ADVERTISEMENT

ADVERTISEMENT

മെഗാ തൊഴിൽമേള നടത്തി

തൃക്കരിപ്പൂർ: യുവജനങ്ങൾക്ക് സ്വകാര്യമേഖലയിലെ തൊഴിലവസരങ്ങൾ തുറന്നുനല്കി തൃക്കരിപ്പൂർ ഗവ. പോളിടെക്‌നിക് കോളജിൽ ജില്ലാ എംപ്ലോയ്മെന്‍റ് എക്സ്ചേഞ്ചിന്‍റെയും എംപ്ലോയബിലിറ്റി സെന്‍ററിന്‍റെയും നേതൃത്വത്തിൽ പ്രയുക്തി മെഗാ തൊഴിൽമേള നടത്തി. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണൻ ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് ഇ.എം. ആനന്ദവല്ലി അധ്യക്ഷത വഹിച്ചു.

പഞ്ചായത്തംഗം കെ.വി. രാധ, ജില്ലാ എംപ്ലോയ്മെന്‍റ് ഓഫീസർ ബി. ജാസ്മിൻ, പോളിടെക്നിക് കോളജ് പ്രിൻസിപ്പൽ കെ. വിനോദ്, ഹൊസ്ദുർഗ് ടൗൺ എംപ്ലോയ്മെന്‍റ് ഓഫീസർ പി. പവിത്രൻ, വൊക്കേഷണൽ ഗൈഡ് ലൈൻസ് എംപ്ലോയ്മെന്‍റ് ഓഫീസർ പി.കെ. അജേഷ്, പോളിടെക്നിക് സീനിയർ സൂപ്രണ്ട് എൻ.പി. സൈനുദീൻ, എൻഎസ്എസ് പ്രോഗ്രാം ഓഫീസർ കെ.പി. രാജൻ, പ്ലേസ്മെന്‍റ് ഓഫീസർ ഷൈജു കെ. നായർ എന്നിവർ പ്രസംഗിച്ചു. അഞ്ഞൂറിലേറെ ഉദ്യോഗാർത്ഥികൾ പങ്കെടുത്തു.

ADVERTISEMENT

മഴവിസ്മയം തീർത്ത് അച്ചൻകല്ല് വെള്ളച്ചാട്ടം

കൊന്നക്കാട്: മഴ കനത്തതോടെ മലയോരത്തെ മൺസൂൺകാല വെള്ളച്ചാട്ടമായ അച്ചൻകല്ല് വെള്ളച്ചാട്ടം കാണാൻ സഞ്ചാരികളുടെ പ്രവാഹം. കഴിഞ്ഞ ദിവസം മലയോര പ്രദേശത്ത് അതിശക്തമായ മഴ ലഭിച്ചതോടെയാണ് വെള്ളച്ചാട്ടം കാണാൻ ആൾക്കാർ ഒഴുകിയെത്തിയത്. വലിയ ജലപ്രവാഹം വെള്ളച്ചാട്ടത്തെ കൂടുതൽ നയനമനോഹരമാക്കി. ഇതു സഞ്ചാരികളെ ഏറെ ആകർഷിക്കുന്നുണ്ട്. വെള്ളരിക്കുണ്ടിൽ നിന്നും 16 കിലോമീറ്റർ സഞ്ചരിച്ചാൽ വെള്ളച്ചാട്ടത്തിനടുത്തെത്താം. ഇവിടേക്കു ടാറിട്ട റോഡുണ്ട്. റോഡ് സൗകര്യമുള്ളതിനാൽ വിദൂരസ്ഥലങ്ങളിൽ നിന്നും ധാരാളം ആൾക്കാർ എത്തിച്ചേരുന്നുണ്ട്. കുന്നിൻ മുകളിൽ നിന്നും വരുന്ന വലിയ ജലപ്രവാഹത്തെ കല്ലിൽത്തട്ടി ചിതറി വീഴുന്ന കാഴ്ച ഏവരെയും ആകർഷി ക്കുന്നുണ്ട്. മഴ കുറയുന്നതോടെ ജലപ്രവാഹവും കുറയും. ഇതിന് സമാനമായി കാണപ്പെടുന്ന മറ്റൊന്നാണ് സമീപമുള്ള ഓടക്കൊല്ലി വെള്ളച്ചാട്ടം. ഇവിടേക്കും ധാരാളം ആൾക്കാർ എത്തുന്നുണ്ട്. എത്തിച്ചേരാൻ റോഡുണ്ട് എന്നതൊഴിച്ചാൽ മറ്റു സൗകര്യങ്ങളൊന്നും ഇവിടെയില്ല. ദിവസേന നൂറുകണക്കിനാളുകളാണ് ഇവിടേക്ക് വന്നുകൊണ്ടിരിക്കുന്നത്. വെള്ളച്ചാട്ടത്തിന്‍റെ സമീപ പ്രദേശങ്ങൾ ഉൾപ്പെടുത്തി വികസന പ്രവർത്തനങ്ങൾ നടത്തേണ്ടത് അനിവാര്യമാണ്. ജില്ലയുടെ ടൂറിസ്റ്റ് കേന്ദ്രങ്ങളുടെ ലിസ്റ്റിൽഇതേ വരെ ഉൾപ്പെടുത്തിയിട്ടില്ല. റാണിപുരം, കോട്ടഞ്ചേരി എന്നീ ടൂറിസ്റ്റ് കേന്ദ്രങ്ങളുമായി ഈ പ്രദേശത്തെയും ബന്ധിപ്പിച്ചാൽ സന്ദർശകർക്ക് ഏറെ സൗകര്യപ്രദമാകും ബളാൽ പഞ്ചായത്ത് അധികൃതർ ഇവിടെ മുൻ കൈയെടുത്തു സ്ഥലം ഏറ്റെടുത്ത് വികസന പ്രവർത്തനങ്ങൾ നടത്തണമെന്നാണ് നാട്ടുകാർ ആവശ്യപ്പെടുന്നത്. ഇവിടെ സൗകര്യങ്ങൾ വർധിപ്പിച്ച് ടൂറിസ്റ്റ് കേന്ദ്രങ്ങളാക്കുന്നതോടെ കൊന്നക്കാട് ടൗണിന്‍റെയും സമീപപ്രദേശങ്ങളുടെയും വികസനത്തിന് വേഗത കൂടും.

സ്വയം സമർപ്പണത്തോടെ പാഠഭാഗങ്ങൾ അധ്യാപകർ പകർന്നു നൽകണം: ബിഷപ് ഡോ. ഡെന്നിസ് കുറുപ്പശേരി

തൃക്കരിപ്പൂർ: മതബോധനത്തിന്‍റെ പാഠഭാഗങ്ങൾ യേശുവിന്‍റെ പാദാന്തികത്തിൽ സ്വയം സമർപ്പിച്ചു വേണം അധ്യാപകർ വിദ്യാർഥികൾക്ക് പകർന്നു നൽകേണ്ടതെന്ന് കണ്ണൂർ രൂപത സഹായമെത്രാൻ ഡോ. ഡെന്നിസ് കുറുപ്പശേരി. കാഞ്ഞങ്ങാട് ഫൊറോനാ മതബോധന അധ്യാപക സംഗമം തൃക്കരിപ്പൂർ സെന്‍റ് പോൾസ് ഓഡിറ്റോറിയത്തിൽ ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്‌. വചനവും സഭാനിയമങ്ങളും ജീവിത മൂല്യവും ഒരുമിച്ചു ചേർത്ത് വിദ്യാർത്ഥികളുമായി പങ്കുവെക്കുന്ന അധ്യാപകർ നൽകുന്ന മതബോധന പാഠം മഹത്തരമാണെന്നും അദ്ദേഹം പറഞ്ഞു. ഫൊറോനാ വികാരി ഫാ. മാത്യു തൈക്കൽ അധ്യക്ഷതവഹിച്ചു. കണ്ണൂർ രൂപതാ ചാൻസിലർ ഫാ. ആന്‍റണി കുരിശിങ്കൽ, മതബോധന വിഭാഗം മേഖലാ ഡയറക്ടർ ഫാ. ജസ്റ്റിൻ എടത്തിൽ, എയ്ഞ്ചൽ തോമസ് എന്നിവർ പ്രസംഗിച്ചു. പരിയാരം സംസ്കൃതി ഭവൻ ഡയറക്ടർ ഫാ. ജോ മാത്യു സെമിനാറിൽ വിഷയാവതരണം നടത്തി.

കല്ലപ്പള്ളി വിശുദ്ധ അൽഫോൻസാമ്മ ദേവാലയത്തിൽ തിരുനാൾ ആഘോഷം

പാണത്തൂർ: കല്ലപ്പള്ളി വിശുദ്ധ അൽഫോൻസാമ്മ ദേവാലയത്തിൽ തിരുനാൾ ആഘോഷത്തിന് വികാരി ഫാ. നോബിൾ പന്തലാടിക്കൽ കൊടിയേറ്റി. തുടർന്ന് നടന്ന തിരുക്കർമങ്ങൾക്ക് ഫാ. ജോസ് കളത്തിപ്പറമ്പിൽ കാർമികത്വം വഹിച്ചു. ഇന്നും നാളെയും 26, 27 തീയതികളിലും വൈകുന്നേരം നാലിനും 23 മുതൽ 25വരെ ഉച്ചകഴിഞ്ഞ് മൂന്നിനും ആരംഭിക്കുന്ന തിരുക്കർമങ്ങൾക്ക് ഫാ. നിഖിൽ ജോൺ ആട്ടുകാരൻ, ഫാ. ജോസഫ് പൗവ്വത്ത്, ഫാ. റ്റോമി പുളിന്താനം, ഫാ. ജെയിൻ കണിയോടിക്കൽ, ഫാ. ജോസഫ് പൂവത്തോലിൽ, ഫാ. വർഗീസ് ചെരിയംപുറത്ത്, ഫാ. അഷർ കൊച്ചുപറമ്പിൽ എന്നിവർ കാർമികത്വം വഹിക്കും. സമാപനദിനമായ 28നു രാവിലെ ഒന്പതിനു തിരുസ്വരൂപപ്രതിഷ്ഠ. 10.30ന് ആഘോഷമായ വിശുദ്ധ കുർബാന, വചനസന്ദേശം, നൊവേന, ലദീഞ്ഞ്-ഫാ. നോബിൾ പന്തലാടിക്കൽ. തുടർന്ന് പ്രദക്ഷിണം, സമാപനാശീർവാദം, സ്നേഹവിരുന്ന്.

100 ദിനങ്ങളിൽ 100 പദ്ധതികളുമായി ഈസ്റ്റ് എളേരി പഞ്ചായത്ത്

ചിറ്റാരിക്കാൽ: ഈസ്റ്റ്‌ എളേരി പഞ്ചായത്ത്‌ ജൂലൈ 21 മുതൽ ഒക്ടോബർ 31 വരെയുള്ള 100 ദിവസങ്ങളിൽ 100 പദ്ധതികൾ പൂർത്തിയാക്കാൻ ഒരുങ്ങുന്നു. ചിറ്റാരിക്കാൽ ഹെൽത്ത്‌ സബ്‌സെന്‍റർ കെട്ടിടം,ഗോക്കടവ് അങ്കണവാടി, അരിയിരുത്തി അങ്കണവാടി കെട്ടിടങ്ങൾ, പാവൽ കമ്യൂണിറ്റി ഹാൾ എന്നിവയുടെ നിർമാണം ഇക്കാലയളവിൽ പൂർത്തിയാക്കും. അറക്കത്തട്ട് കുടിവെള്ളപദ്ധതിയുടെ പൈപ്പ് ലൈൻ നിർമാണം,50 പുതിയ റോഡുകളുടെ കോൺക്രീറ്റ്, 10 റോഡുകളുടെ വീതികൂട്ടൽ, 70 സോളാർ വഴിവിളക്കുകൾ, 10 മിനിമാസ്റ്റ് ലൈറ്റ്കൾ എന്നിവയുടെ സ്ഥാപിക്കൽ, കാർഷിക മൃഗസംരക്ഷണ, പട്ടികജാതി, പട്ടിക വർഗമേഖലകളിലെ വിവിധ പദ്ധതികൾ, വയോജനങ്ങൾ, ഭിന്നശേഷിക്കാർ, കുട്ടികൾ എന്നിവർക്കുള്ള വിവിധ പദ്ധതികൾ എന്നിവ ഇതിൽ ഉൾപ്പെടുമെന്ന് പഞ്ചായത്ത്‌ പ്രസിഡന്‍റ് ജോസഫ് മുത്തോലി വ്യക്തമാക്കി. 2025-26 വാർഷിക പദ്ധതികൾ സമയബന്ധിതമായി പൂർത്തിയാക്കുന്നതിനുള്ള എല്ലാ മുന്നൊരുക്കങ്ങളും പൂർത്തിയായതായി അദ്ദേഹം അറിയിച്ചു. വിവിധ ടെൻഡർ നടപടികൾ പുരോഗമിക്കുകയാണ്. വ്യക്തിഗതആനുകൂല്യങ്ങൾക്കുള്ള ഗുണഭോക്തൃ തെരെഞ്ഞെടുപ്പുകളും പൂർത്തിയാക്കിയിട്ടുണ്ട്. വൈസ് പ്രസിഡന്‍റ് ഫിലോമിന ജോണി, സ്ഥിരം സമിതി അധ്യക്ഷരായ മേഴ്‌സി മാണി, പ്രശാന്ത് സെബാസ്റ്റ്യൻ എന്നിവരും ഭരണസമിതി അംഗങ്ങളും സന്നിഹിതരായിരുന്നു.

പുഴയിൽ കാണാതായ യുവാവിനായുള്ള തെരച്ചിൽ ഇന്നലെയും വിഫലം

പാണത്തൂർ: മഞ്ഞടുക്കം പുഴയിൽ കാണാതായെന്നു സംശയിക്കുന്ന പ്ലാന്‍റേഷൻ കോർപറേഷന്‍റെ പാണത്തൂർ ഡിവിഷനിൽ പണിക്കുവന്ന ഹിറ്റാച്ചി ഡ്രൈവറുടെ സഹായിക്കായുള്ള തിെരച്ചിൽ ഇന്നലെയും വിഫലം. വ്യാഴാഴ്ച ഉച്ചയോടെയാണ് താമസ സ്ഥലമായ കരിക്കെ തോട്ടത്തിലേക്ക് മഞ്ഞടുക്കം പാലം കടന്ന് ബൈക്കിൽ വന്ന കർണാടക ബൽഗാം സ്വദേശിയായ ദുർഗപ്പ (18) നെ കാണാതായത്. തുടർന്ന് ഡ്രൈവർ രാജപുരം പോലീസ് സ്റ്റേഷനിൽ പരാതി നൽകിയത്. ഇന്നലെയും ഫയർഫോഴ്സ്, പോലീസ്, എൻഡിആർഎഫ്, നാട്ടുകാർ തുടങ്ങിയവർ ചേർന്നാണ് തിെരച്ചിൽ നടത്തിയത്. കാണാതായി എന്നു പറയുന്ന സ്ഥലം മുതൽ അരിപ്രേഡ് വരെയുള്ള ഭാഗങ്ങൾ ഇന്നലെ തിരച്ചിൽ നടത്തിയിരുന്നു. റവന്യു, പഞ്ചായത്ത്, ജനപ്രതിനിധികൾ തുടങ്ങിയവർ നേതൃത്വത്തിലാണ് തെരച്ചിൽ പുരോഗമിക്കുന്നത്. ഇന്നും തെരച്ചിൽ തുടരാനാണ് തീരുമാനം. കലങ്ങിയ വെള്ളവും ശക്തമായ ഒഴുക്കും തെരച്ചിലിന് പ്രതികൂലമായി ബാധിക്കുന്നതായി അധികൃതർ പറഞ്ഞു.

ഖാദിയും ഓണ്‍ലൈന്‍ വിപണന രംഗത്തേക്ക്; ന്യൂജെന്‍ വസ്ത്രങ്ങളും വിപണിയിലെത്തിക്കും

കാസര്‍ഗോഡ്: ഈ ഓണം മുതല്‍ ഖാദിയും ഓണ്‍ലൈന്‍ വിപണന രംഗത്തേക്ക് കടക്കുന്നു. പുതുതലമുറയെ ആകര്‍ഷിക്കാന്‍ വിവിധ നിറത്തിലുള്ള പാന്‍റ്സ്, കുര്‍ത്ത, ലോംഗ് ബ്ലൗസ് എന്നിവ വിപണിയിലെത്തിച്ചു ന്യൂ ജെന്‍ ആകാന്‍ ഖാദിയും തയ്യാറെടുത്തെന്ന് ഖാദി ബോര്‍ഡ് വൈസ് ചെയര്‍മാന്‍ പി. ജയരാജന്‍. ദേശീയ പ്രസ്ഥാനത്തോളം പഴക്കമുള്ള ഖാദിയുടെ മൂല്യം ഇനി പുതുതലമുറയ്ക്കും പകര്‍ന്നു കൊടുക്കും. ഇത്തവണ അഭിഭാഷകര്‍ക്കുള്ള കോട്ടുകള്‍ നിര്‍മിച്ചു പുതുപരീക്ഷണം നടത്തുന്ന ഖാദിയുടെ ഓഗസ്റ്റ് ഒന്ന് മുതലുള്ള എല്ലാ വില്പനക്കും 30 ശതമാനം റിബേറ്റ് പ്രഖ്യാപിച്ചിട്ടുണ്ട്. ഓഗസ്റ്റ് 16 മുതല്‍ ഖാദി ഓണം വിപണന മേള സജീവമാകും. കുഞ്ഞുടുപ്പുകള്‍, കുഷ്യന്‍, ബെഡ്ഷീറ്റ്, സമ്മാന വസ്ത്രങ്ങള്‍ എന്നിവയും മേളയില്‍ ഉണ്ടാകും. കേരള ഖാദി ഗ്രാമ വ്യവസായ ബോര്‍ഡിന്‍റെ നേതൃത്വത്തില്‍ ഖാദി വസ്ത്രപ്രചാരണവിജയം ലക്ഷ്യമിട്ട് കാസര്‍ഗോഡ് ജില്ലാ പഞ്ചായത്ത് വീഡിയോ കോണ്‍ഫറന്‍സ് ഹാളില്‍ നടന്ന യോഗം ഖാദി ഗ്രാമ വ്യവസായ ബോര്‍ഡ് വൈസ് ചെയര്‍മാന്‍ പി. ജയരാജന്‍ ഉദ്ഘാടനം ചെയ്തു . ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അധ്യക്ഷതവഹിച്ചു. ജില്ലാ പഞ്ചായത്ത് സെക്രട്ടറി ശ്യാമലക്ഷ്മി, ഖാദി ബോര്‍ഡ് പ്രോജക്ട് ഓഫീസര്‍ സുഭാഷ്, പയ്യന്നൂര്‍ ഖാദി കേന്ദ്രം മാനേജര്‍ ഷിബു എന്നിവര്‍ സംബന്ധിച്ചു.

