പുനലൂർ: ഉപജില്ലാ സ്കൂൾ കലോത്സവം സമാപിച്ചു.ബഹുജന പങ്കാളിത്തത്തോടെ നിറഞ്ഞ വേദികളിലായിരുന്നു നാലു ദിവസങ്ങളിലും കലോത്സവം നടന്നത്. പുനലൂർ സെന്റ് ഗൊരേറ്റി ഹയർ സെക്കൻഡറി സ്കൂൾ , സെന്റ് ജോൺസ് എൽപി സ്കൂൾ എന്നിവിടങ്ങളിൽ ക്രമീകരിച്ച അഞ്ചു വേദികളിലായാണ് കലാ മത്സരങ്ങൾ നടന്നത്.
കലോത്സവത്തിന്‍റെ സമാപനം പുനലൂർ നഗരസഭാ വൈസ് ചെയർമാൻ വി.പി.ഉണ്ണികൃഷ്ണൻ അധ്യക്ഷനായ ചടങ്ങിൽ പുനലൂർ നഗരസഭാ ചെയർപേഴ്സൺ നിമ്മിഎബ്രഹാം ഉദ്ഘാടനം ചെയ്തു. കലോത്സവ റിസപ്ഷൻ കമ്മിറ്റി ചെയർമാനും നഗരസഭാ ക്ഷേമകാര്യ സ്റ്റാൻഡിങ് കമ്മിറ്റി ചെയർമാനുമായ അനസ്, ഗ്രാമപഞ്ചായത്ത് പ്രസിഡന്‍റുമാരായ ആർ ജയൻ, സുജ തോമസ്, അദബിയ നാസറുദ്ദീൻ, കെ. ശശിധരൻ, എസ്.തുളസി, ബ്ലോക്ക് പ്രോഗ്രാം കോഡിനേറ്റർ ജി. ബിജു, പ്രോഗ്രാം കമ്മിറ്റി ചെയർമാൻ എസ്. ശ്രീഹരി, സെന്റ് ജോൺസ് എൽപിഎസ് പിടിഎ പ്രസിഡന്‍റ് സനിൽകുമാർ, പ്രോഗ്രാം കമ്മിറ്റി കൺവീനർ ബിജു തങ്കച്ചൻ , തുടങ്ങിയവർ പങ്കെടുത്തു. ഉപജില്ലാ വിദ്യാഭ്യാസ ഓഫീസർ ഡി.അജയകുമാർ വിജയികൾക്കുള്ള സമ്മാനങ്ങൾ വിതരണം ചെയ്തു.
എൽപി വിഭാഗത്തിൽ കമുകുംചേരി ന്യൂ എൽപിഎസ്, കുന്നിക്കോട് പി.ആർ. എൻ.എം പബ്ലിക് സ്കൂൾ എന്നീ സ്കൂളുകൾ ഓവറോൾ പങ്കിട്ടു. തൊളിക്കോട് എൽപിഎസ്, പത്തനാപുരം മദർ സൂസൻ മെമ്മോറിയൽ എൽപിഎസ് എന്നീ സ്കൂളുകൾ രണ്ടാം സ്ഥാനം പങ്കിട്ടു. യു. പി. വിഭാഗത്തിൽ ആവണീശ്വരം എ. പി.പി.എം വി. എച്ച്.എസ്. എസ് ഓവറോൾ നേടി. പുനലൂർ ഗേൾസ് ഹൈസ്കൂൾ രണ്ടാം സ്ഥാനത്തെത്തി.
എച്ച്. എസ് വിഭാഗത്തിൽ പുനലൂർ സെന്‍റ്് ഗൊരേറ്റി എച്ച്.എസ്. എസ് ഓവറോൾ നേടിയപ്പോൾ പുനലൂർ ഗേൾസ് ഹൈസ്കൂൾ, വാളക്കോട് എൻ.എസ്.വി എച്ച്. എസ്.എസ് എന്നീ സ്കൂളുകൾ രണ്ടാം സ്ഥാനത്തെത്തി.ഹയർ സെക്കൻഡറി വിഭാഗത്തിൽ പുനലൂർ ഗവ. എച്ച്.എസ്. എസ് ഓവറോൾ നേടി. സെന്റ് തോമസ് എച്ച്എസ്എസാണ് രണ്ടാം സ്ഥാനത്ത്. അറബി കലോത്സവത്തിൽ പത്തനാപുരം എം.ടി. എൽ പി സ്കൂൾ ഓവറോൾ നേടി. ഡിബിയുപി.എസ് വിളക്കുടിയാണ് യുപി വിഭാഗത്തിൽ ഓവറോൾ നേടിയത്.
ഹൈസ്കൂൾ വിഭാഗത്തിൽ സെന്റ് ഗൊരേറ്റി എച്ച്. എസ്. എസാണ് ഓവറോൾ നേടിയത്.സംസ്കൃതോൽസവത്തിൽ യു. പി. വിഭാഗത്തിൽ കറവൂർ പി.എൻ.കെ.എം യു. പി.എസ്, ആര്യങ്കാവ് സെന്റ് മേരിസ് യു.പി.എസ് എന്നിവർ ഓവറോൾ പങ്കിട്ടു. ഹൈസ്കൂൾ വിഭാഗത്തിൽ ആവണീശ്വരം എ.പി.പി.എം വി.എച്ച്. എസ്. എസ് ഓവറോൾ നേടി.