തളിപ്പറമ്പ്: കേരള കോണ്ഗ്രസ്-ജോസഫ് സംസ്ഥാന ജനറൽ സെക്രട്ടറി ജോര്ജ് വടകര (62) അന്തരിച്ചു. ഇന്നലെ രാവിലെ ഹൃദയാഘാതത്തെ തുടര്‍ന്നായിരുന്നു അന്ത്യം. രാവിലെ 6.30 ഓടെ വീട്ടില്‍ കുഴഞ്ഞുവീണ ജോര്ജ് വടകരയെ ഉടന്‍തന്നെ തളിപ്പറമ്പിലെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. ചെമ്പന്തൊട്ടി സ്വദേശിയായ ജോര്ജ് വടകര വര്‍ഷങ്ങളായി തളിപ്പറന്പ് പുഷ്‌പഗിരിയിലാണ്‌ താമസം.
കെഎസ്‌‌സി യൂണിറ്റ്‌ പ്രസിഡന്‍റായി രാഷ്ട്രീയജീവിതം ആരംഭിച്ച ജോര്ജ് കെഎസ്‌‌സി ജില്ലാ പ്രസിഡന്‍റ്, സംസ്ഥാന സെക്രട്ടറി എന്നീ പദവികള്‍ വഹിച്ചിട്ടുണ്ട്‌. കേരള യൂത്ത്‌ഫ്രണ്ട്‌ ജില്ലാ പ്രസിഡന്‍റ്, സംസ്ഥാന സെക്രട്ടറി എന്നീ സ്ഥാനങ്ങളിലും പ്രവര്‍ത്തിച്ചിരുന്നു. കേരള കോണ്ഗ്രസ് ജില്ലാ പ്രസിഡന്‍റായും പ്രവര്‍ത്തിച്ചിരുന്നു.
കേരള ഗ്രന്ഥശാല സംഘം ജില്ലാ സെക്രട്ടറി, കണ്ണൂര്‍ ജില്ലാ റബര്‍ ആൻഡ് അഗ്രിക്കള്‍ച്ചറല്‍ മാര്‍ക്കറ്റിംഗ്‌ സഹകരണസംഘം (റബ്‌മാര്‍ക്‌സ്‌) വൈസ് പ്രസിഡന്‍റ്, കത്തോലിക്കാ കോണ്ഗ്രസ് തലശേരി അതിരൂപത വൈസ് പ്രസിഡന്‍റ്, കത്തോലിക്കാ കോൺഗ്രസിന്‍റെ സാമൂഹ്യ സേവന വിഭാഗമായ ഹാര്‍ട്ട് ലിങ്ക്‌സ് കോ-ഓര്‍ഡിനേറ്റര്‍, ഇരിട്ടി പി.ടി. ചാക്കോ സ്‌മാരക ആശുപത്രി ഡയറക്‌ടര്‍ എന്നീ നിലകളില്‍ പ്രവര്‍ത്തിച്ചുവരികയായിരുന്നു. ആദ്യകാലത്ത് കേരള കോണ്ഗ്രസ് ജേക്കബിലും പ്രവർത്തിച്ചിരുന്നു. സയ്യിദ്‌ നഗറിലെ പാലസ്‌ വുഡ്‌ ഇന്‍ഡ്‌സ്‌ട്രീസ്‌ ഉടമയാണ്‌.
സംസ്കാരം 31ന് ഉച്ചകഴിഞ്ഞ് തളിപ്പറമ്പ് സെന്‍റ് മേരീസ് ഫൊറോന ദേവാലയത്തിൽ. ഭാര്യ: ശോഭ കുടിയാന്മല മഞ്ചപ്പിള്ളിൽ കുടുംബാംഗം. മക്കൾ: അലിൻ മരിയ, അതുൽ (കാനഡ), അഖിൽ (യുകെ). മരുമക്കൾ: നിബിൻ കുര്യൻ കൊട്ടാരത്തിൽ (കോടഞ്ചേരി), ജീവ റോബിൻ കുമ്മായത്തൊട്ടിയിൽ (കാനഡ). സഹോദരങ്ങൾ: തങ്കമ്മ (ശ്രീകണ്ഠപുരം), മേരി (നെല്ലിക്കുറ്റി), അപ്പച്ചൻ (ചെമ്പേരി), ചിന്നമ്മ (ചെമ്പേരി), വിൻസന്‍റ് (ഓസ്ട്രേലിയ),ആൻസി (നെല്ലിപ്പാറ).