ജവഹര്‍ ബാൽ മഞ്ച് ജില്ലാ കണ്‍വന്‍ഷന്‍

കാസര്‍ഗോഡ്: സ്വാതന്ത്ര്യസമരപ്രസ്ഥാനത്തിന്‍റെ ചരിത്രം തിരുത്താനും അന്ധവിശ്വാസങ്ങള്‍ അടിച്ചേല്‍പ്പിക്കുകയും ചെയ്യുന്ന ശ്രമം നടന്നുകൊണ്ടിരിക്കുമ്പോള്‍ ദേശീയ-മതേതരത്വ ബോധമുള്ള കുട്ടികളെ വളര്‍ത്തിയെടുക്കുകയാണ് ജവഹര്‍ ബാൽ മഞ്ചിന്‍റെ ലക്ഷ്യമെന്നും ഡിസിസി പ്രസിഡന്‍റ് പി.കെ. ഫൈസല്‍. ജവഹര്‍ ബാൽ മഞ്ച് ജില്ലാ കണ്‍വന്‍ഷന്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സംസ്ഥാന കോ-ഓര്‍ഡിനേറ്റര്‍ രാജേഷ് പള്ളിക്കര അധ്യക്ഷതവഹിച്ചു. രജിത രാജന്‍, കെ. നീലകണ്ഠന്‍, ജയിംസ് പന്തമാക്കല്‍, സാജിദ് മവ്വല്‍, എം.സി. പ്രഭാകരന്‍, പി.വി. സുരേഷ്, സോമശേഖര ഷേണി, എം. കുഞ്ഞമ്പു നമ്പ്യാര്‍, ഉനൈസ് ബേഡകം, ശ്രീജിത് മാടക്കാല്‍, എ. വാസുദേവന്‍, കുഞ്ഞികൃഷ്ണന്‍ മാടക്കല്‍, ശ്രീനാഥ് ബദിയടുക്ക, മണിമോഹന്‍ ചട്ടഞ്ചാല്‍, രാഹുല്‍ കൊഴുമ്മല്‍, ശ്രീനിവാസന്‍ അരവത്ത്, ജിബിന്‍ ജയിംസ്, സുജിത്, മയൂഖ ഭാസ്‌കര്‍, ഭാഗ്യലക്ഷ്മി എന്നിവര്‍ സംസാരിച്ചു.

വിദ്യാര്‍ഥികളുടെ ഗ്രാന്‍റ് നല്‍കാത്തത് ഗുരുതര അനാസ്ഥ: ആദിവാസി കോണ്‍ഗ്രസ്

ചുള്ളിക്കര: സ്‌കൂള്‍ തുറന്ന് ഒരുമാസം കഴിഞ്ഞിട്ടും സംസ്ഥാനത്തെ പട്ടികജാതി-പട്ടികവര്‍ഗ വിദ്യാര്‍ഥികളുടെ ലപ്‌സം ഗ്രാന്‍ഡ് സ്‌റ്റൈപെന്‍റ് എന്നിവ വിതരണം ചെയ്യാതെ സര്‍ക്കാര്‍ ഗുരുതരമായ അനാസ്ഥയാണ് വിദ്യാര്‍ഥികളോട് കാണിച്ചിരിക്കുന്നതെന്ന് കേരള ആദിവാസി കോണ്‍ഗ്രസ് സംസ്ഥാന ജനറല്‍ സെക്രട്ടറി പത്മനാഭന്‍ ചാലിങ്കാല്‍. കേരള ആദിവാസി കോണ്‍ഗ്രസ് ജില്ലാകമ്മിറ്റി യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഇതുമൂലം വിദ്യാര്‍ഥികള്‍ക്ക് പഠനോപകരണങ്ങളും വസ്ത്രങ്ങളും വാങ്ങാന്‍ പറ്റാതെ പഠനംപോലും നിര്‍ത്തേണ്ടിവരുന്ന അവസ്ഥയാണ് നിലവിലുള്ളത്. ഇടതുസര്‍ക്കാര്‍ അധികാരത്തില്‍ ഏറിയതുമുതല്‍ ലംപ്‌സം ഗ്രാന്‍റും സ്‌റ്റൈപെന്‍റും നല്‍കുന്നതില്‍ കൃത്യത പാലിക്കാറില്ലെന്നും മുന്‍വര്‍ഷങ്ങളിലേതു കുടിശിക ഇപ്പോഴും കിടക്കുകയാണെന്നും അദ്ദേഹം കൂട്ടിച്ചേര്‍ത്തു. ജില്ലാ പ്രസിഡന്‍റ് പി.കെ. രാഘവന്‍ അധ്യക്ഷതവഹിച്ചു. കണ്ണന്‍ മാളൂര്‍ക്കയം, കെ.സി. കുഞ്ഞികൃഷ്ണന്‍, മാധവന്‍ ചുള്ളി, സുന്ദരന്‍ ഒരള എന്നിവര്‍ സംസാരിച്ചു. രാജീവന്‍ ചീരോല്‍ സ്വാഗതവും നാരായണന്‍ കുഴിക്കോല്‍ നന്ദിയും പറഞ്ഞു.

കാടുകയറിയും വെള്ളംകയറിയും നല്ലോംപുഴ- ഓsക്കൊല്ലി റോഡ്

പാലാവയൽ: വർഷങ്ങളുടെ കാത്തിരിപ്പിനൊടുവിൽ ടാറിംഗ് പൂർത്തിയായ നല്ലോംപുഴ- ഓടക്കൊല്ലി റോഡിൽ ഓവുചാലുകളുടെ പണി പൂർത്തിയാകാത്തതിനാൽ പലയിടങ്ങളിലും വെള്ളം കയറുന്നു. പല ഭാഗങ്ങളിലും റോഡിലൂടെ മഴവെള്ളം കുത്തിയൊഴുകുന്നുണ്ട്. നേരത്തേ ഉണ്ടായിരുന്ന ഓവുചാലുകൾ കല്ലും മണ്ണും നിറഞ്ഞ് അടഞ്ഞ നിലയിലാണ്. മഴക്കാലമായതോടെ പല സ്ഥലങ്ങളിലും റോഡിന്‍റെ ഇരുവശങ്ങളിലും വളർന്നുപൊങ്ങിയ കാടും പടർപ്പുകളും ടാറിട്ട ഭാഗത്തേക്കുപോലും പടർന്നുകയറാൻ തുടങ്ങി. ചെളിവെള്ളവും പായലുകളും റോഡിന്‍റെ ഉറപ്പിനെ പോലും ബാധിക്കുന്ന നിലയാണ്. പല സ്ഥലങ്ങളിലും പുതുതായി നിർമിച്ച ഓവുചാലുകളുടെ ഭാഗം റോഡിനേക്കാൾ ഉയർന്നിട്ടായതിനാൽ വെള്ളത്തിന് ഒഴുകിപ്പോകാനാകാത്ത സ്ഥിതിയുമുണ്ട്.

നെല്ലിയടുക്കം-ബിരിക്കുളം റോഡിന്‍റെ ശോചനീയാവസ്ഥയ്‌ക്കെതിരെ പ്രതിഷേധമിരമ്പി

ബിരിക്കുളം: നെല്ലിയടുക്കം-ബിരിക്കുളം റോഡിന്‍റെ ശോചനീയാവസ്ഥയ്‌ക്കെതിരെ പ്രതിഷേധം ശക്തമാകുന്നു. മലയോര മേഖലയിലെ ജനങ്ങള്‍ക്ക് കാര്‍ഷിക വിളകളുടെ വില്‍പനയ്ക്കും ആശുപത്രി തുടങ്ങിയ ആവശ്യങ്ങള്‍ക്കും നീലേശ്വരം പോലുള്ള ടൗണുകളിലേക്ക് പോകുന്നതിന് ഉപയോഗിക്കുന്ന ഏറ്റവും വര്‍ഷം പഴക്കമുള്ള പ്രധാന റോഡാണ് ബിരിക്കുളം - നെല്ലിയടുക്കം -കൊല്ലമ്പാറ റോഡ്. ഈ റോഡിന്‍റെ നവീകരണത്തിന് അനുവദിച്ച ഫണ്ട് ജില്ലാ പഞ്ചായത്ത് മെമ്പറുടെ സ്വജനപക്ഷപാത നടപടിയിലൂടെ സ്വന്തം നാട്ടിലേക്ക് വകമാറ്റി കൊണ്ട് പോയത് മുന്‍ പഞ്ചായത്ത് പ്രസിഡന്‍റിന്‍റെ ശബ്ദരേഖയിലൂടെ പുറത്ത് വന്നതാണെന്ന് കോണ്‍ഗ്രസ് നേതൃത്വം ആരോപിക്കുന്നു. കിനാനൂര്‍-കരിന്തളം പഞ്ചായത്ത് പ്രസിഡന്‍റിന്‍റെ വാര്‍ഡിലൂടെയും പരപ്പ ബ്ലോക്ക് പഞ്ചായത്ത് പ്രസിഡന്‍റിന്‍റെ കിനാനൂര്‍ ഡിവിഷനിലെയും പ്രധാന റോഡായ കൊല്ലമ്പാറ - നെല്ലിയടുക്കം- ബിരിക്കുളം റോഡിന്‍റെ ഫണ്ട് വകമാറ്റി കൊണ്ടുപോയിട്ട് റോഡ് നടന്നുപോകാന്‍ പോലും പറ്റാതെ കുണ്ടും കുഴിയുമായിട്ട് ജനപ്രതിനിധികള്‍ ജനങ്ങളോട് കാണിക്കുന്ന കടുത്ത ജനവഞ്ചനയ്‌ക്കെതിരെ കിനാനൂര്‍-കരിന്തളം മണ്ഡലം കാറളം അഞ്ചാം വാര്‍ഡ് കമ്മറ്റിയുടെ നേതൃത്വത്തില്‍ കാട്ടിപ്പൊയിലില്‍ വാഴനട്ട് പ്രതിഷേധിച്ചു. അടിയന്തിരമായി അറ്റകുറ്റപണി നടത്തി റോഡ് സഞ്ചാരമാക്കാന്‍ അധികാരികള്‍ കണ്ണ് തുറന്നില്ലെങ്കില്‍ ശക്തമായ സമരത്തിന് ഇന്ത്യന്‍ നാഷണല്‍ കോണ്‍ഗ്രസ് മണ്ഡലം കമ്മറ്റി നേതൃത്വം നല്‍കുമെന്ന് മണ്ഡലം പ്രസിഡന്‍റ് മനോജ് തോമസ് മുന്നറിയിപ്പ് നല്കി. പ്രതിഷേധ ധര്‍ണ ഡിസിസി വൈസ്പ്രസിഡന്‍റ് ബി.പി. പ്രദീപ് കുമാര്‍ ഉദ്ഘാടനം ചെയ്തു. വിജയന്‍ കാറളം അധ്യക്ഷതവഹിച്ചു. ബാലഗോപാലന്‍ പി. കാളിയാനം സ്വാഗതം പറഞ്ഞു. ദിനേശന്‍ പെരിയങ്ങാനം, സിജോ പി. ജോസഫ്, നൗഷാദ് കാളിയാനം, ഷിബിന്‍ ഉപ്പിലിക്കൈ, ജയകുമാര്‍ ചാമക്കുഴി, ശശി ചാങ്ങാട്, മനു കാറളം, പുഷ്പന്‍ ചാങ്ങാട്, രാജേഷ് പുതുക്കുന്ന്, ഉണ്ണികൃഷ്ണന്‍ കാട്ടിപ്പൊയില്‍, ശ്രീജിത്ത് പുതുക്കുന്ന്, കൃപേഷ് കുമാര്‍, സുധീഷ് കാട്ടിപ്പൊയില്‍ എന്നിവര്‍ നേതൃത്വം നല്‍കി.

പഴകി ദ്രവിച്ച കെട്ടിടത്തിൽനിന്ന് ഇന്നും മോചനമില്ല

കുമ്പള: ഏഴു പതിറ്റാണ്ടിലേറെ പഴക്കമുള്ള രണ്ട് കെട്ടിടങ്ങളിലായി പ്രവർത്തിക്കുന്ന ഒരു സാമൂഹികാരോഗ്യകേന്ദ്രമുണ്ട് ജില്ലയിൽ. പ്രതിദിനം മുന്നൂറിലേറെപ്പേർ ചികിത്സ തേടിയെത്തുന്ന കുമ്പള സാമൂഹികാരോഗ്യ കേന്ദ്രം. കോട്ടയം മെഡിക്കൽ കോളജ് ആശുപത്രിയിലുണ്ടായ അപകടത്തിനുശേഷം പെരുമഴയിൽ ചോർന്നൊലിക്കുന്ന കെട്ടിടങ്ങളുടെ ദ്രവിച്ച മേൽക്കൂരയിൽ ഇടയ്ക്കിടെ നോക്കി ഭയാശങ്കയിൽ കഴിയാനാണ് ഇവിടുത്തെ രോഗികളുടെയും ജീവനക്കാരുടെയും വിധി. ഒരുപക്ഷേ ഇത്രയും പഴക്കമുള്ള ഓടുമേഞ്ഞ ആശുപത്രി കെട്ടിടങ്ങൾ സംസ്ഥാനതലത്തിൽതന്നെ കുറവായിരിക്കും. മിക്കയിടങ്ങളിലും പ്രാഥമികാരോഗ്യകേന്ദ്രങ്ങൾക്കുപോലും പുതിയ കെട്ടിടങ്ങളായിക്കഴിഞ്ഞപ്പോഴാണ് കുമ്പള പോലെ ജനസാന്ദ്രതയേറിയ ഒരു സ്ഥലത്ത് ഇപ്പോഴും പഴയ കെട്ടിടത്തിൽ തന്നെ ചികിത്സ തുടരുന്നത്. 1954 കാലഘട്ടത്തിലാണ് രണ്ടു കെട്ടിടങ്ങളും നിർമിച്ചതെന്നാണ് രേഖകളിൽ കാണുന്നത്. രണ്ടു കെട്ടിടങ്ങളും മഴക്കാലത്ത് ചോർന്നൊലിക്കുന്നുമുണ്ട്. സാമൂഹികാരോഗ്യകേന്ദ്രത്തിന്‍റെ നവീകരണത്തിന് ഏഴുകോടി രൂപ അനുവദിച്ചതായി ഒരു വർഷം മുമ്പ് സർക്കാരിന്‍റെ പ്രഖ്യാപനമുണ്ടായിരുന്നു. എന്നാൽ തുടർനടപടികളൊന്നും ഉണ്ടായില്ല. സിഎച്ച്സിയുടെ ശോചനീയാവസ്ഥ ചൂണ്ടിക്കാട്ടി വിവിധ സംഘടനകൾ സർക്കാരിന്‍റെ താലൂക്ക് തല ആദാലത്തിൽ നിവേദനം നല്കിയിരുന്നു. നവീകരണ പദ്ധതിക്കായി സർക്കാരിലേക്ക് പ്രപ്പോസൽ സമർപ്പിച്ചിട്ടുണ്ടെന്ന മറുപടിയാണ് ഇതിന് ജില്ലാ മെഡിക്കൽ ഓഫീസിൽ നിന്നും ലഭിച്ചത്. സിഎച്ച്സിയുടെ വികസനവുമായി ബന്ധപ്പെട്ട് വിവിധ സംഘടനകൾ ആരോഗ്യ മന്ത്രി വീണാ ജോർജിനും നിവേദനം സമർപ്പിച്ചിരുന്നു. പക്ഷേ ഒന്നിലും നടപടികളൊന്നും ഉണ്ടായില്ല. ഇടയ്ക്ക് സിഎച്ച്സിയിൽ ഡയാലിസിസ് കേന്ദ്രം തുടങ്ങാൻ അനുമതി ലഭിച്ചിരുന്നെങ്കിലും മതിയായ സൗകര്യങ്ങളില്ലാത്തതിനാൽ അതും നടന്നില്ല. സർക്കാരാശുപത്രികളെല്ലാം ഹൈടെക്കാകുന്ന കാലത്ത് ഈയൊരാശുപത്രി മാത്രം അടിസ്ഥാന സൗകര്യങ്ങൾ പോലുമില്ലാത്ത പഴഞ്ചൻ കെട്ടിടത്തിൽ ഇനിയുമെത്രകാലം തുടരേണ്ടിവരുമെന്നാണ് കുമ്പളക്കാർ ചോദിക്കുന്നത്.

