ൊകൊട്ടാരക്കര: ഉൽപന്നങ്ങളുടെ വൈവിധ്യം കൊണ്ടും ജനപങ്കാളിത്തം കൊണ്ടും കാർഷികമേളയായി മാറി പള്ളിയിലെ ആദ്യ ഫല സാധനശേഖരണ ശുശ്രൂഷ. കൊട്ടാരക്കര തൃക്കണ്ണാ മംഗൽ ശാലോം മാർത്തോമ്മ പള്ളിയിലാണ് പരമ്പരാഗതമായി നടന്നു വരുന്ന ഈ ആദ്യഫല ശുശ്രൂഷ. പള്ളിയുടെ പ്രവർത്തനങ്ങൾക്കും ഇടവകയിലെ സേവന പ്രവർത്തനങ്ങൾക്കുമായാണ് ഇതിൽ നിന്നും ലഭിക്കുന്ന വരുമാനം വിനിയോഗിച്ചു വരുന്നത്.
ശാലോം മാർത്തോമ്മ ഇടവക സ്ഥാപിതമായപ്പോൾ തുടങ്ങിയതാണ് ആദ്യഫല ശുശ്രൂഷ.എല്ലാ വർഷവും നവംബറിലാണ് ഇത് നടന്നു വരുന്നത്. ഇടവകയിലെ എല്ലാ കുടുംബങ്ങളും കാർഷിക വിളകളുടെ ആദ്യ ഫലങ്ങളും വളർത്തു പക്ഷികളെയും മൃഗങ്ങളെയും ഈ ദിവസം പള്ളിക്കു സമർപ്പിക്കുന്നു. ഇത് വിശ്വാസികൾ ലേലം വിളിച്ച് സ്വന്തമാക്കും. യഥാർഥ വിലയുടെ മൂന്നും നാലും ഇരട്ടി വിലക്കായിരിക്കും ലേലം പിടിക്കുക. കൂറും വിശ്വാസവുമാണ് അധികവിലക്ക് ലേലം കൊള്ളാൻ കാരണം.
കാർഷിക വിളകളായ ചേന, ചേമ്പ്, കാച്ചിൽ, ചീനി, പച്ചമുളക്, കുരുമുളക്, കപ്പക്കാ, കരിക്ക്, വാഴക്കുല, ഇഞ്ചി, മഞ്ഞൾ, കൂവ, പഴവർഗങ്ങൾ, പയറ് തുടങ്ങിയവയോടൊപ്പം ആട്, പശു, കോഴി, താറാവ്, മുയൽ തുടങ്ങിയവയും ആദ്യ ഫല ശുശ്രൂഷ നാളിൽ പള്ളിയിലെത്തിച്ചേരുന്നു. കാർഷിക വിളകൾ കുറഞ്ഞതോടെ പകരം വന്ന റബറും ഈ ദിവസം പള്ളിയിലെത്തും.
ആദ്യം ഒറ്റ ദിവസം കൊണ്ടു നടന്നു വന്നിരുന്ന ഈ ഫല ശുശ്രൂഷ, തിരക്കു വർധിച്ചതോടെ ഇപ്പോൾ മൂന്നു ദിവസമായാണ് നടത്തുന്നത്. ആറ് ഭക്തസംഘടനകളിൽ രണ്ട് സംഘടനകൾക്ക് രണ്ടാഴ്ച നൽകിക്കൊണ്ടാണ് മൂന്നു ദിവസമായി നടത്തി വരുന്നത്. എല്ലാ കൃഷിയുടെയും ആദ്യഫലം പള്ളിക്കെന്നത് ഇപ്പോൾ എന്തിന്റേയും ഒരു പങ്ക് പള്ളിക്കെന്നതിലേക്ക് മാറ്റിയിരിക്കുകയാണ് വിശ്വാസ സമൂഹം. ഉൽപന്നങ്ങളെത്തിച്ചവർക്ക് പള്ളിക്ക് നൽകിയെന്ന വിശ്വാസം. വൻ വിലയ്ക്ക് ലേലം കൊണ്ടവർക്കും പള്ളിക്ക് നൽകിയെന്ന ആശ്വാസം. എന്തായാലും ഒരു കാർഷിക മേളക്ക് സമാനമായി മാറുകയാണ് ശാലോം പളളിയിലെ ആദ്യ ഫല ശുശ്രൂഷ. ഈ വർഷത്തെ അദ്യ ഫല ശുശ്രൂഷക്ക് ഇടവക വികാരി ഫാ. റജിസഖറിയ, ട്രസ്റ്റി ജേക്കബ് സാം, സെക്രട്ടറി അനിൽ കൊച്ചു കിഴക്കേതിൽ, സി തോമസ് എന്നിവർ നേതൃത്വം നൽകി.
സ്പോട്ട് അഡ്മിഷന് ഇന്ന്
കൊല്ലം: ഭൂതക്കുളം ചെമ്പകശേരി എയ്ഡഡ് ടി.ടി.ഐയില് 2022-24 വര്ഷത്തെ ഡി.എല്.എഡ് കോഴ്സില് ഒഴിവുള്ള സീറ്റുകളിലേക്ക് (സര്ക്കാര് എയ്ഡഡ്) ഇന്ന് രാവിലെ 10.30 ന് റാങ്ക് ലിസ്റ്റിന്റെ മുന്ഗണനാക്രമമനുസരിച്ച് വിദ്യാഭ്യാസ ഉപഡയറക്ടറുടെ കാര്യാലയത്തില് സ്പോട്ട് അഡ്മിഷന് നടത്തും. സയന്സ് വിഭാഗത്തില് മൂന്ന് ഒഴിവും ഹ്യുമാനിറ്റീസ്, കൊമേഴ്സ് വിഭാഗങ്ങളില് രണ്ട് ഒഴിവുകള് വീതവുമാണുള്ളത്. വിദ്യാര്ഥികള് അസല് സര്ട്ടിഫിക്കറ്റുകളുമായി എത്തണം. ഫോണ്: 0474 2792957.