹൗസ് പരിസരത്തു 29ന് രാവിലെ 11നു പ്രതിഷേധ കൂട്ടായ്മ നടത്തും.
ഗസ്റ്റ് ഹൗസ് പുതിയ ബ്ലോക്കിനു 14 വർഷം മുന്പു ശിലാസ്ഥാപനം നടത്തിയതാണ്. ഇതുവരെ നിർമാണം പൂർത്തിയായില്ല. കാരാർ ഏറ്റെടുത്ത സ്റ്റേറ്റ് കണ്‍സ്ട്രക്ഷൻ കോർപറേഷന്റെ കെടുകാര്യസ്ഥതയാണ് പ്രവൃത്തി പൂർത്തിയാകാത്തതിനു കാരണം. മുന്പുണ്ടായിരുന്ന ഗസ്റ്റ് ഹൗസ് അറ്റകുറ്റപ്പണികൾക്കായി അടച്ചിട്ടിരിക്കയാണ്. പിഡബ്ല്യുഡി ഗസ്റ്റ് ഹൗസും പൊളിച്ചുപണിതുകൊണ്ടിരിക്കയാണ്. ധാരാളം സഞ്ചാരികളെത്തുന്ന നഗരത്തിൽ നിലവിൽ സർക്കാർ ഉടമസ്ഥതയിൽ താമസസൗകര്യമില്ലെന്നു യോഗം ചൂണ്ടിക്കാട്ടി.
സംസ്ഥാന ജനറൽ സെക്രട്ടറി കെ.ജെ. ദേവസ്യ ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് ടി.ഡി. മാത്യു അധ്യക്ഷത വഹിച്ചു. ജില്ലാ പ്രസിഡന്‍റ് ജോസഫ് മാണിശേരി, ടി.എസ്. ജോർജ് , കെ.പി. ജോസഫ്, പി.കെ. മാധവൻ നായർ, കെ.കെ. ബേബി, എൻ.കെ. ബില്ലിഗ്രാം, ജോസ് തോമസ്, ടോം ജോസ്, റെജി ഓലിക്കരോട്ട്, പി.എം. ജയശ്രീ, ജോയ് ജോസഫ്, കുര്യൻ ജോസഫ്, സണ്ണി കുടുക്കപ്പാറ, ജോർജ് ജോസഫ്, ടി.കെ. അന്നമ്മ, ബേസിൽ ജോർജ്, കെ. സാവിത്രി, ബീന, വി.എം. ജേസഫ്, സി.കെ. വിജയൻ, കെ.സി. കൃഷ്ണൻ എന്നിവർ പ്രസംഗിച്ചു.