ഉമ്മൻ ചാണ്ടിയെ അനുസ്മരിച്ച് നാട്

കാസർഗോഡ്: ജനമനസുകളിൽ എന്നും ജീവിക്കുന്ന ഭരണാധികാരിയും ജനനേതാവുമാണ് മുൻ മുഖ്യമന്ത്രി ഉമ്മൻ ചാണ്ടിയെന്ന് എൻ.എ. നെല്ലിക്കുന്ന് എംഎൽഎ പറഞ്ഞു. പുതിയ നിയമങ്ങൾ സൃഷ്ടിക്കുന്നതിനുപകരം ഉള്ള നിയമങ്ങൾ ജനങ്ങളുടെ ജീവൽപ്രധാനമായ ആവശ്യങ്ങൾക്ക് വേണ്ടി ഉപയോഗപ്പെടുത്തിയ ആർജവമുള്ള ഭരണാധികാരിയായിരുന്നു അദ്ദേഹം. അധികാരം കൈയിലെത്തിയാൽ ജനങ്ങളിൽ നിന്നും വളരെ ഉയരത്തിലാണെന്ന് സ്വയം വിശ്വസിച്ച് ജനങ്ങളോട് അകലം പാലിച്ചുനിൽക്കുന്ന ഇന്നത്തെ ഭരണാധികാരികൾ ഉമ്മൻ‌ചാണ്ടിയെ മാതൃകയാക്കണമെന്നും എംഎൽഎ പറഞ്ഞു. ഉമ്മൻ ചാണ്ടിയുടെ രണ്ടാം ചരമവാർഷിക ദിനത്തിൽ ജില്ലാ കോൺഗ്രസ് കമ്മിറ്റി ഓഫീസിൽ നടത്തിയ പുഷ്പാർച്നയും അനുസ്മരണ യോഗവും ഉദ്‌ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മുതിർന്ന കോൺഗ്രസ് നേതാവ് ടി.കെ. സുധാകരൻ ഉമ്മൻ ചാണ്ടി അനുസ്മരണ പ്രഭാഷണം നടത്തി. ഡിസിസി പ്രസിഡന്‍റ് പി.കെ. ഫൈസൽ അധ്യക്ഷത വഹിച്ചു. ജീവകാരുണ്യമേഖലയിൽ പ്രവർത്തിക്കുന്ന അഷറഫ് എടനീർ, ഡോ. ഉദയകുമാർ നൂജി, അഹമ്മദ് മണിയനോടി, കെ.വി. സായിദാസ്, കെ. ഗംഗൻ, എം. അശോകൻ, എം.എ. അബൂബക്കർ, എം. നയിമുന്നീസ, ഇർഫാനെ ഇക്ബാൽ, ഖയൂം മാന്യ, തങ്കച്ചൻ കൊല്ലക്കൊമ്പിൽ, വി. രാജൻ, പി.വി. വാസന്തി എന്നിവരെ ചടങ്ങിൽ ആദരിച്ചു. എ. ഗോവിന്ദൻ നായർ, ഹക്കീം കുന്നിൽ, കെ. നീലകണ്ഠൻ, കെ.വി. ഗംഗാധരൻ, രമേശൻ കരുവാച്ചേരി, എം.സി. പ്രഭാകരൻ, ബി.പി. പ്രദീപ് കുമാർ, വി.ആർ. വിദ്യാസാഗർ, സി.വി. ജെയിംസ്, കെ.പി. പ്രകാശൻ, പി.വി. സുരേഷ്, സോമശേഖര ഷേണി, ധന്യ സുരേഷ്, കാർത്തികേയൻ പെരിയ, ജവാദ് പുത്തൂർ, മിനി ചന്ദ്രൻ എന്നിവർ പ്രസംഗിച്ചു. ചിറ്റാരിക്കാൽ: ഉമ്മൻ ചാണ്ടി അനുസ്മരണദിനത്തിൽ വോയ്സ് ഓഫ് ചിറ്റാരിക്കാൽ കൂട്ടായ്മയുടെ നേതൃത്വത്തിൽ ജ്യോതിഭവൻ സ്‌പെഷ്യൽ സ്‌കൂളിന് ഏകദേശം 30,000 രൂപയുടെ ഭക്ഷ്യവസ്തുക്കൾ കൈമാറി. ഒപ്പമുണ്ട് ഞങ്ങൾ എന്ന് പേരിട്ട പരിപാടി യൂത്ത് കോൺഗ്രസ് തൃക്കരിപ്പൂർ നിയോജകമണ്ഡലം വൈസ് പ്രസിഡന്‍റ് ഷിജിത്ത് തോമസ് ഉദ്ഘാടനം ചെയ്തു. ജ്യോതിഭവൻ സ്‌പെഷ്യൽ സ്‌കൂൾ പ്രിൻസിപ്പൽ സി. അനറ്റ് എസ്എബിഎസ് ഭക്ഷ്യവസ്തുക്കൾ ഏറ്റുവാങ്ങി.എബി പുറയാറ്റിൽ, സി.ജി സ്മരിയ എസ്എബിഎസ്, എബിൻ നമ്പ്യാമഠത്തിൽ, അമിത്ത് ചിലമ്പട്ടശേരി, റോയിസ് തെങ്ങടയിൽ, മെബിൻ സേവ്യർ, സെലക്ട് ഇടക്കരോട്ട്, റോഷൻ എഴുത്തുപുരയ്ക്കൽ എന്നിവർ സംബന്ധിച്ചു. ചുള്ളിക്കര: ചുള്ളിക്കര ടൗൺ കോൺഗ്രസ് കമ്മിറ്റിയുടെ നേതൃത്വത്തിൽ ഉമ്മൻചാണ്ടി അനുസ്മരണവും പുഷ്പാർച്ചനയും നടത്തി. എം.കെ. മാധവൻ നായർ, ത്രേസ്യാമ്മ ജോസഫ്, പി.എ. ആലി, ബി. അബ്ദുള്ള, സനൽ അറക്കൽ, സുരേഷ് കൂക്കൾ, സജി മണ്ണൂർ, റോയി ആശാരികുന്നേൽ എന്നിവർ സംബന്ധിച്ചു. കൊട്ടോടി: കൊട്ടോടി ടൗൺ കോൺഗ്രസ് കമ്മിറ്റിയുടെ നേതൃത്വത്തിൽ ഉമ്മൻ ചാണ്ടി അനുസ്മരണം നടത്തി. വാർഡ് പ്രസിഡന്‍റ് ഉസ്മാൻ പൂണൂർ, ബി. അബ്ദുള്ള, കുഞ്ഞിക്കണ്ണൻ കൂരംകയ, ഫിലിപ്പ് തച്ചേരിയിൽ, മുഹമ്മദ് സാലി, കെ. കൃഷ്ണൻ, ഹുസൈനാർ ഹാജി, അശ്വിൻ മേലത്ത്, കെ. ഫിലിപ്പ്, ഇബ്രാഹിം കരയിൽ, സുലൈമാൻ പാട്ടില്ലത്ത് എന്നിവർ പ്രസംഗിച്ചു.

കാഞ്ഞങ്ങാട് മത്സ്യ മാക്കറ്റിൽ മൂക്കുപൊത്തി പ്രതിഷേധവുമായി യൂത്ത് കോൺഗ്രസ്

കാഞ്ഞങ്ങാട്: ദുർഗന്ധം വമിക്കുന്ന കാഞ്ഞങ്ങാട് മത്സ്യ മാർക്കറ്റിന്‍റെയും റെയിൽവേ സ്റ്റേഷൻ റോഡിന്‍റെയും ശോചനീയാവസ്ഥ പരിഹരിക്കണമെന്നാവശ്യപ്പെട്ട് യൂത്ത് കോൺഗ്രസ്‌ കാഞ്ഞങ്ങാട് മണ്ഡലം കമ്മിറ്റിയുടെ നേതൃത്വത്തിൽ മത്സ്യമാർക്കറ്റിലേക്ക് പ്രതിഷേധ മാർച്ചും മൂക്കുപൊത്തി പ്രതിഷേധവും സംഘടിപ്പിച്ചു. ദിവസവും ആയിരക്കണക്കിനാളുകൾ കടന്നുപോകുന്ന റെയിൽവേ സ്റ്റേഷൻ റോഡിലേക്കാണ് മത്സ്യ മാർക്കറ്റിലെ മലിനജലം ഒഴുകിയെത്തുന്നത്. നഗരസഭ ലക്ഷങ്ങൾ പാഴാക്കി മത്സ്യമാർക്കറ്റ് കെട്ടിടത്തിൽ മലിനജല ശുദ്ധീകരണ പ്ലാന്‍റ് പണിതിട്ടും മത്സ്യവില്പന തൊഴിലാളികൾ കെട്ടിക്കിടക്കുന്ന മലിനജലത്തിലിരുന്ന് വില്പന നടത്തേണ്ട അവസ്ഥയാണെന്നും യൂത്ത് കോൺഗ്രസ് നേതാക്കൾ ചൂണ്ടിക്കാട്ടി. കാഞ്ഞങ്ങാട് നിയോജക മണ്ഡലം പ്രസിഡന്‍റ് ഷിബിൻ ഉപ്പിലിക്കൈ ഉദ്ഘാടനം ചെയ്തു. മണ്ഡലം പ്രസിഡന്‍റ് എച്ച്.ആർ. വിനീത് അധ്യക്ഷത വഹിച്ചു. പ്രവീൺ തോയമ്മൽ, വിനോദ് ആവിക്കര, പി.വി. തമ്പാൻ, പി.വി. ബാലകൃഷ്ണൻ, വി.വി. കുഞ്ഞികൃഷ്‌ണൻ, നിധീഷ് കടയങ്ങൻ, ഒ.വി. രതീഷ്, രാജേഷ് മൾട്ടി, രവീന്ദ്രൻ, നിയാസ് ഹോസ്ദുർഗ്, സിജോ അമ്പാട്ട്, സന്ദീപ് ഒഴിഞ്ഞവളപ്പ്, കൃഷ്ണലാൽ തോയമ്മൽ, ഗോകുൽദാസ് ഉപ്പിലിക്കൈ, പ്രതീഷ് കല്ലഞ്ചിറ, ശരത് ചന്ദ്രൻ, അജീഷ് പനത്തടി, സുനീഷ് അരയി, അർജുൻ, അനിരുദ്ധ്, സിനാൻ, ജിഷ്ണു, രോഹിത് എന്നിവർ നേതൃത്വം നല്കി.

സുസ്ഥിര പച്ചക്കറിയിൽ മുമ്പനായി ആകാശവെള്ളരി

കാലിക്കടവ്: വള്ളിയിൽ തൂങ്ങിവിളയുന്ന അപൂർവമായ ആകാശവെള്ളരി കാണണമെങ്കിൽ കണ്ണൂർ- കാസർഗോഡ് ജില്ലാ അതിർത്തിയോട് ചേർന്നുള്ള കാലിക്കടവിൽ വന്നാൽ മതി. റിട്ട. മുഖ്യാധ്യാപകൻ കെ.വി. വേണുഗോപാലനും ആരോഗ്യ വകുപ്പിൽ പബ്ലിക് ഹെൽത്ത് നഴ്സിംഗ് സൂപ്പർവൈസറായി വിരമിച്ച ഭാര്യ വി.ആർ. ലൈയും ചേർന്നു ചെയ്തുവരുന്ന ജൈവ കൃഷിയിടത്തിലെ ഒരിനം മാത്രമാണിത്. പാഷൻ ഫ്രൂട്ടിന്‍റെ കുടുംബക്കാരനായ ഈ വെള്ളരി തലമുറകളോളം വിളവുതരും.സുസ്ഥിര പച്ചക്കറിയായും മധുരഫലമായും ഉപയോഗിച്ചുവരുന്നുണ്ട്. ഏതുകാലാവസ്ഥയിലും സൂര്യകാന്തിയുടെ പൂപോലെ പൂത്തുനിൽക്കുന്ന പൂക്കളും ആകർകമാണ്. പ്രോട്ടീൻ, നാരുകൾ, ഇരുമ്പ്, കാൽസ്യം, ഫോസ്ഫറസ് എന്നീ പോഷകങ്ങളാൽ സമ്പുഷ്ടമായ ഇവ പ്രമേഹം, രക്തസമ്മർദം, ആസ്ത്മ, ഉദരരോഗങ്ങൾ തുടങ്ങിയവയ്ക്കെതിരെ പ്രയോഗിക്കാവുന്ന ഔഷധവുമാണെന്നാണ് പറയപ്പെടുന്നത്. പപ്പായയിലേതുപോലെ കനത്തിൽ മാംസളമായ കാമ്പും അകത്ത് പാഷൻ ഫ്രൂട്ടിലേതു പോലെ പൾപ്പും വിത്തുകളുമുണ്ട്. പൾപ്പിന് നല്ല മധുരവുമുണ്ട്.പൂവിട്ട ശേഷം രണ്ട് മാസം കൊണ്ട് വിളവെടുക്കാൻ പാകമാവും. മറ്റു പച്ചക്കറികളിലെ കീടബാധകൾ ഇവക്ക് ഉണ്ടാവില്ല എന്നതും പ്രത്യേകതയാണ്. ചാണകം മാത്രമാണ് വളമായി നൽകി വരുന്നത്. ഞാലിപൂവൻ, പാളയംകോടൻ, കൂമ്പില്ലാ പൂവൻ, വിരൽ പൂവൻ, നെയ് പൂവൻ, മണ്ണൻ, അണ്ണാറക്കണ്ണൻ, കൂമ്പില്ലാകണ്ണൻ,ചെങ്കദളി, പച്ചകദളി, സോദരി, റോബസ്റ്റ, മങ്ക തുടങ്ങി 14 ഇനം വാഴകളുടെ ഇനങ്ങളും വീട്ടുവളപ്പിലുണ്ട്. ഏഴുതരം ചീരകൾ ഉണ്ട് ഇവരുടെ കൃഷിയിടത്തിൽ. ഒരേക്കർ വയലിൽ നാടൻ ഇനം നെൽകൃഷിയുമുണ്ട്. പച്ചക്കറി, കിഴങ്ങുവർഗങ്ങൾ, റമ്പൂട്ടാൻ, മുള്ളാത്ത, പേരക്ക, ഇംഗ്ലീഷ് നെല്ലിക്ക ഇനങ്ങളെല്ലാം വീട്ട് വളപ്പിൽ കൃഷി ചെയ്യുന്നു. ആരെയും ആകർഷിക്കുന്ന വേറിട്ട താമര ചെടികൾ ഇവിടെ കാണാം.ഹൈബ്രിഡ് ഇനങ്ങളായ സത്താബങ്കട്ട്, വൈറ്റ് പിയോണി, അമേരിക്കമലി തുടങ്ങി നാടൻ ഉൾപ്പെടെ ഏഴ് വിഭാഗം താമര ചെടികളാണുള്ളത്.

കഞ്ചാവ് കടത്തിയ കേസിൽ രണ്ടുവർഷം തടവും പിഴയും

കാസർഗോഡ്: 10 വർഷം മുമ്പ് കാറിൽ കഞ്ചാവ് കടത്തിയ കേസിൽ രണ്ടാം പ്രതിയായ യുവാവിന് രണ്ടു വർഷം കഠിനതടവും 30000 രൂപ പിഴയും ശിക്ഷ വിധിച്ചു. പട്ള സ്വദേശി മുഹമ്മദിന്‍റെ മകൻ അബ്ദുൾ റൗഫി (39) നെയാണ് കാസർഗോഡ് അഡീഷണൽ ഡിസ്ട്രിക്റ്റ് & സെഷൻസ് കോടതി (രണ്ട്) ജഡ്ജ് കെ. പ്രിയ ശിക്ഷിച്ചത്. പിഴയടച്ചില്ലെങ്കിൽ മൂന്ന് മാസം അധിക തടവ് അനുഭവിക്കണം. കേസിലെ ഒന്നാം പ്രതിയെ നേരത്തേ ശിക്ഷിച്ചിരുന്നു. പ്രോസിക്യൂഷന്വേണ്ടി അഡീഷണൽ ഗവ. പ്ലീഡർ ജി. ചന്ദ്രമോഹൻ, അഡ്വ. ചിത്രകല എന്നിവർ ഹാജരായി.

മഹിള കോൺഗ്രസ് കൺവൻഷൻ

രാജപുരം: മഹിള കോൺഗ്രസ് കള്ളാർ മണ്ഡലം കൺവൻഷനും എസ്എസ്എൽസി, പ്ലസ്ടു വിജയികൾക്കുള്ള അനുമോദനവും രാജപുരം വ്യാപാര ഭവനിൽ ജില്ലാ പ്രസിഡന്‍റ് മിനി ചന്ദ്രൻ ഉദ്ഘാടനം ചെയ്തു. മണ്ഡലം പ്രസിഡന്‍റ് പ്രിയ ഷാജി അധ്യക്ഷത വഹിച്ചു. ഡിസിസി സെക്രട്ടറി ധന്യ സുരേഷ് മുഖ്യപ്രഭാഷണം നടത്തി. ബളാൽ ബ്ലോക്ക് പ്രസിഡന്‍റ് ലക്ഷ്മി തമ്പാൻ, മണ്ഡലം കോൺഗ്രസ് പ്രസിഡന്‍റ് എം.എം. സൈമൺ, പഞ്ചായത്ത് പ്രസിഡന്‍റ് ടി.കെ. നാരായണൻ, ബ്ലോക്ക് പഞ്ചായത്ത് അംഗം സി. രേഖ, പഞ്ചായത്ത് സ്ഥിരം സമിതി അധ്യക്ഷ പി. ഗീത, വിനോദ് കപ്പിത്താൻ, ബി. അബ്ദുള്ള, ബി. രമ, പ്രേമ കൃഷ്ണൻ, ദേവി ആടകം എന്നിവർ പ്രസംഗിച്ചു.

മരങ്ങൾ വീണ് വീടിന് നാശനഷ്‌ടം

പാലാവയൽ: കാറ്റിലും മഴയിലും മരങ്ങൾ ഒടിഞ്ഞുവീണ് വീടിന് ഭാഗിക നാശനഷ്ടം. ചാവറഗിരിയിലെ ഐക്കരമറ്റത്തിൽ ജോസഫ് മാത്യുവിന്‍റെ വീടിന് മുകളിലാണ് തേക്കും റബറും കമുകുകളുമടക്കം ഒടിഞ്ഞുവീണത്. വെള്ളിയാഴ്ച രാതി 11 മണിയോടെയായിരുന്നു അപകടം. വീടിന്‍റെ മുൻവശം പൂർണമായും തകർന്നു. വാട്ടർ ടാങ്കിനും മഴവെള്ള സംഭരണിക്കും കേടുപാടുകൾ സംഭവിച്ചു. പഞ്ചായത്ത് പ്രസിഡന്‍റ് ജോസഫ് മുത്തോലി, വാർഡ് അംഗം തേജസ് ഷിന്‍റോ എന്നിവർ സ്ഥലം സന്ദർശിച്ചു.

മാലോം സെന്‍റ് അൽഫോൻസ പള്ളിയിൽ തിരുനാളിന് തുടക്കമായി

മാലോം: സെന്‍റ് അൽഫോൻസ പള്ളിയിൽ വിശുദ്ധ അൽഫോൻസാമ്മയുടെ തിരുനാളാഘോഷത്തിനും നവനാൾ പ്രാർഥനയ്ക്കും ഇടവക വികാരി ഫാ. ജോസഫ് തൈക്കുന്നുപുറത്ത് കൊടിയേറ്റി. വിശുദ്ധ കുർബാനയ്ക്കും പ്രാർഥനയ്ക്കും ഫാ. അഗസ്റ്റിൻ ചെറുനിലം നേതൃത്വം നല്കി. തിരുനാളിനോടനുബന്ധിച്ച് എല്ലാ ദിവസവും വൈകിട്ട് 4.30 ന് വിശുദ്ധ കുർബാനയും വചന പ്രഘോഷണവും വിശുദ്ധ അൽഫോൻസാമ്മയുടെ നൊവേന പ്രാർഥനയും ഉണ്ടായിരിക്കും. വിവിധ ദിവസങ്ങളിലെ തിരുകർമങ്ങൾക്ക് ഫാ. ഡൊമിനിക് ഓണശേരിൽ ഒഎസ്ബി, ഫാ. ജോർജ് കായംകാട്ടിൽ, ഫാ. ജോസഫ് കാഞ്ഞിരത്തിങ്കൽ, റവ.ഡോ. മാണി മേൽവട്ടം, ഫാ. തോമസ് മരശേരി, ഫാ. ജിതിൻ തെക്കേമാലി, മോൺ. മാത്യു ഇളംതുരുത്തിപടവിൽ, ഫാ. ജോസഫ് തൈക്കുന്നുംപുറത്ത്, ഫാ. മൈക്കിൾ മഞ്ഞക്കുന്നേൽ എന്നിവർ നേതൃത്വം നല്കും. സമാപന ദിവസം പ്രദക്ഷിണവും നേർച്ച വിതരണവും നടക്കും. ചായ്യോത്ത് സെന്‍റ് അൽഫോൻസാ പള്ളിയിൽ തിരുനാൾ ഇന്നുമുതൽ ചായ്യോത്ത്: വിശുദ്ധ അൽഫോൻസാമ്മയുടെ തീർഥാടന ദേവാലയത്തിൽ തിരുനാളാഘോഷങ്ങൾക്ക് ഇന്ന് വൈകിട്ട് 4.30 ന് ഇടവക വികാരി ഫാ. ജോസഫ് ആനിത്താനം കൊടിയേറ്റും. തിരുമണിക്കൂർ ആചരണത്തിന് ഫാ. ആൻഡ്രൂസ് തെക്കേൽ കാർമികത്വം വഹിക്കും. എല്ലാ ദിവസവും വൈകിട്ട് 4.30 ന് വിശുദ്ധ കുർബാനയും വചനസന്ദേശവും വിശുദ്ധ അൽഫോൻസാമ്മയുടെ നൊവേന പ്രാർഥനയും ഉണ്ടായിരിക്കും. വിവിധ ദിവസങ്ങളിലെ തിരുകർമങ്ങൾക്ക് ഫാ.തോമസ് കളത്തിൽ, ഫാ. അമൽ തോമസ് ചിലാലയിൽ, ഫാ. ജോസഫ് നൂറംമാക്കൽ, ഫാ. കുര്യാക്കോസ് പുതിയകുളങ്ങര, ഫാ. അമൽ തൈപ്പറമ്പിൽ, ഫാ. സെബാസ്റ്റ്യൻ കിടങ്ങേത്ത്, ഫാ. ലൂയി മരിയാദാസ് മേനാച്ചേരി, ഫാ. ക്രിസ്റ്റിൻ വല്ലാട്ടുപറമ്പിൽ, ഫാ. അജീഷ് ഐലാറ്റിൽ, മോൺ.മാത്യു ഇളംതുരുത്തിപടവിൽ എന്നിവർ നേതൃത്വം നല്കും.

ജില്ലയിലെ സ്കൂളുകൾക്ക് കർശന സുരക്ഷാ

കാസർഗോഡ്: ശക്തമായി തുടരുന്ന മഴയും സ്കൂൾ കെട്ടിടങ്ങളുടെയും വിദ്യാർഥികളുടെയും സുരക്ഷയുമായി ബന്ധപ്പെട്ട സമീപകാല സംഭവങ്ങളും കണക്കിലെടുത്ത് ജില്ലയിലെ സ്കൂളുകൾക്ക് കർശന സുരക്ഷാ നിർദേശങ്ങളുമായി ജില്ലാദുരന്ത നിവാരണ അഥോറിറ്റി. എല്ലാ സ്കൂളുകളിലും സ്കൂൾ സുരക്ഷാ സമിതികൾ ഉടൻ വിളിച്ചുകൂട്ടാൻ ജില്ലാ വിദ്യാഭ്യാസ ഡെപ്യൂട്ടി ഡയറക്ടർക്ക് നിർദേശം നല്കി. കെട്ടിടങ്ങളുടെ സുരക്ഷ, വൈദ്യുത ലൈനുകളുടെയും ട്രാൻസ്‌ഫോർമറുകളുടെയും സാമീപ്യം, സമീപത്തുള്ള ജലാശയങ്ങൾ, കിണറുകൾ, റോഡ് എന്നിവയിൽ നിന്നുള്ള അപകടസാധ്യതകൾ, കാട്ടുമൃഗങ്ങളിൽ നിന്നും പാമ്പുകളിൽ നിന്നുമുള്ള ഭീഷണികൾ,ഗതാഗത സുരക്ഷ, അഗ്നിബാധയ്ക്കും മറ്റ് അപകടങ്ങൾക്കുമുള്ള സാധ്യത എന്നിവ വിലയിരുത്തി പ്രശ്നങ്ങൾ പരിഹരിക്കാൻ തദ്ദേശ സ്ഥാപനങ്ങൾ, കെഎസ്ഇബി, പിഡബ്ല്യുഡി, അഗ്നിരക്ഷാസേന, ആർടിഒ, വനം വകുപ്പ് എന്നിവയുമായി ബന്ധപ്പെട്ട് നടപടികൾ സ്വീകരിക്കണം. ഇക്കാര്യങ്ങളിൽ ആവശ്യമായ സാങ്കേതിക സഹായം നല്കാനും സ്കൂൾ അധികാരികളുമായി സഹകരിച്ച് വേഗത്തിലുള്ള നടപടികൾ ഉറപ്പാക്കാനും തദ്ദേശ സ്ഥാപനങ്ങളിലെ സെക്രട്ടറിമാർക്ക് നിർദേശം നല്കി. സ്കൂൾ സുരക്ഷാസമിതി യോഗങ്ങളുടെയും സ്വീകരിച്ച നടപടികളുടെയും മിനിറ്റ്സ് വിദ്യാഭ്യാസ ഡെപ്യൂട്ടി ഡയറക്ടർ ഒരാഴ്ചയ്ക്കുള്ളിൽ ജില്ലാ കളക്ടർക്ക് സമർപ്പിക്കണമെന്നും ജില്ലാ ദുരന്ത നിവാരണ അഥോറിറ്റിയുടെ ചുമതല വഹിക്കുന്ന എഡിഎം പി. അഖിൽ നിർദേശം നല്കി.നിർദേശങ്ങളുമായി ദുരന്ത നിവാരണ അഥോറിറ്റി

തെരുവ് നായ ആക്രമണത്തിൽ കുട്ടിക്ക് പരിക്ക്

പാണത്തൂർ: പാണത്തൂർ മൈലാട്ടിയിൽ തെരുവ് നായ ആക്രമണത്തിൽ കുട്ടിക്ക് പരിക്ക്. മൈലാട്ടിയിലെ വള്ളിയോടൻ ശ്രീധരന്‍റെ മകൻ ദേവനന്ദി (17) നെയാണ് ഇന്നലെ വൈകുന്നേരം 7 മണിയോടെ തെരുവ് നായ കടിച്ച് പരിക്കേൽപ്പിച്ചത്. കാലിന് ഗുരുതരമായ പരിക്കേറ്റ കുട്ടിയെ കാഞ്ഞങ്ങാട് ജില്ലാ ആശുപത്രിയിൽ പ്രവേശിപ്പിച്ചു.

കാണാതായ യുവാവിനായി തെരച്ചിൽ തുടരുന്നു

പാണത്തൂർ: കഴിഞ്ഞ ദിവസം മഞ്ഞടുക്കം പുഴയിൽ കാണാതായതായി സംശയിക്കുന്ന യുവാവിനുവേണ്ടി അഗ്നിരക്ഷാസേനയും പോലീസും എൻഡിആർഎഫ് സംഘവും തെരച്ചിൽ നടത്തി. എന്നാൽ യുവാവിനെ സംബന്ധിച്ച വിവരങ്ങളൊന്നും കണ്ടെത്താനായില്ല. പുഴയ്ക്ക് കുറുകേയുള്ള ചപ്പാത്തിനു മുകളിലൂടെ ശക്തിയായി വെള്ളമൊഴുകുന്നുണ്ട്. ഇതുവഴി ബൈക്കിൽ യാത്രചെയ്യുന്നതിനിടയിലാണ് കർണാടക ബെൽഗാം സ്വദേശിയായ ദുർഗപ്പ (18) യെ കാണാതായത്. ബൈക്കും ഇതുവരെ കണ്ടെത്താനായിട്ടില്ല. ഇന്നും തെരച്ചിൽ തുടരാനാണ് തീരുമാനം.

ഒറ്റയ്ക്ക് താമസിച്ചിരുന്ന വയോധികൻ മരിച്ച നിലയിൽ

കാലിച്ചാനടുക്കം: ഒറ്റയ്ക്ക് താമസിച്ചിരുന്ന വയോധികനെ വീട്ടുപറമ്പിൽ മരിച്ചനിലയിൽ കണ്ടെത്തി. മൂപ്പിൽ എട്ടാംമൈലിലെ അരീപ്പറമ്പിൽ തോമസ് (63) ആണ് മരിച്ചത്. മൃതദേഹത്തിന് ഒരാഴ്ചത്തെ പഴക്കമുണ്ട്. അമ്പലത്തറ പോലീസ് സ്ഥലത്തെത്തി ഇൻക്വസ്റ്റ് നടത്തി. മൃതദേഹം പോസ്റ്റ്മോർട്ടത്തിനായി ജില്ലാ ആശുപത്രിയിലേക്ക് മാറ്റി. ഭാര്യയും രണ്ട് ആൺമക്കളും മറ്റൊരിടത്താണ് താമസം.

പുഴ വീണ്ടും ഗതിമാറി; അജാനൂർ ഫിഷ് ലാൻഡിംഗ് സെന്‍റർ അപകടമുനമ്പിൽ

കാഞ്ഞങ്ങാട്: കടലേറ്റം ശക്തമായി തുടരുന്ന അജാനൂർ കടപ്പുറത്ത് ചിത്താരിപ്പുഴ വീണ്ടും ഗതിമാറിയൊഴുകി. അജാനൂർ ഫിഷ് ലാൻഡിംഗ് സെന്‍റർ കെട്ടിടത്തെ തൊട്ടു വലംവച്ചുകൊണ്ടാണ് ഇപ്പോൾ പുഴ ഒഴുകുന്നത്. ഇതോടെ കെട്ടിടത്തിന്‍റെ അടിത്തറയോടു ചേർന്ന മണ്ണിളകി തറയുടെ കല്ലുകൾ പുറത്തുകാണാവുന്ന വിധത്തിലായി. കെട്ടിടത്തിന്‍റെ വടക്കേയറ്റത്ത് തറയുടെ ഒരു ഭാഗം ഇടിഞ്ഞുതാഴ്ന്നു. ഈ ഭാഗത്തേക്കും പുഴ ഇരച്ചുകയറിയ നിലയിലാണ്. കെട്ടിടം അപകടാവസ്ഥയിലായതോടെ ആളുകൾ ഇവിടേക്ക് പ്രവേശിക്കുന്നത് വടംകെട്ടി തടഞ്ഞു. ചിത്താരിപ്പുഴ ഗതിമാറിയൊഴുകിയതുമൂലം ഫിഷ് ലാൻഡിംഗ് സെന്‍ററിനു സമീപം രൂപപ്പെട്ട അഴിമുഖം മണൽ നിറച്ച ജിയോ ട്യൂബുകൾ കൊണ്ട് അടച്ച് പുഴയുടെ ഗതി പൂർവസ്ഥിതിയിലാക്കാനുള്ള പ്രവൃത്തികൾ തുടങ്ങുന്നതിനിടെയാണ് പുഴ വീണ്ടും ഗതിമാറിയൊഴുകിയത്. ഫിഷ് ലാൻഡിംഗ് സെന്‍ററിലേക്കുള്ള റോഡും ഇതിനു സമീപം പഞ്ചായത്ത് സ്ഥാപിച്ച കോൺക്രീറ്റ് സംരക്ഷണഭിത്തിയും നേരത്തേ കടലേറ്റത്തിൽ തകർന്നിരുന്നു. ഫിഷ് ലാൻഡിംഗ് സെന്‍ററിന്‍റെ ഗേറ്റുണ്ടായിരുന്ന ഭാഗത്ത് അവശേഷിച്ചിരുന്ന കോൺക്രീറ്റ് തൂണും കഴിഞ്ഞ ദിവസം നിലംപൊത്തി. ഇതിനടുത്തുള്ള ഹൈമാസ്റ്റ് ലൈറ്റും അപകടാവസ്ഥയിലായി. ജിയോ ട്യൂബ് സ്ഥാപിക്കുന്നതിനു മുന്നോടിയായി സാൻഡ് പമ്പ് ഡ്രഡ്ജർ ഉപയോഗിച്ച് മണൽ കൂട്ടിയിടുന്ന പ്രവൃത്തിയാണ് ഇപ്പോൾ നടക്കുന്നത്. അഞ്ചുദിവസത്തിനകം ജിയോ ട്യൂബുകൾ സ്ഥാപിക്കാൻ കഴിയുമെന്നാണ് പ്രതീക്ഷ. പക്ഷേ അതിനുമുമ്പ് ഫിഷ് ലാൻഡിംഗ് സെന്‍റർ കെട്ടിടം തകർന്നുവീഴുമോ എന്ന ആശങ്കയും നിലനിൽക്കുകയാണ്.

ഉമ്മൻചാണ്ടിയെ അനുസ്മരിച്ച് നാട്

വെള്ളരിക്കുണ്ട്: ബളാൽ മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ നടന്ന ഉമ്മൻചാണ്ടി അനുസ്മരണം ഡിസിസി ജനറൽ സെക്രട്ടറി ഹരീഷ് പി. നായർ ഉദ്ഘാടനം ചെയ്തു. മണ്ഡലം പ്രസിഡന്‍റ് എം.പി. ജോസഫ് അധ്യക്ഷതവഹിച്ചു. ഷോബി ജോസഫ്, കെ.ആർ. വിനു, സുകുമാരൻ അരിങ്കല്ല്, ജോർജ് മൈലാഡൂർ എന്നിവർ പ്രസംഗിച്ചു. കെഎസ്എസ്പിഎ പരപ്പ നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ ഉമ്മൻചാണ്ടി അനുസ്മരണവും നവാഗതർക്ക് വരവേൽപ്പും നടത്തി. വെള്ളരിക്കുണ്ട് ദർശന ഓഡിറ്റോറിയത്തിൽ നടന്ന പരിപാടി സംസ്ഥാന സെക്രട്ടറിയേറ്റംഗം പി.സി. സുരേന്ദ്രൻ നായർ ഉദ്ഘാടനം ചെയ്തു. സംസ്ഥാന കമ്മിറ്റി അംഗം ടി.കെ. എവുജിൻ അനുസ്മരണ പ്രഭാഷണം നടത്തി. മാത്യു സേവ്യർ അധ്യക്ഷതവഹിച്ചു. പി.പി. കുഞ്ഞമ്പു മുഖ്യപ്രഭാഷണം നടത്തി. ഡോ. അനുശ്രീ, ഡോ.വി. അമൃത, സെബിൻ സെബാസ്റ്റ്യൻ എന്നിവരെ ജില്ലാ സെക്രട്ടറി തോമസ് മാത്യു ആദരിച്ചു. ശാന്തമ്മ ഫിലിപ്പ്, എം.യു. തോമസ്, ബി. റഷീദ എം.കെ. ദിവാകരൻ, ജി. മുരളീധരൻ, പി.എം. ഏബ്രഹാം, പി.എ. ജോസഫ്, കെ. കുഞ്ഞമ്പു നായർ, ഷേർളി ഫിലിപ്പ്, ജോസുകുട്ടി അറയ്ക്കൽ, മിനി ജോസഫ്, ബാലൻ കക്കാണത്ത് എന്നിവർ സംസാരിച്ചു. ബളാൽ: മണ്ഡലം മൂന്നാം വാർഡ് കോൺഗ്രസ്‌ കമ്മിറ്റിയുടെ ആഭിമുഖ്യത്തിൽ ഉമ്മൻ‌ചാണ്ടി അനുസ്മരണം നടത്തി. വാർഡ് പ്രസിഡന്‍റ് സി.വി. ശ്രീധരൻ അധ്യക്ഷതവഹിച്ചു. ഡിസിസി ജനറൽ സെക്രട്ടറി ഹരീഷ് പി. നായർ അനുസ്മരണപ്രഭാഷണം നടത്തി. ഭീമനടി: എളേരി-ഭീമനടി മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ സംഘടിപ്പിച്ച ഉമ്മൻ ചാണ്ടി അനുസ്മരണ സമ്മേളനം ഡിസിസി പ്രസിഡന്‍റ് പി.കെ. ഫൈസൽ ഉദ്ഘാടനം ചെയ്തു. എളേരി മണ്ഡലം കോൺഗ്രസ് പ്രസിഡന്‍റ് എ.വി. ഭാസ്കരൻ അധ്യക്ഷത വഹിച്ചു. ഡിസിസി ജനറൽ സെക്രട്ടറി ടോമി പ്ലാച്ചേരി, ബ്ലോക്ക് കോൺഗ്രസ് പ്രസിഡന്‍റ് ജോയി ജോസഫ്, ഭീമനടി മണ്ഡലം കോൺഗ്രസ് പ്രസിഡന്‍റ് സി.എ. ബാബു, പഞ്ചായത്ത് പ്രസിഡന്‍റ് ഗിരിജ മോഹനൻ, മുൻ പഞ്ചായത്ത് പ്രസിഡന്‍റ് കെ.ജെ. വർക്കി, രാജേഷ് തമ്പാൻ, ജോയി മാരൂർ, പി.കെ. അബൂബക്കർ, ഷെരീഫ് വാഴപ്പള്ളി, എം. അബൂബക്കർ, ജോബിൻ പറമ്പ, പി.ടി. ജോസഫ്, മാത്യു വർക്കി, പഞ്ചായത്ത് അംഗങ്ങളായ കെ.കെ. തങ്കച്ചൻ, ടി.എ. ജെയിംസ്, മോളിക്കുട്ടി ടീച്ചർ, ലില്ലിക്കുട്ടി എന്നിവർ പ്രസംഗിച്ചു. ചിറ്റാരിക്കാൽ: ഈസ്റ്റ്‌ എളേരി മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച ഉമ്മൻ ചാണ്ടി അനുസ്മരണം മുതിർന്ന കോൺഗ്രസ് നേതാവ് എം.സി. ജോസ് ഉദ്ഘാടനം ചെയ്തു.മണ്ഡലം കോൺഗ്രസ്‌ പ്രസിഡന്‍റ് ജോർജ് കരിമഠം അധ്യക്ഷത വഹിച്ചു. കെപിസിസി അംഗം ശാന്തമ്മ ഫിലിപ്പ്, പഞ്ചായത്ത് പ്രസിഡന്‍റ് ജോസഫ് മുത്തോലി, മാത്യു പടിഞ്ഞാറേൽ, എം.കെ. ഗോപാലകൃഷ്ണൻ, ബെന്നി കോഴിക്കോട്ട്, മനോജ്‌ ജോസഫ് എന്നിവർ പ്രസംഗിച്ചു. പഞ്ചായത്ത്‌ പ്രസിഡന്‍റ് ജോസഫ് മുത്തോലിയെയും ഭരണസമിതി അംഗങ്ങളെയും 120 തവണ രക്തദാനം നടത്തിയ വി.ജെ. ജോസഫ് വടക്കേപറമ്പിൽ, മദ്യനിരോധന പ്രവർത്തകൻ തങ്കച്ചൻ കൊല്ലക്കൊമ്പിൽ എന്നിവരെയും ചടങ്ങിൽ ആദരിച്ചു. കള്ളാർ: മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമവാർഷിക ദിനത്തിൽ കള്ളാർ മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ പുഷ്പാർച്ചനയും അനുസ്മരണ സമ്മേളനവും സംഘടിപ്പിച്ചു. മണ്ഡലം പ്രസിഡന്‍റ് എം.എം. സൈമൺ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ടി.കെ. നാരായണൻ മുഖ്യപ്രഭാഷണം നടത്തി. സുരേഷ് കൂക്കൾ, ഗിരീഷ് നീലിമല, ബി. അബ്ദുള്ള, പി.എ. ആലി, വി. കുഞ്ഞിക്കണ്ണൻ, റോയി ആശാരികുന്നേൽ, ബാബു കാരക്കുന്നേൽ, രാജേഷ് പെരുമ്പള്ളി, ശശിധരൻ മൊടക്കട്ട്, കുഞ്ഞിക്കണ്ണൻ കുരംകയ എന്നിവർ പ്രസംഗിച്ചു. കടുമേനി: ഉമ്മൻ ചാണ്ടിയുടെ രണ്ടാം ചരമവാർഷിക ദിനത്തിൽ മലയോര മേഖല ഉമ്മൻ ചാണ്ടി ഫൗണ്ടേഷന്‍റെ നേതൃത്വത്തിൽ കടുമേനി ഹോളി ഫാമിലി കോൺവെന്‍റ് ശാന്തിഭവനിലെ അമ്മമാർക്ക് ഭക്ഷണവും വസ്ത്രങ്ങളും നല്കി. ഉമ്മൻ ചാണ്ടി അനുസ്മരണ പരിപാടി ചെറുപുഴ ജെഎം യുപി സ്കൂൾ മാനേജർ കെ.കെ.വേണുഗോപാൽ ഉദ്ഘാടനം ചെയ്തു. ഫൗണ്ടേഷൻ പ്രസിഡന്‍റ് കെ.വി.സന്തോഷ് അധ്യക്ഷത വഹിച്ചു. മണ്ഡലം കോൺഗ്രസ് പ്രസിഡന്‍റ് ജോർജുകുട്ടി കരിമഠം, വാർഡ് പ്രസിഡന്‍റ് ജോസഫ് വാഴയിൽ, സൈമൺ പള്ളത്തുകുഴി, ശാന്തിഭവൻ മദർ സുപ്പീരിയർ സിസ്റ്റർ ഇസബെൽ, പഞ്ചായത്ത് അംഗങ്ങളായ പ്രശാന്ത് പാറേക്കുടിലിൽ, സോണിയ വേലായുധൻ, തേജസ് ഷിന്‍റോ, വി.ബി. ബാലചന്ദ്രൻ, മേഴ്സി മാണി, സിന്ധു ടോമി, ഫൗണ്ടേഷൻ ഭാരവാഹികളായ ജോഷി തെങ്ങുംപള്ളി, ദിലീപ് മുനയംകുന്ന്, സോണി പൊടിമറ്റം എന്നിവർ സംബന്ധിച്ചു. രാജപുരം: പത്താം വാർഡ് കോൺഗ്രസ് കമ്മിറ്റിയുടെ ആഭിമുഖ്യത്തിൽ രാജപുരം ടൗണിൽ ഉമ്മൻ ചാണ്ടി അനുസ്മരണവും പുഷ്പാർച്ചനയും നടത്തി. മണ്ഡലം പ്രസിഡന്‍റ് എം.എം. സൈമൺ, വാർഡ് പ്രസിഡന്‍റ് ഒ.സി. ജെയിംസ്, ബ്ലോക്ക് വൈസ് പ്രസിഡന്‍റ് എം.യു. തോമസ്, സെക്രട്ടറി റോയ് ആശാരികുന്നേൽ, പി.എ. ആലി, പി.എൽ. റോയ്, കർഷക കോൺഗ്രസ് മണ്ഡലം പ്രസിഡന്‍റ് ബേബി ജോസഫ്, കെ.ടി. മാത്യു എന്നിവർ പ്രസംഗിച്ചു.

ലഹരിവിരുദ്ധ ബോധവത്കരണ കാമ്പയിന്‍

കുണിയ: മില്‍മ കാസര്‍ഗോഡ് ഡയറിയുടെ നേതൃത്വത്തില്‍ കുണിയ ആര്‍ട്‌സ് ആന്‍ഡ് സയന്‍സ് കോളജുമായി ചേര്‍ന്ന് മയക്കുമരുന്ന് വിരുദ്ധ ബോധവത്കരണ കാമ്പയിന്‍ നടത്തി. പ്രിന്‍സിപ്പല്‍ ഡോ. ഫായിസ് അബ്ദുള്ള ഉദ്ഘാടനം ചെയ്തു. മില്‍മ കാസര്‍ഗോസ് ഡയറി മാനേജര്‍ സ്വീറ്റി വര്‍ഗീസ് അധ്യക്ഷതവഹിച്ചു. ഡോ.ടി.സി. ജീന, അസി. പ്രഫസര്‍ മന്‍ഷാന, ആശിഷ് ഉണ്ണി എന്നിവര്‍ പ്രസംഗിച്ചു. സിവില്‍ എക്‌സൈസ് ഓഫീസര്‍ ചാള്‍സ് ജോസ് ക്ലാസ് നയിച്ചു.

അനധികൃത വയറിംഗ് തടയാൻ നടപടി വേണം: വയർമാൻ അസോസിയേഷൻ

തൃക്കരിപ്പൂർ: വീടുകളിലും വാണിജ്യ കെട്ടിടങ്ങളിലും നടക്കുന്ന അനധികൃത വയറിംഗ് തടയാൻ കർശന നടപടികളെടുക്കണമെന്ന് ഇലക്ട്രിക്കൽ വയർമാൻ ആൻഡ് സൂപ്പർവൈസേഴ്സ് അസോസിയേഷൻ ഓഫ് കേരള (സിഐടിയു) തൃക്കരിപ്പൂർ ഏരിയാ സമ്മേളനം ആവശ്യപ്പെട്ടു. തൃക്കരിപ്പൂർ ഫൈൻ ആർട്സ് ഹാളിൽ നടന്ന സമ്മേളനം കെഎസ്ഇബി വർക്കേഴ്സ് അസോസിയേഷൻ സംസ്ഥാന വൈസ് പ്രസിഡന്‍റ് വി. ജനാർദനൻ ഉദ്ഘാടനം ചെയ്തു. കെ.വി. ദീപു അധ്യക്ഷത വഹിച്ചു. പി.വി. പ്രീജു, എൻ. പുരുഷോത്തമൻ, ടി.പി. ചന്ദ്രൻ, എം.വി. സുകുമാരൻ, പി. സനൽ എന്നിവർ പ്രസംഗിച്ചു. ഭാരവാഹികൾ: ടി. സുബൈർ(പ്രസിഡന്‍റ്), കെ.വി. ദീപു(സെക്രട്ടറി).

എഎച്ച്എസ്ടിഎ പ്രതിഷേധസംഗമം 26ന്

കാസര്‍ഗോഡ്: ഹയര്‍സെക്കന്‍ഡറി മേഖലയോടുള്ള അവഗണനക്കെതിരെ എയ്ഡഡ് ഹയര്‍സെക്കന്‍ഡറി ടീച്ചേഴ്‌സ് അസോസിയേഷന്‍ 26നു രാവിലെ 10നു പ്രതിഷേധസംഗമം നടത്തും. കാസര്‍ഗോഡ് പുതിയ ബസ് സ്റ്റാന്‍ഡ് പരിസരത്ത് നടക്കുന്ന പരിപാടി ഡിസിസി പ്രസിഡന്‍റ് പി.കെ. ഫൈസല്‍ ഉദ്ഘാടനം ചെയ്യും. അഞ്ചുവര്‍ഷം പൂര്‍ത്തിയാകുമ്പോള്‍ ജൂണിയര്‍ അധ്യാപകര്‍ക്ക് സീനിയര്‍ തസ്തിക നല്‍കുക, ജൂണിയര്‍ സര്‍വീസ് പ്രിന്‍സിപ്പല്‍ പ്രമോഷന് പരിഗണിക്കുക, പ്രിന്‍സിപ്പല്‍ തസ്തികയില്‍ ഹയര്‍സെക്കന്‍ഡറി അധ്യാപകരെ മാത്രം നിയമിക്കുക, ആശ്രിത നിയമനം അട്ടിമറിക്കാനുള്ള നീക്കം ഉപേക്ഷിക്കുക, ശമ്പള പരിഷ്‌കരണ കുടിശിക പൂര്‍ണമായും അനുവദിക്കുക, അധ്യാപകരുടെ ന്യായമായ സര്‍വീസ് ആനുകൂല്യങ്ങള്‍ നല്‍കുക, 12-ാം ശമ്പള പരിഷ്‌കരണ കമ്മീഷനെ ഉടന്‍ പ്രഖ്യാപിക്കുക, മെഡിസെപ്പ് പദ്ധതി കാര്യക്ഷമമാക്കുക, സ്റ്റാറ്റിയൂട്ടറി പെന്‍ഷന്‍ സമ്പ്രദായം പുനഃസ്ഥാപിക്കുക, അധ്യാപക നിയമനങ്ങള്‍ അംഗീകരിക്കുക തുടങ്ങിയ വിവിധ ആവശ്യങ്ങള്‍ ഉന്നയിച്ചുകൊണ്ടാണ് പരിപാടി സംഘടിപ്പിക്കുന്നത്. സമരപ്രഖ്യാപന കണ്‍വെന്‍ഷന്‍ സംസ്ഥാന ഓര്‍ഗനൈസിംഗ് സെക്രട്ടറി ജിജി തോമസ് ഉദ്ഘാടനം ചെയ്തു. എ.ബി. അന്‍വര്‍ അധ്യക്ഷതവഹിച്ചു. മെജോ ജോസഫ്, ഷിനോജ് സെബാസ്റ്റ്യന്‍, റിന്‍സി, സി.പി. ശ്രീജ, കെ. ബാലചന്ദ്രന്‍, കെ.പ്രേമലത, സുബിന്‍ ജോസ് എന്നിവര്‍ സംസാരിച്ചു. പ്രവീണ്‍കുമാര്‍ സ്വാഗതവും റംസാദ് അബ്ദുള്ള നന്ദിയും പറഞ്ഞു.

മഞ്ഞടുക്കം പാലത്തിൽ ബൈക്ക് യാത്രികൻ ഒഴുക്കിൽപ്പെട്ടതായി സംശയം

പാണത്തൂര്‍: മഞ്ഞടുക്കം പാലത്തിലൂടെ സഞ്ചരിച്ച കർണാടക സ്വദേശിയായ ബൈക്ക് യാത്രികൻ ഒഴുക്കിൽപ്പെട്ടതായി സംശയം. പാണത്തൂരിലെ പ്ലാന്‍റേഷന്‍ കോര്‍പ്പറേഷന്‍റെ കശുമാവിന്‍ തോട്ടത്തില്‍ പ്രവൃത്തികൾ നടത്താനെത്തിയ ഹിറ്റാച്ചി ഓപ്പറേറ്ററുടെ സഹായി ബെല്‍ഗാം സ്വദേശി ദുർഗപ്പ (അനില്‍-18) യെയാണ് കാണാതായത്. വ്യാഴാഴ്ച ജോലിചെയ്യുന്നതിനിടെ ഉച്ചഭക്ഷണം എടുക്കാനായി ബൈക്കിൽ കരിക്കെയിലെ താമസസ്ഥലത്തേക്ക് പോയതായിരുന്നു. ഏറെനേരം കഴിഞ്ഞിട്ടും താമസ സ്ഥലത്തോ ജോലിസ്ഥലത്തോ എത്താതിരുന്നതിനെ തുടർന്നാണ് ഹിറ്റാച്ചി ഓപ്പറേറ്റര്‍ കുടക് സ്വദേശി യുവാനന്ദ പോലീസില്‍ പരാതി നല്കിയത്. പാലത്തിനു മുകളിൽ ബൈക്ക് ഒഴുക്കിൽപ്പെട്ടതിന്‍റെ അടയാളങ്ങൾ കണ്ടതോടെയാണ് ആശങ്കയുയർന്നത്. സമീപപ്രദേശങ്ങളിൽ കനത്ത മഴ പെയ്തതിനാൽ ഉച്ചസമയത്ത് പുഴയില്‍ ജലനിരപ്പ് ഉയർന്നിരുന്നതായി നാട്ടുകാർ പറയുന്നു. അഗ്നിരക്ഷാസേനയും സ് കൂബ ടീമും രാജപുരം പോലീസിന്‍റെ സഹായത്തോടെ പുഴയിൽ തെരച്ചിൽ നടത്തി. തഹസിൽദാർ പി.വി. മുരളി, പഞ്ചായത്ത് പ്രസിഡന്‍റ് പ്രസന്ന പ്രസാദ്, കരിക്കെ പഞ്ചായത്ത് പ്രസിഡന്‍റ് എൻ. ബാലചന്ദ്രൻ എന്നിവരും സ്ഥലത്തെത്തി. ഇന്നും തെരച്ചിൽ തുടരാനാണ് തീരുമാനം.

ഉപ്പള ഗേറ്റിലെ തുടര്‍ച്ചയായ അപകടങ്ങള്‍: ശാശ്വത പരിഹാരം വേണമെന്ന് എംഎല്‍എ

ഉപ്പള: ദേശീയപാതയുടെ നിര്‍മാണം പൂര്‍ത്തിയായതോടെ ഉപ്പള ഗേറ്റില്‍ അപകടങ്ങള്‍ അനുദിനം വര്‍ധിച്ചു വരുന്നതിനാല്‍ ഇവിടെ അപകടസാധ്യത ഇല്ലാതാക്കാന്‍ അടിയന്തിരമായി ശാശ്വതപരിഹാരം ഉണ്ടാക്കണമെന്ന് ആവശ്യപ്പെട്ട് എ.കെ.എം. അഷ്റഫ് എംഎല്‍എ ദേശീയ പാത അതോറിറ്റി റീജ്യണല്‍ ഓഫീസര്‍ക്ക് കത്ത് നല്‍കി. ഉപ്പള ഗേറ്റിലെ അപകട പാരമ്പരകളുടെ ആദ്യ ഘട്ടത്തില്‍ തന്നെ പ്രശ്‌നം ജില്ലാ വികസന സമിതിയില്‍ ഉന്നയിക്കുകയും തുടര്‍ന്ന് ഇവിടെ 7 എംഎം തിക്ക്‌നസ് ഉള്ള മഞ്ഞ കളർ തെര്‍മോപ്ലാസ്റ്റിക് സ്ട്രിപ്പ് സ്ഥാപിക്കുകയും എല്‍എച്ച്എസ് ആന്‍ഡ് ആര്‍എച്ച്എസ് മെയിന്‍ ക്യാരേജ് വേ തുറന്നതായും ദേശീയ പാത അതോറിറ്റി അറിയിച്ചിട്ടും അപകടങ്ങള്‍ക്ക് ശമനമുണ്ടായിട്ടില്ല. ഇതിനാല്‍ ഈ റോഡിന്‍റെ മിനുസമുള്ള ഏരിയയിലെ ‌ടാര്‍ മാറ്റി നിര്‍മ്മിച്ചോ മറ്റും അപകടങ്ങള്‍ തടയുന്നതിനാവശ്യമായ നടപടികള്‍ സ്വീകരിക്കണമെന്ന് എംഎല്‍എ കത്തില്‍ ആവശ്യപ്പെട്ടു,ഇതുമായി ബന്ധപ്പെട്ട് ജില്ലാ കളക്ടറുടെ സാന്നിധ്യത്തില്‍ ഒരു യോഗം സംഘടിപ്പിക്കണമെന്ന് ആവശ്യപ്പെട്ട് ജില്ലാ കളക്ടര്‍ക്കും എംഎല്‍എ കത്ത് നല്‍കി.

അശാസ്ത്രീയ റോഡ് നിര്‍മാണം; മൂലക്കണ്ടത്ത് അപകടം പതിവാകുന്നു

കാഞ്ഞങ്ങാട്: അശാസ്ത്രീയമായ റോഡ് നിര്‍മാണം മൂലം ദേശീയപാതയിലെ മാവുങ്കാല്‍ മൂലക്കണ്ടത്ത് അപകടം തുടര്‍ക്കഥയാവുന്നു. വ്യാഴാഴ്ച വൈകുന്നേരം നാലോടെ ഇവിടെ പിക്കപ്പ് ജീപ്പ് നിയന്ത്രണംവിട്ട് മറിഞ്ഞു. ആര്‍ക്കും പരിക്കില്ല. കഴിഞ്ഞ രണ്ടാഴ്ചക്കുള്ളില്‍ നടക്കുന്ന അഞ്ചാമത്തെ അപകടമാണിത്. കഴിഞ്ഞ തിങ്കളാഴ്ച രാവിലെ മാവുങ്കാല്‍ ഇലക്ട്രിസിറ്റിയിലെ ജീപ്പ് ഇവിടെ മറിഞ്ഞിരുന്നു. കുതിരക്കാളിയമ്മ ക്ഷേത്രത്തിലേക്ക് പോകുന്ന ഇറക്കത്തിലാണ് അപകടം വര്‍ധിപ്പിക്കുന്നത്. കഴിഞ്ഞ ആഴ്ചയിൽ മൂന്നു കാറുകള്‍ ഇവിടെ കുഴിയില്‍ വീണു അപകടം സംഭവിച്ചിട്ടും നിരവധി തവണ കുതിരക്കാളിയമ്മ ക്ഷേത്ര കമ്മിറ്റി തഹസില്‍ദാര്‍ക്കും ഹൈവേ അതോറിക്കും പരാതി നല്‍കിയിട്ടും ഇതുവരെയായി യാതൊരു നടപടിയും സ്വീകരിച്ചിട്ടില്ല. ഇതു കടുത്ത പ്രതിഷേധത്തിനിടയാക്കിയിട്ടുണ്ട്. ഇവിടെ നിലവിലുള്ള റോഡില്‍ സ്വകാര്യവ്യക്തി കയ്യേറി റോഡ് നിര്‍മിച്ചതും അപകടത്തിന് കാരണമാകുന്നു. ഉടനടി ഇതിന് പരിഹാരം കണ്ടില്ലെങ്കില്‍ റോഡ് തടസപ്പെടുത്തുന്നതുള്‍പ്പെടെയുള്ള സമര പരിപാടിക്ക് നാട്ടുകാര്‍ നിര്‍ബന്ധിതരാകുമെന്ന് നാട്ടുകാര്‍ പറയുന്നു.

മലയോരത്ത് വീണ്ടും ബ്ലേഡ് മാഫിയ പിടിമുറുക്കുന്നു

ചിറ്റാരിക്കാൽ: മലയോരമേഖലയിൽ വീണ്ടും ബ്ലേഡ് മാഫിയകൾ പിടിമുറുക്കുന്നു. കാലവർഷക്കെടുതിയും വ്യാപാരമേഖലയിലെ പ്രതിസന്ധികളും വിദ്യാർഥികളുടെ ഉപരിപഠനച്ചെലവുമൊക്കെയാണ് പലിശക്കാർക്ക് വളമാകുന്നത്. ഇടക്കാലത്ത് ഓപ്പറേഷൻ കുബേര ശക്തമായതോടെ ബ്ലേഡ് സംഘങ്ങളുടെ പ്രവർത്തനം കുറച്ചെങ്കിലും മന്ദീഭവിച്ചിരുന്നു. പിന്നീട് പോലീസിന്‍റെ പരിശോധനകൾ ഏറെക്കുറെ നിലച്ചതോടെ വിവിധ മേഖലകളിൽ പലിശക്കാർ വീണ്ടും തലപൊക്കി. വാഹന വായ്പകളുടെയും ബാങ്ക് വായ്പകളുടെയും തിരിച്ചടവ് മുടങ്ങുമ്പോഴും മക്കളുടെ ഉപരിപഠന ആവശ്യങ്ങൾക്ക് വിദ്യാഭ്യാസവായ്പ കിട്ടാതെ വലയുമ്പോഴുമെല്ലാം ബ്ലേഡ് സംഘങ്ങൾ രക്ഷകരായി അവതരിക്കുന്നു. പിന്നീട് തിരിച്ചടവ് മുടങ്ങിയാൽ ഇടപാടുകാരിൽ നിന്നു വാങ്ങിയ ബ്ലാങ്ക് ചെക്കുകൾ ഉപയോഗിച്ച് കള്ളക്കേസുകൾ സൃഷ്ടിച്ച് ഭീമമായ തുക കൈപ്പറ്റുന്ന സംഘങ്ങളുണ്ട്. ഭീമമായ പലിശ കിട്ടാതെ വരുമ്പോൾ ഗുണ്ടാസംഘങ്ങളെ ഉപയോഗിച്ച് വീട്ടിലും വ്യാപാരസ്ഥാപനങ്ങളിലും കയറി ഭീഷണിപ്പെടുത്തുന്നതും പതിവാണ്. എന്തിനും തയാറായി കൂടെയുള്ള സംഘങ്ങളെ ഉപയോഗിച്ചാണ് പണപ്പിരിവ് നടത്തുന്നത്. ഒരുതവണ ഇവരുടെ പക്കൽ നിന്ന് പണം വാങ്ങിച്ചാൽ പലിശയും കൂട്ടുപലിശയുമായി വാങ്ങിയ തുകയുടെ പതിന്മടങ്ങ് നൽകിയാലും കടം തീരാത്ത നിലയാകും. കേസുകളുടെ നൂലാമാലകളിൽ പെടുമെന്നു ഭയന്ന് ഇടപാടുകാർ മിക്കവാറും മറ്റൊരു പലിശക്കാരനിൽ നിന്ന് കടം വാങ്ങി ആദ്യത്തെയാളിന് പലിശ നല്കും. വസ്തു ഈടായി വാങ്ങി കൈവശപ്പെടുത്തുന്നവരുമുണ്ട്. ഇങ്ങനെ കിടപ്പാടം നഷ്ടപ്പെട്ട് വാടക വീടുകളിലേക്ക് മാറേണ്ടിവന്നവരും നാട്ടിൽ നിന്നുതന്നെ പോയവരും നിരവധിയാണ്. പലരും പെട്ടെന്ന് പ്രതിസന്ധിയിലായതായി കാണുമ്പോൾ മാത്രമാണ് അവർ‌ ബ്ലേഡ് മാഫിയയുടെ വലയിൽ പെട്ടിട്ടുണ്ടെന്ന് ബന്ധുക്കളും അയൽക്കാരും പോലും മിക്കവാറും അറിയുക. ടാക്സി ഡ്രൈവർമാരും സർക്കാർ ഉദ്യോഗസ്ഥരും ജോലിയിൽ നിന്ന് വിരമിച്ചവരുമടക്കം ബ്ലേഡ് മാഫിയയുടെ നടത്തിപ്പുകാരും ഏജന്‍റുമാരുമായി രംഗത്തുണ്ട്. നാട്ടുകാർക്ക് പുറമേ തമിഴ്നാട്ടിൽനിന്നും ഉത്തരേന്ത്യയിൽ നിന്നുമുള്ള പലിശ ഇടപാടുകാരും ഉൾനാടുകളിൽ പോലും സജീവമാണ്. ആവശ്യക്കാർക്ക് ഒരു ഫോൺകോളിൽ തുക വീട്ടിലെത്തിച്ച് കൊടുക്കുമെന്നതാണ് ഇവരുടെ വാഗ്ദാനം. ഒറ്റ ഫോൺ കോൾ കൊണ്ട് ജീവിതം തന്നെ മാറിമറിയുന്ന തരത്തിലുള്ള കുരുക്കുകളിലേക്കാണ് പോകുന്നതെന്ന് തുടക്കത്തിൽ പലരും മനസിലാക്കുന്നില്ല. സാധാരണക്കാരാണ് സംഘങ്ങളുടെ വലയിൽ ഏറ്റവുമധികം വീഴുന്നതെന്ന് അനുഭവസ്ഥർ റയുന്നു.

പോക്‌സോ: യുവാവിന് ജീവപര്യന്തം തടവും പിഴയും

കാഞ്ഞങ്ങാട്: പട്ടികവര്‍ഗവിഭാഗത്തില്‍പ്പെട്ട പതിനഞ്ചുകാരിയെ ലൈംഗികമായി പീഡിപ്പിച്ച കേസില്‍ യുവാവിന് ജീവപര്യന്തം തടവും 11,000 രൂപ പിഴയും ശിക്ഷ വിധിച്ചു. ബേഡകം മുന്നാട് വട്ടംതട്ടയിലെ ബി.ആദര്‍ശിനെയാണ് (28) കാഞ്ഞങ്ങാട് ഫാസ്റ്റ് ട്രാക്ക് സ്‌പെഷല്‍ കോര്‍ട്ട് ജഡ്ജ് പി.എം.സുരേഷ് ശിക്ഷിച്ചത്. പിഴ അടച്ചില്ലെങ്കില്‍ ആറുമാസവും ഒരാഴ്ചയും അധികതടവ് അനുഭവിക്കണം. 2023 ജൂലൈ നാലിനാണ് കേസിനാസ്പദമായ സംഭവം. ബേഡകം പോലീസ് രജിസ്റ്റര്‍ ചെയ്ത കേസില്‍ അന്വേഷണം നടത്തി കോടതിയില്‍ കുറ്റപത്രം സമര്‍പ്പിച്ചത് അന്നത്തെ കാസര്‍ഗോഡ് എസ്എംഎസ് ഡിവൈഎസ്പി ആയിരുന്ന സതീഷ്‌കുമാര്‍ ആലക്കല്‍ ആയിരുന്നു. പ്രോസിക്യൂഷന് വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ എ.ഗംഗാധരന്‍ ഹാജരായി.

ജില്ലയിൽ കനത്ത മഴ; നിരവധി വീടുകൾ തകർന്നു

കാസർഗോഡ്:ചെമ്മനാട് കളനാട് നടക്കാലിൽ കൂറ്റൻ പാറക്കല്ല് വീണ് വീട് തകർന്നു. നടക്കാലിലെ മിതേഷിന്‍റെ വീടാണ് തൊട്ടടുത്ത പറമ്പിൽ നിന്നുള്ള പാറക്കല്ല് ഉരുണ്ടുവീണ് തകർന്നത്. ഈ പാറക്കല്ല് വീടിന് ഭീഷണിയാണെന്നു ചൂണ്ടിക്കാട്ടി മിതേഷ് നേരത്തേ കളനാട് വില്ലേജ് ഓഫീസർക്കും ചെമ്മനാട് പഞ്ചായത്തിനും പരാതി നല്കിയിരുന്നു. ബന്ധപ്പെട്ടവരുടെ ഭാഗത്തുനിന്ന് നടപടികളൊന്നും ഉണ്ടാകാതിരുന്നതാണ് വീട് തകരുന്ന നിലയിലെത്തിച്ചതെന്ന ആക്ഷേപമുയർന്നിട്ടുണ്ട്. ബുധനാഴ്ച വൈകുന്നേരത്തോടെയാണ് പാറക്കല്ല് വീടിനുമേൽ ഉരുണ്ടുവീണത്. ഓടിട്ട വീടിന്‍റെ ഒരുവശത്തെ ഭിത്തി പാടേ തകർന്നു. ചെങ്കല്ലും മണ്ണും കൊണ്ട് നിർമിച്ച വീടിന്‍റെ മറ്റു ഭാഗങ്ങളിലും വിള്ളൽ വീണിട്ടുണ്ട്. അപകടസമയത്ത് മിതേഷിന്‍റെ ഭാര്യ ചൈത്ര മാത്രമാണ് വീടിനകത്തുണ്ടായിരുന്നത്. ഇവർ പുറത്തേക്കോടി രക്ഷപ്പെട്ടു. മിതേഷ് തൊട്ടടുത്തുതന്നെയുള്ള വർക്ക് ഷോപ്പിലെ ജോലിസ്ഥലത്തും ഇവരുടെ കുട്ടിയും മിതേഷിന്‍റെ പ്രായമായ അമ്മയും അടുത്തുള്ള ക്ഷേത്രത്തിലുമായിരുന്നു. ആകെയുള്ള വീട് തകർന്നതോടെ പെരുമഴയത്ത് എങ്ങോട്ട് പോകുമെന്നറിയാത്ത നിലയിലാണ് കുടുംബം. കുന്നുംകൈ: കുന്നുംകൈ മുള്ളിക്കാട് പടിഞ്ഞാറേട്ട് ജോസഫ് മാത്യുവിന്‍റെ വീടിന്‍റെ മുറ്റത്തിന്‍റെ പാർശ്വഭിത്തി പൂർണമായി ഇടിഞ്ഞുതാണു. കഴിഞ്ഞ ദിവസം രാത്രി 10.30ഓടെയാണ് സംഭവം. റോഡ് ഗതാഗതം പൂർണമായി തടസ്സപ്പെട്ടിരുന്നു. വീട് അപകടഭീഷണിയിലാണ്. രണ്ടു ലക്ഷം രൂപയുടെ നഷ്ടം കണക്കാക്കുന്നു.വില്ലേജ്, പഞ്ചായത്ത് അധികൃതർ സ്ഥലം സന്ദർശിച്ചു. ബിരിക്കുളം: ഇന്നലെയുണ്ടായ കനത്ത മഴയിലും കാറ്റിലും പുലിയംകുളം ആർടിഒ ടെസ്റ്റിംഗ് ഗ്രൗണ്ടിലെ കാത്തിരിപ്പ് പന്തൽ തകർന്നുവീണു. രാത്രി തകർന്നു വീണതിനാൽ വൻ ദുരന്തം ഒഴിവായി. പകൽ സമയങ്ങളിൽ ഗ്രൗണ്ടിൽ ടെസ്റ്റിന് എത്തുന്നവർ കാത്തുനിൽക്കുന്ന കാത്തിരുപ്പ് കേന്ദ്രമാണ് കാറ്റിൽ തകർന്നു വീണത്. വൈകുന്നേരം ഡ്രൈവിംഗ് സ്കൂളുകാരുടെ ചില വാഹനങ്ങൾ പന്തലിനടിയിൽ പാർക്ക് ചെയ്തിരുന്നത് വിഴുന്നതിനടിയിൽ പെട്ട് ഭാഗികമായി തകർന്നു .

കാസര്‍ഗോഡ് മുതല്‍ കന്യാകുമാരി വരെ ലഹരിവിരുദ്ധ കാമ്പയിനുമായി മാര്‍ത്തോമ്മാ സണ്‍ഡേ സ്‌കൂള്‍ സമാജം

കാസര്‍ഗോഡ്: മാര്‍ത്തോമ്മാ സഭയുടെ കുട്ടികളുടെ വിഭാഗമായ സണ്‍ഡേ സ്‌കൂള്‍ സമാജം സമൂഹത്തില്‍ വര്‍ധിച്ചുവരുന്ന ലഹരിക്കെതിരെ സ്‌കൂളുകളില്‍ കാമ്പയിന്‍ ആരംഭിച്ചു. കാസര്‍ഗോഡ് മുതല്‍ കന്യാകുമാരി വരെ നീണ്ടു നില്‍ക്കുന്ന ലഹരിക്കെതിരായ പോരാട്ടങ്ങള്‍ക്ക് ചെര്‍ക്കള മാര്‍ത്തോമ്മാ ബധിരവിദ്യാലയത്തില്‍ എന്‍.എ. നെല്ലിക്കുന്ന് എംഎല്‍എ ഉദ്ഘാടനം ചെയ്തു. കുട്ടികളുടെയും യുവാക്കളുടെയും ഇടയില്‍ ലഹരി ഉപയോഗം വര്‍ധിക്കുന്നതായും ഇതിനുള്ള പണം കുട്ടികള്‍ക്ക് എവിടെ നിന്ന് ലഭിക്കുന്നുവെന്ന് മാതാപിതാക്കള്‍ അന്വേഷിക്കണമെന്നും മതവിശ്വാസം ഈ തിന്മയ്‌ക്കെതിരെ പോരാടാന്‍ സഹായിക്കുമെന്നും അദ്ദേഹം പറഞ്ഞു. മാര്‍ത്തോമ്മാസഭാ കുന്നംകുളം മലബാര്‍ ഭദ്രാസന അധ്യക്ഷനും സണ്‍ഡേ സ്‌കൂള്‍ പ്രസിഡന്‍റുമായ ഡോ. മാത്യൂസ് മാര്‍ മക്കാറിയോസ് എപ്പസ്‌കോപ്പ അധ്യക്ഷത വഹിച്ചു. മുന്‍കാലങ്ങളെക്കാള്‍ ലഹരി ഉപയോഗം വര്‍ധിച്ചുവെന്നും അതു സമൂഹത്തെ കാര്‍ന്നുതിന്നുന്നുവെന്നും ഇതിനെതിരെ കൂട്ടായ പോരാട്ടം ആവശ്യമാണെന്നും അദ്ദേഹം പറഞ്ഞു. റവ.അനു ഉമ്മന്‍, റവ. അനീഷ് തോമസ്, ടി.ജി.ജോണ്‍സണ്‍, മാത്യുസണ്‍ പി.തോമസ് എന്നിവര്‍ പ്രസംഗിച്ചു. സണ്‍ഡേ സ്‌കൂള്‍ സമാജം ജനറല്‍ സെക്രട്ടറി റവ.സജേഷ് മാത്യൂസ് സ്വാഗതം പറഞ്ഞു.

കുളങ്ങാട്ട് മലയുടെ പാർശ്വം ഇടിഞ്ഞു

ചെറുവത്തൂർ: നാട്ടുകാരെ ഭീതിയിലാഴ്ത്തി വീണ്ടും കുളങ്ങാട്ട് മലയുടെ പാർശ്വമിടിഞ്ഞ് താഴ്ന്നു. കുന്നിന് താഴെയുള്ള വീടിന് മുകളിലേക്ക് കടപുഴകിയ മരങ്ങളും ചരൽമണ്ണും വീഴുകയായിരുന്നു. വീടിനടുത്ത് നിർത്തിയിട്ടിരുന്ന ഓട്ടോറിക്ഷക്കും കേടുപാട് പറ്റി. പഴയങ്ങാടി ചെങ്ങൽ സ്വദേശിയും ടാക്സി ഡ്രൈവറുമായ നെല്ലിക്കാലിലെ ടി. മനോജിൻന്‍റെ വീടിന്‍റെ പിൻഭാഗത്തേക്കാണ് മലഞ്ചെരുവിലെ മരങ്ങൾ കടപുഴകി വീണത്.വീടിന്‍റെ അടുക്കള ഭാഗത്ത് ജിഐ ഷീറ്റുകൊണ്ട് നിർമിച്ച ഭാഗം തകർന്നു വീണു. നിരവധി കാർഷിക വിളകളും നശിച്ചു. 15 ൽപ്പരം കമുകുകളും തെങ്ങും ഉൾപ്പെടെ നശിച്ചു. ബുധനാഴ്ച രാത്രിയാണ് സംഭവം. മലയുടെ പടിഞ്ഞാറ് നെല്ലിക്കാൽ ഭാഗത്താണ് പാറക്കല്ലുകൾ ഉരുണ്ടു വീണത്. മണ്ണിനൊപ്പം മരങ്ങളും വീടിന് മുകളിലേക്ക് വീഴുകയായിരുന്നു. മലയിടിഞ്ഞ് വീടിന് മുകളിലേക്ക് വീഴുമ്പോൾ മനോജിന്‍റെ ഭാര്യ വിനീത, മക്കളായ കിരൺ, കൃഷ്ണപ്രിയ എന്നിവരും ഭാര്യാമാതാവ് നാരായണിയും വീടിന്‍റെ വരാന്തയിലുണ്ടായിരുന്നു. മനോജിന്‍റെ കുടുംബവും തൊട്ടടുത്ത വിനോദ്, ഷാജി, അഷ്റഫ് എന്നിവരുടെ കുടുംബങ്ങളെയും മാറ്റി പാർപ്പിച്ചു. എഡിഎം പി. അഖിൽ, തഹസിൽദാർ, ടി. ജയപ്രസാദ്, തൃക്കരിപ്പൂർ എംഎൽഎ എം. രാജഗോപാലൻ, കെ.വി. പ്രഭാകരന്‍റെ നേതൃത്വത്തിൽ തൃക്കരിപ്പൂർ നിലയത്തിൽ നിന്ന് അഗ്നി രക്ഷാസേന, കെ.എം. സതീഷ് വർമയുടെ നേതൃത്വത്തിൽചന്തേര പോലീസ്, വനം വകുപ്പ് അധികൃതർ തുടങ്ങി വിവിധ മേഖലയിലുള്ളവർ സ്ഥലത്തെത്തി.

തൃക്കണ്ണാട് സംസ്ഥാനപാത തകര്‍ച്ചയിലേക്ക്

ഉദുമ: കനത്തമഴയെ തുടര്‍ന്ന് കാസര്‍ഗോഡ്- കാഞ്ഞങ്ങാട് സംസ്ഥാന പാതയിലെ തൃക്കണ്ണാട്ട് റോഡുവക്കിലെ മണ്ണ് ഒലിച്ചുപോയി, കടലാക്രമണം ഇനിയും ശക്തമായാല്‍ കടല്‍ റോഡിലേയ്‌ക്കെത്തുമെന്ന് ആശങ്ക. പ്രശ്നത്തിനു ഉടന്‍ പരിഹാരം ഉണ്ടായില്ലെങ്കില്‍ ഗുരുതരമായ സ്ഥിതി വിശേഷം ഉണ്ടാകുമെന്ന് കാണിച്ച് പോലീസ് ജില്ലാ കലക്ടര്‍ക്ക് റിപ്പോര്‍ട്ട് നല്‍കി. ബുധനാഴ്ച്ച രാത്രി ഉണ്ടായ ശക്തമായ മഴയെതുടര്‍ന്ന് കെഎസ്ടിപി റോഡിലെ മിക്ക ഭാഗങ്ങളും വെള്ളത്തിനടിയിലായിരുന്നു. കടലാക്രമണം തുടരുന്ന തൃക്കണ്ണാട് ത്രയംബകേശ്വര ക്ഷേത്രത്തിനു മുന്‍വശത്ത് റോഡരികിലെ മണ്ണ് കടലിലേയ്ക്ക് ഒഴുകിപ്പോയി. സ്ഥലത്ത് വലിയ ഗര്‍ത്തം രൂപം കൊണ്ടിട്ടുണ്ട്. ഇന്നലെ ഉച്ചവരെ മഴ മാറിനിന്നെങ്കിലും ഉച്ചകഴിഞ്ഞ് മഴ ശക്തിപ്രാപിച്ചതോടെ ആശങ്കയേറിയിട്ടുണ്ട്. കനത്ത മഴ തുടരുകയും കടലാക്രമണം കൂടുതല്‍ രൂക്ഷമാവുകയും ചെയ്താല്‍ റോഡിന്‍റെ നിലനില്‍പ്പ് തന്നെ ഭീഷണിയിലാകുമെന്ന് ആശങ്ക ഉയര്‍ന്നിട്ടുണ്ട്. റോഡില്‍ നിന്നു അഞ്ചു മീറ്റര്‍ അകലെയാണ് ഇപ്പോള്‍ കടലിന്‍റെ സ്ഥാനം. ചരിത്രത്തില്‍ ആദ്യമായാണ് തൃക്കണ്ണാട്ട് ഇത്തരമൊരു സ്ഥിതിവിശേഷമെന്ന് പ്രദേശവാസികള്‍ പറഞ്ഞു. സ്ഥലത്ത് ബേക്കല്‍ പോലീസ് കാവല്‍ നില്‍ക്കുന്നുണ്ട്.

മുളിയാറിൽ വീണ്ടും പുലിഭീതി; കെട്ടിയിട്ട വളർത്തുനായയെ കൊന്നു

ബോവിക്കാനം: നാലുമാസത്തെ ഇടവേളയ്ക്കു ശേഷം മുളിയാർ പഞ്ചായത്തിൽ വീണ്ടും പുലിഭീതി. ബാവിക്കര അമ്മങ്കല്ലിലെ സിന്ധുവിന്‍റെ വീട്ടുമുറ്റത്ത് കെട്ടിയിട്ടിരുന്ന വളർത്തുനായയാണ് പുലിയുടെ ഇരയായത്. വ്യാഴാഴ്ച പുലർച്ചെയാണ് കടിച്ചുകീറിയ നിലയിൽ നായയുടെ ജഡം കണ്ടെത്തിയത്. വിവരമറിഞ്ഞ് വനംവകുപ്പ് ഉദ്യോഗസ്ഥർ സ്ഥലത്തെത്തി. പുലിയുടേതെന്ന് സംശയിക്കാവുന്ന കാൽപാടുകൾ സംഭവസ്ഥലത്തിനു സമീപം കണ്ടെത്തി. ഇതോടെ നാട്ടുകാർ വീണ്ടും ആശങ്കയിലായി.

പെരുമഴയത്ത് റീടാറിംഗ് നടത്തിയ റോഡ് ദിവസങ്ങൾക്കകം തകർന്നു

കാസർഗോഡ്: പെരുമഴയെ വകവയ്ക്കാതെ റീടാറിംഗ് നടത്തിയ റോഡ് ദിവസങ്ങൾക്കകം തകർന്നു. പുതിയ ബസ് സ്റ്റാൻഡിൽ നിന്ന് മധൂർ ഭാഗത്തേക്കുള്ള കോട്ടക്കണ്ണി-ബട്ടംപാറ റോഡാണ് നഗരസഭയുടെ ഫണ്ട് ഉപയോഗിച്ച് ലക്ഷങ്ങൾ ചെലവാക്കി റീടാറിംഗ് നടത്തി ദിവസങ്ങൾക്കകം തകർന്നത്. അവിടവിടെ പൊട്ടിപ്പൊളിഞ്ഞ് കിടന്നിരുന്ന റോഡ് റീടാറിംഗ് നടത്തണമെന്ന ആവശ്യം ദീർഘനാളായി ഉണ്ടായിരുന്നെങ്കിലും മഴയത്ത് ടാറിംഗ് നടത്തുന്നതിനെ നാട്ടുകാർ ചോദ്യം ചെയ്തിരുന്നു. അത് വകവയ്ക്കാതെയാണ് കരാറുകാർ പണി പൂർത്തിയാക്കി സ്ഥലംവിട്ടത്. ദിവസങ്ങൾക്കുള്ളിൽ തന്നെ ടാറിംഗും മെറ്റലുകളുമെല്ലാം ഇളകി റോഡ് പഴയതിനേക്കാൾ മോശമായ നിലയിലാവുകയും ചെയ്തു. പേരിനു മാത്രം പ്രവൃത്തികൾ പൂർത്തിയാക്കി ലക്ഷങ്ങൾ തുലച്ചതിനെതിരെ കർശനമായ നടപടികൾ വേണമെന്നാണ് ഇപ്പോൾ നാട്ടുകാരുടെ ആവശ്യം.

നായ്ക്കയംതട്ടില്‍ മലവെള്ളപ്പാച്ചില്‍; മൂന്നു കുടുംബങ്ങളെ മാറ്റിതാമസിപ്പിച്ചു

നായ്ക്കയം: നായ്ക്കയംതട്ടില്‍ മലവെള്ളപ്പാച്ചിലില്‍ വ്യാപകകൃഷിനാശം. ഇരിയ മുട്ടിച്ചരലില്‍ താമസിക്കുന്ന റിട്ട.അധ്യാപകന്‍ കെ.വി. ഗോപാലകൃഷ്ണന്‍റെ സ്ഥലത്ത് ഇന്നലെ ഉച്ചയ്ക്ക് ഒരുമണിയോടെയാണ് സംഭവം. കല്ലും മണ്ണും ഒഴുകിവന്ന് നിരവധി തേക്കിന്‍തൈകളും റബര്‍മരങ്ങളും നശിച്ചു. ഇതുകൂടാതെ വലിയ പാറക്കല്ലും പ്രദേശത്തേക്ക് ഉരുണ്ടുവന്നു. പാറക്കല്ല് ഭീഷണിയായതിനെതുടര്‍ന്ന് മൂന്നു കുടുംബങ്ങളെ അധികൃതരുടെ നിര്‍ദേശപ്രകാരം ബന്ധുവീടുകളിലേക്ക് മാറ്റിപാര്‍പ്പിച്ചു. വെള്ളരിക്കുണ്ട് തഹസില്‍ദാര്‍ പി.വി. മുരളി, ബേളൂര്‍ വില്ലേജ് ഓഫീസര്‍ ശ്രീലാല്‍, റവന്യൂ ഉദ്യോഗസ്ഥര്‍ എന്നിവര്‍ സ്ഥലം സന്ദര്‍ശിച്ചു.

കുളങ്ങാട്ട് മലയിലും തൃക്കണ്ണാട് കടപ്പുറത്തും മുന്‍കരുതല്‍ ശക്തിപ്പെടുത്തും

കാസര്‍ഗോഡ്: അതിതീവ്ര മഴ തുടരുന്ന പശ്ചാത്തലത്തില്‍ ജില്ലാ ദുരന്തനിവാരണ അതോറിറ്റി അടിയന്തരയോഗം ഓണ്‍ലൈനില്‍ ചേര്‍ന്നു. ചെറുവത്തൂര്‍ കുളങ്ങാട്ട് മലയില്‍ വിള്ളല്‍ ഉണ്ടായ സാഹചര്യത്തില്‍ മുന്‍കരുതല്‍ നടപടികള്‍ ശക്തിപ്പെടുത്താന്‍ നിര്‍ദേശം നല്‍കി. ഇവിടെ റവന്യൂ, പോലീസ്, ഫയര്‍ഫോഴ്‌സ്, വനം, തദ്ദേശസ്വയംഭരണം വകുപ്പുകള്‍ ജാഗ്രത പാലിക്കണം. അപകടാവസ്ഥയിലായ പ്രദേശങ്ങളില്‍ കാഴ്ചക്കാരായി ആളുകള്‍ കൂട്ടംകൂടുന്നത് കര്‍ശനമായും ഒഴിവാക്കേണ്ടതാണ്. രൂക്ഷമായ കടലാക്രമണം നേരിടുന്ന പ്രദേശങ്ങളില്‍ അടിയന്തര നടപടികള്‍ സ്വീകരിക്കാനും യോഗം തീരുമാനിച്ചു. വെള്ളക്കെട്ട് ഉണ്ടായ പ്രദേശങ്ങളില്‍ ആളുകളെ മാറ്റിപ്പാര്‍പ്പിക്കുന്നതിന് ആവശ്യമെങ്കില്‍ ക്യാമ്പുകള്‍ ആരംഭിക്കും. തൃക്കണ്ണട്, കോട്ടിക്കുളം തീരത്ത് കടലേറ്റം തടയാനുള്ള പ്രവര്‍ത്തനങ്ങള്‍ അടിയന്തരമായി സ്വീകരിക്കുന്നതിന് ജലവിഭവ വകുപ്പിന് നിര്‍ദ്ദേശം നല്‍കി. അപകടനിലയിലുള്ള മരച്ചില്ലകള്‍ വെട്ടി മാറ്റുന്നതിന് നടപടി സ്വീകരിക്കാന്‍ നഗരസഭ, പഞ്ചായത്ത് സെക്രട്ടറിമാര്‍ക്ക് നിര്‍ദേശം നല്‍കി.

തെരുവുനായശല്യം: ദയാവധ ഉത്തരവ് കണ്ണിൽ പൊടിയിടാനെന്ന് ഡോ. ടിറ്റോ ജോസഫ്

കാഞ്ഞങ്ങാട്: ആവശ്യമായി വന്നാൽ തെരുവുനായ്ക്കളെ ദയാവധം നടത്താമെന്ന സർക്കാരിന്‍റെ ഉത്തരവ് ജനങ്ങളുടെ കണ്ണിൽ പൊടിയിടാൻ മാത്രമാണെന്ന് ഇന്ത്യൻ വെറ്ററിനറി അസോസിയേഷൻ മുൻ സംസ്ഥാന വൈസ് പ്രസിഡന്‍റും കർഷക കോൺഗ്രസ്‌ നേതാവുമായ ഡോ. ടിറ്റോ ജോസഫ്. നിലവിലുള്ള നിയമം ഒന്നുകൂടി പറയുക മാത്രമാണ് ഉത്തരവിൽ ചെയ്തിരിക്കുന്നത്. ചികിത്സിച്ചു ഭേദമാക്കാൻ പറ്റാത്ത അവസ്ഥയിലുള്ള നായ്കളെ മാത്രമേ ദയാവധം നടത്താനുള്ള സർട്ടിഫിക്കറ്റ് കൊടുക്കാൻ ഡോക്ടർമാർക്ക്‌ സാധിക്കുകയുള്ളൂ. അല്ലാത്തപക്ഷം മൃഗസ്നേഹികളുടെ ഭാഗത്തുനിന്നുള്ള നിയമനടപടികൾ നേരിടേണ്ടിവരും. പാതയോരങ്ങളിലെത്തുന്ന അറവ് മാലിന്യമാണ് തെരുവുനായ്ക്കൾ നാടും നഗരവും കീഴടക്കുന്നതിനുള്ള പ്രധാന കാരണം. സംസ്ഥാനത്ത് അറവ് മാലിന്യം ശാസ്ത്രീയമായി സംസ്കരിച്ച് മറ്റു തരത്തിലുള്ള ഉത്പന്നങ്ങളാക്കുന്നതിനായി തുടങ്ങിയ സ്ഥാപനങ്ങൾ പോലും നിലച്ചു പോകുന്ന അവസ്ഥയിലാണ്. ഇത്തരത്തിലുള്ള സ്ഥാപനങ്ങൾക്ക് സർക്കാരിന്‍റെ പിന്തുണയും പ്രോത്സാഹനവും വേണ്ടത്ര ലഭിക്കുന്നില്ല. മാലിന്യം തെരുവിലേക്ക് വലിച്ചെറിയുന്നതിന് ശിക്ഷ ഉറപ്പാക്കണം. പേവിഷബാധ മൂലം മരണമുണ്ടാകുമ്പോൾ മാത്രം അധികാരികളും മാധ്യമങ്ങളും ഇടപെട്ടാൽ പോരാ. തെരുവുനായ്ക്കളെ നിയന്ത്രിക്കാൻ ശാസ്ത്രീയമായ സമീപനവും നടപടികൾക്ക് തുടർച്ചയും ഉണ്ടാകണം. മൊബൈൽ എബിസി പദ്ധതി നല്ല നിർദേശമാണ്. പക്ഷേ അത് കൃത്യമായി നടപ്പാക്കപ്പെടുന്ന കാര്യത്തിൽ സർക്കാരിന്‍റെ ഇടപെടലുകൾ ഉണ്ടാകണം. വാക്‌സിനേഷൻ, ലൈസൻസ്, മൃഗസ്നേഹികളുടെ ഭാഗത്തുനിന്ന് തെരുവ് നായ്ക്കളെ ദത്തെടുക്കൽ തുടങ്ങിയവ പ്രോത്സാഹിപ്പിക്കണമെന്നും അദ്ദേഹം നിർദേശിച്ചു.

തീപിടിത്തം: ഗൃഹോപകരണങ്ങൾ കത്തിനശിച്ചു

രാജപുരം: കള്ളാർ പഞ്ചായത്തിലെ അരയാർപള്ളത്തെ പി.കെ. വെള്ളച്ചിയുടെ വീട് ഷോട്ട് സർക്യൂട്ട് മൂലം തീ പിടിച്ചു. ടിവി, ഫാൻ, മേശ എന്നിവ കത്തി നശിക്കുകയും വിടിന് കേടുപാടുകൾ സംഭവിക്കുകയും ചെയ്തു. കുറ്റിക്കോൽ ഫയർഫോഴ്സിലെ സീനിയർ ഫയർ ആൻഡ് റസ്ക്യൂ ഓഫിസർ ദീലീപിന്‍റെ നേതൃത്വത്തിലുള്ള സംഘവും രാജപുരം എസ്ഐ ബിജുവിന്‍റെ നേതൃത്വത്തിലുള്ള സംഘവും സ്ഥലത്തെത്തി തീയണച്ചു. പഞ്ചായത്ത് പ്രസിഡന്‍റ് ടി.കെ. നാരായണൻ, മെമ്പർ പി. ഗീത എന്നിവരും സ്ഥലത്തെത്തി.

ബസില്‍ ബൈക്കിടിച്ച് പരിക്കേറ്റ യുവാവ് മരിച്ചു

പൊയിനാച്ചി: സ്വകാര്യബസ് പെട്ടെന്ന് ബ്രേക്കിട്ടപ്പോള്‍ പിന്നില്‍നിന്നും വന്നിടിച്ച് പരിക്കേറ്റ് ചികിത്സയിലായിരുന്ന ബൈക്ക് യാത്രികന്‍ മരിച്ചു. കുണിയ കാനത്തില്‍ ഹൗസിലെ കെ.വി. അബ്ദുള്ള-താഹിറ ദമ്പതികളുടെ മകന്‍ അബ്ദുള്‍ റഹ്‌മാന്‍ ഫാരിസ് (19) ആണ് മരിച്ചത്. കഴിഞ്ഞ വെള്ളിയാഴ്ച ഉച്ചയോടെ ദേശീയപാതയില്‍ പൊയിനാച്ചിക്ക് സമീപം ബട്ടത്തൂരിലാണ് അപകടമുണ്ടായത്. ഇന്നലെ പുലര്‍ച്ചെ കാസര്‍ഗോട്ടെ സ്വകാര്യാശുപത്രിയിലാണ് മരിച്ചത്. മംഗളൂരുവില്‍ ഡിഗ്രി വിദ്യാര്‍ഥിയാണ്. സഹോദങ്ങള്‍: ഹുസൈന്‍, മുജ്തബ, ആയിഷ, ബുഷ്‌റ, ഫാത്തിമ.

മരുന്ന് ക്ഷാമം പരിഹരിക്കണം: എകെസിസി

കടുമേനി: സർക്കാർ ആശുപത്രികളിലെ മരുന്നുകളുടെയും പ്രതിരോധ വാക്സിനുകളുടെയും ക്ഷാമം അടിയന്തരമായി പരിഹരിക്കണമെന്ന് കത്തോലിക്ക കോൺഗ്രസ് കടുമേനി യൂണിറ്റ് കൺവൻഷൻ ആവശ്യപ്പെട്ടു. തോമാപുരം ഫൊറോന ഡയറക്ടർ ഫാ. മാത്യു വളവനാൽ ഉദ്ഘാടനം ചെയ്തു. ഫൊറോന പ്രസിഡന്‍റ് സാജു പടിഞ്ഞാറേട്ട് അധ്യക്ഷതവഹിച്ചു. യൂണിറ്റ് പ്രസിഡന്‍റ് ടോമി കുന്നിപ്പറമ്പിൽ, സോജോ ചക്കാലയ്ക്കൽ, തോമസ് മാത്യു മണ്ണനാനിക്കൽ, സിന്ധു ടോമി, സെബാസ്റ്റ്യൻ വട്ടപ്പറമ്പിൽ എന്നിവർ പ്രസംഗിച്ചു.

ഏഴാംക്ലാസിലെ അധ്യാപകന്‍റെ ഓർമകളിലേക്ക് എഴുപതാം വയസിലൊരു മടക്കയാത്ര

സ്വന്തം ലേഖകൻ ഭീമനടി: ദീർഘകാലം മുംബൈയിൽ ജോലിചെയ്ത ശേഷം നാട്ടിലെത്തി ജോലിയും വിശ്രമവുമായി കഴിയുന്ന തിരുവല്ല തടിയൂർ സ്വദേശി പി.കെ. പ്രേമചന്ദ്രൻ തന്‍റെ എഴുപതാം വയസിൽ കാസർഗോഡ് ജില്ലയിലെ ഭീമനടിയിലേക്കൊരു യാത്ര നടത്തിയത് അത്രമേൽ അമൂല്യമായ ഓർമകളുടെ മധുരം മനസിൽ സൂക്ഷിച്ചുകൊണ്ടാണ്. കാഞ്ഞിരപ്പള്ളി ഉപജില്ലയിലെ കനകപ്പലം എംടി യുപി സ്കൂളിൽ അഞ്ചാം ക്ലാസ് മുതൽ ഏഴാം ക്ലാസ് വരെ തന്നെ പഠിപ്പിച്ച കാരിയ്ക്കൽ ജോർജ് ജോസഫ് സാറിന്‍റെ ഓർമകളിലേക്കായിരുന്നു ആ മടക്കയാത്ര. തന്‍റെ ഏറ്റവും പ്രിയപ്പെട്ട അധ്യാപകനെ തേടി മാസങ്ങളായി നടത്തിയ അന്വേഷണത്തിന്‍റെ പര്യവസാനമായിരുന്നു അത്. അദ്ദേഹം ജീവിച്ചിരിക്കുന്നില്ലെന്നറിഞ്ഞെങ്കിലും ഭീമനടി ക്രിസ്തുരാജാ പള്ളിയിലെ അദ്ദേഹത്തിന്‍റെ കബറിടത്തിൽ നിറഞ്ഞ കണ്ണുകളോടെ പ്രാർഥിക്കാനെത്തിയപ്പോൾ പ്രേമചന്ദ്രന്‍റെ മനസും നിറഞ്ഞുകവിയുകയായിരുന്നു. ജോർജ് ജോസഫ് എന്ന അധ്യാപകന്‍റെ പേരും അദ്ദേഹത്തിന്‍റെ മകന്‍റെ പേരും മാത്രമാണ് പ്രേമചന്ദ്രന് അറിയാമായിരുന്നത്. കിട്ടിയ വിവരങ്ങൾ വച്ച് പല സ്ഥലങ്ങളിലും അന്വേഷണം നടത്തി. തന്‍റെ ജീവിതത്തിൽ അത്രമേൽ സ്വാധീനിച്ച വ്യക്തിയാണ് ജോർജ് ജോസഫ് സാറെന്ന് പ്രേമചന്ദ്രൻ പറയുന്നു. ഏറെ നാളത്തെ അന്വേഷണങ്ങൾക്ക് ശേഷമാണ് കാസർഗോഡ് ജില്ലയിലെ കല്ലംചിറ കെഐ എഎൽപി സ്കൂളിൽ 1977 കാലഘട്ടത്തിൽ അദ്ദേഹം മുഖ്യാധ്യാപകനായിരുന്നുവെന്ന് അറിയുന്നത്. ഇതിന്‍റെ ചുവടുപിടിച്ചുള്ള അന്വേഷണമാണ് ഒടുവിൽ പ്രേമചന്ദ്രനെ ജോർജ് സാറിന്‍റെ മക്കളുടെ അടുത്തും ഭീമനടിയിലുമെത്തിച്ചത്. ജോർജ് ജോസഫ് സാറിന്‍റെ ഓർമകൾ ഉറങ്ങുന്ന കല്ലംചിറ കെഐ എഎൽപി സ്‌കൂളും സാർ താമസിച്ചിരുന്ന വീടും കാണാനെത്തിയ പ്രേമചന്ദ്രൻ സാറിനോടുള്ള സ്നേഹസൂചകമായി സ്കൂളിലേക്ക് ഒരു സംഭാവനയും നല്കി. ജോർജ് സാറിന്‍റെ മക്കളുടെ വീടുകളിലുമെത്തി സ്നേഹബന്ധത്തിന്‍റെ തുടർച്ച ഉറപ്പാക്കിയാണ് മടങ്ങിയത്.

വനിത ഫുട്‌ബോളിനോട് അവഗണന: പി. മാളവിക

കാഞ്ഞങ്ങാട്: വനിത ഫുട്‌ബോളിനോടുള്ള അധികൃതരുടെ അവഗണന ഇപ്പോഴും തുടരുന്നുണ്ടെന്നും പുരുഷ ഫുട്‌ബോള്‍ താരങ്ങള്‍ക്കുള്ള സൗകര്യങ്ങള്‍ വനിത ഫുട്‌ബോള്‍ ടീമിന് ചിന്തിക്കാന്‍ പോലും കഴിയില്ലെന്നും ഇന്ത്യന്‍ ഫുട്‌ബോള്‍ താരം പി. മാളവിക. കാഞ്ഞങ്ങാട് പ്രസ് ഫോറത്തില്‍ നടന്ന മീറ്റ് ദി പ്രസില്‍ സംസാരിക്കുകയായിരുന്നു അവര്‍. ഇത്തവണ ഇന്ത്യന്‍ വനിത ടീം മികച്ച പ്രകടനത്തോടെ ചരിത്രത്തിലാദ്യമായി ഏഷ്യകപ്പിനുള്ള യോഗ്യത നേടാന്‍ കാരണമായതും അവഗണനയ്‌ക്കെതിരായ വാശിയോടെയുള്ള പോരാട്ടമാണ്. വനിതകള്‍ക്ക് പ്രഫഷണല്‍ ഫുട്‌ബോള്‍ ഒരു കരിയറായി എടുക്കാന്‍ സാധിക്കുന്ന സാഹചര്യമല്ല നിലവിലുള്ളത്. പരിക്കുപറ്റിയാല്‍ ഒരു പക്ഷേ കായികജീവിതം തന്നെ അവസാനിച്ചേക്കാം. അഞ്ചാംക്ലാസ് മുതല്‍ കാണുന്ന സ്വപ്‌നമാണ് ഇന്ത്യന്‍ ടീമിന്‍റെ ജഴ്‌സി അണിഞ്ഞതോടെ സഫലമായത്. 26 വര്‍ഷത്തിനുശേഷമാണ് ഇന്ത്യന്‍ ഫുട്‌ബോള്‍ ടീമില്‍ ഒരു മലയാളി പെണ്‍കുട്ടി ബൂട്ടണിയുന്നതെന്ന് എന്നത് ഏറെ അഭിമാനാര്‍ഹമായ നേട്ടമാണ്. വനിത ഫുട്‌ബോള്‍ ലീഗില്‍ തമിഴ്‌നാട് മധുരയിലെ സേതു എഫ്‌സിക്കായി നടത്തിയ മികച്ച പ്രകടനമാണ് ഇന്ത്യന്‍ ടീമിലേക്ക് വഴിതുറന്നത്. അത്യാവശ്യം ഹിന്ദി അറിയാമായിരുന്നതിനാല്‍ സഹകളിക്കാരുമായുള്ള ആശയവിനിമയം അത്ര ബുദ്ധിമുട്ടായിരുന്നില്ലെന്നും മാളവിക പറഞ്ഞു. സെപ്റ്റംബറില്‍ നടക്കുന്ന വനിത ഫുട്‌ബോള്‍ ലീഗില്‍ സേതു എഫ്‌സിക്കായി കളത്തിലിറങ്ങും. അടുത്തവര്‍ഷം ഓസ്‌ട്രേലിയയിലാണ് എഎഫ്‌സി ഫുട്‌ബോള്‍ ടൂര്‍ണമെന്‍റ് നടക്കുക. സ്വീകരണത്തിരക്കുകള്‍ക്കിടയിലും അടുത്ത ടൂര്‍ണമെന്‍റുകള്‍ക്കായുള്ള പരിശീലനത്തില്‍ മാളവിക യാതൊരു മുടക്കവും വരുത്തുന്നില്ല. പ്രസ്‌ഫോറം പ്രസിഡന്‍റ് ഫസലു റഹ്‌മാന്‍ ഉപഹാരം സമ്മാനിച്ചു.

ഓട്ടോറിക്ഷയുടെ മുകളിലേക്ക് മരംവീണ് ഡ്രൈവര്‍ക്ക് സാരമായ പരിക്ക്

മുള്ളേരിയ: ഓട്ടോറിക്ഷയുടെ മുകളിലേക്ക് മരംവീണ് ഡ്രൈവര്‍ക്ക് സാരമായ പരിക്ക്. ആദൂര്‍ സിഎ നഗറിലെ അബ്ദുള്ളക്കുഞ്ഞിക്കാണ് (42)പരിക്കേറ്റത്. ഇദ്ദേഹത്തിന്‍റെ കൈകാലുകള്‍ക്ക് ഒടിവുപറ്റി. ഇന്നലെ രാവിലെ എട്ടോടെ ചെര്‍ക്കള-ജാല്‍സൂര്‍ അന്തര്‍സംസ്ഥാനപാതയിലെ മുള്ളേരിയ ആലന്തടുക്ക ഇറക്കത്തിലാണ് അപകടമുണ്ടായത്. ആദൂരില്‍ നിന്നും മുള്ളേരിയിലേക്ക് പോവുകയായിരുന്ന ഓട്ടോയുടെ മുകളിലേക്ക് റോഡരികിലെ കൂറ്റന്‍ അക്കേഷ്യമരം കടപുഴകിവീഴുകയായിരുന്നു. ഓടിക്കൂടിയ നാട്ടുകാര്‍ കാസര്‍ഗോഡ് അഗ്‌നിരക്ഷാ സേനയെ വിവരമറിയിക്കുകയായിരുന്നു. സീനിയര്‍ ഫയര്‍ ആന്‍ഡ് റെസ്‌ക്യൂ ഓഫീസര്‍ വി.എം. സതീശന്‍റെ നേതൃത്വത്തില്‍ സേന എത്തി ഓട്ടോറിക്ഷയ്ക്ക് മുകളില്‍ വീണിരുന്ന മരം മുറിച്ചു നീക്കുകയായിരുന്നു. ഓട്ടോ പൂര്‍ണമായി തകര്‍ന്നുപോയി. അബ്ദുള്ളക്കുഞ്ഞിയെ നാട്ടുകാര്‍ വളരെ പണിപ്പെട്ടു പുറത്തെടുത്ത് തൊട്ടടുത്ത സ്വകാര്യ ആശുപത്രി ആശുപത്രിയില്‍ എത്തിക്കുകയായിരുന്നു. സേനാഗംങ്ങളായ ജിത്തു തോമസ്, കെ.വി. ജിതിന്‍ കൃഷ്ന‍, ഒ.കെ. പ്രജിത്ത്, വി.വി. ഉണ്ണികൃഷ്ണന്‍ എന്നിവര്‍ സംഘത്തില്‍ ഉണ്ടായിരുന്നു.

ഇ-മാലിന്യം ശേഖരിക്കാന്‍ ഹരിതകര്‍മസേന

കാഞ്ഞങ്ങാട്: ഇ-മാലിന്യം ഇനി തലവേദനയാകില്ല, മാത്രമല്ല കാശുമാക്കാം. വീടുകളില്‍ നിന്നും സ്ഥാപനങ്ങളില്‍നിന്നും വിലനല്‍കി ശേഖരിക്കാന്‍ ഒരുങ്ങുകയാണ് ഹരിതകര്‍മസേന. ഓരോ ഇനത്തിനും പ്രത്യേകം വിലനല്‍കിയാണ് ശേഖരിക്കുക തദ്ദേശവകുപ്പിന്‍റെ നേതൃത്വത്തിലുള്ള ഇ-മാലിന്യശേഖരണത്തിനുള്ള ഒരുക്കങ്ങള്‍ ജില്ലയില്‍ തുടങ്ങി. ആദ്യഘട്ടത്തില്‍ ജില്ലയിലെ നീലേശ്വരം, കാഞ്ഞങ്ങാട്, കാസര്‍ഗോഡ് നഗരസഭ പരിധിയിലെ വീടുകള്‍, സ്ഥാപനങ്ങള്‍ എന്നിവിടങ്ങളില്‍ നിന്നുമായിരിക്കും ഇ-മാലിന്യംശേഖരിക്കുക. 15 മുതല്‍ 31 വരെയാണ് കാമ്പയിന്‍ നടക്കുന്നത്. ഇതിനു മുന്നോടിയായി നഗരസഭാ ഉദ്യോഗസ്ഥരുടെ യോഗം ചേരുകയും തുടര്‍ന്ന് ഹരിത കര്‍മസേനയ്ക്ക് ക്ലീന്‍കേരളകമ്പനി പരിശീലനം നല്‍കുകയും ചെയ്തു. പുനഃചംക്രമണ സാധ്യമായവ, അപകടകരമായവ, ശേഖരിക്കുമ്പോഴും കൊണ്ടുപോകുമ്പോഴും പാലിക്കേണ്ട സുരക്ഷാമാനദണ്ഡങ്ങള്‍, ഇ-മാലിന്യത്തിന്‍റെ വില, ഭവിഷ്യത്തുകള്‍ എന്നിവ കേന്ദ്രീകരിച്ചാണ് പരിശീലനം നല്‍കിയത്. ഹരിതകര്‍മസേന ശേഖരിക്കുന്ന ഇ-മാലിന്യം ക്ലീന്‍കേരള കമ്പനിക്ക് നല്‍കുകയും കമ്പനി ഹരിതകര്‍മസേനയ്ക്ക് തുക കൈമാറുകയുംചെയ്യും. ക്ലീന്‍കേരള കഴിഞ്ഞ സാമ്പത്തികവര്‍ഷത്തില്‍ 59 ടണ്‍ പുനഃചംക്രമണമായ ഇ-മാലിന്യവും അപകടകരമായ 210 കിലോമാലിന്യവും ശേഖരിച്ചു. കാസര്‍ഗോഡ് നഗരസഭയില്‍ നെല്ലിക്കുന്നില്‍ നഗരസഭ ചെയര്‍മാന്‍ അബ്ബാസ് ബീഗവും നീലേശ്വരം നഗരസഭയില്‍ ചിറപ്പുറത്ത് നഗരസഭ ചെയര്‍പേഴ്സണ്‍ ടി.വി. ശാന്തയും കാഞ്ഞങ്ങാട് നഗരസഭാതല ഉദ്ഘാടനം ആലാമിപ്പള്ളിയില്‍ നഗരസഭ ചെയര്‍പേഴ്സണ്‍ കെ.വി. സുജാതയും ഉദ്ഘാടനം നിര്‍വ്വഹിച്ചു.

സഹകരണപ്രസ്ഥാനം സാധാരണക്കാരുടെ അത്താണി: രമേശ് ചെന്നിത്തല

കാഞ്ഞങ്ങാട്: കേരളത്തിലെ സഹകരണപ്രസ്ഥാനം സാധാരണക്കാരുടെ ജീവിതത്തില്‍ എന്നും സ്ഥാനം പിടിച്ച ഒരു മേഖലയും സാധാരണക്കാര്‍ക്ക് അവരുടെ സാമ്പത്തിക ആവശ്യങ്ങള്‍ പെട്ടെന്ന് നിറവേറ്റുന്നതിന് സമീപിക്കാന്‍ പറ്റുന്ന ഒരു സ്ഥാപനമാണെന്നും മുന്‍ പ്രതിപക്ഷനേതാവ് രമേശ് ചെന്നിത്തല. കോട്ടച്ചേരി കോ-ഓപ്പറേറ്റീവ് മാര്‍ക്കറ്റിംഗ് സൊസൈറ്റിയുടെ പുതിയ ബഹുനില കെട്ടിടത്തിന്‍റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. സംഘം പ്രസിഡന്‍റ് കുഞ്ഞിരാമന്‍ അയ്യങ്കാവ് അധ്യക്ഷതവഹിച്ചു. എം. ലത, എം. ശോഭന, പി.കെ. ഫൈസല്‍, വി. ചന്ദ്രന്‍. പി. ലോഹിതാക്ഷന്‍, പി.കെ. ജനീഷ്, കെ. നീലകണ്ഠന്‍, പി.വി. സുരേഷ്, എം. രാഘവന്‍, കെ.വി. ഗോപാലന്‍, വി. കമ്മാരന്‍, ശങ്കരന്‍ വാഴക്കോട്, എം. അസൈനാര്‍, കെ. രാജ്‌മോഹന്‍, കെ.വി. കൃഷ്ണന്‍, സി.ഇ.ജ യന്‍, കെ.വി. വിശ്വനാഥന്‍, കെ. ബാലകൃഷ്ണന്‍ നായര്‍, രവീന്ദ്രന്‍ ചേടിറോഡ്, നാരായണന്‍ വയമ്പ്, കെ. അനിത.നസീമ അബ്ദുള്ള എന്നിവര്‍ സംസാരിച്ചു. വേലിക്കോത്ത് അസൈനാര്‍ ഹാജി സ്വാഗതവും പി. ബാലകൃഷ്ണന്‍ നന്ദിയും പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]